MHO" PEIM: 25
25
1Israel byu shid' zo: wa- myan" myo" ru kao: nae" qhid' mae" tarha" yung" khyo ye" re- dayaug wa qobo maqo" ga: ta" byid: mung: dang: ra" dayaug re qobo zhaug' ein gelang:- 2Qobo qo" yaug re be, nae" qobo dae byid' re- tarha" agyi wa yao: re lamhaung: lagoe, goe, nhao mung: be; ru qhug' nhao ca" ra". Yao: shad' nghung" ra" mau" khyo" cao" yang: khonho" dae be, nae" ru ba nhao nae". 3Yao: re byid xe dae byang" sho' gai: be; ra" ngadqere: ai: tho' magai: je: be,- ai: tho' je: be; re shava byu: qhid' kheim: mae yao: re nga: yeim nhao: ru boe" nae".
4Nung: lo: re gaug nao" rumae ci: na: ra" au: nhad' mae cam" dazhaung: byid:-
Shid Va" Mao: Nhaung: Qhid' Mae" Qo Vin: Ru
5Dayham mae za: na: ra" mao:nhaung: tao mae" dayaug wa yauggai zo: mamyhung co' lo: shid: lo" ngad: re- yao" cug' mo" re- gayham bao: khag' re: cug' magai: gaug- yao: re cug' gaug nae" ru wa shid yaug: nho: mao:nhaung pho" qo ngad: ra". 6Yao: shid' tao mae" qhid' qo" li" ra" yauggai zo: wa- shid yaug: nho: yao: zo: khyo" mhang" ca" ra". Aikhyo" yang yao" yham khaung wa Israel mae xo' jo; ye" lo" nae" ngad: ra". 7Ngadqere:- shid yaug: nho: mao:nhaung: wa yao: re cug' manug: gaug ngad: re- ai: myiqe: wa vogaung" ade, qe: qhid' kheim: khyo ye: mung: nga" yham sang pho" nho: mao:nhaung: wa yao" qo re manug: vin ngad: ra". Yao: wa Israel qe: phaung gaung: mae yao: mao" nho: nyaug re manug: xo' ga: ha: ra"- ga: ta" vashao:- 8Alao" vogaung: ade, au: jhaung qe wa aiyaug re khai: yu mung: yao: we' jho" ta" qu" ca" ra". Yao: wa ai: myiqe: re cug' magaug nae" khyo" za: qe- aha: na shi" ngad: re. 9Yao: mao" nho: cug' mo" wa- vogaung: ade, qenho: qhid' kheim: mae aiyaug: khyid zhaung: dashad' khyad' yu: pye' byid: ru we' yao" myo, khung: mae khata: phoe" sheim: yang:- yao: mao" nho: anyaug xo' byid: nae" ha: pye' yaug wa ceru: boe" ra"- ga: ta" vashao:. 10Yao" yham khaung wa- Israel mae khyid zhaung: khyad' pye' byid: qhug' yaug: kaung ga: mhang" ru qhug' vashao:.
Gatau: Tarha" Jham
11Yauggai shid' yaug jho" byo, mung: dayaug: nho: yham sang myhi" wa yao" yham sang pho" re bobao" ra" khyo" gatau yham sang pho" zai re myhag' to: byid' re- 12Ai: myiqe: re nhag' khyag' ru daqhu" byid:- yao" lo, re qam" phyid' pye' byid: ge,.
13-14Jao laug: we' jo, lag ci: re damhug' pyag'- 15Jao laug: we' jo, lag aman" re ci wa- ailao" naonhaung" Mao"So Asang: yang nao re byid: nae" ra" mug: mae nao apyad qhang sho' qo" na nae". 16Asang wa- mhug' pyag' zo: mo, re nghang" ra".
Amaleg Qere Se' Pye' Nae" Amyin"
17Naonhaung" Egutu mae" phao: lo: ra" ru: Amaleg qe naonhaung" re pe" kad' ru myid: beim: ge,. 18Yao: bam wa Mao"So re gyaug phug' myid mabo ko" ngad: ra". Aimung: yao: bam wa- naonhaung" myaung: mung: qam: ngau" jo, au: re naonhaung" re thao khyo" khe' zin" ako". Aimung: thao mae su" gyo" mo, alhab' re se' pye' ako". 19Airu: mung: ni" Mao"So Asang: yang- nao re ai: mug:myid byid' ru we' ni" nho: avai: ayae lhang" gam: mae na: ra" ni" gyevo alhab' mae" gug:gam byid' ra" au: re- Amaleg qe alhab' re qo" se' sho' se' pye' ge,- airu: khyo" yang- yao: bam re khag' yang re: malhaung" myid: beim: lo: genae" dato" myhid' ge, lhe"-
Currently Selected:
MHO" PEIM: 25: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009
