যোহন 8
8
কামিসু লুঃউকসাঃমা মিঃমা তাঃরা
1য়াংনক আলুং লুঃউরোচা কুঃ ঈংদু কুঃ লাখাগেতি, য়িগিলি যীশু জৈতুন তংদুঃ লালিরি। 2নকরাক মুলাং কংগং চঃজগা যীশু প্রেংরো ওয়িপাসানা ক্যংদুঃ লালিরি নক আলুং লুঃউচা য়াংসুউবাদুঃ লাগেলিরি। য়াংখা যীশু থৈংরো য়াংসুউরোগু সুওয়েংসাং পিলিরি। 3-4য়াং আখিংমা কেইংছারানা ফরীশীরো মিঃমা তয়ক্কু যীশুবাদুঃ য়ুলাগেলিরি। মিঃমাগো কামিসু লুকরো তিঃরাগেলিরি। দেংমা ছারানা ফরীশীরো য়াং মিঃমাগো রেঃচিরো যীশুগো মিংগেলিরি, “ছারা দিঃ মিঃমাচা জগ্রখেঃরো তিঃরাগেরি। 5থুংজৈমা মোশি দিঃজেএ মিঃমারোগু ক্যকবৈরো সেঃফু আনাঃ পিলিরি। য়িগিলি কুঃবাং যা প্ররিলি?”
6য়াংসুউরো যীশুগো চেংফু আতুওয়ক দিঃচাগাগু প্রগেলিরি, আক্রংগা য়াংসুউগো আপ্রইখ্যাফু তখুঃ আপ্রই রাঃঅং। য়াংখা যীশু আগংগো অকটুঃ খ্যারো কেইংফামা লাকঞ্যংনা রুঈলিরি। 7য়িগিলি য়াংসুউরো আপ্রইেং আপ্রইেং মিংগেলিরি আক্রংনা, য়াংখা যীশু থারো য়াংসুউরোগু প্রলিরি, “কুবাংরো আতুওয়ংমা যাসুউ তুখুলিঃ আপ্রই লুকলো মিহিক, য়াংসুউ পাথামা দিঃ মিকমাগো ক্যক বৈ।” 8য়াংনক যীশু অর অগং অক্ খ্যারো কেইংফামা রুঈলিরি।
9দিঃ চাগাগো ক্রারো য়াং গংখ্যুকরোমা ওয়াগ্রিরোগাকাবাং চারো আলুংসো তয়ক তয়ক য়াংগা লাগেলিরি। যীশু তয়করা হিলৈতিব্যা অর থুউ মিকমাচা যীশু হ্রিইগা রেঃরো হিকলিইরি। 10যীশু থারো য়াং মিঃমাগো প্রলিরি, “য়াংসুউরো যামালি? তয়কলি নাক্কু আপ্রইঈ ক্যারো ডেং খ্যারাফু মুতুওয়ক্কেলি লঃ?”
11মিঃমা আফ্রি পিলিরি, “মহু পাঃ, তয়কলি মাক্রিলি।”
য়াংখা যীশু প্রলিরি, “ঙালি মাক্রি। বালাঃ লালিই, অর আপ্রই মুলুককিফিই।”
আস্যাং যীশুচা কাবামা আড়ং
12নক যীশু প্রেংরো লুঃউরোগু প্রলিরি, “ঙা লঃগামা আড়ং। যাসু ঙা লেংমা লাঃরি, য়াংসুউ তাখালি মঃমমা মাক্যামু। প্রফুছুগি লগামা আলাং রাঃমি।”
13দিঃচাগু ক্রারো ফরীশীরো যীশুগো প্রগেলিরি, “নাকমা সাকসি আম্হেং মুহু, আক্রংগা কুখ্যাংকু সাকসি পিরি।”
14যীশু য়াংসুউরোগু আফ্রি পিলিরি, “ঙাক বারাক ঙা সাকসি পিগিলি, য়িগিলি ঙাক সাকসিইচা অামেং। অাক্রংগা ঙা যাগা লাঃলি অর যাদু লাঃফুলি য়াংচা ঙারা সিরিব্যা। য়িগিলি ঙা যাগা লাঃরি অর যাদু লাঃফু য়াংচাগু কুবাংরো মিসিঃ। 15লুঃউরো যা পুয়েন তাড়াঃ চতিলিঃ, য়াং পুয়েন কুবাংরোলি তাড়াঃ চৈতি। ছুগি ঙাগা তয়ককুলি তাড়াঃ মচঃ। 16য়িগিলি তাখা-মাসাঃ তাড়াঃ চলিগিলি, য়াং তাড়াঃচা আম্হেং, আক্রংগা ঙা তয়ক মহু। ঙাগা হিকরিব্যা অর যাসু ঙাগো রুওয়েলৈতি য়াং ফাখাংলি ঙা না হিরি। 17কুবাংরোমা থুংজৈমা রুঈরো হিকচাগা, নৈয়ক তেজেতৈং সাকসি পিগিঃ য়াংচা আম্হেংব্যা। 18ঙারা ঙা বারাক সাকসি পিরি, অর যাসু ঙাগো রওয়েলৈতি, য়াং ফাখাংলি ঙা বারাক সাকসি পিরি।”
19ফরীশীরো য়াংসুউগো প্রলিরি, “নাক ফাখাং যামালি?”
যীশু আফ্রিঃ পিইলিরি, “কোবাংরো ঙাগো মিসিক অর ঙামা ফাখাংগোলি মিসিক। ঙাগো সিইগিরা, ঙাক ফাখাংগো সিইফু।”
20ওয়িপাসানা ক্যংমা সুওয়েংসাং পিরি আখিংমা, আলুঃউঃ পিরি আরামা যীশু দিঃ চাগারোগু প্রলিইরি। য়িগিলি য়াং আখিংমালি আখিং মাফ্রসিরো য়াংসুউগো তয়কলি মিতিগেলি।
কুঃ সিখ্রাংগু য়ুউরো আস্যাং যীশু প্রচা চাঃগা
21যীশু প্রেংরো ফরীশীরোগু প্রলিইরি, “ঙা লাঃরিব্যা। কুবাংরো ঙাগো হ্রাগেমি য়িগিলি কুবাংরোচা কুঃদৈং আপ্রই আতুওয়ংমা সিইগেলিমি। ঙা যাদুঃ লারিলি, য়াংদু নাংরো মালানৈমু।”
22য়াংখা যিহূদী গংখ্যুকরো প্রগেলিরি, “য়াংসুউ আচিং সিইফুল? আক্রংগা য়াংসুউ প্ররি, ‘ঙা যাদু লারি কুবাংরো য়াংদু মালানৈমুহুক।’”
23যীশু য়াংসুউরোগু প্রলিরি, “ঙা আথাক্কা লাচা অর কুবাংরো অক্কা লাচা। কুবাংরো দিঃ লগাঃ লুঃউ, ঙাঃচা দিঃ লগাঃ লুঃউ মুহু। 24য়াং আতওয়ক ঙা কুবাংরোগু প্ররি, কুবাংরো কুবাংরোমা ঙারি আতুয়ংমা সিঃফু। কুবাংরো মক্যুংরা ছুগি, ঙা য়াংসুউ। য়িগিলি কুবাংরো কুবাংরোমা ঙারি আতুওয়ংমা সিঃফু।”
25দিঃচাগু ক্রারো গংখ্যুকরো যীশুগো মিংগেলিরি, “নাং যাসুলি?”
যীশু আফ্রি পিলিরি, “পাথামা কাবাং ঙা কুবাংরোগু যা প্রলিরিলি ঙা য়াংসুউ। 26কুবাংরো আক্রংলিলাগু প্রফু অর তাড়াঃ চঃরো ক্রিফু ঙামা আম্যা হিরি। য়িগিলি যাসু ঙাগো রওয়েলৈতি য়াংসুউমা আলিং মিহি। ঙা য়াংসুউ বামাঃ যা ক্রালিরি, য়াংচারা ঙা লুঃউরোগু প্ররি।”
27য়াংসুউরো নামিলিগেলি যীশু ফাখাং আক্রংলিলাগু য়াংসুউরোগু প্রলিরি। 28য়াং আতুওয়কনা যীশু প্রলিরি, “যাখা কুবাংরো মনুসাওয়া সাঃগু আথাকতুঃ তাংফু য়াংখারা সিলিমিচাগা, ঙা য়াংসুউ। অর দিঃচালি নালিঃলিমি, ঙা কু আতুওয়ক তুখুলি মুলুকলিই। প্রফুছুগি ফাখাাং ঙাগো যা সুওয়েংসাং পিলিরি ঙা য়াংচাঞ্যং চাগাঃ প্রলিইরি। 29যাসুউ ঙাগো রুওয়েলৈতিলি য়াংসুউ ঙানা আতু হিরি। য়াংসুউ ঙাগো নুখ্যাং মুরুওয়েলি আক্রংগা য়াংসুউ যা আলুকমা ওয়েংসারিলি, য়াং আলুককুরা ঙা লুকতি।” 30যাখা যীশু দিঃ চাগারোগু প্রলিরি য়াংখা আম্যা লুঃউ য়াংসুউগো ক্যুংগেলিরি।
যিহূদীরো আস্যাং যীশুমা ছেংগ্যাংফাক
31যা যিহূদীরো যীশুগো ক্যুংগেলিরি যীশু য়াংসুউরোগু প্রলিরি, “ঙা চাগাঃ আতৈং কুবাংরো লারিছুগিরা, আম্হেং কুবাংরো ঙা তিবি। 32য়াংচাগু আপি কুবাংরো আম্হেংগু সিকমি, অর য়াং আম্হেংরা কুবাংরোগু খ্যুওয়েমি।” 33যিহূদী গংখ্যুকরো য়াংখা যীশুগো প্রগেলিরি, “ঙারো অব্রাহামরো আচৈং; ঙারো তাখালি তয়কপাংমা ক্যুওয়েং মাফ্রলি। নাং মজং প্যাংরো প্রচালি, ঙারোগু খ্যুওয়েমি?”
34যীশু য়াংসুউরোগু দিঃ আফ্রি পিলিরি, “ঙা কুবাংরোগু আম্হেং প্ররি, যাসুরো ঙারিমা ক্যারো হিরি, য়াংসুউরো আলুংসু ঙারিমা ক্যুওয়েং। 35ক্যুওয়েং তাসাকপেলুং ঈংমা মিনিং, প্রফুছুগি সাঃরাঃ তাসাক পেলুং ঈংমা নিংচা। 36য়াং আতুওয়ক থাওরা ফোরা আপি কুবাংরোগু খ্যুওয়েকিরা কুবাংরো আম্হেং ক্যুওয়েফু। 37ঙা সিরি কুবাংরো অব্রাহানরো আচৈং, য়িগিলি কুবাংরো ঙাগো সেঃবৈফু ক্রেংগেতি। আক্রংগা ঙা চাঃগা কুবাংরো চিনুনুংমা মওয়ং। 38ঙা ঙাক ফাখাংবামা যা ম্রাংরি, য়াং আক্রংলিলাগু প্রলি অর কুবাংরো কুবাংরোমা ফাখাংবাগা যা ক্রাগেলিরি য়াংচাগো লুককেতি।”
39দিঃচাগু ক্রারো য়াং যিহূদী গংখ্যুকরো যীশুগো প্রগেলিরি, “অব্রাহাম ঙারো ফাখাং।”
যীশু য়াংসুউরোগু প্রলিরি, “কুবাংরো অব্রাহাম সারাঃ ফ্রইতিছুগি, য়াংসুউঞ্যং অলু লুকফু। 40থাওরা ফোরাবাগা যা আম্হেং ঙা ক্রালিরি য়াংচা কুবাংরোগু প্ররি, য়িগিলি কুবাংরো ঙাগো সেঃফু ক্রেংগেতি। প্রফুছুগি অব্রাহাম দিঃযে অলুক মলুকলি। 41কুবাংরো ফাখাং যা লুকতি কুবাংরো য়াংচা লুককেতি।”
য়াংসুউরো যীশুগো প্রগেলিরি, “ঙারোগা তঃমা রাচাঃ মুহুক। ঙারোমা তয়করা আফাঃ হিরিব্যা, য়াংসুউ ফ্রইতি থাওরা ফোরা।”
42যীশু য়াংসুউরোগু প্রলিরি, “আম্হেংরা থাওরা ফোরা কুবাংরোমা ফাখাং ফ্রইতিছুগি কুবাংরো ঙাগো খ্যকেফু। আক্রংগা ঙা থাওরা ফোরাবাঃগা লাচা অর অগু কুবাংরোমাবাঃমা হিরি। ঙা কুঃদৈং মালেলি, প্রফুছুগি য়াংসুউ ঙাগো রওয়েলৈতি। 43কুবাংরো যাস্যা ঙা চাগাগু নামিলিগেলি? য়াং আক্রংচা ফৈতি, কুবাংরো ঙা চাগাঃগু সিঃমাখেংনৈগে। 44আপ্যাকজসু কুবাংরোমা আফাঃ অর কুবাংরো য়াংসুউমা সাঃ। য়াং আতওয়কনা কুবাংরো য়াংসুউ চিইদানাগু আব্রিআচুং লুকফু ক্রিগেতি। আপ্যাজসু পাথামাগাবাং আসাক সেঃসা। য়াংসুউ তাখালি আম্হেংচাংজ মাঃনি। আক্রংগা য়াংসুউ আতুওয়ংমা আম্হেং মিহি। য়াংসুউ যাখা ঈলিং চাগাঃ প্ররি য়াংখা য়াংসুউ কুঃদৈং য়াংচা প্ররি। আক্রংগা য়াংসুউ মাসাওয়া লুঃউ অর আলুং ঈলিংচা য়াংসুউগা থওয়কচা। 45য়িগিলি ঙা আম্হেং চাগাঃ প্ররি, অর য়াংচা আতওয়ক কুবাংরো ঙাগো মুক্যুংগে। 46কুবাংরো আতুওয়ংমা যাসু ঙাগো আপ্রইঈসিঃ ছুরো তাংপ্রানৈফুলঃ? ঙা আম্হেংরা প্ররিছুগি কুবাংরো যাফু মুক্যুংগেলি? 47যা লুঃউঃউ থাওরা ফোরা বারাকরি, য়াংসুউ থাওরা ফোরা চাগাঃগু নাথংরি। কুবাংরো থাওরা ফোরা বারাক মুহুকলু, থাওরা ফোরা চাগাগু না মথংগে।”
48য়াংখা যিহূদী গংখ্যুকরো যীশুগো প্রগেলিরি, “ঙারো আম্হেং চাগাঃ প্রলিরিমুলঃ, নাং তয়ক শমরীয় অর নাক্কু নেঃ কৈব্যা?”
49আফ্রিমা যীশু প্রলিরি, “ঙাগো নেঃ মকৈ। ঙা ঙামা ফাখাংগু ম্যাকন্হা পিরি য়িগিলি কুবাংরো ঙাগো ম্যাকন্হা মিপি। 50ঙা ঙাক কুঃদৈং ম্যাকন্হা মিপি য়িগিলি তয়ক হিরি যাসু ঙাগো ম্যাকন্হা পিরি অর য়াংসুউরা তাড়াঃজৈ ফৈতি। 51ঙা কুবাংরোগু আম্হেং প্ররি, খ্যাংসুউমুছু ঙা চাগাঃ আতৈং লুঃউঃকিরা, য়াংসুউ তাখালি মিসিমুঃ।”
52যিহূদী গংখ্যুকরো যীশুগো প্রগেলিরি, “ঙারো এখক আহ্লা নালিগেরি, ঙাক্কু নেঃ কৈব্যা। অব্রাহামনা রিসিইরো সিলাহাব্যা, অর নাং প্ররি, ‘খ্যাংসুমুছু ঙা চাগাঃ আতৈ লুককিরা, য়াংসুউ তাখালি মিসিক মুহুক।’ নাং ফাখাং অব্রাহাম থাক আগ্রিলঃ? 53য়াংসুউগা সিইলাঃখাব্যা অর রিসিরোলি সিইলাঃখাব্যা। নাং কুঃ গু কুঃ যা তুওয়কতিলি?”
54আফ্রিমা যীশু প্রলিরি, “ঙারা কুখ্যাংকু ম্যাকন্হা পিগি, য়াংচা আফুঃ মাতেং। ঙা ফাখাং যাসুগো কুবাংরো কুবাংরোমা থাওরা ফোরা ছুরো আঃকুগেতি, য়াংসুউরা ঙাগো ম্যাকন্হা পিরি। 55কুবাংরো তাখালি য়াংসুউগো মিসিসিঃ, য়িগিলি ঙা য়াংসুউগো সিরি। ছুগি ঙা য়াংসুউগো মিসিঃ খেংগি, ঙালি কুবাংরোঞ্যং মুসওয়া প্ররি ক্যাফু। য়িগিলি ঙা য়াংসুউগো সিরি অর য়াংসুউ চাগাঃ আতৈং অলুক লুকতি। 56কুবাংরো ফাখাং অব্রাহাম ঙা রাক্কুরা ক্রিফু আতুওয়ক চিইমা প্যলিরি। য়াংসুউ য়াংচা ম্রাংলিলি অর প্যলিরি।”
57যিহূদী গংখ্যুকরো যীশুগো প্রগেলিরি, “নাকমা আসাক্কা ঙাছিঃবাং মাক্যসিঃ, অর ঙা যা অব্রাহামগো ম্রাংফুলি?”
58-59যীশু য়াংসুউরোগু প্রলিরি, “ঙা কুবাংরোগু আম্হেং প্ররি, অব্রাহাম ম্যুঈফু হ্রিঃগাকাবাং ঙা হিরি।” দিঃ চাগাঃগু ক্রারো থুউ গংখ্যুকরো যীশুকে বৈফু আতুওয়ক ক্যক লুংগেলিরি। য়িগিলি যীশু কুগুকু আথিঃখু লুকরো ওয়িপাসা ক্যংগা থুওয়ক লাঃলিইরি।
Currently Selected:
যোহন 8: BBSRMZ
Highlight
Share
Copy
Want to have your highlights saved across all your devices? Sign up or sign in
