লূক 2
2
আস্যাং যীশু খ্রীট মুওয়িং ফুওয়াঃখ্রাং
1য়াং আখ্যিংমা আস্যাং মাং আগস্ত কৈসর য়াংসুউ প্রিমা লুঃউ আলুংসুউগো নাঃমি রুইফো আতুওয়ক আনা খ্যালিরে। 2সুরি প্রিমা আমায় কুরেনি লাথামা দিঃচা পাথমা লুঃউরোগো রুইফো কিজু নামি চারাং তাংলিরে। 3নামি রুইফো কিজু আলুঃউংসু কো মি মি রওয়াদো লাগায়লিরে।
4-6যোসেব হিকলিরি দায়ুদ মাং আচৈংমা লুঃউঃও। মাং দায়ুদ ম্যুইংচা আঃরা ফ্রইতি, যিহুদিয়া প্রিনি বৈৎলেহম রুওয়ামা। য়জংকিজু যোসেফ নাঃমি রুইফু কিজু গালীল প্রিনিমা নাসরত রুওয়াগা বৈৎলেহম রুওয়াদুঃ লাঃখারি। মরিয়মলি য়াংসুউনা আতু লাঃলিইরি। দিঃ মিঃমানা যোসেফ নেঃজেফু চাঃগা ফ্রঃ হিকলিরি। য়াং আখিংমা মরিয়মচা কুঃওয়েংসি হিকলিরি অর বৈৎলেহমমা হিকলিইরিখা, য়াংসুউ সাঃআ ম্যুইফু আখিং ফ্রলিরি। 7য়াংদে মরিয়মমা পাঃথামা সাঃআচা ফুওয়ালিইরি য়াংখা য়াংসুউ সাঃআগো আওয়ে রঅরো নুওয়াজা পিঃচা আঃরামা থিঃই থালৈতি। আক্রংগা য়াংসুউরো প্রাংগা ওয়িইফু তিঃখুওখেংমা নিংরা মিহিকলি।
গংখাং তেমেংদনা নুওয়া ক্যংসারো
8বৈৎলেহম নেং প্রাংমা ঞিই ছুয়িইক্যংসারো, সাংফ ছুয়িইকো চংরো হিকলিইরি। 9য়াং আখিংমা আস্যাং তেমেংদ তয়কচা ব্রুংখুনইং প্যাংরো য়াংসুউরো হ্রিইগা রকরিলি। য়াংখা আস্যাং রংখ্রেদঃচা য়াংসুউরো লিঃফাকলাকচি লালাং ফ্রলিইরি। য়াংচাগো ম্রাংরো ছুয়ি ক্যংসারোচা ক্রককেলিরি।
10গংখাং তেমেংদ য়াংসুউরোগো প্রলিইরি, “মক্রককি আক্রংগা ঙা নাংরোগো কংগং তুখু আপ্য তাঃরা য়ুলাঃরি। দিঃ আপ্য তাঃরাচা আলুংসুউ কিজু। 11গিনি দায়ুদ রুওয়ামা, নাংরোগো ক্যুওয়েম্রক পিইসা ফুওয়ারি। য়াংসুউ আস্যাং, য়াংসুউ মশীহ। 12দিঃ চাঃগাচা আম্হেং, য়াংচা লাকখানা ফ্রইতিচা-নাংরো আওয়ে রঃলো অর নুওয়াজা পিইচা আঃরামা আঃশ্যি তয়ক ম্রাংলিইমি।”
13য়াং আখিংমা থুউ গংখাং তেমেংদনা আতু ব্রুংখুনেং প্যাংরো অরলি আম্যা তেমেংদ রককেলিরি। য়াংসুউরো থাওরা ফুরাগো খিম্যুয়েংগেলিরি,
14“গংখাং ফুংমা থাওরা ফোরাস্যাংমা ফুং ক্রিইবাজিই,
দিঃকাবামা যাসুউরো আঃপমা ফুরাস্যাং কোচি সায়ারেলে
য়াংসুউরো ঙ্রিং খ্যাইংসাগো রালিইজিই।”
15গংখাং তেমেংদরো য়াংসুউরোগা গংখাং ফুংদুঃ তাকপ্রিনক, ছুয়িই ক্যংসারো তয়ককো তয়ক প্রগেলিইরি, “লাঃ, ঙারো বৈৎলেহমদুঃ লাঃগেমি অর যা প্রাসানা চাঃগা আস্যাং ঙারোগো প্রলিরি, য়াংচাগো লাঃলো ক্রিগেমি।”
16য়াংসুউরো আয়াং লাঃরো মরিয়ম, যোসেফ অর নুওয়া চাঃচাআ আঃরামা য়াং আশ্যিগো রাঃআ থুককেরি। 17য়াংসুউরোবামা য়াং আশ্যিগো য়ুউরো যা আক্রংলিলাগো আঃসিক পিইলিইরি, আশ্যিগো ম্রাংব্রিনক, য়াংসুউরো য়াংচাগো প্রগেলিইরি। 18ছুয়িই ক্যংসা চাঃগারোগো ক্রারো, আলুংসুউ এংঅগেলিরি। 19য়িগিলি মরিয়মচা আলুংচাগো চিঃকমা ম্হে থলৈতি। 20গংখাং তেমেংদরো ছুয়িই ক্যংসারোবামা যা প্রপ্রালিরি, য়াংচাঞ্যং তেথেং ম্রাংগেলিরি অর ক্রাগেলিরি। য়াংচাকিজু য়াংসুউরো থাওরা ফুরাগো খিম্যুওয়েংলো প্রেং লাঃখাগেতি।
21ম্যুইংরো স্যরাক নক যিহুদিরো আক্যাং আঃল, যাখা আশ্যিগো জেঃম্রকআখিং ফ্রইরি, য়াংখা য়াংসুউগো নাঃমি থাঃলিচাগা যীশু। আঃমিঃ ওয়েংথিমা পিদিসেংথি মিতিখাং হ্রিইগা, সাগ্রা নেঃসাচা দিঃ নাঃমিগো পিইলিইরি।
ওয়িপাসা ইং আথিমা যীশু
22য়াং নক মোশি পৈংঞে আতৈং, য়াংসুউরো সেংস্যাংস ফ্রঃফু আখিং ফ্রঃলিরি। য়াংখা যোসেফনা মরিয়মচা যীশুগো থাওরা ফুরা হ্রিইগা য়ুউ লাঃফু কিজু য়াংসুউগো যিরুশালেম ম্রুদুঃ য়ুউলাঃখারি। 23যাফুলিছুগি থাওরা ফুরা পৈংঞেচা রুইরো হিরি, “পাথামা ম্যুইংচা, তয়ক মক্যুয়েং য়কক্যাগো আস্যাংছুরো ম্হেরাফু।” 24দিঃচাগো মুহুকপ্রিলি, “ন্হইকং গ্রুও য়াংচা মুহুকিলি ন্হইকং খঃঅ সাঃআ” ল্হুউরাফু চাঃগাচা যা পুয়েং থাওরা ফুরা থুংজৈংমা রুইরো হিলি, য়াং পুয়েং য়াংসুউরো য়াংচাগো ল্হুউফু লাঃখাগেতি।
25-26য়াংখা যিরুশালেংমা শিমিয়োন নাঃমিনা তয়ক সুদগং অর ফোরা রুসিইসা হিকলিইরি। থাওরা ফোরা যাখা ইস্রায়েলীরোগো দুঃখাওয়াগা খ্যুওয়েফুলি, য়াং আখিংগো চংরো হিকলিরি। সেংস্যাংস ওয়িঞেংচা য়াংসুউগো খ্যুকরো হিকলিরি অর য়াংসুউবামা প্রালিরিচাগা, সিইফু হ্রিইগা, য়াংসুউ থাওরা ফুরা ঈ য়াং মশীহগো ম্রাংরাফু।
27য়াক রাকনিং শিমিয়োনগো সেংস্যাংস ওয়েঞেং ছংরো ওয়িপাসানা ক্যংদুঃ য়ুলালিরি। মোশি থুংজৈং আঃল যা যা লুকরাফুলি, য়াংচা লূকফু কিজু যীমু আঃমিক আফাচা আশ্যি যীশুগো য়ুউরো য়াংদুঃ লাঃগেলিইরি। 28য়াংখা শিমিয়োনচা য়াং আশ্যিগো রইখুওয়ংমা য়ুউলিইরি অর থাওরা ফুরাগো খিম্যুয়েংরো প্রলিইরি,
29“ফুরাস্যাং, কোবাং কোবাং চাঃগা আঃল, কোবাং ক্যুয়েংগো
আগো চিক আখেংসানা রুওয়েতি,
30-31আক্রংগা লুঃউরোগো আপ্রইকা খ্যুওয়েম্রকফু কিজু
হিচা আলুংসুউ লুঃউ হ্রিথাকমা
কোবাং যা লুকলিইরিলি,
ঙা য়াংচাগো আম্রাং রাঃলিইরি।
32আখ্রা লুঃউম্যুও জেঃবামা দিঃচা লেং প্রাফুচা আরং,
অর কোবাং ইস্রায়েল জেঃ ম্যুওবামা
খিম্যুয়েংফু আক্রংলিলা ফ্রইতি।”
33শ্শিমিয়োন আশ্যিগো য়ুউরো যা আক্রংলিলা চাঃগা প্রলিইরিলি, য়াংচাগো ক্রারো মিখাং ফাখাংচা কংগং এংঅগেলিরি। 34য়াংনক শিমিয়োনচা য়াংসুউরোগো ছুউক পিইলিইরি অর যীশু মিখাং মরিয়মগো প্রলিইরি, “থাওরা ফুরাচা আঃদিথেং প্রুচাগা, দিঃ আশ্যি কিজু ইস্রায়েললিয়রো আতুওয়ংগা লৈগায়ক লুঃউ প্যাকফু অর লৈগায়ক লুঃউ আক্যুওয়ে তাঃরা রাঃফু। দিঃ আশ্যিচা প্রফুচাঞ্যং লাকখানা তুখু ফ্রফু, যাসুউগো ছেগ্যাংফাক লুকরো, আম্যা লুঃউ চাঃগা প্রলিইমি। 35য়জং কিজু য়াংসুউরো চিইমা চেংযাখ্রাং রকলিমি। দিঃচাগো আপিলি দাঃশ্যি থুঅং পুয়েং চিইমা দুঃখাওয়া রকমি।”
36-37য়াং আখিংমা হান্না খঃরো আক্রা আম্রাং ঞেংহিকসামা তয়ক হিকলিরি। য়াংসুউচা আশের আচৈংমা পনূয়েল সিঃমি। য়াংসুউচা ওয়াগ্রিমা ফ্রইব্যা। খঃন্হন্হ পেলুং লাংনা নিংব্রিইনক স্যইছি লিঃন্হ পেলুং মিকছুমা ফ্রইরো নিংলিরি। ওয়িইপাসানা ক্যংগো বৈরো, য়াংসুউ তাখালি তেরেপাংদুঃ মাঃলা প্রফুছুগি ওয়িইপাসানা ছুউকতং রাক নিক থাওরা ফুরাগো রুসিই প্যাংরো নিংলিরি। 38য়াংসুউলি য়াং আখিংমা, য়াং আঃরাদুঃ লাঃরো থাওরা ফুরাওগা খিম্যুয়েংলিরি অর থাওরা ফুরা যিরুশালেমগো খ্যুওয়েম্রকফু কিজু যাসুরো চংনিগেতি, য়াংসুউরোবামা য়াং অাশ্যিচা চাঃগা প্রলিরি।
39ফুরা পৈংঞে্ আলুংচা লুকপ্রিনক মরিয়মনা যোসেফচা গালীলদুঃ, য়াংসুউরো রুওয়া নাসরতদুঃ প্রেং লাঃগেলিইরি। 40আশ্যি যীশুচা আসাক ক্রিই তাকরো ছিদেং ছিআঃ ফ্রলিরি অর পুয়েংঞামা আব্রিচুং ফ্রলিইরি। য়াংসুউ আঃপমাগা ফুরাস্যাং ছুউক হিকলিরি।
তিছি ন্হইনঅমা যীশু ওয়িপাসানা ক্যংমা
41ক্যুয়েম্রককতি আঃখাগো ফুখিং লেককি,যীশু আঃমি-আফাচা তন্হ মুকৈং যিরুশালেমদুঃ লাঃগেতি। 42যীশু যাখা তিছি ন্হৈন্হ, য়াংখা য়াংসুউরো থুংজৈং আলৈই থুউ ফুউচাদুঃ লাঃখাগেতি। 43ফুউখিং ব্রিনক য়াংসুউরো যাখা ইংদুঃ প্রেংগেতিলি, য়াংখা যীশুচা যিরুশালেংমা নিংলৈতি। য়াংচাগো য়াংসুউ মিখাং ফাখাংচা মিসিক। 44য়াংসুউ মিখাং ফাখাংচা, য়াংসুউরোনা লাঃচা লুঃউনা হিকরিলঃ তুওয়করো, তারাক লেংখ্রিই লাঃগেলিরি। য়াংনক য়াংসুউরো কুও আম্যিও অর সিকসা লুঃউরোবামা যীশুগো হ্রাগেলিইরি। 45য়জংছুগি হ্রারো মাঃরাব্রি, য়াংসুউগো প্রেং হ্রারো হ্রারো, য়াংসুউরো প্রেংরো যীরুশালেংদুঃ প্রেংহাগেতি।
46সুংরাক নক য়াংসুউরো যীশুগো ওয়িপাসানা ক্যংমা রাঃগেলিরি। যীশুচা কেইং ছারারোনা থৈংরো য়াংসুউরো চাঃগাগো নাথংরো হিকলিইরি অর য়াংসুউরোগো আফ্রি তংরো হিকলিইরি। 47যাসুউরো যীশু চাঃগাগো নাথংগেলিইরি, য়াংসুউরো আলুংসুউ যীশু পইংঞাগো ম্রাংরো অর য়াংসুউ আফ্রিগো ক্রারো কংগং এংঅগেলিইরি। 48য়াংসুউ আঃমি-আফাচা, যীশুগো ম্রাংরো এংঅগেলিরি। যীশু আঃমি য়াংসুউগো প্রলিইরি, “সাশ্যি, নাং ঙানা যাফু দিঃপুয়েং প্যাংরিলি? নাক আফানা ঙা নাককো কংগং চিই পুউরো হ্রাগেলিইরি।”
49যীশু য়াংসুউরোগো প্রলিইরি, “নাংরো যাফু ঙাগো হ্রাগেতিলি? নাংরো মিসিগেলি লঃও, ঙা ফাখাং ইংমা, ঙা নিংরাফু?” 50যীশু যা প্রলিইরি, য়াংসুউ আঃমি-আফাচা য়াংচাগো নাআমিলিগেলিই।
51য়াং নক যীশু আঃমি-আফানা আতু নাসরতদুঃ প্রেংখালিইরি অর য়াংসুউরো চাঃগাগো কৈংলো নিংলিরারি। যীশু আঃমিচা দিঃ চাঃগারোগো চিকমা ম্হেঃ থাঃলিরি। 52যীশুচা পইংঞা, আসাক, থাওরা ফুরানা লুঃউ ওয়াসানামা ক্রিতাকলিরি।
Currently Selected:
লূক 2: BBSRMZ
Highlight
Share
Copy
Want to have your highlights saved across all your devices? Sign up or sign in
