SHOLAMON NGHAUI" CAUNG: 5
5
Zoqae: pho"
1Nga" zoqae: myhi"- nga" myhi" sag' we"-
ngo wa nga" shikhyae khug khyo vao lo va". Xeim: ngam" cid' we' mura re zhang: yu: na:- ngo wa nga" byoyhid we' byoyhid khai" re zo: shaug' na: ngo wa nga" sabyi qang: we' nug' re shaug' na:- ngo wa nga" bin: khyae khyo vao ye: va".
Zoqae: myhi" qe-
Zoqae: pho" we"- nao wa jhid'de; myid: yang yid sho' zo: wa,- shaug' wa,.
Byid Lam: Ein: Lam: nghaui" caung:
Zoqae: myhi"
2Ngo- yab; jo; au: re nga" nhag' lam: wa gyang: so" na: jo;-
nga" zoqae: pho" kham: li" ko' rure yab mo, myao:-
Zoqae: pho"
Nga" zoqae: myhi" we"- nga" nhag' de,-
nga" phaung" kyug' we"- ngore vao nhao la, nga" au: wa nghin: yang jhug' byaug va".
nga" nho: xae re: nghin coe" yang jhug' dag: jo, va".
Zoqae: myhi"
3Ngo wa bau: qhang bin: khyad' pye' va".
Ngo pe"mung: mai bau: dam: ve, qo nae" i?
ngo wa nga" khyid bin: cid' ci va". Aijham re ngo pe"mung: dam: zai" lhag' nhao nae" i?
4Nga" zoqae: pho" wa- yao" lo, re kham: dung: mae jhoe" ke' ra"
yao: wa ngojhao" te' li" lao" ngo gyo, shi: qid qid ga" ra".
5Ngo wa yao: re vao nhao nae" za: ngad va"
kham: kyao" lo, zaui: mae zhab' ci: re nga" nho: lo, jham wa mura gyad ci va"-
nga" lo,nyhug' jham mae mura qang: dag va".
6Ngo wa nga" zoqae: pho" re kham: phung" byid: va".
Ngadqere: yao: wa lo" byaug va" yao" thoe re ngo gyo: nug: va" lhe"-
yao: re ngo cao" qho: ngadqere: yao: re ngo maqhug' qho- yao: re ngo yao qere: tau: thoe ngo mathe' gyo:-
7Vomo" lhaug' gam" qin" mo, ngore the' myao: ako".
Yao: bam wa ngore be; khyad' yang: dae te' ako".
Vomo" vang lhaug' mo, wa nga" lang yang" pin: re cad' pye' ako".
8Yerusalem mae" myiqe: qe we"-
nga" zoqae: pho" re naonhaung" the' myao ko" re
yao: re ngo jhid'de; yang: qam: nang" jo; rure naonhaung" yao: re ta" kyo: genae" ein: rure ngore dao:so: byid: gela,.
Zoqae: myhi"
9Myiqe: qemae" yaung" thao" yaug we"-
ni" nho: zoqae: pho" wa gatau yaug khao: ngo" we' shai" i?
ngonhaung" wa- ngonhaung" dao:so: re byid: naesho' yao" khyo we' sin: yang: gyai mug' nae" pe" jo; ra" i?
Zoqae: myhi"
10Nga" zoqae: pho" wa yaung" ru we' qam: bo: ra"-
yao: wa datug mae dayaug za: bo yaug ngad:-
11Yao" nho: myo,khung: wa gyid: we' dakhyo: myhaug' myhaug' jhad' jhad' mung: ra"-
yao" xae wa dajhid' kaui mung: kano, we' dakhyo: no; ra".
12Yao" nho: myo,jid' jham wa qid gyaung: zo: nhae mae" phaung" kyug' jham we' dakhyo: yaung" ra".
Nung: nug' yang cid' pye' mung: qid zo: gyaung: mae ye; jo; ra" phaung" kyug' jham ru: ngad: ako".
13Yao" nho: boqae jham wa mocid' gae jham we' xeim: ngam" cid' gae jham byang" sho' yaug: jo; ra" khyae we' dakhyo: qu" yaung" taung" ngad: ra".
Yao" nho: nhad' qid wa mura qang" yang dag: jhug' ra" nghin bin: jham we' dau: ra".
14Yao" nho: lo, wa dau nyang" za: ngad: ra". Aimung: yao: wa phug' de; ra" laugsin" te' to" ra" lo, pin: pin" ci: ra".
Yao" nho: gaung wa laugsin" nyhug te' to: mung: jhad' jhad' mung: ra" xao zaui we' dau: ra".
15Yao" nho: paung daung: wa qhang lham" to" ra" laug gyang" zang baung: ngad: ra".
Yao: wa shaug' gae mo" jham yaug: ngoe' to" ra" Lebanon bam jham we' dakhyo: phungbao bo: ra".
16Yao" nho: nhad' wa bobaug baug nug dataung: ngad: ra".
Yao: we' sin" ra" khyo alhab' wa ngore maung: pye' va".
Yerusalem mae" myiqe: qe we"- nga" nho: zoqae: pho" wa- ceru we' dau: ra".
Currently Selected:
SHOLAMON NGHAUI" CAUNG: 5: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009
