LUKA 10

Yesu Mho" Zo: Nhad' Xe: Shid' Yaug Re Nhao: Ke' Ru

1Ai: thao Asang wa gatau nhad' xe: shid' yaug re khyin: yu mung:- yao: yao: re: ye: nae" vogaung: jo, qo khao: ngo" khyo shid' zo: dazam" zam" kad' mung: yao" qhid' au:khyo ye" na genae" qhid' mae" yao: bam re nhao: ke' ra". 2Yesu wa yao: bam re- gaug myo: sho' mhang" jo; ra"- ngadqere: yad: yu nae" mau" zaui: byu malaug ngad: ra". Airumung: ai: gaug sang wa yao" gaug mhang" yo mae mau" zaui: nae" byu qere nhao: ke' byid: nae" qhid' mae" gaug sang re akyu" mho' ge,- ga: ta" ra". 3Ye:ge,- Zag ne jham: phaung gaung: khyo yao nau" jham re nhao: ke' ru we' dakhyo:- ngo naonhaung" re nhao: ke' ra". 4Ngaui thaung- thaung pyan- khyid zhaung: jham davin ge,- Khyodang mae dayaug yaug re au" nae" qhid' mae" dathang ge,- 5Kho:yham mae ngad ngad naonhaung" vao ye: gelao"- Ce:yham ngaui bau: yaug yo vashao: wo"- ein: shi" sao qhid' ta" ge,- 6Ai: yham mae ngaui bau: yaug yo: rure kao bau: ra" byu na: ngad: re wa naonhaung" bang" se" shaman" dao: wa aiyaug: dao mae ngad vashao:- Airu" ra" yaug mana ngad: re wa naonhaung" bang" se" shaman" dao: wa naonhaung" jhao" dam: tug' lo: li" nae". 7Ai: yham mae na mung: yao: bam da" byid' rure zo: shaug' ge,- pe"mung:ga"re mau" zaui: yaug wa okaung phug' qo" yu ang: ra"- dayham mae" gatau dayham khyo dakai" na: qin" ge,. 8Naonhaung" vogaung: khyo vao ye: khao: ngo" bang" lham: tug: yu ko" ngad: re wa naonhaung"qhid' kheim: mae da" byid' rure zo: ge,. 9Aimung: ai: vogaung: mae" no mo, re gai byid: ge,- ai: vogaung: byu qere- Mao"So: mung"dan: wa naonhaung: we' ajhao" mae joe" li" na va" ra"- ein: yao: bam re ta" kyo: ge,- 10Ngadqere: naonhaung" vogaung: khao: ngo" khyo vao ye: khao: ngo" bang"malham: tug: yu ko" re wa- hau" mo" khyo jham khyo thug' ye: mung:- 11ngonhaung" khyid mae de; ra" naonhaung" vogaung: mae" phalhug re lhao" re: naonhaung" re the nae" khyo" ngonhaung" ko: khyo" to: co' va"- ngadqere: Mao"So: mung"dan: wa naonhaung" we' ajhao" mae joe" li" va" rure beim: ge,- ein: ta" to: co' ge,- 12Naonhaung" re ngo dang za: ta" geli"- Dao: Kho' ra" Ba Na mae Mao"So wa ai: vogaung: re tho' Sodom vogaung: re je yang: nhag' khyag' myid qhu" byid' li" nae".

Malam: Ra" Vogaung: Jham

(Mathe 11.20-24)

13O"- Korazin we"- nao byuxa: vaqoe, qhug' ra". O"- Bedsaida we"- nao re: byuxa: vaqoe, qhug' ra"- Vogaung: ni" shid' vo mae zaui" qhu" lo: ra" mug' pho: ve, lho jham re Ture we' Sidon shid' vo mae zaui" qhu" ngad: re wa- daba gaco' mae" jid: mo" mai bau: ve,- myiqe, bam mae zaung: jo, yang: yao: bam yao" gaung dao mae myiqe, gag: sheim: mung: yao: bam myid tha" va" khyo re qhu" byid: genaeva". 14Mao"So wa Dao: Kho' ra" Ba Na mae vogaung: ni" shid' vo re tho' Sidon we' Ture shid' vo re nhag' khyag' myid je yang: qhu" byid' li" nae". 15Kapena-um we"- nao re: mug:gaung joe" sho' to' yu nae" o: i? Nao wa movo: mug: khyo joe" sho' khyo" pye' ru qhug' li" nae"- ga: ta" ra".

16Yesu wa yao" mho"zo: qere- naonhaung" dao: re tae" gyo" ra" yaug wa nga" dao: re tae" gyo" ra"yaug ngad: ra"- amung: ngore ngag: pye' yaug wa ngore nhao: ke' ra" yaug re ngag: pye' ra" yaug ngad: ra"- ga: ta" ra".

Nhad' Xe: Shid' Yaug Dam: Tug' Lo: Ru

17Mho"zo: nhad' xe: shid' yaug wa gyai ngaui bau" ru we' dam: tug' joe" lo mung: yao: bam wa- Asang we"- ngonhaung" ni" mang lao: mung: amyin" byid: lao"- yui jham lhao" re: ngonhaung" dao: tae" gyo" ako"- ga: ta" ako".

18Yesu wa yao: bam re- Satan wa lhe' cad' ru: mug:gaung mae" byid: gyo" lo" rure ngo myao va". 19Tae" gyo: ge,- ngo wa naonhaung" re lhao maui jham we' gung gug' jham: dao mae qo" zab: lai: lo" mung: Satan" nho: qam: so' alhab' re aung doe, nae" kheim: so' byid' to: va"- naonhaung" re pe" ja" yang re: dae mate' nae". 20Ngadqere: yui jham naonhaung" mho dao: tae" gyo: geyang: dabau: ge,- naonhaung" mang jham re mug:gaung dao mae tung" xam" to: va" ruyang bau: ge,- ga: ta" ra".

Yesu Ngaui Bau" ru

(Mathe 11.25-27; 13.16-17)

21Ai: yo, khyin: mae Yesu wa Gyang" Lho" Byo: yang ngaui bau: nhao mung:- Mug:gaung we' myid gaung Asang Pho" we"- nao wa pha,jhi" bo mo, we' ba jhao mo, mae" nyham" to" rure pha,jhi" mabo: ra" mo, re qhu" byid: va" ruyang nao re ngo jeju caung: byid' ra". Ngad va"- nga" Pho" we"- ce wa nao o ngaui: ra" khyo" boe" ru ngad: ra".

22Nga" Pho" wa ja: cao jab alhab' ngore ab byid' to" ra". Yao: zo: wa khag' ngad: rure yao: pho" mae" je yang: khag' maba ngad: ra"- amung: yao: pho" khag' ngad: rure re: yao: zo: we' yao: zo" yang qhu" byid: nae" khyin: yu: ra" yaug mae" je yang: khag' maba ko" ngad: ra".

23Ai: thao Yesu we' yao" mho"zo: qe wa yao: bam za: na ko" au:- Yesu wa mho"zo: qe shad' khyo lhang: lo mung:- naonhaung" myao: ra" gu: jham re the' myao: ra" mo, wa ngaui lho" ko" ra". 24Naonhaung" re ngo ta" geli"- naonhaung" myao: ra" gu: jham re lapa qe we' kho:kham qe myo: sho' mo, myao nug gengad yang: re:- maqhug' myao ko" ngad: ra". Naonhaung" the' gyo" ra" gu: jham re gyo: nug gengad yang: re: maqhug' gyo: ko"ngad: ra"- ga: ta" ra".

Gai: Ra" Samari Byu: Dao: Tau"

25Alao" qu" ge,- Jham: Tung" Pho" dayaug to" ye, mung:- Mho" Pho" we"- Apyad ato: kao so' qo" yu nae" qhid' mae" ngo pe" kad' ca" ra" i? ga: Yesu re kung" ra" khyo" myid' ra".

26Yesu wa- Tarha" mugsug' mae pe" ru: ta" to" ra" i? Nao khoru: ba: nghe' yu: i? ga: yao: re phaug' ta" ra".

27Alao" ai: Jham: Tung" Pho" wa- Asang ni" Mao"So re ni" aung khug nhag' lam: alhab'- ni" kao so' alhab'- ni" gaung dau: qam: so' alhab'- ni" myid nyan: ba: ru alhab' yang jhid'de; wa,- amung: ni" yham kyo: cao: re nao yao" gaung re we' dakhyo: jhid'de; wa,- ga: ta" ra".

28Nao ta" ru jo: ra"- Airu: kad' wa,- ailao" nao apyad ato: kao so' qo" yu: li" nae"- ga: ta" ra".

29Ngadqere: ai: Jham: Tung" Pho" wa yao: yao: jo: rure qhu" nug mung: Yesu re- Nga" yham kyo: cao: khag' ngad: i? ga: myid' ra".

30Alao" Yesu wa- Dalhang: mae" byu dayaug wa Yerusalem vogaung: mae" Yerikho vogaung: khyo gyo" lo" ra" au:- damya, jham we' thaung" qhug' ra". Damya, jham wa ai: yaug re mai bau: khyad' yu: pye' byid: mung:- be, yang: alaug laug shid: ru shapye' to: co' ako". 31Khinjaung dayaug wa khyo ai:gau: khyo" su" gyo" lo" ang: ra"- ngadqere: khinjaung pho" wa ai: yaug re lomyao lao"- gashad' khyo" jao" lai: lo" ra". 32Ai we' dakhyo:- Levi kaung mae" dayaug re: ai: jo, qo khyo joe" lo mung: ai: yaug re lomyao lao"- gashad' khyo" jao" lai: lo" ra". 33Ngadqere: khyo ai:gau: khyo" Samari byu dayaug gyaung: su" lo: re- ai: damya, qhug' ra" yaug jhao" joe" lo mung:- yao: re lomyao lao" nhag' qu" khyag' ra". 34Yao: wa damya, qhug' yaug jhao" te' ye: mung:- yao" dae khu jham mae xau we' sabyi qang: vhe' gyad byid: yang: thab' byid' ra"- Bin lao"- yao" loze dao mae ai: yaug re vo; zhaung mung:- bang" khug yham dalam: khyo jhui" lo mung: nyhang" caung byid' ra". 35Thao: ba re yao: wa ngaui shid' kye' phoe' yu yang:- bang" khug yham sang re byid: mung:- ceyaug re nyang" za: caung wa,- yao: re caung yang: gan: ra" ngaui gatau alhab' rere: ngo dam: tug' lo lao" nao re ngo lo:xe' byid: shinae"- ga: bang" khug yham sang pho" re pin co' ra".

36Yesu wa ai: Jham:Tung" Pho" re- Ai: byu sam yaug mae" damya, qhug' ra" yaug: nho: yham kyo: cao: khyo" kad' yaug khoyaug lam: ngad: ra"- ein: nao myid: jho: i? ga: myid' ra"

37Alao" Jham: Tung" Pho" wa- Ai: damya, qhug'ra" yaug re nhag' khyag' ra" yaug ngad: ra"- ga: phaug' tau" ra".

Yesu wa- Nao re: ai we' dakhyo: lo" kad' wa,- ga: phaug' tau" ra".

Matha We' Mari Nhae Jhao" Yesu Ye" Ru

38Yesu we' yao" mho"zo: qe su" ye" lo" na ko" au:- vogaung: dalam: khyo joe" lo: ako"- Matha ga: mang: ra" myiqe: dayaug wa Yesu re yao" yham mae bang" lham: tug: yu: ra". 39Yao: wa Mari ga: mang: ra" yao: nhaung: dayaug qo" ra". Mari wa Asang: khyid qao: mae zaung: jo, mung: Yesu ta" ra" mungdao: re tae" gyo" na: ra". 40Matha wa bang" da" mau" kad' nae" mau" laug: ruyang myid laug sang: kho: mung:- Yesu jhao" lo yang:- Asang we"- nga" nhaung: wa bang" da" mau" alhab' re ngo dayaug reza: shapye' to: byid' rure nao pe" maqu" jho i? Ngo re bao" nae" qhid' mae" yao: re ta" wa,- ga: Yesu re ta" ra".

41Asang wa Matha re- Matha- Matha- Nao wa mau" myo: sho' ja: re myid: qug: myid: ci" na: ra". 42Ngadqere: qo ca" ru wa daja: za: ngad: ra". Mari wa jo: ra" ja: re khyin: yu: ava"- ai:rure yao: mae" khag' re: maqo" yu: pye' byid: genae"- ga: ta" ra".

Currently Selected:

LUKA 10: LHCL

Highlight

Copy