যোহন 10
10
অাস্যাং যীশুরা আম্হেং সাংফঃছিঃ ক্যংসা
1“ঙা কুবাংরোগু আম্হেং প্ররি, খ্যাংসুমুছু সাংফছিঃ খুওয়ালেংগা মুওয়ংব্রি, আখ্রা লেংগা ওয়ংগি য়াংসুউ সুঃখু অর দাম্রা। 2ছুগি যাসু তেংখওয়াগা নিরো আথিঃদু ওয়ংগি য়াংসুউরা ছুঁয়িরো ক্যংসা। 3ছুঁয়িমা খুঃওয়াগু যাসু চংরিলি, য়াংসুউ য়াং ক্যংসাগু তেংখুওয়া লহরো পিরি। ছুঁয়িরো য়াংসুউ খঃচুগো ক্রারি অর য়াং ক্যংসাচা য়াংসুউ কুঃছুঁয়িরোগু নাঃমিথুঃউ খঃরো প্রাংদু য়ুলারি। 4য়াংসুউ কুঃ আলুং ছুঁয়িকু থুঃউপ্রিনক য়াংসুউ হ্রিইগা হ্রিইগা লারি, অর ছুঁয়িরোচা য়াংসুউ নক্কা নক্কা লারি আক্রংগা য়াংসুউরো থুউসু খঃচাগো সিঃরি। 5য়াংসুউরো তাখালি মিসিকরি লুঃউ নক্কা মাঃলা মুহুক, প্রফুছুগিগা য়াংসুউগা প্রেংরো ব্রিইলাফু আক্রংগা য়াংসুউরো মিসিারি লুঃউঃ আসেংগু মিসিক।”
6য়াং ফরীশীরোগু সুয়েংসাংপিফু আতুওয়ক যীশু দিঃ চাগাঃগু প্রলিরি, ছুগি য়াংসুউ যা প্ররিলি, য়াংচাগো তুখুউলি য়াংসুউরো মিসিগেলি। 7য়াং আতওয়ক যীশু প্রেংরো প্রলিরি, “ঙা নাংরোগু আম্হেং প্ররি, ছুঁয়িরো আতুওয়ক ঙারা লেংখুওয়া। 8ঙা হ্রিঃগা যাসুরো লালিরি, য়াংসুউরো আলুংসুউ সুঃখুনা দাম্রা, ছুগি ছুঁয়িরো য়াংসেো চাগাগু নাঃমথংগেলি। 9ঙারা লেংখুওয়া। খ্যাংসুউমুছু ঙা আতুওয়ংগা নিরো আথিঃদু ওয়ংগিরা, য়াংসুউ ক্যুয়েম্রকমি। য়াংসুউ আথিঃদু লাফু অর প্রাংদু লারো প্রাংমা চাফুঃ আঃরা রামিঃ। 10সুঃখু খুফুচাঃরা, সেঃফুনা ফ্যাকফু চিঃমা য়ুউরো লাচা। ঙা লারি আক্রংগা য়াংসুউরো লগা আসাক রাঃঅং, অর য়াং লগা আসাকচা প্রিজুংঅং।”
11ঙারা সিঃসিম্যুঈ ছুঁয়ি ক্যংসা। সিঃসিম্যুঈ ছুঁয়ি ক্যংসা য়াংসুউ ছুঁয়িরো আতুওয়ক আসাক তয়ং পিরি। 12-13যাসু কেবেলে লাকখা আতুওয়ক, ছুঁয়ি ক্যংসুচা য়াংসুউ কুঃদৈং ক্যংসা মুহু অর ছুঁয়িরোলি য়াংসুউচা মুহু। ক্যাগুরোক লারি ম্রাংগি, য়াংসুউ ছুঁয়িরোগু বৈরো ব্রিরিব্রা আক্রংগা য়াংসুউ কেবেলে লাকখা রাঃফু আতুওয়ক দিঃ অলুক্কু লুকুচা অর ছুঁয়িরো আতুওয়কলি মাচেংজা। কিগুরোক য়াংসুউরোগু ফেংয়ুলারি অর ছুঁয়িরো লিফাকলাকচি ক্রাংলারি।
14-15ঙারা সিঃসিম্যুঈ ছুঁয়িক্যংসা। ফাখাং যাপুয়েং ঙাগো সিঃরিলি, য়াং পুয়েং ঙা ফাখাংগু সিঃরি। দিঃ পুয়েং থেথেং ঙা ঙাক ছুঁয়িরোগু সিঃরি, য়াংসুউরোলি ঙাগো সিঃরি। ঙা ঙাক ছুঁয়িরো আতুওয়ক, ঙাক আসাক্কু পিরি।
16আঃরলি ঙামা ছুঁয়ি হিকরিসি, যাচুরোচা দিঃ খুওয়ামা মুহু। য়াংসুউরোগুলি ঙা য়ুউ লারাফু। য়াংসুউরো ঙা খঃচাগু ক্রামি অর য়াংদে ছুঁয়ি তুরুঈমা তয়ক ক্যংসা ফ্রমি। 17ফাখাং য়াং আতুওয়ক ঙাগো খ্যঈতি আক্রংগা ঙা ঙাক আঃসাক পিফু, যাফুলিছুগি য়াং আসাককো প্রেংরো রালৈঅং। 18তয়কলি ঙাগা ঙা আঃসাক য়ুমাঃলা, য়িগিলি ঙা কুদৈং পিফু। ঙামা আঃসাক পিফুলি আঃহিরি, য়ুউফুলি আঃহিকরি। দিঃ তাওয়েংচা ঙা ঙাক ফাখাংগা রাঃচা।
19যীশু দিঃ চাগাঃনা যিহূদীরোমা অরপ্রেংরো আতওয়ক খ্রাগেরি। 20য়াংসুউরো আতুওয়ংমা আম্যালুঃউ প্রগেলিরি, “য়াংসুউগো নেঃ কৈব্যা, য়াংসুউ রুঃব্যা, নাংরো য়াংসুউ চাগাঃগো যাফু নাথংগেতিলি?”
21আখ্রা লুঃউরো প্রগেলিরি, “প্রফুছুগি দিঃ লুঃউ চাগাঃরোগা নেঃ কৈচা লুঃউঞ্যং মুহু। নেঃ একেইং লুঃউগো ফুওয়ংনৈলঃ?”
আস্যাং যীশু আতংবেং
22য়াংনক যিরূশালেম্মা ওয়িপাসানা ক্যং তিরিঃরাক ক্যাহ্লারি। য়াংখা আখেইংরাক হিকলিরি। 23যীশু ওয়িপাসা ক্যং আতুওয়ংমা শলোমন প্রঃমা জাংব্রেং সুওয়ারো হিকলিরি। 24য়াং আখিংমা যিহূদী গংখ্যুকরো যীশু লিফাকলাকচি ওয়েংরো প্রগেলিরি, “নাং অর মহ্নরাক ঙারোগু আথাংমা থাঃফুলি? নাংরা মশীহ ছুগি, আব্রিচি ঙুরোগু প্রঃ।”
25যীশু আফ্রিমা প্রলিরি, “ঙাগা কুবাংরোগু আম্হেং প্ররি, য়িগিলি কুবাংরো মক্যুংগে। ঙা ফাখাংগু নাঃমি থুউরো ঙা প্ররি, ঙা যা অলুকরোগু লুকতিলি য়াংচারো ঙা আক্রংলিলাগু সাকসি পিরি। 26ছুগি কুবাংরো মক্যুংগে, আক্রংগা কুবাংরো ঙা ছুঁয়ি মুহু। 27ঙাক ছুঁয়িরো ঙা খঃচাগো ক্রারি। ঙা য়াংসুউরোগু সিঃরি অর য়াংসুউরো ঙা নক্কা নক্কা লারি। 28ঙা য়াংসুউরোগু তিম্রিজ আসাক্কু পিরি। য়াংসুউরো তাখালি মাপ্যাকব্যা অর তয়কলি য়াংসুউরোগু ঙা আলাক্কা লুকরো ময়ুনৈব্যা। 29ঙা ফাখাং, যাসু য়াংসুউরোগু ঙাগো পিলিরি, য়াংসুউ আলুংসুথাক আগ্রি। তয়কলি ফাখাং আলাক্কা তুখুউলি লুক মুয়ুনৈ। 30ঙানা ফাখাং তয়কতৈব্যা।”
31য়াংখা যিহূদী গংখ্যুকরো প্রেংরো যীশুগো বৈফু আতুওয়ক ক্যক কক্কেলিরি। 32যীশু য়াংসুউরোগু প্রলিরি, “ফাখাং অলুক পিঞ্যং আম্যা আকং আকং অলুক ঙা কুবাংরোগু প্রালৈতি। য়াং আতুওয়ংমা যা অলুক কিজু কুবাংরো ঙাগো ক্যক বৈখেংগেতিলি?”
33গংখ্যুকরো আফ্রিমা প্রগেলিরি, “আকং অলুক আতুওয়ক ঙারো নাক্কু ক্যক মবৈ য়িগিলি নাং থাওরা ফোরাগু ঞ্যচি লুকতি আতুওয়ক ক্যক বৈচা। লুঃউ ফৈরো নাং কুঃগো থাওরা ফোরা খেংরি।”
34যীশু প্রলিরি, “কুবাংরো থুংজৈমা রুঈরো মিহিলঃ, ‘ঙা প্রলিরি, নাংরোরা তাথেং থাওরা ফোরা’? 35সাগ্রা সাঃসানা যাসুরোবামা লালিরি, য়াংসুউরোগু থাওরা ফোরাঞ্যং প্রলিরি। সেংস্যাংস কেইংচাউ চাগাঃগু পিনৈলঃ? মিপিনৈ। 36য়জংছুগি ফাখাং কুঃ আতুওয়ক যাসুউগো আঃখ্রা লুকলিইরি অর লঃগাদু রুওয়েলৈতি, য়াংসুউ ঙা যাখা প্রলিরি, ‘ঙা সাগ্রামা সাঃ,’ য়াংখা কুবাংরো যা পুওয়েং প্রগেলিরিলি, ‘নাং থাওরা ফোরাগো ছেংগ্যাংফাক লুকতি?’ 37ঙা ফাখাং অলুক্কু ঙারা মুলুকছুগিরা কুবাংরো ঙাগো মুক্যুংগেমু। 38প্রফুছুগি ঙা তুওয়কতিরাছুগি, য়িগিলি ঙাগো মক্যুংগি ঙাক অঃলুঃউক্বু ম্রাংরোগা ক্যুংগে। য়াংখা কুবাংরো সিঃরো নাঃলিমিচাগা, ফাখাং ঙা আতুওয়ংমা হিরি অর ঙা ফাখাংমা হিরি।”
39য়াংখা প্রেংরো যিহূদী গংখ্যুকরো যীশুগো তিঃফু ক্রেংগেলিরি, য়িগিলি যীশু য়াংসুউরোগা খ্যরো লাখারি। 40য়াংনক যীশু প্রেংরো যর্দন খ্যং তাঃফাক্কা লারো নিলিরি। য়াংদেমা পাথামা যোহন রিঙুক মাঙ্গালা পিলিরি। 41আম্যা লুঃউ যীশুবাদুঃ লাগেলিরি অর তয়ক্কু তয়ক্কু প্রগেলিরি, “যোহনগা তখুলি এংঅফুয়ি অলুক মুলুকলি হকতি, য়িগিলি য়াংসুউ দিঃ অলুক আক্রংলিলাগু যা যা প্রলিরি আলুংচা ম্হেংরি।” 42অর য়াংমা আম্যা লুঃউ যীশুগো ক্যুংগেলিরি।
Currently Selected:
যোহন 10: BBSRMZ
Highlight
Share
Copy
Want to have your highlights saved across all your devices? Sign up or sign in
