ESAIA 2
2
Apyad Ato Ngaui Pyo: Yaug Yo: Ru
(Mikha 4.1-3)
1Ce wa Yuda mung" we' Yerusalem we' sin: yang: Amod nho: yauggai zo: Esaia re Mao"So: yang byid' ra" mungdao: ngad: ra".
2Aiwa joe" lo nae" ayo,
mae Caung:pa" Yham zhaug' ra" bam wa-
myhao: thao" rumae" bam dabam ngad mung:
bug gaung alhab' tho' mae myhe" nghoe' jo; li" nae".
Byumyu" mung"dan: myo: sho' wa ai: khyo yan" li" mung: yao: bam: mung" byu qe wa-
3Israel Mao"So: Caung:pa" Yham khyo-
Asang: bug gaung khyo do, ye: gelang:-
Yao: ngonhaung" re kad' nhao nug: ra" ja: ngonhaung" re mho" shid' li" nae".
Yao: khyin: to" ra" khyodang mae ngonhaung" su" li" nae".
Pe"mung:ga"re Asang: mho" shid' khyo wa Yerusalem mae" joe" li" mung:-
Yao: wa yao" byumyu" qere Ziun mae" dao: jhau: li" nae".
4Yao: wa qi" qhang: ra" byumyu" phaung mae jho" ta" ngag: rure ta" sho' byid' li" nae".
Yao: bam: shae pyang: jham re kheim be, mung:
yao: bam: lhae tad' jham re shae tho: be; yu: li" genae".
Byumyu" mung"dan: jham wa khonhae" re: gye makhe' lo: genae".
Gyekhe' poe qhid' mae" khonhae" re: maseim" lo: genae".
5Ana"- Yaku nho: myid:zo: qe we"- Asang: yang ngonhaung" re byid' to" ra" bo" bao mae su: gelang:- ga: ta" li" genae".
Ngad Beim" Ru Phyo' Qheim" Pye' Qhug' Nae" Khyo
6O"- Mao"So we"- ni" byumyu" ngad: ra" Davi myid:zo: qere nao shapye' pye' ava". Mung"dan: wa ba thug' shad' mae" we' Philisti mung" mae vha" ra" mau" byang" jo; ra". Amyu" byu qe wa taung bug byu qe: thung" li jham cao" byaug: avako". 7Yao: bam: mung"dan: wa ngaui we' qhang byang" jo, mung: yao: bam: jo,nho" matho' thao" ngad: ra". Yao: bam: mung"dan: wa myao: jham byang" jo, mung: yao: bam: myao: lhin" jham mathao" ngad: ako". 8Yao: bam: mung"dan: wa so alho byang" sho' jo; ra". Amung: yao: bam: lo; yang kad' to" ra" zai jham re yao: bam caung:pa" byid' ako".
9Yaug khao: ngo" wa nyham: khyo" pye' ru we' qho' phyo' ru qhug' li" genae". Asang we" yao: bam re qobo dakhyad' byid: wo"-
10Laug byo, mae jo; ra" laug aug' jham mae yao: bam phao: vho' li" genae". Asang: nhag' jam: yo" rumae" phao: loe, nae" we' yao" kheim: so' we' phungbao mae" phao: loe, nae" qhid' mae" myid gaung mae dung:khung: dau" laung" ako". 11Xao su byu qe: ngad beim" ru wa thao" lo" mung: xao su byu qe: nhag' lam: myhao: ru byo; qeim: lo" nae" ayo, joe" lo: li" nae". Ailao" Asang dayaug za: nga: yhe' byid' ru qhug' li" nae". 12Ai: ba na mae qam: bo: ra" Asang wa kheim: so' bo mo,- ngad beim: mung: phug mo, yaug khao: ngo" re nyham: khyo" pye' li" nae". 13Yao: wa Lebanon mae" myhao: ra" shaug' gae jham re we' Bashan mung" mae" shikhai: gae alhab' re thau: khyo" pye' li" nae". 14Yao: wa myhao: ra" bam jham bug gaung jham 15Myhao: ra" gyebyu zaung jham- gyetab vang jham re tae" pye' li" nae". 16Qi" thao" ru we' yaung" thao" ra" qid sang pho jham re lhao" re: nhab' pye' ra". 17-18Xao su byu qe: ngad beim" ru wa thao" lo" byaug mung:- xao su byu qe: nhag' lam: myhao: ru wa phyo' qheim" pye' ru qhug' li" nae". So alho jham wa bin sho' byaug: byaug nae". Ai: ba na mae Asang dayaug za: nga: yhe' byid' ru qhug' li" nae".
19Myid gaung re lhaui" nhan" nae" yao: joe" li" lao"- mung" byu qe wa laug byo, mae jo; ra" laug aug' jham mae phao: vho' li" genae". Asang: nhag' jam: yo" rumae" we' yao" kheim: so' we' phungbao mae" phao: loe, nae" qhid' mae" myid gaung mae dung:khung: dau" laung" li" genae". 20Ai: ba joe" lo lao"- yao: bam kad' ci: ra" ngaui we' qhang so alho jham re yao: bam shapye' pye' li" genae". Aijham re qug qhug' jham we' pho' qhid' jham khyo shapye' byid' pye' li" nae". 21Myid gaung re lhaui" nhan" nae" qhid' mae" Asang joe" li" lao"- mung" byu qe wa yao" nhag' jam: yo" rumae" we' phao: loe, nae" qhid' mae" we' yao" kheim: so' we' phungbao mae" phao: vho' nae" qhid' mae"- dungkhung: jham mae we' laug byo, mae jo; ra" laug aug' jham mae vho' jo; li" genae".
22Shid ba: ra" byu qere damyid: lam loge, yao: bam pe" phug' de; ako" i?
Currently Selected:
ESAIA 2: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009
