Johan 4

Zeisu Leh Samaria Numei

1Zeisu in Johan sangin nungzui tamzaw a suahsakna leh a baptaiz thu, Farisaite in thei cih Topa in a theih ciangin, 2Judah gam pan Galile gamah a paikik hi. 3Ahih hangin Zeisu in a baptaiz kei hi; a nungzuite in a baptaiz uh hi. 4Amah in Samaria gam paltan a; 5Jakob in a tapa Josef a piak lo cing khat tawh kinai, Samaria gam Saikhar kici khua-ah a tung hi. 6Tua munah Jakob’ tuikhuk a om hi. Tua ahih ciangin, Zeisu a lam paina gim ahih ciangin tuikhuk gei-ah a tu hi. Tua hun in sun laitak ahi hi.

7Samaria numei khat in tuitawi dingin hong pai ciangin Zeisu in, “Ka dawn ding tui hong pia in,” ci-in a ngen hi. 8Bang hang hih bangin ngen hiam i cih leh, a nungzuite an lei dingin khua sungah a pai khin zo uh hi. 9Samaria numei in, “Nang Judah mi na hi napi-in kei Samaria numei kiangah bang hangin tui dawn ding hong ngen na hi hiam?” a ci hi. Bang hang hiam i cih leh, Judah mite in Samaria mite tawh a kihopih thei kei uh hi. 10Zeisu in, “Pasian’ hehpihna leh ‘Dawn ding tui hong pia in,’ ci-a hong ngenpa kua mi ahih thei le-cin ama kiangah tui na ngen ding a, amah in nuntakna tui a hong pia ding hi,” a ci hi. 11Numei in, “Topa aw, nangmah in tui dip nading na nei kei hi. Tuikhuk lah a thuk hi. Tua nuntakna tui bangci ngah ding na hi hiam? 12Hih tuikhuk hong piapa leh, amah akipan a tate leh a ganhingte in a dawn uh i pu Jakob sangin na lianzaw hiam?” ci-in a dawng hi. 13Zeisu in, “Hih tui a dawn mi khempeuh in a nung ciangin tui a duh kik ding uh hi. 14Ahih hangin ke’n ka piak tui a dawnte in a tawntungin a dangtak nawn kei ding hi. Ke’n ka piaksa tui in tua mi sungah nuntak tawntungna tuikhukin a piang ding hi,” a ci hi. 15Numei in, “Topa aw, kei in tui ka duh nawn loh nadingin ahi zongin, tuitawi dingin hihsan takah kong pai nawn loh nading ahi zongin tua tui hong pia in,” ci-in a ngen hi.

16Zeisu in, “Pai in, na pasal sam in la, hong paikik in,” a ci hi. 17Numei in, “Ke’n pasal ka nei kei hi,” a cih ciangin Zeisu in, “Pasal ka nei kei hi,’ na cihna thu aman hi. 18Bang hang hiam na cih leh, pasal nga na nei ngei zo hi. Tu-a na neih mi in na pasal ahi kei hi. Hih thu aman takpi-in na gen hi,” a ci hi. 19Numei in, “Topa aw, nangmah in Pasian’ kamsangpa na hih lam ka thei hi. 20Ka pute ka pate un hih mual tungah Pasian a bia ngei uh hi. Note in ahih leh, ‘Jerusalem khua bekah mite in Pasian a bia ding uh hi,’ na ci uh hi,” a ci hi. 21Zeisu in, “Numei aw, ka thu hong um in. Hih mual tungah ahi zongin, Jerusalem khua sungah ahi zongin Pa Pasian na biak loh nading uh hun hong tung ding hi. 22Note in na theih lohpi uh na bia uh hi. Kote in ka theih uh ka bia uh hi. Bang hang hiam na cih leh, Judah mite sung pan gupna a piang hi. 23A bia taktakte in Kha leh thuman thutak tawh, Pa Pasian a biak ding uh hun hong tung ding tham loin a hong tung zo hi. Bang hang hiam na cih leh, Pa Pasian in amah bia dingin tua bang mite a zong hi. 24Pasian in Kha ahi hi. Amah a biate in Kha leh thuman thutak tawh a bia ding uh hi,” ci-in a gen hi. 25Numei in, “Khazih kici Messiah hong tung ding ke’n ka thei hi. Amah hong tun’ ciangin thu khempeuh hong hilh ding hi,” a ci hi. 26Zeisu in, “Nang tawh a kiho keimah in Messiah ka hi hi,” a ci hi.

27Tua ciangin ama nungzuite hong pai uh a, numei tawh a kihopihna lamdang a sa uh hi. Ahih hangin, “Bang deih na hi hiam? Tua numei tawh bang hangin thugen na hi hiam?” ci-in kuamah in a dong ngam kei uh hi. 28Numei in a tuiphel nusia-in, khua sungah ciah a; 29“Hong pai un la, ka gamtatna khempeuh hong lakpa en un. Tua pa in Khazih ahi hiam?” ci-in mite kiangah a ko hi. 30Amaute khua sung pan paikhia uh a, a kiangah a pai uh hi.

31Amaute a tun’ ma-in a nungzuite in, “Rabbi aw, an ne in,” a ci uh hi. 32Zeisu in, “Note theih loh an nek ding ka nei hi,” a ci hi. 33Tua ahih ciangin a nungzuite in, “Mi khatpeuh in an nek ding hong puak zo hiam?” ci-in khat leh khat a kikum uh hi. 34Zeisu in, “Keimah hong sawlpa’ deihna bang hih a, ama nasepna ka zawhna in ka an nekna ahi hi. 35Tu-a kipan kha li ciangin buh at a hun ding hi, ci thei hilo na hi uh hiam? Ke’n kong cih-inah, buh min zo a, a at hun ta hi ci-in khua dakin en un. 36Buh atte in thaman ngah thei a, nuntak tawntung nadingin gah a khawm ding uh hi. Tua bang ahih ciangin, a vawhte leh a atte a lungdam khawm ding uh hi. 37Tua ahih ciangin, ‘Mi khat in a vawh hi; midang in a at hi,’ a cihna thu a man hi. 38Lo na khawh lohna uh ah buh at dingin ke’n note kong sawl hi. Midangte in a kho uh a, note in amau sepna-ah na tum zo uh hi,” a ci hi.

39Numei in, “Ka gamtatna khempeuh hong lak hi,” ci-a teci a pan’na thu hangin tua Samaria khuami tampite in Zeisu thu a um uh hi. 40Tua hi a, Samaria mite a kiangah a tun’ uh ciangin, amau khua-ah a tam nadingin a thuum uh ciangin ni nih a tam hi. 41Ama thu hangin mi tampi in a up beh uh hi. 42Amaute in numei kiangah, “Tu-in ahih leh, kote in na genna hangin um ka hi kei uh hi. Kote in zong ka za teekteek uh a, hih pa in leitung mite’ Gumpa ahi takpi hi ci-in ka thei uh hi,” a ci uh hi.

Zeisu In Upa Khat’ Tapa Damsak

43Zeisu in ni nih ciangin tua mun pan paikhia a, Galile gam a tung hi. 44Bang hang hiam i cih leh, Zeisu in, “Kamsangpa in ama omna gamah minthan’na ngah lo hi,” ci-in a tel takpi-in a gen hi. 45Tua ahih ciangin, Galile gam a tun’ ciangin Galile mite in amah a ngai uh hi. Bang hang hiam i cih leh, Jerusalem khua pawikhamna-ah a bawl nate khempeuh a mu uh hi. Bang hang hiam i cih leh, tuate zong pawikhamna-ah a pai uh hi.

46Tui leenggahtui a suah sakna mun; Galile gam Kana khua-ah a paikik hi. Tua lai takin Kapernaum khua-ah upa khat’ tapa cina-in a om hi. 47Zeisu in Judah gam pan Galile gamah a tun’ tua pa in a zak ciangin ama kiangah pai a, hong paisukin a si dektak a tapa a damsak nadingin a thuum hi. 48Zeisu in, “Note in nalamdang leh lim na muh kei uh leh, na um kei ding uh hi.” a cih ciangin, 49upa in, “Topa aw, ka tapa a sih ma-in hong paisuk in,” a ci hi. 50Zeisu in, “Ciah in, na tapa a nungta ding hi,” a ci hi. Tua pa in Zeisu’ thupiakna umin a ciah hi. 51Amah lampi-ah a paisuk lai takin a silate in hong dawn uh a, “Na tapa a dam zo hi topa aw,” ci-in a ko uh hi. 52Tua ahih ciangin, “Bang hunin a noptuam a kipan hiam?” ci-in a dot ciangin amau in, “Zanni-in nai sawm leh nai khat lai takin a natna a dam hi,” a ci uh hi. 53Tua hun in, “Na tapa a nungta ding hi,” ci-in Zeisu in a cih hun ahi hi ci-in a theih ciangin, amah akipan a innkuanpihte khempeuh tawh Zeisu thu a um uh hi. 54Hih nalamdang Zeisu in Judah gam panin Galile gamah hong tun’ khit ciangin a bawl nihveina ahi hi.

Currently Selected:

Johan 4: TB77

Highlight

Copy