Luka 22
22
Zeisu A Kisawmna
1Paisan kici silngo om lo khomun pawikham ding a nai zo hi. 2Siampi liante leh laitheite in Zeisu bangci thatlum ding ci-in a zong uh hi. Bang hang hiam i cih leh, amaute in mite a kihta uh hi.
3Tua lai takin Satan in sawm-le-nihte lakah khat Iskariot kici Judah sungah a lut hi. 4Amah siampi liante leh biakna innpi palik mangte kiangah va pai a, amaute khut tungah Zeisu bangci piak theih ding ci-in a vaihawm uh hi. 5Amaute nuam uh a, “Dangka-in kong guai ding uh hi,” ci-in a kiciam uh hi. 6Amah in zong mang a, mihonpi a om loh lai takin Topa amaute khut tungah a piak theih nading a zong hi.
Zeisu In A Nungzuite Tawh Paisan Pawi Ne
7-8Paisan tuuno a kigawh nading, silngo om lo khomun nek pawikham ni a tun’ ciangin Zeisu in Piter leh Johan kiangah, “Pai un la, Paisan pawi an nek ding na bawl un,” ci-in a sawl hi, 9amau in, “Koi lai takah hong bawlsak le-ung na deih hiam?” ci-in a dong uh hi. 10Zeisu in, “Khua sungah na tum uh ciangin, tuibeel a pua mi khat tawh na kituak ding uh hi. Tua mi a lutna inn sungah na zui un la, 11inn neipa kiangah, ‘Sia in, Keimah in ka nungzuite tawh Paisan pawi ka nek nadingin zin tun’na inndei koi lai-ah a om hiam? a ci hi,’ ci-in na gen un. 12Tua mi in a kibawlsa dei tungnung a lian khat hong lak ding hi. Tua dei sungah na bawl khol un,” ci-in a sawl hi. 13Amaute pai uh a, Zeisu gen mah bangin a mu uh a; Paisan pawi nek ding a bawl uh hi.
14A hun a tun’ ciangin Zeisu in a sawltakte tawh a tukhawm hi.
Nekkhawm Bawlna A Pian’na
15Zeisu in, “Ka sih ma-in hih Paisan pawi note tawh nekkhop ka ut mahmah hi. 16Ke’n kong cih-inah, Pasian’ Gam sungah deihna a kicin’ matengin, hih pawi ka ne nawn kei ding hi,” a ci hi. 17Tua lai takin Zeisu in hai la a, hehpihna a phat khit ciangin, “Hih hai la un la, note lakah na hawm tek un. 18Bang hang hiam na cih uh leh, Pasian’ Gam a hong tun’ matengin tu-a kipan, leenggahtui ka dawn nawn kei ding hi,” a ci hi. 19Amah in khomun la a, hehpihna a phat khit ciangin, khomun balnenin, “Hih khomun in note ading a kipia ka pumpi ahi hi. Kei nong ngaihsut nadingun hih bangin na hih un,” ci-in a nungzuite a pia hi. 20Tua mah bangin an a nek khit uh ciangin hai la a, “Hih hai in note ading a kibua, kiciamna thak a lak ka si ahi hi. 21Ahih hangin kei hong lehheekpa’ khut in sabuai tungah keima khut tawh a omkhawm hi. 22Mihing Tapa in a kisehkhol mah bangin a pai ding hi. Ahih hangin amah a lehheekpa in gimna a thuak ding hi,” a ci hi. 23A nungzuite in, “Hih ahih ding kua ahi hiam?” ci-in khat leh khat a kidong uh hi.
Liatna Thu Kiseelna
24Amaute lakah kua lianbel hiam? ci-in nungzuite khat leh khat a kiseel uh hi. 25Zeisu in, “Gentaile’ hausate in amau tungah a mang uh a; amau tungah a ukte mi hehpihpa a ci uh hi. 26Ahih hangin note tua bang na hi kei ding uh hi. Note lakah a lianpen in a neupen bangin om ta hen. A makaipa in nasem bangin om ta hen. 27Kua lianzaw hiam: sabuai ah tupa lianzaw hiam? Nasempa lianzaw hiam? Sabuai ah a tupa lianzaw hilo ahi hiam? ahih hangin note lakah nasempa mah bangin ka om hi. 28Gimna ka thuak lai takin, note in kei tawh hong omkhawm mi na hi uh hi. 29Ka pa in Kumpi Gam khat hong piak mah bangin; 30note zong keima Gam sungah ka sabuai ah an ne-in tui na dawn theih nadingun note thu kong pia ding hi. Note in thukhen tokhom tungah tu-in, Israel mipawl sawm leh nihte tungah thu na khen ding uh hi,” a ci hi.
Piter’ Nialna Kigenkhol
31Zeisu in, “Simon, Simon aw, Satan in buhhum bangin nang hong haih nuam hi. 32Ahih hangin nangma upna a siat loh nadingin ke’n thu kong ngetsak zo hi. Na kikheel kik khit ciangin ute naute na kipsak in,” a ci hi. 33Simon in, “Topa aw, thong kiatna ahi zongin, sihna ahi zongin nang tawh ka thuakkhawm ngam ding hi,” a ci hi. 34Zeisu in, “Piter aw, ke’n kong cih-inah, nangmah in, ‘Ke’n ka thei kei hi,’ ci-in kei thumvei nong nial matengin, tuni-in aak a khuang kei ding hi,” a ci hi.
Dangka-ip, Thung-ip leh Namsau
35Khatvei Zeisu in, “Dangka-ip, thung-ip, khedapte keng loin note kong sawl lai-in, na sapna uh a om hiam?” ci-in a dot ciangin, “Sapna khat beek a om kei hi,” a ci uh hi. 36“Tu-in ahih leh, dangka-ip a nei mi in la ta hen. Tua mah bangin thung-ip a nei mi in la ta hen. Namsau a nei lo mi in a puan zuak hen la, namsau lei ta hen. 37Ke’n kong cih-inah, ‘Amah mawhneite tawh a kisimkhawm ding hi,’ ci-in Lai Siangtho sungah a kigelhna thu in keima tungah hong tung ding hi. Bang hang hiam na cih uh leh, keima thu khempeuh in a tangtung ding hi,” a ci hi. 38Amaute in, “Topa aw, namsau nih a om hi,” a cih uh ciangin, “Pha hi,” a ci hi.
Zeisu In Oliv Mual Tungah Thungen
39Tua lai takin Zeisu paikhia a, a ngeina bangin Oliv Mual tungah kahto a, a nungzuite in a zui uh hi. 40Tua mun a tun’ ciangin, “Kheemna tawh na kipelh theih nadingun thu na ngen un,” a cih khit ciangin, 41a nungzuite tawh suang lot khat tan bang kikhen a, 42khukdin’in, “Pa aw, na deih leh, hih hai kei tawh hong kipelhsak in. Ahih hangin keima deihna bang hi kei hen; nangma deihna bang hi ta hen,” ci-in thu a ngen hi. 43Vantung panin vantungmi khat hong pai a, Zeisu’ tha a hatsak hi. 44Amah gim mahmah ahih ciangin, nakpi-in thungen a, a khua-ul in lei tungah sisan malgol bangin a kia hi. 45Thu a nget khit ciangin tho a, a nungzuite kiangah a paikik ciangin, amaute dahna tawh ihmu a om uh a mu hi. 46Amaute kiangah, “Note in bang hangin ihmu na hi uh hiam? Tho un la, kheemna tawh na kipelh theih nadingun thu na ngen un,” a ci hi.
Zeisu A Kilehhekna Leh Kimatna
47Zeisu in a gen lai takin mihonpi hong pai uh a, nungzui sawm-le-nihte lakah khat Judah kici in amai ah a pai hi. Zeisu nam dingin a kiangah a va naih ciangin, 48Zeisu in, “Judah aw, nang in napna tawh Mihing Tapa na lehhek ding hiam?” ci-in a dong hi. 49Zeisu kimkot ah a omte in a piang ding thu a theih uh ciangin, “Topa aw, kote in namsau tawh ka sat ding uh hiam?” a ci uh hi. 50Khat in siampi ukpa’ nasem khat a sat leh, a bil taklam a satkhia hi. 51Zeisu in, “Tua zah hisak in,” ci-a a bil a khut tawh lawngin a damsak hi. 52Tua ciangin Zeisu in amah man dinga hong pai siampi liante, biakna inn mangte leh upate kiangah, “Note in galgumat bangin kei man dingin namsau leh molhtumte tawi-in hong pai na hi uh hiam? 53Keimah in ni simin biakna innpi sungah note tawh ka omkhop lai takin na hong man kei uh hi. Ahih hangin hih hun in note hun leh khuamial’ vangliatna hun ahi hi,” a ci hi.
Piter In Zeisu Nial
54Amaute in Zeisu man uh a, siampi ukpa’ innah a paipih uh hi. Piter in gamla sim kihalin a zui hi. 55Amaute in inntual lai zangah mei cih uh a, a tutkhawm khit uh ciangin, Piter zong amau lakah a tu hi. 56Piter mei awi-a om numeino khat in a muh ciangin lim takin en a, “Hih mi in Zeisu tawh a kipawl hi,” a ci hi. 57Piter in, “Numei aw, tua pa ke’n ka thei kei hi,” ci-in a nial hi. 58Tua nung a sawt loin midang khat in Piter mu a, “Hua mite khat na hi hi,” a ci hi. Piter in, “Lawm aw, ka hi kei hi,” a ci hi. 59Tua nung nai khat bang ciangin midang khat in, “Hih mi in Zeisu tawh a kipawl takpi hi. Bang hang hiam na cih uh leh, amah in Galile mi ahi hi,” ci-in uphuaina tawh a ci hi. 60Piter in, “Lawm aw, nang na cih pen ke’n ka thei kei hi,” a ci hi. A gen lai takin thakhat mahin aak a khuang pah hi. 61Tua lai takin Topa kihei-in Piter a en hi. Piter in, “Tuni-in aak a khuan’ ma-in nang in thumvei nong nial ding hi,” Topa in a cihna thu a phawk kik hi. 62Amah pusuak a, nakpi-in a kap hi.
Zeisu Kizahkoin Kisat
63Zeisu a len mite in amah zahkoin a sat uh hi. 64A maitang a tuam khit uh ciangin, “Nang kua in hong beeng hiam? Kamsangte bangin hong gen in,” a ci uh hi. 65Kam dang tampi tawh Zeisu lang pangin a zahko uh hi.
Upate Mai-ah Zeisu
66Khua a vak ciangin mite lakah upate, siampi liante leh laitheite kikhawm uh a, Zeisu amau zumah a paipih uh hi. 67“Nang Khazih na hih leh, kote hong hilh in,” a cih uh ciangin, “Ke’n kong gen leh, nong um kei ding uh hi. 68Ke’n kong dot leh, nong dawng kik kei ding uh hi. 69Ahih hangin tu-a kipanin Mihing Tapa in Pasian’ vangliatna ziat lamah a tu ding hi,” a ci hi. 70Amaute khempeuh in, “Tua ahih leh, Pasian’ Tapa na hi hiam?” ci-in a dong uh hi. Zeisu in, “Na gen bangun ka hi hi,” a ci hi. 71Tua lai takin amaute in, “Adang bang teci thu deih lai i hi hiam? Ama kam pan eite in i thei zo hi,” a ci uh hi.
Currently Selected:
Luka 22: TB77
Highlight
Share
Copy
Want to have your highlights saved across all your devices? Sign up or sign in
Tedim Bible © Bible Society of Myanmar, 1977.
