লূক 20
20
আস্যাং যীশুনা কেইংছারা গংখ্যুকরো
(মথি ২১:২৩-২৭; মার্ক ১১:২৭-৩৩)
1-2তারাক যীশু ওয়িপাসানা ক্যংমা লুঃউরোগো সুয়েংসাং পিইরো তাড়া হঃলিইরি। য়াং আখিংমা ফুংগ্রিই গংখ্যুকরোনা কেইং ছারারোচা ওয়াগ্রিইরোগো য়ুউ লাঃরো যীশুগো প্রগেলিইরি, “যা তাওয়েংনা নাং দিঃ অলুককো লুকতিলি অর যাসুউ দিঃ তাওয়েংগো নাককো পিইরিলি, য়াংচা ঙারোগো প্রঃ।”
3আফ্রিমা যীশু য়াংসুউরোগো প্রলিইরি, “ঙালি কোবাংরোগো চাঃগা তুখুয়েং মিংফু। প্রনা ক্রিমি, 4রিঃঙুক মাঙ্গালা পিইফু তাওয়েং যোহনচা থাওরা ফুরাগা হ্রালিই লঃ, মুহুককি লুঃউগারা হ্রারি লঃ?”
5য়াংখা য়াংসুউরো কুরো কুরো তৈংবাংগেলিচাগা, “ঙারো জং প্রগিনা, ‘থাওরা ফুরাগা,’ য়জংছুগি য়াংসুউ প্রফুব্যা, ‘য়জংছুগি য়াংসুউগো যাফু মক্যুংগেলিলি?’ 6দিঃপুয়েং প্রগিনা, ‘লুঃউগা রাঃরি,’ য়জংছুগি লুঃউরো ঙারোগো ক্যকখিয়ি বয়ফুব্যা, আক্রংগা য়াংসুউরো যোহনগো আক্রা আম্রাং লুঃউছুরো ক্যুংগেতি।”
7য়জংকিজু য়াংসুউরো প্রগেলিরি, “য়াং তাওয়েং যাগা হ্রারিলি, ঙারো মিঃসি।”
8যীশু য়াংসুউরোগো প্রলিরি, “য়জংছুগি ঙালি মঃপ্র, যা তাওয়েংনা ঙা দিঃচারোগো লুকতিলি।”
চব্য ওয়া য়ইং লুকসামা ওয়েথুক
(মথি ২১:৩৩-৪৬; মার্ক ১২:১-১২)
9য়াংনক যীশু লুঃউরোগো সুয়েংসাং পিইফু আতুওয়ক দিঃ চাঃগাগো প্রলিরি, লুঃউ তয়কচা চব্য তাখাং লুকলিরি অর লুকসামারো আলাকমা বাক্কা পিইরো রাকম্যা আক্রা আতুওয়ক নেংঙেংখ্রাদুঃ লাঃখারি। 10নক্কা ইংস্যাংচা য়াং চব্যখাংগা চব্যসিই আঃফু রাঃফু কিজু আখিং আতৈং, ক্যুয়েং তয়ককো লুকসামারোদুঃ রুওয়েলৈতি। ছুগি লুকসামারোচা য়াংসুউগো বুকসেঃরো আলাক আলেঃনা প্রেং রুওয়েলৈতি। 11য়াংতাফাক্কা অর তয়ক ক্যুয়েংগো রুওয়েলৈতি, য়িখালি লুকসাচারোচা য়াংসুউগোলি বুকসেঃরো আহ্রাক পিইরো আলাক আলেঃনা প্রেং রুওয়েলৈতি। 12য়াংনক তাদিয়া ক্যুয়েং তয়ককো রুওরেলৈতি, য়াংখালি লুকসামারোচা য়াংসুউগোলি কংগং বুকসেঃরো লৈই রুওয়েলৈতি।
13“য়াংখা চব্য খাং ইংস্যাংচা প্রলিরি, ‘যা লুকরাফুলি? আচ্ছা, ঙা ঙাকমা সাঃখ্যকো রুওয়েফু। য়ল্হকমিগি য়াংসুউরো সাঃগো ম্যাকন্হা পিগেমি।’
14“ছুগি লুকচাসারোচা য়াং সাঃগো ম্রাংরো প্রগেলিইরি, ‘দিঃসুগা নক্কা দিঃ উচ্চারোমা আস্যাং ফ্রইফুদিঃ। উচ্চরোচা ঙারোচা ফ্রইঅং লাঃ, ঙারো দিঃসুউগো সেঃবলৈকেমি।’ 15দিঃ চাঃগা প্ররো য়াংসুউরো, য়াং সাঃগো তিঃরো চব্যখাং প্রাংগা য়ুউ লাঃরো সেঃবলৈকেতি।
“অাগো চব্যখাং ইংস্যাংচা থুউ লুকচাসারোগো যা প্যাংফুলি? 16ইংস্যাংচা লাঃরো য়াংসুউরোগো সেঃবলৈফু অর চব্যখাংগো অরতয়ক আলাকমা লাগায়য়া পিইফু।”
লুঃউরোচা যীশু চাঃগাগো ক্রারো প্রগেলিরি, “য়জংজে মফ্রপাগি।”
17য়াংখা যীশু য়াংসুউরোদুঃ ক্রিরো প্রলিরি, “য়িগি দিঃ চাঃগাচা সেংস্যাংস কেইং চাউমা রুইরো হিকচাগা, ‘উক ইং লুকসামারো যা ক্যকগো মুসুংগেলিইলি, য়াংচাচা কংগং আলুহিক ক্যক ফ্রইলিরি’- দিঃ চাঃগা আদিপিচা যালিঃ? 18খ্যাংসুউমুছু য়াং ক্যক আথাকমা ক্যাগি, য়াংসুউচা থুঃউংবওয়েং ফ্রই লাঃফু অর যাসুউ আথাকমা য়াং ক্যক ক্যাফু, য়াংসুউচা জুমুদারা ফ্রইলাঃফু।”
19য়াং আখিংমা কেইং ছারারোনা পুরোহিত গংখ্যুকরোচা যীশুগো তিঃফু ক্রিগেলিরি, আক্রংগা য়াংসুউরো নাঃলিগেলিচাগা, থুউ চাঃগারোচা য়াংসুউরোগো ছেংগ্যাংফাক লুঃউকরো প্ররি; য়িগিলি য়াংসুউরো লুঃউরোগো ক্রককেলিরি।
ফাইংদা ককচা আক্রং
(মথি ২২:১৫-২২; মার্ক ১২:১৩-১৭)
20কেইং ছারারোনা পুরোহিত গংখ্যুকরোচা যীশুগো ম্যাকচি খ্যা থাঃগেলিরি অর লুঃউ স্যুও রুওয়েলৈতি। যীশুগো কোঃ চাঃগানা কোঃ আপ্রই ক্যাফু কিজু, থুউ স্যুওরোচা লুঃউগং খেংগেলিরি, যাফুলিছুগি য়াংসুউরো যীশুগো ওকখ্যুকগ্রি সাসানা পিইসু আলাকমা তাঃরা চৈফু আলি রালৈইঅং। 21য়জংকিজু য়াংসুউরো যীশুগো প্রগেলিরি, “ছারা, ঙারো সিকচাগা, কোবাং যা প্ররিলি অর লুকতিলি য়াংচা ম্হেংরি। কোবাংচা আলুংসুউগো তেজেতৈং ম্যাকন্হা পিইরি অর আম্হেং প্যাংরো থাওরা ফুরা ঈ লেং আক্রংগো সুয়েংসাং পিইরি। 22হুত্তি, মোশি পুয়েংঞেচা আলৈই, রোম সিঃথিগো ফেংদা পিইসাং লঃ?”
23যীশু য়াংসুউরো পিরিয়েগো ম্রাংরো প্রলিরি, 24“ঙাগো মুয়ি টেংগা তাব্রা প্রা। দিঃ আথাকমা যাসুউ পুং অর নাঃমি হিকরিলিঃ?”
য়াংসুউরো প্রগেলিরি, “রোম সিঃথি।”
25যীশু য়াংসুউরোগো প্রলিরি, “য়জংছুগি যাচা সিঃথিচা য়াংচা সিঃথিগো পিই অর যাচা থাওরা ফুরাচা য়াংচা থাওরা ফুরাগো পিই।”
26লুঃউ হ্রিকথাকমা যীশু যা প্রলিরিলি, য়াং চাঃগানা থুউ স্যুওরোচা যীশুগো কোঃ চাঃগানা আপ্রই খ্যাফু মাঃরালি। যীশু আফ্রিমা এংঅরো য়াংসুউরো চিছিক ফ্রইকেলিরি।
হ্রাংলো থাঃফু আক্রং
(মথি ২২:২৩-৩৩; মার্ক ১২:১৮-২৭)
27সদ্দুকীরোগা লৈংগায়ক যীশুবাদুঃ লাঃগেলিরি। সদ্দুকীরো আস্যা আতৈং আঃসিইগা আহ্রাং ফ্রইতিছুরো তুখুউলি মিহি। য়াংসুউরো যীশুগো মিংগেলিরি, 28“ছারা, মোশি ঙারো কিজু দিঃ চাঃগা রুইরো বৈখারি, সাঃ-সিমিং মাঃরাব্রি, খ্যাংসুউমুছু মাঃয়াগো বৈরো সিই লাঃগি, য়াংখা য়াংসুউ ঞিং, কোঃ মিরিঃসিগো নেজেরো, আকোঃসিগা নিংরো কোঃ আচৈংগো থিংক্যংনৈংফু লঃ। 29কংগং কংরি, উপমা ফ্রইতিগা, ঞিংকো খঃনৈইয়ক হিকলিরি। পাথামা সুঃ মিঃয়া নেজেরো সাঃ-সিঃমি মাঃরাব্রি সিই লাঃখারি। 30-31নক্কা তুদিয়ানা তাদিয়া ঞিংচা থুউ মাছামাগো নেজেলিরি অর থুউচাঞ্যং তেথেংয় খন্হয়ক জুংসু সাঃ-সিমিং মাঃরাব্রি সিই লাঃখারি। 32আতুংমা য়াং মিঃমাচালি সিই লাঃখারি। 33য়জংছুগি যানিং আসিইরো হ্রাং থাঃফুলিঃ, য়াংনিং থুউ মিঃমাচা যাসু মাঃয়া ফ্রইফুলিঃ? খন্হয়ক জুংগা য়াংসুউগো নেজেকেরি।”
34যীশু য়াংসুউরোগো প্রলিরি, “দিঃ খঃমা লুঃউরোরা মাঃয়া নেজেতি অর য়াংসুউরোগো মাঃয়া পেজেতি। 35ছুগি আসিইগা আহ্রাং ফ্রইরো, লাঃরি খঃকো বৈ লাঃফু থঃতেংরি ছুরো যাসুরোগো কৈংফু, য়াংসুউরো মাঃয়ালি মাপেজে অর য়াংসুউরোগো মাঃয়ালি মানেজে। 36য়াংসুউরো অর মিসিইব্যা, আক্রংগা য়াংসুউরো সাগ্রা নেঃসানা তুউরি। য়াংসুউরো থাওরা ফুরা ঈ সাঃ আক্রংগা আসিইগা য়াংসুউরোগো আহ্রাং প্যাংলৈতি। 37মিং তকতি তঃ আখ্রুং আক্রংগো যাদেমা রুইরো হিকরি, য়াংদেমা মোশি প্রালিচাগা, আসিইরো আম্হেং হ্রাং থাঃরি। য়াংদেমা মোশি আস্যাংগো(ফুরাগো) ‘অব্রাহামমা থাওরা ফুরা, ইসহাকমা থাওরা ফুরা অর যাকোবমা থাওরা ফুরা’ ছুরো খঃলিকরি। 38ছুগি থাওরা ফুরাগা আসিইরোমা থাওরা ফুরা মুহুক, ফুরাগা আহ্রাংরোমা ফুরা। ফুরা ছেংদানারা আলুংসুউ হ্রাং হিকচা।”
39য়াংখা লৈংগায়ক কেইং ছারারো প্রগেলিরি, “ছারা, কোবাং আহ্লাপা প্রবারি।” 40য়াংসুউরো অর তুখুকমাসা যীশুগো মিংফু আংগেরিব্যা।
কেইং ছারারোবামা আস্যাং যীশু মিংখুওয়েং
(মথি ২২:৪১—২৩:৩৬; মার্ক ১২:৩৫-৪০; লূক ১১:৩৭-৫২)
41যীশু য়াং কেইং ছারারোগো প্রলিরি, লুঃউ দিঃপুয়েং প্রগেতি লঃ, মশীহচা দায়ুদ মাং আচৈং? 42-43সেংস্যাংস কেইং চাউমাগা দায়ুদ কোঃদৈং দিঃ চাঃগাগো প্রলিরি,
‘আস্যাং ঙাক আস্যাংগো প্রলিরি,
মন্হক তয়ং ঙা নাক রেংসুউরোগো
নাক ফুওয়া অক্কা মাঃথালি,
য়ল্হক তৈঅং নাং ঙাক ঞাফাক্কা থইং।’
44দায়ুদগা মশীহগো আস্যাংছুরো খঃলিইরি; য়জংছুগি মশীহ যাপুয়েং প্যাংলো দায়ুদ মাং আচৈং ফ্রইনৈংলি?
45লুঃউরো যাখা যীশু চাঃগা নাঃথংগেতি, য়াংখা যীশু কোঃ তিবিরোগো প্রলিরি, 46“কেইংছারারোগো য়ুউরো সিঃদিক রেঃকে। য়াংসুউরো আংগি আহ্রি আহ্রি ওয়েরো লিঃপেনিংফু ক্রিরি অর জিই-ক্রংমা ম্যান্হা রাঃফুগো সাঃয়ারি। য়াংসুউরো তাঃরা চেঃরেমা আম্রাং আম্রাং থৈংরানা চাঃখিংখা ম্যাকন্হাহিক আঃরামা থৈংফু সাঃয়ারি। 47তাজাগা য়াংসুউরো লুঃউরোগো প্রাফু কিজু আরি আরি ছুক তংরি, অর তাজাগা মাছামারো উচ্চাগো সিংরি। দিঃ লুঃউচা ডেং কংগং আম্যা রাঃফু।”
Currently Selected:
লূক 20: BBSRMZ
Highlight
Share
Copy
Want to have your highlights saved across all your devices? Sign up or sign in
