যোহন 4
4
শমরীয় আচৈং মিইমা
1যীশুচা যোহন থাক আম্যাঃ রিঃঙুক মাঙ্গালা পিঃরো তিবি লুকলিইরি চাগাঃগো ফরীশীরো ক্রাঃগাইরি। 2য়জং ছোগেলেঃ যীশুচা রিঙুক মাংলাগো কোদৈং মিপিঃ, য়াংসুউ তিবিরোরা রিঃঙুক মাঙ্গালাগো পিঃগেতি। 3যীশু য়াংচাগো সিলো যিহুদিয়া প্রিনিগু বৈরো গালীলদু প্রেংরো লাঃখালিরি। 4গালীল প্রেদো লাঃরেখা শমরিয়া প্রে আথাকা ফ্রাইলো লাঃফো ক্যারে। 5যীশুচা শুখর নাঃমিনা শমরীয় রুওয়া তুওয়াদুঃ লাঃলিইরি। যাকোব কুঃ সাঃ যোষেফগো যা আঃরাগো পিইলিইরি, দিঃ রুওয়াচা য়াং নেংমা হিকলিইরি। 6য়াং আঃরামা যাকোব লুকচা রিই তুওয়ং হিকলিইরি। লেংমা খ্রিরিই সুওয়ালো সুওয়ালো যীশু ঞ্যলো য়াং রিই তুওয়ংনামা থৈংলিইরি।
য়াংখা মুওয়েংদি আখিং ফ্রইব্যা। 7-8যীশু তিবিরোচা আঃচা ওয়িফু কিজু রুওয়াদুঃ লাঃখাগেতি। য়াং আখিংমা শমরিয় মিইমা তয়ক রিই খেঃফু লাঃরি। যীশু য়াংসুউগো প্রলিরি, “ঙাগো রিই সকফু তেঃকে পিঃ।”
9য়াং শমরিয় মিঃমাচা য়াংসুউগো প্রলিরি, “ঙাগা শমরিয় মিঃমা। কুঃবাং যিহুদী ফৈরো, যাপুয়েং প্রাংরো ঙাগা রিই তংরিলি?” মিঃমাচা দিঃ চাঃগা প্রলিরি আক্রংগা, যিহুদীরোনা শমরীয়রোচা আতাক আসাক মিহিগে।
10যীশু য়াং মিঃমাগো আফ্রে পিঃলিরি, “নাংরা সিঃত থাওরা ফোরা ঈ আঃলুঃউঃ দাঃনাচা জালি অর যাসু নাংগা রিই তংরিলি, য়জং ছুগিরা নাং য়াংসুউগা রিই তংফু অর য়াংসুউচা নাক্কু তিম্রিজ রিইগু পিইলিইফু।”
11মিকমাচা প্রলিইরি, “প্রফুছুগি কুবাংমাগা রিই ক্যুংফুচা তুখুউলি মিঃহি অর ক্রিগি তুওয়ংলি আঃনাক। য়জংছুগি য়াং বাওয়া হিকচা রিই যাগা রাঃরিলিঃ? 12কুবাংগা ঙারো আচৈং যাকোব থাকগা আগ্রি মুহু। দিঃ রিই তুওয়ংচা য়াংসুউ ঙুরোগু পিঃলিচা। য়াংসুউ কুঃদৈং অর য়াংসুউ সাঃরোলি দিঃ রিই তুওয়ংগা রিই সককেতি অর য়াংসুউমা সুদুওয়ারোলি দিঃগা রিই সককেতি।”
13য়াংখা যিশু প্রলিরি, “ক্যাংসুমুছু দিঃ রিইগো সককিয়ি, য়াংসুউ প্রেংরো রিই সক ম্যুওয়েফুসি। 14ছুগি ঙা যা রিই পিইফু, ক্যাংসুউমুছু য়াংচাগো সককিয়ি অর তাখালি রিই সক মম্যুওয়েপ্যা। য়াং রিঃচা য়াংসুউ চিঃনুনুংমা রককিয়ি-রিঃছাং রিইঞ্যং ফ্রইরো তিম্রিজ বাওয়াগো আহ্লুউ পিইমি।”
15য়াংখা মিকমাচা যীশুগো প্রলিরি, “য়জংছুগি ঙাগো য়াং রিই পিঃ, যাস্যালিছুগি অর ঙা রিই সক মুম্যুওয়েরাঅং অর রিই খেঃফু কিজু দুঃ মাঃলারাঅং।”
16যীশু য়াংসুউগো প্রলিরি, “য়জংছুগি লাঃলি, নাক লাংগো দুঃ খঃ য়ুখা।”
17মিঃমাচা প্রলিরি, “ঙামাগা লাং মিঃহি।”
যীশু য়াংসুউগো প্রলিরি, নাং আম্হেং প্ররি, নাকমা লাং মিহি, 18আক্রংগা দিঃ আতুওয়ংমা নাকমা ঙায়ক লাং ফ্রঃব্যা অর অগু যাসুউ নাংনা হিকরিলি, য়াংসুউ নাক লাং মুহু। নাং আম্হেং চাঃগা প্ররি।
19য়াংখা মিঃমাচা যীশুগো প্রলিরি, “ঙা আগু সিঃব্যা, কুঃবাং তয়ক রিসিকতাবা। 20ঙারোমা আচৈংরো দিঃ তংমা ওয়িপাসানা থৈগেতি, য়িগিলি কুবাংরো প্ররিচাগা, যিরূশালেংমারা ওয়িপাসানা থৈরাফু।”
21যীশু য়াংসুউগো প্রলিরি, “নাথং, ঙা চাঃগাগো ক্যুং,জং আখিং তারাক লেঃমি, যাখা ফাখাং থাওরা ফোরা ঈ ওয়িপাসানাগোলি নাংরো দিঃ তংমা মথৈংগেমুহুক যিরূশালেংমালি মথৈংগেমুহুক। 22নাংরো যাচাগো মিঃসিলি, য়াংচাগো য়ুউরো ওয়িপাসানা থৈংগেতি, ছুগি ঙারো যা সিঃরিলি য়াংচাগো য়ুউরো ওয়িপাসানা থৈগেতি আক্রংগা আপ্রইকা খুওয়ং রুওয়েফু লেংচা যিহুদীরোগা নিংরোরা ফ্রঃচা। 23ছুগি জং আখিং লাঃরি, প্রফুছুগি, আগু য়াং আখিংচা লেঃব্যা, যাখা মিলিংব্রি ওয়িপাসানা থৈসারো ওয়িঞেংনা আঃচঃ ফাখাং ঈ ওয়িপাসানাগো থৈগেমি। ফাখাংলি দিঃপুয়েং ওয়িপাসানা থৈংসারোগু হ্রারি। 24থাওরা ফোরা ঈ ওয়িঞেং, যাসুরো য়াংসুউগো য়ুউরো ওয়িপাসানা থৈগেতি, ওয়িঞেংনা আঃচঃগো য়ুউরো য়াংসুউরো য়াং ওয়িপাসানাগো থৈরাফু।”
25য়াংখা য়াং মিকমাচা প্রলিরি, “ঙা সিরিক, মশীহ, যাসুগো খ্রীট প্ররিলি, য়াংসুউচা লাঃফু। য়াংসুউ যাখা লাঃফুলি, য়াংখা আলুংচা ঙারোগু আঃসিই পিইফু।”
26যীশু য়াংসুউগো প্রলিরি, “য়াংসুউচা ঙারা, যাসু নাংনা চাঃগা প্ররি।”
27য়াং আখিংমা যীশুর তিরিরোচা লাঃরো যীশুগো মিঃমা তয়কনা চাঃগা প্রচাগো ম্রাংরো এংঅগেলিরি। য়িগিলি য়াংসুউরো তয়কলি মপ্রগেলি, “কুঃবাং যা লুরিলি?” য়াংচা মুহুকিলি “যাফু কুঃবাং য়াংসুউনা চাঃগা প্ররিলি?” 28য়াংখা য়াং মিঃমাচা য়াংসুউমা ওখাকগো বৈরো, ওয়াদুঃ লাঃরো লুঃউরোগু প্রলিরি, 29“নাংরো লুঃউ তয়ককো লাঃরো ক্রিগে। ঙা লঃগামা যা লুঃকলিরি, য়াংসুউ আলুংচা ঙাগো প্রপ্রালিরি। য়জংছুগি য়াংসুউ থুউ মশীহ ল?” 30য়জংছুখা রুওয়ামা লুঃউরোচা থুওকরো যীশুবাদুঃ লাঃগেলিরি।
31য়াং আতুওয়ংমা যীশুগো তিবিরোচা আফি থাঃরো প্রগেলিরি, “ছাড়া, খ্যাংচামুছু তুখু চাআ।”
32যীশু য়াংসুউরোগু প্রলিরি, “ঙাকবামা যা আঃচা হিরিলি, য়াং আঃচাগো য়ুউরো নাং মিঃসিমু।”
33য়াংচাগো ক্রারো তিবিরোচা তয়ককো তয়ক প্রগেলিরি, “য়জংছুগি যাসুউ ছাড়াগো তুখুমাসা আঃচা য়ুঃ পিইলৈতি লঃ?” 34য়াংখা যীশু য়াংসুউরোগু প্রলিরি, “যাসু ঙাগো রুওয়েলৈতি, য়াংসুউ ছেংদাগো কৈংখ্রাংনা য়াংসুউ আলুঃউককো তুংজিফুচা ফ্রইতি, ঙাকমা আলুক। 35নাংরো প্রগেতিমু লঃ, ‘অর লিঃলাব্যা, য়াংনক আসিই রুইখিং ফ্রইফুব্যা?’ য়িগিলি ঙা নাংরোগু প্ররি, ম্রাকচি খ্যারো তখক খ্রেংদু ক্রিঃ, আসিই রুইফু তেংব্যা। 36যাসু আসিই রুইতিলি, য়াংসুউ আগুলি লাকখা রাঃরিসি অর তিম্রিজ বাওয়া কিজু আসিইগো লোংরো থাঃরি। য়াংচাকিজু আচিই প্যুওসানা রুইসা নৈইয়কচুং আহ্রিঃ প্যগেতি। 37দিঃ চাঃগামা আম্রাং পিইরিগা, ‘তয়ক আচিই প্যুওরি অর তয়ক রুইতি।’ 38ঙা নাংরোগু প্রফুচাঅং আসিই রুইফু রুওয়েলৈতি, যাচা কিজু নাংরো মুক্রোজাগেলি। আখ্রা লুঃউঃউরো ক্রোজাগেরি অর নাংরো য়াংসুউরো ক্রোজাগেলিরি য়াং আসিইগো রুইকেতি।”
39যা মিকমাচা দিঃচা প্ররো সাকসি পিইলিরিচাগা, য়াং মিঃমা যা লুঃকলিরি, য়াংচারো আলুংচা যীশু য়াং মিঃমাগো প্রপ্রালিরি, য়াংসুউ চাঃগাগো ক্রারো, য়াং রুওয়ামা শমরীয় লুঃউম্যারোচা যীশুগো ক্যুংগেলিরি। 40য়াংসুউরো যীশুবাদুঃ লাঃরো, যীশুগো য়াংসুউরোনা আতু নিংফু কিজু আতংবেং প্রুইকেলিরি। য়াংচা কিজু যীশু য়াংদেমা নৈইরাক নিংলিরি। 41য়াংখা যীশু চাঃগাগো ক্রারো অরলি লুঃউম্যা যীশুগো ক্যুংগেলিরি। 42য়াং মিঃমাগো য়াংসুউরোচা প্রগেলিরি, “ঙারো আগু যা ক্যুংগেতি, য়াংচা নাক চাঃগা আলৈই মুহু, প্রফুছুগি ঙারো কুঃদৈং যীশু চাঃগাগো ক্রারো নাঃলিগেরিচাগা, য়াংসুউ আম্হেং চাংজ লুঃউগো খ্যুয়েসা।”
মাং ভেংদেসাচা কেইংমালিরি
43-44যীশু প্রলিরিচাগা, কোঃ প্রিঃমা রিসিইরো ম্যাকন্হা মাঃরা; য়াং চাঃগা প্রিজুংফু কিজু শমরিয়ামা নৈরাক নিংব্রিনক, যীশু য়াংচাগা গালীল প্রিনিদুঃ লাঃখারি। 45ফুউখিংখা যীশু যিরূশালেংমা যামুছু লুঃউকলিরি, গালীলগা লুঃউরো য়াং ফুউখিং পুয়িইদুঃ লাঃখাগেতি কিজু আলুংচা ম্রাংগেলিরি। য়াংচা কিজু যীশু যাখা গালীলদুঃ লাঃখারি য়াংখা য়াংদেমা লুঃউরো যীশুগো লাক খেংগেলিরি।
46নক্কা যীশু প্রেংরো গালীলমা থুঃউঃ কান্না রুওয়াদুঃ লাঃখারি। য়াংদেমা যীশু রিঃগো চব্যসিই আরিঃ লুঃউকলিরি। গালীল কফরনাহূম ম্রুমা মাং ভেংদে সাঃ তয়ক কাইংথা মকং হিকলিরি। 47যীশু যিহুদীয়াগা গালীলদুঃ লাঃচাগো ক্রারো, থুঃউঃ মাং ভেংদেচা যীশুবাদুঃ লাঃলিইরি অর আতংবেং থাঃলিরিচাগা, যীশুচা কফরনাহুমদুঃ লাঃরো য়াংসুউ সাঃগো কেইংমাজিঞ্যং। য়াংসুউ সাঃচা য়াংখা সিইফুব্যা।
48যীশু য়াং মাং ভেংদেগো প্রলিরি, “তুখুমাসা লাকখানা য়াংচামুহুকিলি তুখুমাসা এংঅফুয়ি অলুক মাম্রাংব্রি, কোবাংরো খ্যাংঞ্যংফ্র মুক্যুংমু।”
49য়াংখা থুঃউঃ মাং ভেংদেচা প্রলিরি, “ওয়াসানা প্রুকলো, ঙাক সাঃ মিসিইখাং হ্রিঃগা লাঃবা।”
50যীশু য়াংসুউগো প্রলিরি, “কোবাং লাঃলি, কোবাং সাঃচা হ্রাংলৈতি।” য়জংছুখা য়াংসুউচা যীশু চাঃগাগো ক্যুংরো প্রেং লাঃখালিরি।
51য়াং মাং ভেংদেচা যাখা ইংদুঃ প্রেংলাঃরি, য়াংখা লেংমা য়াংসুউ ক্যুয়েংরোচা, য়াংসুউবামা লাঃরো প্রগেলিরি, “কোবাং সাঃচা কেইংমাব্যা।”
52য়াংসুউচা ক্যুয়েংরোগু মিংলিরি, “য়াংসুউ যাখা কেইংমালিরিলি?” য়াংসুউরো প্রগেলিরি, “ঞাগা ম্যুয়েংদি তানাড়ি ল্হকমা কেইংমালিরি।”
53য়জংছুখা ফ্যাসা আফাচা তুওয়রালিচাগা, য়াং আখিংমা যীশু য়াংসুউগো প্রলিরি, “কোবাং সাঃচা হ্রাংলৈতি।” য়াংখা য়াং মাং ভেংদেনা ইংসা আলুংসুউ যীশুগো ক্যুংগেলিরি।
54যিহুদীয়াগা গালীল লাঃব্রিনক যীশু দিঃ তুদীয়া এংঅফুয়ি অলুককো লুঃউকলিরি।
Currently Selected:
যোহন 4: BBSRMZ
Highlight
Share
Copy
Want to have your highlights saved across all your devices? Sign up or sign in
