লূক 11
11
ছুকতং সাংখ্রাং
(মথি ৬:৫-১৫; ৭:৭-১১)
1তখকখা যীশু তুখুক অারামা ছুউক তংরো হিকলিইরি। ছুউক তংব্রিখা, যীশু তিবি তয়ক যীশুগো প্রলিরি, “আস্যাং ছারাদ, রিখ্যুওমাঙ্গালা পিইসু যোহন, যাপুয়েং য়াংসুউ তিবিরোগো ছুউক তংফু সুয়েংসাং পিইলিইরিলি, য়াংপুয়েং ঙুরোগোলি কুঃবাং ছুউক তংফুচা সুয়েংসাং পিইবা।” 2যীশু য়াংসুউরোগো পিইলিইরি, যাখা নাংরো ছুউক তংগেতিলি য়াংখা প্রঃ,
‘অ ঙুরোমা সাগ্রাফুংমা ফাখাং, কুঃবাং নামিচা সেংস্যাংস ছুরো আলুংসুউ লাকখেংগেপাজি।
কুঃবাং নেংঙেংদচা ফ্রইপাজি।
3নিদৈং ঙুরো আতুওয়ক আঃচাগো
নিংদৈং পিইবা।
4ঙুকরো আপ্রইকো খুওয়ং রুওয়েপা,
আক্রংগা যাসুউরো ঙারোগো ছেংগ্যাংফাক লুকরো আপ্রই লুকতি
ঙারো য়াংসুউরোগো খুওয়ং রুওয়েতি
ঙারোগো কুঃবাং মাচেংগি।’
5য়াংনক যীশু য়াংসুউ তিবিরোগো প্রলিইরি, “জং ফ্রইকিনা, ঞি তুবোয়েংমা নাংরো আতুওয়ংগা তয়ক কুও মিকছুয়ি ইংদুঃ লাঃলো প্রলিইরি, ‘মিছুয়ি, ঙাগো ভংমুক সুংস্যাংক আখিই পিই। 6ঙামা মিকছুয়ি তয়ক লেংমা লাঃরি আখিংখা ঙাদুঃ লাঃলেতি। য়াংসুউগো চাঃজিইফুচা তুখুকলি মিহিক।’ 7য়াংখা ইং আথিগা মিকছুয়িচা প্রলিইরি, ‘ঙাগো দুঃখাওয়া মিপিইগি। আগু লেংখুওয়া পুয়িইব্যা অর সা-সিমিংরোলি ঙানা ওয়িইলো হিকরি। ঙা থাঃলো নাককো তুখুকলি মিপিইনৈং মুহুক।’ 8ঙা নাংরোগো প্রখ্যাংচাগা, য়াং লুঃউচা মিকছুয়ি ফ্রইলো তয়ং থাঃলো তুখুকলি মিপিই য়িগিলি য়াং লুঃউচা আপ্রেইং আপ্রেইং আতংবেং প্যাংরি আতুওয়ক মিকছুয়িচা থাঃফু অর য়াংসুউমা যা লুরিলি য়াংচাগো পিইফু।
9“য়াং আতুওয়ক ঙা নাংরোগো প্ররি, তংগে-তংগি নাংরোগো পিইমি; হ্রাগে-য়াংখা রাঃমি; লেংখুওয়াগো খককে-য়াংখা লেংখুওয়া হ্ল পিইমি। 10যাসুউরো তংগেতি য়াংসুউরো আলুংসুউ রাঃগেতি; যাসুউ হ্রারিলি য়াংসুউ রাঃরি; অর যাসুউ লেংখুওয়াগো খকতিলি-য়াংসুউ আতুওয়ক লেংখুওয়া হ্ল পিইরি। 11নাংরো আতুওয়ংমা দিঃপুয়েং ফাখাং যাসুউমা হিকরিলি, যা ফাখাংগো ভংমুক তংগি-য়াংসুউগো ক্যক পিইরি। মুহুককিলি ঙা তংগি ম্রিং পিইরি। 12অর ওউক তংগি পুশ্যি পিইরি? 13ছুগি নাংরো মকং ফ্রইলো তয়ং কুও সা-সিমিংগো আকং আকং ওয়েংরো পিইনৈংরিচাগো সিকরি, অর যাসুউরো গংখাংমা ফাখাংগা তংগেতি-য়াংখা ফাখাংচা য়াংসুউরোগো সেংস্যাংস ওয়িইঞেংগো পিইফুচাগা আমেইংব্যা!”
আস্যাং যীশু যাসুউ তেখুনা অলুক লুকতিলি?
(মথি ১২:২২-৩০,৪৩-৪৫; মার্ক ৩:২০-২৭)
14তাখা আখিংমা যীশুচা নেঃছুও পাবা কৈংলো হিকচা তয়ককো আকং প্যাংলিইরি। মকং নেঃছুওচা কেংথাগা থুওয়ক লাঃব্রিনক চাঃগা মপ্রনৈংরি লুঃউচা চাঃগা প্রনৈংলিইরি। য়াংচাগো ম্রাংলো লুঃউরোচা এংঅগেলিইরি। 15য়িগিলি লৈগায়কচা প্রগেলিইরি, “নেঃছুওরোমা মাং বেলসবূল তেখুওনা যীশুচা অলুক লুকতি।”
16আখ্রাঃ তাসাং লুঃউরোচা যীশুগো চেংফু আতুওয়ক গংখাং ফুংগা লাকম্হে তুখুক প্রা প্রগেলিইরি। 17য়াংসুউ তুওয়কচা চাঃগাগো সিকলো যীশু প্রলিইরি, “যা মাং নেংঙেংদচা কুয়ি লাঃরি-য়াং মাং নেংঙেংদচা প্যাক লাঃরিব্যা অর য়াংখা য়াংদে হিকচা ইংথংরোলি প্যাক লাঃরিব্যা। 18মাইংনেঃলি কুঃফাক রেঃলো ছেংগ্যাংফাক লুকতিছুগি যাপুয়েং প্যাংলো য়াংসুউ নেইংচা ম্রিফুলি? কুবাংরো প্রগেতিচাগা, ঙা বেলসবূল তেখুনা লুঃউরোগো আকং প্যাংরি। 19হুকতি কংরি, ঙারা নেঃছুও বেলসবূল তেখুনা লুঃউরোগো আকং প্যাংরিছুগি আখ্রা লুঃউরোচা যাপুয়েং প্যাংলো অাকং প্যাংগেতিলিঃ? কুবাংরো সাংরি চাঃগা প্ররিলঃ-য়াংচাগো কুবাংরোমা লুঃউরোচা চেংজাবেচিই। 20ছুগি ঙারা থাওরা ফোরা তেখুনা লুঃউরোগো আকং প্যাংরিছুগি-তুওয়কফুচাগা ফোরা নেংঙেংদচা কুঃবাংরোবামা রকব্যা।
21“আস্যাং লুঃউ তয়ক যাখা হিকচা সেনেঃ-দা হ্লেং য়ুউলো যাখা কুও ইংগো চংনিংরি য়াংখা য়াংসুউমা ওয়েংছেংচা আম্রি নিংরি। 22ছুগি য়াংসুউ থাক আস্যাং তয়ক লাঃলো য়াংসুউগো ন্হইদেতিছুগি য়াংখা যাসুউ যা হ্লেং-দাগো আথাকমা আক্যুং হিকলিইরি-আখ্রা লুঃউচা য়াংচাগো লুক য়ুউরি অর আনা য়ুউচা ওয়েংরোগো ফুঃ য়ুউগেতি।
23“খ্যাংসুউমুছু ঙা ব্রাক্কা মিহিকগি-য়াংসুউচা ঙামা রেংসুউ। যাসুউ ঙানা মককলি-য়াংসুউচা ঙাচাগো ক্রাংসা।
24“নেঃছুওচা যাখা লুঃউ তয়ক্কা থুওয়ক লাঃরি য়াংখা নেঃছুওচা নিংফু আতুওয়ক আসুয়িক আরাগো হ্রারি। নক্কা মারাগি প্ররিচাগা, ‘ঙা যাচাগা থুওয়ক লাঃরিলি প্রেংলো য়াংচাদুঃ ওয়ংরাফুব্যা।’ 25প্রেং লাঃখা য়াংসুউচা কুও ইংগো লুঃউ মিহিক, সেসেংপেব্রেং অর আহ্লা ম্রাংরি। 26য়াংখা য়াংসুউচা কুঃথাকপাং মকং নেঃছুও অরলি খন্হইকংগো কুঃনা আতুউ য়ুউ লাঃরি অর য়াংদেমা ওয়ংলো নিংগেতি। য়াংচা আতুওয়ক য়াং লুঃউচা পাথামা মকংচা থাকপাং অরলি ছিব্রেইং মকং ফ্রইতি।”
27যাখা যীশু চাঃগা প্ররি য়াংখা লুঃউ আচুক আথিগা মিকমা তয়কচা অলো প্রলিইরি, “য়াং মিকমাচা কেইং কংরি, যাসুউ কুবাংগো পিদিসেংথিক য়ুউলিইরি অর রাং সুয়িই নুওগো তলিইরি।”
28ছুগি যীশুচা প্রলিইরি, “য়াং মিকমা থাক দিঃ লুঃউরোচা কেইং কংরি যাসুউরো ফোরা তাঃরাগো নাথংরি অর য়াংচা পুয়েং অলুক লুকতি।”
যে যে অওয়াদা পিইচা
(মথি ১২:৩৮-৪২; ৫:১৫; ৬:২২,২৩; মার্ক ৮:১১,১২)
29অরলি লুঃউম্যারোচা যীশু লিফাক লাকচিই চুককেলিইরি। য়াংখা যীশু প্রলিইরি, “দিঃ খঃমা লুঃউরোচা মকং। য়াংসুউরোচা লাকম্হেগো হ্রাগেতি ছুগি রিসিই যোনা লাকম্হে আপি অর তুখুকলি লাকম্হে য়াংসুউরোগো মাপ্রাব্যা। 30নীনবী ম্রুমা লুঃউরো আতুওয়ক যোনা যাপুয়েং কুঃদৈং লাকম্হে ফ্রলিইরি, য়াংপুয়েং তেথেং দিঃ খঃমা লুঃউরো আতুওয়ক মুনুসাওয়া সাঃচা লাকম্হে ফ্রইফু। 31তাঃরা চৈতি রাকমা ম্রকফাক প্রিগা মাংমাচা থাঃলো দিঃ খঃমা লুঃউরো আপ্রইকো প্রা পিইফু। আক্রংগা শলোমন মাং পৈঞ্যা চাঃগাগো নাথংফু আতুওয়ক য়াংসুউচা কাবা আছুংগা লাঃলিইরি; অর ক্রি, দিঃমা শলোমন থাক আগ্রিই আকি তয়ক হিকরি। 32তাঃরা চৈতি রাকমা নীনবী ম্রুমা লুঃউরোচা থাঃলো দিঃ খঃমা লুঃউরোমা আপ্রইকো প্রা পিইফু আক্রংগা যোনা তাঃরা হব্রিইনক নীনবী ম্রুমা লুঃউরোচা আপ্রইকা চিই হ্লিগেরিব্যা; অর ক্রি, দিঃমা যোনা থাক আগ্রিই আকি তয়ক হিকরি।
33“খ্যাংসুউমুছু ছিইমিং থুওয়েংলো মাম্রাংরি আঃরামা অর খারাং খ্যুক মাঃথা প্রফুছুগি ছিইমিং দাং আথাকমারা থাঃরি যাফুলিছুগি আথিদুঃ যাসুউরো ওয়ংরি-য়াংসুউরোচা আলাংগো ম্রাংরারি। 34কুঃমা ম্যাচিইচা কুও কেইংথামা ছিইমিং পুয়েং। কুবাংমা ম্যাকচিইরা কংরিছুগি, কেইংথা অলুংচা আলাং রং ফ্রইফু। 35কুবাং আতুওয়ংমা যা আহ্লাং হিকরি, য়াং আহ্লাংচা মমৈলঃ য়াং আক্রংলিলাগো সিধি রেঃরাফু। 36কুবাং কেইংথাচা আলাংমা হিকরি অর তেকেবাং মমৈই মিহিকছুগি য়াংচাচা আব্রিচুং লালাং ফ্রইফু। য়াং পুয়েং তেথেং ছিইমিং আরং কুবাং কেইংথামা ক্যারিছুগি কুবাং কেইংথাচা লালাং ফ্রইমি।”
কেইং ছারারোগো য়ুউ আস্যাং যীশু চেংজাখ্রাং
(মথি ২৩:১-৩৬; মার্ক ১২:৩৮-৪০; লূক ২০:৪৫-৪৭)
37যীশু চাঃগা প্রব্রিইনক ফরীশী তয়কচা যীশু থামাং চাঃফু আতুওয়ক পাংলিইরি। য়াংখা যীশুচা আথিদুঃ ওয়ংলো চাঃফু থৈংলিইরি। 38বাসারি থুংজৈং আলৈই যীশু আলাক মিছিইব্রি থামাং চাঃফু থৈংচাগো ম্রাংলো ফরীশীচা এংঅলিইরি।
39যীশুচা য়াংসুুুউগো প্রলিইরি, “ছুগি নাথং, কুবাংরোচা খুওয়ক-লংবেইং প্রাংগাচাগো সেসেং প্রাং থাঃগেতি য়িগিলি কুবাংরো আথিমাচাগা লফানা মকং প্রিব। 40কুবাংরোচা পৈঞ্যা মিহিক! যাসুউ প্রাংগাচাগো লুকলিইরি-য়াংসুউচা আথিমাচাগোলি মুলুকলিইলঃ? 41কুবাংরো লংবাইং-হাংজামা যা হিকরিলিঃ-য়াংচারোগো মিত্তা রেঃতি পুয়েং হ্লুউলৈ; য়াংখা ম্রাংরামিচাগা-কুবাংরোবামা আলুংচা আকং।
42“ফরীশীরোচা প্যকপেচিই! কুবাংরোচা ফোরাগো পুদিনা আরুওয়ক, মসালা আরুওয়ক অর যে যে আপ্রেং চাঃচা হাংরুওয়কমা ছিফুমা তুফুরা হ্লুউগেতিব্যা, ছুগি মাঙ্গালা হিক তাঃরা অর ফোরা মিত্তা আখ্যগো চিই মাখ্যাগে। হ্রিইগা থুংজৈংগো সুংরিনা আতু নক্কা থুংজৈংরোগোলি সুংরাফুচা কুবাংরোমা সাংরি।
43“ফরীশীরো প্যকপেচিই! রিইফুংজাংমা আগ্রিই আঃরামা থৈংফু অর জিইমা ক্রংমা ম্যাকন্হা রাফুচাগো কুবাংরোচা সায়ারি। 44কুবাংরোচা প্যকপেচিই! কুবাংরোচা সাংখ্যুয়েংমা লাকম্হে মাঃথা য়াংপুয়েংনা তুউরি। লুঃউরোচা মিসিকব্রি আথাক্কা ক্য লাঃরি।”
45য়াংখা কেইং ছারারোমা তয়কচা যীশুগো প্রলিইরি, “ছারা, দিঃ চাঃগা প্রলো কুবাংচা ঙুরোগো সিরিই ফ্যাকতি।”
46যীশু প্রলিইরি, “প্যকপেচিই কেইং ছারারো! কুবাংরোচা লুঃউরো অাথাকমা আম্যা তাওয়েং পিই থাঃরি। ছুগি য়াংসুউরোগো আকুউ-ঞিং পিইফু আতুওয়ক কুঃমা লাকঞ্যং তঞ্যংবাং মুহ্লুক।
47“কুবাংরোচা প্যকপেচিই! রিসিইরো সাংখ্যুয়েংগো কুবাংরোচা আসৈই প্যাংলো প্র প্রাগেতি। ক্রিগিগা কুবাংরোমা অাচৈংচা য়াংসুউরোগো সেবৈলিইরি। 48য়াং আতুওয়ক কুবাংরোচা সাকসিই কুবাংরো অাচৈংরো অলুকমা অর য়াংসুউরো অলুককোলি কুবাংরোচা লাক খেং য়ুউগেতি। তাব্রাক্কা য়াংসুউরো রিসিইরোগো সেবৈলিইরি অর তাব্রাক্কা কুবাংরোচা য়াং রিসিইরো সাংখ্যুয়েংগো অাসৈই প্যাংগেতি। 49য়াং আতুওয়ক থাওরা ফোরাচা কুও ছেন্দা আলৈই দিঃ চাঃগাগো প্রলিইরি, ‘ঙা য়াংসুউরোবামা রিসিই অর তেমেংদরোগো রুওয়েফু। য়াংসুউরো আতুওয়ংমা লৈংগায়ককো সেবৈফু অর লৈংগায়ককো ঞ্যচিই প্যাংফু।’ 50য়াং আক্যুওচা ফ্রইতি, কাবা তিম্রিজরি কাবাং মন্হইয়ক রিসিইকো সেবৈরি-য়াংসুউরোমা স্যুই থুওয়কচা আপ্রইকো দিঃ খমা লুঃউরোচা খেংরাফু। 51হুকতি, ঙা নাংরোগো প্রফুচাগা, হেবলগো সেবৈরি খাকাবাং যা সখরিয়গো ফোরাখুং অর সেংস্যাংস আঃরামা সেবৈলিইরি য়াং সখরিয়গো সেবলৈচা তৈঅং হিকচা আলুং স্যুই আপ্রইকো দিঃ খমা লুঃউরো খেংরাফু।
52“কেইংছারারোচা প্যকপেচিই! কুাবাংরোচা পৈঞ্যা সাবিইগো য়ুউ লাঃখাগেতি। কুঃদৈংলি মুওয়ংগেলিই অর যাসুউরো ওয়ংফু য়াংসুউরোগোলি ওয়ংফু মিপিইলিই।”
53-54যীশুচা য়াং অাঃরাগা লাঃখেংরিখা কেইং ছারারোনা ফরীশীরোচা যীশুগো ছেংগ্যাংফাক প্যাংরাফু ম্হেকেরি। যে যে আক্রংগো যীশুগো মিংলো আপ্রই খ্যাফুগো ক্রুজাগেলিইরি।
Currently Selected:
লূক 11: BBSRMZ
Highlight
Share
Copy
Want to have your highlights saved across all your devices? Sign up or sign in
