2 KHO:KHAM 23
23
Yoshia Tarha" Taung Bug So Caung:pa" Ra" Khyo Re Yu: Pye' Ra" Khyo
(2 Kho:kham mhomyi: 34.3-7, 29-33)
1Kho:kham Yoshia wa Yuda mung" we' Yerusalem mae" au: jhaung qe alhab' re khai: zhang" yu mung:- 2Yao: bam alhab' mo, daga" za: khinjaung qe lapa qe- dang: ra" amyu" byu qe alhab'- jo,nho" qo" mo, myaung sho: mo, we' daga" Caung:pa" Yham khyo ye" ako". Kho:kham pho" wa yao: bam alhab' mo; qhid' kheim: mae Caung:pa" Yham mae" qhug' myao: yu: ra" dao: thang" mugsug' paug' geim" re thoe qi: ke' yang: nghe' kyo" ra". 3Yao: wa kho:kham pho" yham zang baung: nhae mae ye; jo, mung: yao: re mho dao: gyo: nae"- yao" tarha" we' amyin" dao: jham re yao" aung khug nhag' lam: alhab' yang phug' cao" mung: mugsug' paug' mae tung" to" ru we' dakhyo: ai: dao: thang" mae cao" nhao: to" rure lo, joe" cao" kad' nae" qhid' mae" Asang we' dao: thang" kad' ra". Amung: amyu" byu qe alhab' re: ai: dao: thang" re phug' cao" nae" dao:so: to" ako".
4Ai: thao Yoshia wa Khinjaung Yin" Hilkia- yao" lo, qao: mae" khinjaung qe- Caung:pa" Yham kham: dung: mae mau" ang: ra" gug: gam qere Bala we' so myhi" Ashe- kyi jham: nho: caung:pa" rumae ci ko" ra" zai jham re Caung:pa" Yham khug mae" yu: thug' lo genae" qhid' mae" amyin" byid' ra". Kho:kham pho" wa ai: zai jham alhab' re vomo" taung gaung shad' Kidron lao: khaung: nhae mae ngha" pye' ra". Ai: thao myimhab re Bethela khyo yu: pye' ra". 5Yuda vogaung: jham we' Yerusalem nhae mae" jo, qo jham mae" tarha" taung bug so phan jham: dao mae ngaui" xeim: ngaui" byid: nae" qhid' mae" Yuda kho:kham qeyang aya: byid' to" ra" khinjaung qe: aya: ngad: ra" Bala- ba- lho"- mug: kin- kyi jham re ngaui" xeim: ngaui" byid: ko" ra" khinjaung qe alhab' nho: aya: jham re qab: pye' byid' ra". 6Yao: wa so myhi" Ashe nho: alho re Caung:pa" Yham mae" yu: pye' mung: vomo" mae" Kidron lao: khaung: khyo yu: thug' lo" mung: ngha" pye' ra". Ai: myimhab re badan boe" sho' thaung" mhan" pye' yang: aire shava lab bug mae gag: sin" pye' ra". 7Yao: wa caung:pa" yham shava myhi" qeyang na: sang: to: ko" ra" caung:pa" yham mae" byuna jo, qo jham re phyo' qheim" pye' ra". (Aimae Ashe re caung:pa" rumae ve; ra" bau: qhang jham re myiqe: qe qo; ako".) 8Yao: wa Yuda vogaung: jham mae na ko" ra" khinjaung qere Yerusalem khyo jhui" yu mung:- mung" geim" mae jao: sho' yao: bam ngaui" xeim: ngaui" byid' ra" jo, qo phan jham re maca' majhad' kad' pye' ra". Yao: wa vogaung: zug: pho" Yoshu yang kad' to" ra" kham: nhae mae" cad' be, yui jham re qhaug' byid' to" ra" phan jham rere: phyo' sin" khyo" pye' ra". Aiwa vogaung: khug khyo vao ye" ra" kham: mo" nho: lo, kaung: shad' mae jo; ra". 9Ai: khinjaung qe wa Caung:pa" Yham mae caung: da" byid: nae" akhang" maqo" ngad: ako". Ngadqere: yao: bam: khinjaung mao:nhaung: qere byid' ra" man" make' ra" mug re wa yao: bam gai: zo" ako".
10Kho:kham pho" Yoshia wa khag' re: yao: bam: yauggai myiqe: zo: qere phad' ngaui" byid' ra" ngaui" xeim: khyo" Moleg so re maqo" ngaui" byid: genae" qhid' mae" Hinon lao: khaung: mae tarha" taung bug so re caung:pa" ra" jo, qo Tophed rere: maca' majhad' kad' pye' ra". 11Yao: wa Yuda kho:kham qeyang ba re caung:pa" nae" qhaug' to" ra" myao: jham rere: yu: pye' mung: ce: caung:pa" rumae ci: ra" myao: lhin" jham rere: ngha" pye' ra". (Cejham re kham: nhae mae" caung:pa" yham vang" mae zam" to: mung: ai wa zug: mo" Nathan Meleg nho: na jo, qo mae" mataung" va: ngad: ra".) 12Yuda kho:kham qeyang kho:kham Ahaza nho: yham dao kho:kham kho" khaung dao mae kad' to" ra" phan jham re Caung:pa" Yham: nho: vang shid' lam: mae Manashe kho:kham: yang kad' to" ra" phan jham we' daga" kho:kham Yoshia phyo' khyo" pye' ra". Yao: wa phan jham re aje, aman" kad' pye' mung: aijham re Kidron lao: khaung: khug khyo pye' zaui: pye' ra". 13Yoshia wa Yerusalem ba thug' shad' mae kho:kham Sholamon yang kad' to" ra" phan jham- zhanlun bam jham: nho: mug: thao shad' mae" maca' majhad' so jham ngad: ra" Sidon so myhi" Astared- Moba so Khemo -Amon so Moleg jham re caung:pa" ra" jo, qo jham re maca' majhad' kad' pye' ra". 14Kho:kham Yoshia wa laug zang baung: jham re be; khyoe' pye'- so myhi" Ashe nho: alho jham thau: khyang: pye' yang: aijham ye; jo; ra" jo, qo mae byu: shoqug: jham: yang bam" pye' ra".
15Yoshia wa Israel byu qere qobo jhui" shad' ra" yaug ngad: ra" Nebad nho: yauggai zo: Yeroboam kad' to: co' ra" Bethela mae" caung:pa" ra" jo, qo rere: phyo' khyo" pye' ra". Yoshia wa phan re lao" khyang: pye' yang: ai: laug baui jham re aje, je, be, khyoe' pye' mung: aijham re bodan boe" sho' thaung" mhan" pye' ra". Yao: wa Ashe nho: khyao dau alho rere: ngha" pye' ra". 16Ai: thao Yoshia wa cao" lhang" qu" mung: bug gaung mae lab damyo" jo; rure myao: ra". Yao: wa aijham: khug mae" shoqug: jham re dau" yu nhao mung: phan dao mae ngha" pye' ra". Ceru: kad' yang: yao: wa phan re maca' majhad' kad' pye' ra". Aiwa qhid' phyao: poe gyo: mae kho:kham Yeroboam phan nhae mae ye; jo; au: lapa pho" pa: to" rure kad' ru ngad: ra". Kho:kham Yoshia wa lhang: qu" mung: ce: lapa dao: re pa: to: co' ra" yaug ngad: ra" lapa pho" nho: lab re myao: ra". 17Yao: wa khag' lab ngad: ra" i? ga: myid' ra". Bethela mae" mo,byu qe wa ai wa Yuda mung" mae" joe" li" ra" lapa pho" nho: lab ngad mung:- ce: phan re nao ceru: kad' nae" khyo re lapa pa: to: co' yaug ngad: ra"- ga: tau" ako".
18Yoshia wa airu: yao: to" to: ge,- yao" sho qug:- jham re magai: qhui: nae" ga: amyin" byid' ra". Aimung: yao" shoqug: jham re we' Samari mae" joe" li" ko" ra" ai: lapa nho: shoqug: jham rere: mayu: pye' ngad: ako".
19Kho:kham Yoshia wa Israel vogaung: khao: ngo" mae" Asang: nhag' jam: re lhau: zhung" ke' ko" ra" Israel byu qeyang kad' to" ra" tarha" taung bug so re caung:pa" ra" jo, qo jham alhab' re phyo' khyo" pye' ra". Yao: wa Bethela mae kad' ruru: ai: phan jham alhab' re kad' ra". 20Yao: wa tarha" taung bug so jham: khinjaung qe alhab' re yao: bam caung da" byid' ra" phan jham: dao mae se' pye' ra". Amung: yao: wa phan khao: ngo" dao mae byu: shoqug: phad' ra". Ai: thao yao: wa Yerusalem khyo dam: tug' lo: ra".
Yoshia Lai Co' Poe Kad' Ra" Khyo
(2 Kho:kham mhomyi: 35.1-19)
21Kho:kham Yoshia wa dao: thang" paug' mae tung" to" ru we' dakhyo:- yao bam: Mao"So Asang re nga: yhe' byid' ra" Lai co' poe re kad' genae" qhid' mae" amyu" byu qere amyin" byid' ra". 22Amyu" byu tarha" agyi qeyang eib: ra" ayo, mae" Israel we' Yuda kho:kham qe khoyaug: yang re: ce: Lai co' poe ru" ra" poe we' dau: ru khag' khonhae" re: majhui" kad' qu" ngad: ako". 23Ana" lo" thao" mae Yoshia eib: ru daxe: she' zin mae Lai co' Poe re Yerusalem mae kad' ako".
Yoshia Yang Tha" Pye' Ra" Gatau Lo, Mau"
24Kho:kham Yoshia wa Caung:pa" Yham mae" Khinjaung Yin" Hilkia yang qho: qhug' ra" mugsug' paug' mae tung" to" ra" tarha" jham re cao" pyang" nae" qhid' mae" Yerusalem we' dang: ra" Yuda mung" mae" jan: zho: mo,- lo, kyo' qu" mo, alhab' we' yham khug so jham- so alho jham- tarha" taung bug so gatau re caung:pa" ra" zai jham alhab' yu: pye' ra". 25Asang re yao" aung khug nhag' lam: myid- qam: o: alhab' yang caung da" byid' ra" yaug Moshe nho: tarha" alhab' re phug' cao" ra" kho:kham yao: we' dau: ru yao" qhid' au: mae dayaug re: mana: qu" ngad: ra". Yao: we' dau: ra" kho:kham thao rere: mana: qu" lo:ngad: ra".
26Ngadqere: kho:kham Manashe yang Yuda mung" re: Asang: nhag' jam: re xo sho' yo: nhao: ru wa ana" lhao" re: nhag' yo: magyo" ngad: ra". 27Asang wa ngo wa Israel re kad' ruru: Yuda re ngo kad' nae". Yuda byu qere nga" myo,nho mae" khe' thug' pye' nae". Ngo khyin: yu: to" ra" vogaung: Yerusalem re we' ngore caung:pa" genae" qhid' mae" ngo ta" to" ra" jo, qo Caung:pa" Yham re ngo ngag: pye' nae"- ga: ta" ra".
Yoshia Eib: Ra" Ayo, Gan:Lo" Ra" Khyo
(2 Kho:kham mhomyi: 35.20-36.1)
28Kho:kham Yoshia kad' ra" gatau lo, mau" ja: khao: ngo" re Yuda kho:kham qe: mhomyi: paug' mae tung" xam" to" ako". 29Yoshia kho:kham kad' na: au: Egutu kho:kham Nekho Asuri khosin" re bao" nae" qhid' mae" Uphrad gyaung: khyo gyetab datab re jhui" ye" lo" ra". Kho:kham Yoshia wa Megido jo, qo mae Egutu gyetab re tam" pye' nae" qam: ke' ra". Amung: gye poe mae se' pye' ru qhug' ra". 30Yao" gyezug: qe wa yao" mao gaung re gyekhe' myao: lhin" dao mae kai: mung: Yerusalem khyo dam: yu: lo: ako". Aimae" kho:kham lab mae nyhab' shaung: pye' ako".
Yuda byu qe wa Yoshia nho: yauggai zo: Yoahaza re khyin: yu mung: kho:kham kad' nae" yao: re xau gyad byid: ako".
Yuda Kho:kham Yoahaza
(2 Kho:kham mhomyi: 36.2 -4)
31Yoahaza wa Yuda kho:kham boe" lo: au: apyad shid' xe: sam zin ngad: ra". Yao: wa Yerusalem mae lho" sam khye' eib: na: ra". Yao" myhi" wa Libna vogaung: mae" Yeremia nho: myiqe: zo: Hamuta ngad: ra". 32Yao" phug' pho" qe: ve, so: thao cao" yang: yao: wa Asang re qobo shad' lhoe" ra". 33Hamad mung" mae" Ribla mae Egutu kho:kham Nekho yang thaung: taung" lhaung" lao" yao: eib: ra" ayo, gan: byaug: ra". Amung: Yuda mung" re khang: khyo"- ngaui joe: dataung- qhang joe: daxe byid: nhao: ra". 34Kho:kham Nekho wa Yoshia nho: yauggai zo: Eliakim re Yoshia khu mae Yuda kho:kham xo' kad' nhao: ra". Amung: yao" mang re Yehoiakim ga: tha" mhang" pye' ra". Yoahaza wa kho:kham Nekho yang Egutu mung" khyo jhui" lo" mung: yao: wa aimae shid: ra".
Yuda Kho:kham Yehoiakim
( 2 Kho:kham mhomyi: 36.5 -8)
35Kho:kham Yehoiakim wa Egutu kho:kham: yang mho' ra" khang: re byid: nae" qo" sho' kad' nae" qhid' mae" yao: bam na: dai: ra" jo,nho" re cao" yang: mung" byu qemae" khang: gaug: yu: ra".
36Yehoiakim wa yao: Yuda kho:kham boe" lo: au: apyad shid' xe: ngo" zin ngad: ra". Yao: wa Yerusalem mae daxe: dazin eib: ra". Yao: myhi" wa Ruma vogaung: mae" Pedaia nho: myiqe: zo: Zebida ngad: ra". 37Yao" phug' pho" qenho: ve, so: re cao" yang: Yehoiakim wa Asang re qobo shad' ra".
Currently Selected:
2 KHO:KHAM 23: LHCL
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
© Bible Society of Myanmar 2009