MHO" PEIM: 23
23
Asang: Byumyu" Mae" Phoe' Pye' Ru
1Zhe' pye' va" yauggai mangad: lao" yauggai: zai phyid' pye' va" ru khag' ngadqere:-Asang: byu phaung mae magai: bobo ngad: ra".
2Nin gyid khyo" khau: li" yaug mangad: lao" lo, maxo' ra" myhi" pho" mae" khau: li" ra" zo: dau khag' ngadqere:- byuxag' daxe xag' joe" sho' lhao"- Asang: byumyu" phaung mae magai: bobo nae" ngad: ra".
3Amon myu" ngad ngad Moba myu" ngad ngad yao: bam: myid:zo: khag' ngadqere:- daxe xag' joe" sho' lhao"- Asang: byumyu" phaung mae magai: bobo nae" ngad: ra". 4Egutu mae" naonhaung" phao: thug' lo: ra" gyaung: khyo mae yao: bam wa naonhaung" re zo:ve we' qid mabyid: ngad: ako". Yao: bam kam" wa naonhaung" re nhang: nae" qhid' mae"-Mesopotamia mug: Petho vomo" mae" Beo nho: yauggai zo: Balam re olhaung: ako". 5Ngadqere: naonhaung" Mao"So Asang wa Balam re matae" gyo: byid: ngad: ra". Ai: atha" yao: wa- nhang: kheim: re shaman" dao: khyo" tha" pye' byid' ra". Pe"mung:ga"re- yao: wa naonhaung" re jhid'de; yang: ngad: ra". 6Naonhaung" wa byumyu" damyu" aboe" na na wa- ce: byumyu" qere bao" yu nae" pe" re: dakad' ge, yao: bam na: dai nae" khyo re: pe" daja: re: dakad' byid: ge,.
7Edom byumyu" qere manug ma-o dakad' ge, yao: bam wa- naonhaung" ba nam sang: cao: ngad: ako". Egutu rere: danghang: ge,- naonhaung" wa yao: bam: mug:myid mae ganhae" dalhang na qu" avako". 8Byu sam xag' ein: mae" thoegu: mae yao: bam: myid:zo: qere Asang: byumyu" phaung mae bovhao" yu gai: ra".
Gyetab Re San Sin" Sho' Kad' To" Ru
9Mang: zin" na: ra" ayo, naonhaung" wa gyetab jamu mae na: re- caung:pa" thung" khyo" masan masin" ra" khyo- pe" rere: jao" pye' ca" ra". 10Yauggai dayaug wa- myi" re yabmo, mae ashug' ma yang: sheim mung: masan masin" boe" lo: ru ngad: re yao: wa jamu taung gaung khyo thug' ye: mung: aimae yena: jo, ca" ra". 11Myi" thao zo" re yao: yao" gaung cid' pye' mung:- yao: wa ba vao zo" mae jamu khyo dam: gai: lo: ra".
12Naonhaung" wa- ngha ye: qo: li" ra" au: re- naonhaung" qo" ye: nae" qhid' mae" jamu taung gaung shad' mae jo, qo dajo, qo jaung: to: ca" ra". 13Gyezai: gyekho khyo" ce' bao" dalam: bovin wa,- vae: dug: no mung: ngha ye: nug lao" myidgaung re dungkhung: dau: mung: aire bam" pye' nae" ngad: ra". 14Naonhaung" nho: jamu re caung:pa" thung" khyo" san sin" taung" to: ge,. Pe"mung:ga"re- naonhaung" Mao"So Asang wa naonhaung" re gug:gam byid: mung: naonhaung" gyevo qe: dao mae aung doe, nhao nae" qhid' mae" naonhaung" jamu mae naonhaung" we' daga" na: jo; ra". Asang: yang naonhaung" re nhaung thao" phaug' pye' nhao nae" mayaung" mashab: ru pe" re: dakad' ge,.
Tarha" Ja: Nam Jab
15Jeim dayaug wa- yao" jeim sang: lo, mae" phao mung: gug:gam qo" yu nae" qhid' mae" nao jhao" li" ngad: re- yao: re dadam: nhao: tug' pye'. 16Yao: wa naonhaung" vogaung: jham mae" yao: khyin: yu: ra" kho: vogaung: mae ngadqere: gai: na: rumung: nao wa yao: re abe, akhyad' magai: kad' ngad: ra".
17Israel yauggai myiqe: khag' ngadqere:- caung:pa" yham mae" shava myhi" shava pho" magai: kad' nae". 18Ce: mau" khyo" qo" yu: ra" ngaui rere: naonhaung" Mao"So Asang: yham khyo dao: thang" pyang" nae" qhid' mae" ein: magai: civao ye: genae". Asang wa so yham mae" shava myhi" shava pho" re ca' nghang" ra".
19Nao wa- Israel mao:nhaung: dayaug yaug re ngaui ngad ngad- zo:ve ngad ngad jhid' byid' re yao: mae" gau pai: damho' yu- 20Nao wa taung bug: byumyu" dayaug re jhid' byid' rumae" gau pai: gai: mho' yu nae" ngad: ra". Israel mao:nhaung: dayaug re jhid' byid' rumae" kam" wa gau pai: magai: mho' yu ngad: ra". Ce: tarha" re phug' cao" wa,- aire wa nao yesang: na nae" ra" mug: mae nao kad' ru ja: khao: ngo" dao re ni" Mao"So Asang: yang shaman" byid' li" nae".
21Ni" Mao"So Asang re dao: thang" to" ngad: re nao dao:so: to" to" ru kad' pyang" nae" ayo, daqhui: nhao Asang wa nao dao: thang" to" rure ca: li" nae". Aimung: airu re makad' pyang" ru wa qobo ngad: ra". 22Asang re dao: thang" mato" ru wa qobo mangad:- 23Ngadqere: nao wa- naoyao" myid khyo" dao: thang" to" ngad: re airu re qo" kad' pyang" sho' kad' wa,.
24Nao wa dayaug yaug: nho: sabyi yo khyo" su" lai: lo" ra" au: re- nao o: nho" sabyi re gai: zo" ra" ngadqere: nao wa- gyan dalam: mae magai: ciphao ngad: ra". 25Nao wa dayaug yaug: nho: qhovo: shi: yo khyo" su" lai: lo" ra" au: re- ni" lo; yang qo" lao" phan" yu: ra" qhovo: alhab' gai: zo" ra". Ngadqere: nao wa qhovo: shi: re lagam" yang magai: yad: yu nae" ngad: ra".
Currently Selected:
MHO" PEIM: 23: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009
