HOSEA 11
11
Tau: Lhan" Ra" Yao" Byumyu" Re Jhid'de, Ra" Mao"So
1 Asang wa
Israel zonau" ngad shi" au: yao: re ngo jhid'de; aimung:
yao: re nga" zo: khyo" ein: Egutu mae" khai: jhui" thug' yu va".
2Ngadqere: ngo yao: re je: khai: re je: yao: wa ngo mae" lhang: phaug' lo" ra".
Nga" byumyu" wa Bala re xeim: ngaui" byid' ra".
Yao: bam wa solho jham re nae pyo: cid' phad' ngaui" ako".
3Ngadqere: Israel re khyo su" mho" yaug wa ngo angad:-
Ngo wa nga" byumyu" re nga" lo, mae ge, vo; yu: ngadqere:-
ngo: yang yao: bam re qu" caung: lo: rure yao: bam pe" shui manho aso: maxam: byid: ngad: ako".
4Ngo wa yao: bam re ngo jhao" jhid'de; sang: no: myid we' lao" she: yu va"
ngo wa yao: bam re gaug: vo; yu mung: nga" boqae mae te' ci: lo va".
Ngo wa yao: bam jhao" goe; gam" mung: zho: jhaug' lo va".
5Yao: bam wa ngo jhao" dam: tug' lo nae" maqad ngad: ako". Aimung: yao: bam wa Egutu khyo dam: phao: tug' lo" ca" ru we' Asuri wa yao: bam re eib zo" li" nae". 6Yao: bam: vomo" jham mae mang: zin" ru dao" lhu: joe" lo mung: vomo" kham: jham re phyo' khyoe' pye' byid' li" nae". Nga" byumyu" qe wa yao: bam: myid mae gai: thao" ga: myid: rure kad' ra" mathao mae- ai: yang yao: bam re ngoyang phyo' qheim" pye' li" nae". 7Yao: bam wa ngo mae" va: khyo jhin" phao: lo" ako". Yao: bam: dao mae" kyau: mathao mae ngore hug' yao: li" genae"- ngadqere: ai: qo jham re khag' yang matau: pye' byid: genae".
8Israel qe we"- nao re khoru: ba: tho' to" pye' nae" i?
Nao re ngoyang khoru: tho' shapye' co' nae" i?
Adma re ngo: yang phyo' qheim" pye' ru we' dakhyo:
Zeboiim re ngo nhau" pye' ru we' dakhyo: nao re ngo khoru: ba" kad' nae" laug i?
Nga" nhag' lam: wa airu: kad' nae" maqad nae"-
nao re jhid'de; ra" myid wa saung" yao: qi" ra".
9Nga" nhag' yo" ruyang nao re ngo qobo dae mabyid: nae"
ngo wa Israel re madam: phyo' qheim" pye' nae"-
Pe"mung:ga"re ngo wa Mao"So ngad:- byu mangad:
Gyang" lho" ra" yaug- ngo wa- naonhaung" we' daga" na:-
Ngo wa naonhaung" jhao" nhag' yo: mung: joe" li" nae" mangad:.
10Ngo: yang yao: bam: gyevo qere khang khyi we' dakhyo: kyid' myang lao" nga" byumyu" qe wa nga" thao cao" lo: li" genae"- yao: bam wa ba vao shad' khyo ngo jhao" hin hin phao: dan: lo: li" genae". 11Yao: bam wa Egutu mung" mae" ngho' jham we' Asuri mung" mae" phaung" kyug' jham we' dakhyo: dao" lo: li" genae". Ngo wa yao: bam re yao: bam: yham khyo dam: jhui" phao: lo nae". Ngo Asang ta" to: va"- ga: ta" ra".
Israel We' Yuda Wa Dao: Phyid' Ru Qhug' Avako"
12 Asang wa- Israel byumyu" qe wa ngore mhug' ta" dao: we' pyag' vhan" ruyang lhang" kham" to" avako". Yuda byumyu" qere: jhaug' zaug: ru we' gyang" lho" ra" Mao"So ngore tau: lhan" na: ashiko"- ga: ta" ra".
Currently Selected:
HOSEA 11: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009
