MIKHA 6
6
Israel Re Asang Yang Qobo Zhaug' Ru
1Israel qere qobo zhaug' ra" Asang: mung mau" re tae" gyo: ge,. O" Asang we"- to" wa,- amung: ni" mung mau" re ta" qu" wa,-
nao ta" rure bam jham we' bug gaung jham gyo" yu vageshao:-
2Bam jham- myid: gaung: nho: apyad ato: apan aqao: jham naonhaung" we"- Asang: nho: mung mau" re tae" gyo: ge,- Asang wa yao" byumyu" qere qobo zhaug' na: ra". Yao: wa Israel qere qobo zhaug' nae" ngad va".
3 Asang wa- nga" byumyu" qe we"- ngoyang naonhaung" re pe" kad' byid: va" i? Ngo wa naonhaung" qhid' mae" qola: boe" lai: lo va i? Ngo re phyid: kyo: gela,- 4Ngo wa naonhaung" re Egutu mae" jhui" thug' yu va". Ngo wa naonhaung" re jeim doe; na: rumae" khyad yu va". Ngo wa naonhaung" re jhui" au: shae nae" qhid' mae" Moshe- Arun we' Miriam re nhao: ke' byid: va". 5Nga" byumyu" qe we"- Moba kho:kham Balag yang naonhaung" re khoru kad' nae" seim" ru we' Beo yao: zo: Balam yang yao: re khoru: phaug' tau" rure myid: beim: ge,. Akakia jamu jo, qo zaung mae" Gilgala joe" sho' gyaung: khyo mae boe" lo: ra" khyo jham re myid: beim: ge,. Cejham re myid: beim" ngad: re naonhaung" re khyad' yu nae" qhid' mae" ngo pe" kad' va" rure naonhaung" beim: so" lo genae".
Asang Mho' Ra" Ja:
6Ngo Asang re caung:pa" nae" li" au: mug:gaung mae" Mao"So Asang jhao" pe" ciye: nae" laug i? Yao: re phad' ngaui" byid: nae" qhid' mae" gai: thao" ra" nung: jaung nau" ciye: nae" laug i? 7Asang jhao" yao lo: ataung atug dau: we' magan: mago" ra" zhanlun xau qid zo: gyaung: ciye" re Asang o ngaui nae" laug i? Nga" qobo jham: nho: aphug' xe' nae" qhid' mae" nga" zoqhid' re yao: jhao" ye: ngaui" byid: ca" nae" i? 8Mangad:- Asang wa gai: ra" ja: pe" ngad: rure ngonhaung" re ta" to: va". Yao" yang ngonhaung" re mho' ru wa ce: ngad ra". Tarha" din:man" ru kad' nae"- mabaui mabyo; ra" jhid'de; myid re qhu" byid: nae" we' nhag' lam: nyham: khyo" mung: ngonhaung" nho: Mao"So we' zam" khug: na nae" ru ngad: ra".
9 Asang re gyaug: phug' ru wa pha,jhi" bo: ra" khyo ngad: ra". Yao: wa vomo" re- vomo" mae zang" ham: na mo, we"- tae" gyo: ge,- ga: ta" ra". 10Makhyang: mashab: ra" mo; yham khug mae madangman" ra" khyo" qo" yu: to" ra" jo,nho" jham jo; ra". Yao: bam wa ngo nghang" ra" maman" ra" jo, lag ci: ako". 11Maman" ra" jao we' jao laug: jham ci mo, re ngo: khoru: qobo qo" khyad' byid: nae" i? 12Naonhaung" mae" jo,nho" qo" mo, wa myaung mo, re anyaug phyid' zo: gemung: naonhaung" alhab' mo, wa mhug' hab' qe ngad: ako". 13Aimung: naonhaung" qobo jham: ra" mathao mae ngo wa naonhaung" nho: byo; qeim: lo" khyo re qhid: to: va". 14Naonhaung" wa zo: qere: magyi: genae" gaigai: yao: naonhaung" wa moe; za: amoe; na: shi: genae". Naonhaung" wa zai jham re tai: yu: lo" ngadqere: maqo" sang: ci: genae". Naonhaung" qo" sang: to" rure ngo: yang mang: zin: jao: mae phyo' qheim" pye' byid: nae". 15Naonhaung" wa qhovo: qho: gengadqere: maqo" jham" yu genae". Naonhaung" wa zhanlun xau: re pyag' ngadqere: ai xau khonhae" re: maqo" ci genae". Naonhaung" wa sabyi qang: kad' qere: aire khonhae" re maqhug' shaug' genae". 16Naonhaung" wa Omri kho:kham we' yao: zo: kho:kham Ahab nho: makhyang: mashab: ra" mau" zo" mae bocao" ko" ra" mathao mae ceru: boe" lo nae". Naonhaung" wa yao: shid' pha" akhyo: jham re xo' kad' gemung: ngoyang naonhaung" re byo; qeim nhao lao" yaug khao: ngo" wa naonhaung" re qu" nghang" li" genae". Khyi" khao: ngo" mae" byu qe wa naonhaung" re manug makhyad' kad' li" genae"- ga: ta" ra".
Currently Selected:
MIKHA 6: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009
