Late 58
58
Migilote tungah Thuk ding Ngetna
1No gam ukte aw, a manin thu na khen uh hiam? Note in mi khempeuh thu a tangin na khen uh hiam?
2Hi peuhmah lo hi, na lungsim uh ah aman lo na ngaihsun uh a, gam sungah ngongtatna na gamta uh hi.
3Migilote, a khan’ tawntungin khial uh hi, a suah tung mah-un lam khial pah uh a, zuauthu gen uh hi.
4-5Amaute in gulpi’ gu bang gu nei uh a, a khiimte’ aw ahi zongin, a zol siamte’ aw ahi zongin a za lo, gul bengngong tawh kibang uh hi.
6Pasian aw, amau kam sunga hate sutan in la, humpinelkai khanglai hatute botkhia in, Topa aw.
7Tui luangkhiate bangin amaute mangthangsak in la, lopa bangin amaute kituancil-in keutumsak in.
8Amaute, a naai a bei toktol, a hun cing loin a nausuak, ni a mu ngei lote bangsak in.
9Na beelte in lingkung kuang pen sa a sak ma-in, a hing a keu-in amah in tuate phiatkhia mang hen!
10Heh thukna a muh ciangin thuman mipa lungdam ding a, migilote’ si sungah amah in a khete sil ding hi.
11Mite in, “Thuman mi’ ading noptuamna om taktak a, leitunga thukhen Pasian khat om taktak hi,” ci ding uh hi.
Currently Selected:
Late 58: TB77
Highlight
Share
Copy
Want to have your highlights saved across all your devices? Sign up or sign in
Tedim Bible © Bible Society of Myanmar, 1977.
