লূক 15

প্যকচা সাংফছুয়ি

(মথি ১৮:১০-১৪)

1য়াংখা আম্যা লুঃউ ফেংদা ককসারোনা মকং ‍লুঃউরো যীশু চাঃগাগো নাথংফু কিজু, যীশুবাদুঃ লাঃগেতি। 2য়জংছুগি ফরিশীরোনা কেইং ছারারোচা দিঃ চাঃগা প্ররো কংগং ছেংগ্রাংফাক লূকলিরি, “দিঃ লুঃউচা মকং লুঃউরোনা আতু পংরি অর আঃচাআ আসক চাঃআরি।”

3য়াংখা যীশু য়াংসুউরোগো সুয়েংসাং পিফু কিজু দিঃ চাঃগাগো প্রলিরি: 4“ছাংখ্রাংলো ক্রিগে, কুবাংরো আতুওয়ংমা, খ্যাংসুউমুছু তয়কমা আকং তাঃরা সাংফছুয়ি হিকরি। য়াং সাংফছুয়ি আরুইগা, তগং প্যক লাঃরিছুগি, হিলৈইচা কোছিকোগং ছুয়িইচা, আছাগো বৈখারো প্যকচা তগংগো মাঃরাসাগ্রা, হ্রাগেতি মুহুক লঃ? 5প্যকচা ছুয়িইকো হ্রা রাঃগি, য়াংসুউ প্যরো পাংখুংমা তাংরো মাঃথা লঃ। 6নক্কা ইংদুঃ লাঃরো য়াংসুউ মিকছুয়িইরোনা ইংনেংমা লুঃউরোগো খঃরো প্ররি, ‘ঙানা আতু প্যগে, আক্রংগা ঙামা প্যকচা সাংফছুয়িই প্রেংরো রাঃরি।’ 7ঙা নাংরোগো প্ররি,য়াংপুয়েং তেথেং যাসুরো আপ্রইইকা চিই প্রেংফু অলু মাক্যা তুওয়ককেতি, য়াংপুয়েং কোছিকোয়ক তাঃরাস্যাংথাকপাং তয়ক আপ্রইস্যাং আপ্রইকা চিই প্রেংগি সাগ্রাফুংমা অরলি আম্যা প্যগেতি।

প্যকচা টেংগা

8“অর প্রফুছুগি, মিকমা তয়কমা মুয়িং টেংগা ছিঃখে হিরি। য়াং ছিঃবে আঃথিগা তেবে প্যক লাঃগি, য়াংখা ছিংমিং থুঃউয়াইরো, ইংগো হ্লি থুউকরো, য়াংচাগো মাঃরাসাগ্রা আহ্লাপা প্যাংরো মাঃহ্রা লঃ? 9যাখা য়াংসুউ, য়াংচাগো হ্রারাঃরি য়াংখা য়াংসুউ মিছুয়িইনা ইংনেংবাসারোগো খঃরো প্ররি, ‘ঙানা আতু প্যগে, আক্রংগা ঙামা যা মুয়িং টেংগা প্যকলিরি, য়াংচা প্রেং রাঃরি।’ 10ঙা কুবাংরোগো প্ররি, য়াংপুয়েং তেথেং তয়ক আপ্রইস্যাং আপ্রইকা চিই প্রেংগি, থাওরা ফুরা তেমেংদরো প্যগেতি।”

প্যকচা সাঃ

11য়াংনক যীশু প্রলিরি, লুঃউ তয়কমা সাঃ নৈয়ক হিকলিইরি। 12সাঃ আঞিচা আফাগো প্রলিইরি, ‘ফাখাং, ঙামা রাঃফু আঃরাখ্যং আফুগো ঙাগো পিঃ।’ য়জংছুগি য়াং লুঃউঃওচা, য়াংসুউ সাঃ নৈয়ককো আঃরাফুঃ পিলিরি। 13লৈংগারাক নক সাঃ আঞিচা, য়াংসুউ আফুগো রংরো টেংগা পয়স্যা য়ুউরো আউয়িই নেংঙেংখ্রা দুঃ লাঃলিইরি। য়াংদেমা য়াংসুউ কংগং আপ্যাক মকং প্যাংরো টেংগা পয়স্যাগো ফ্যাক বৈলিরি। 14য়াংসুউ যাখা হিচা আলুং টেংগা পয়স্যাগো ফ্যাকবলৈতি, য়াংখা য়াং প্রিমা কংগং আচাঃ আসক খংবাংখ্রাং ফ্রইরি। য়জংছুখা য়াংসুউচা আঙেক আম্যুওয়ে ফ্রইরি। 15য়াংখা য়াংসুউচা লাঃরো য়াং প্রিমা লুঃউ তয়কমা ওয়েংথেং অলুক তংলিরি। য়াং লুঃউচা য়াংসুউগো ওয়ক ক্যংফু খ্যালিরি। 16ওয়ক যা আঃচা চাঃরিলি,য়াং আঃচাগো চাঃরো য়াংসুউ ওয়েংফ্রিফু ক্রিলিরি, য়িগিলি তয়কলি য়াংচা চাঃফুবাং য়াংসুউগো মিপিগে।

17নক্কা তারাক য়াংসুউমা চিদানা পকলিরি। য়াংখা য়াংসুউ প্রলিরি ‘ঙাক ফাখাংমা মন্হয়ক আঙাসা, মন্হকচি আঃচা রাঃরি ঙা দিঃমা ক্রিগি আঙেক আম্যুয়েনা সিঃইফুব্যা। 18ঙা থাঃরো ঙাক ফাখাংবামা লাঃরো প্রলিরি, ফাখাং, থাওরা ফুরানা কুবাংগো ছেংগ্যাংফাক ফ্রইরো ঙাক আপ্রই লুকরি। 19খ্যাংসুউমুছু ঙাগো কুঃবাং সাঃছুরো খঃফু থঃচা ঙানা থঃমেতেংব্যা। কুবাংমা ক্যুয়েং তয়কঞ্যং ঙাগো থাঃফি।’

20দিঃ চাঃগা প্ররো, য়াংসুউ ফাখাংদুঃ লাঃলিইরি। য়াংসুউ আওয়িইমাকাবাং, য়াংসুউগো ম্রাংরো য়াংসুউ ফাখাংচা কংগং মিত্তা রকরি। য়াং ফাখাংচা ব্রি লাঃরো, সাঃগো ফাকরো নেংলিরি। 21য়াংখা সাঃচা প্রলিরি, ‘ফাখাং, ঙা থাওরা ফুরানা কুবাংগো ছেংগ্যাংফাক লূকরো আপ্রই লুকরি। খ্যাংসুউমুছু ঙাগো কুঃবাং সাঃছুরো খঃফু থঃচা ঙানা মথঃতেংব্যা।’

22য়জংছুগি য়াংসুউ ফাখাংচা, য়াংসুউমা ক্যুয়েংরোগো প্রলিরি, ‘দিঃসুগো আলুংচাথাক আহ্লা আংগিগো য়ুলাঃরো আয়াং ওয়েচি। য়াংসুউ লাকঞ্যংমা লাকচুয়ে অর আখ্রিইমা ফেনেং ওয়েচি, 23অর পুবুয়ো নাওয়াশ্যি তগংগো য়ুউরো হ্লিই। লাঃগে, ঙারো চাঃরো সকরো প্যগেমি, 24আক্রংগা ঙামা দিঃ সাঃচা সিইলাঃখারি য়িগিলি প্রেংরো হ্রাং থাঃরি, প্যক লাঃখারি, প্রেংরো রাঃরি।’ য়াংনক য়াংসুউরো চাঃরো সকরো প্যগেলিরি।

25য়াং আখিংমা সাঃ আগ্রিইচা লিব্রাংমা হিকলিরি। ইংবাদুঃ রকখা য়াংসুউ কাঃচানা রুঃদুঃ আসেংগো ক্রালিইরি। 26য়াংখা য়াংসুউ ক্যুয়েং তয়ককো খঃরো ‍মিংলিরি, ‘দিঃচারো যাস্যালি?’ 27ক্যুয়েংচা য়াংসুউগো আফ্রি পিলিরি, ‘কুঃবাং ঞিং প্রেং লাঃরি। কুঃবাং ফাখাংচা য়াংসুউগো কেগেংমাঃ প্যাংরো প্রেং রাঃরি কিজু নুনুংপুবিউ নাওয়াশ্যিগো হ্লিগেরি।’ 28য়াংখা সাঃ আগ্রিচা রেং প্যাংরো ইং আথিঃদুঃ ওয়ংফু মিক্রিলিঃ। য়জংছুখা য়াংসুউ ফাখাংচা থুঃওয়ক লাঃরো, সাঃ আগ্রিগো ইংদুঅং সুওয়ংফু কিজু লাকপুয়ে খুবুয়ে প্যাংলিরি। 29য়াংসুউ কো ফাখাংগো প্রলিরি, ‘ক্রি, য়াহ্লক ন্হ পেলুং ঙা কুবাংগো আকং-মকং ক্রিলেতি। তখকলি ঙা কোবাং চাঃগাগো মুকৈং মাপ্যাংলি। য়িগিলি ঙাক মিছুয়িইরোনা প্যফু-পাফু কিজু কোবাং তাখালি ঙাগো, আগোতয়ং ছুয়িইশ্যি তগং মিপিসি। 30ছুগি কোবাংমা দিঃসাচা, প্রিতেংছামা কোবাং টেংগা পয়স্যাগো প্যাকবলৈতি, য়াংসুউ যাখা প্রেং লাঃরি, কোবাং য়াংসুউ কিজু নুনুংপুবিউ নাওয়াশ্যিগো হ্লিলিরি।’ 31“ফাখাংচা য়াংসুউগো প্রলিরি, ‘সাঃশ্যি, নাংগা খ্যাংখামুছু ঙানা আতু নিংরি। ঙামা যা হিরি, য়াংচা আলুংচাগা নাকচা। 32চিই সায়্যারো নাং কাঃফু খুংফু তেংরি। আক্রংগা নাকমা দিঃ ঞিংচা সিইলাঃরো প্রেং হ্রাংথাঃরি। প্যক লাঃখারি, প্রেং রাঃরি।’”

Currently Selected:

লূক 15: BBSRMZ

Highlight

Copy