Maciu Nai Vakamacala Taumada
Nai Vakamacala Taumada
Nai Tukutuku Vinaka sa Vola ko Maciu sa tukuni kina nai tukutuku talei ni sai Jisu nai Vakabula ka sa yalataki, ni sai koya ka sa vakayacora kina na Kalou na nona vosa ni yalayala vei ira na nona tamata ena Veiyalayalati Makawa. Nai tukutuku-vinaka oqo sa sega ni baleti ira walega na Jiu se ko ira na kawa tamata ka a mai sucu ka bula vakatamata kina ko Jisu, ia sa baleti vuravura taucoko.
Nai vola i Maciu sa tuvani sara vakamaqosa. E tekivu mai na sucu i Jisu, ka vakamacalataka na nona papitaiso kei na nona veretaki, ka qai semata yani na nona veiqaravi ni sa vunau lako, a sa veivakatavulici, ka ia na veivakabulai mai Kalili. Ni oti ko ya, sa qai vakamacalataka nai lakolako i Jisu mai Kalili ki Jerusalemi kei na veika sa vakayacora ko Jisu ena i otioti ni macawa me la'ki cava sara yani ena nona mate ena kauveilatai kei na nona tucake tale mai na mate.
Nai Tukutuku Vinaka oqo e vakatakila ni ko Jisu na Qasenivuli levu ka sa tu vua na lewa me vakadewataka na Vunau ni Kalou, ka sa vakatavulica na veika me baleta na matanitu ni Kalou. E levu na nona i vakavuvuli sa umani vata ena lima na kenai wasewase vakaoqo: (1) Na Vunau mai na Ulunivanua sa vakabibitaki kina na nodra i tovo, kei nai tavi, kei na nodra kalougata, kei na nodra i votavota na lewe ni matanitu vakalomalagi (wase 5-7); (2) Nai vakasala eso vei iratou na tisaipeli e tinikarua kei na nodratou i tavi (wase 10); (3) Na veivosa vakatautauvata me baleta na matanitu vakalomalagi (wase 13); (4) Na nona i vakavuvuli me baleta na cakacaka ni tisaipeli (wase 18); vata kei (5) Nai vakavuvuli me baleta nai vakataotioti ni gauna kei na kena yaco mai na matanitu vakalomalagi (wase 24-25).
Na Lewe ni Vola
Nai Tubutubu kei na sucu i Jisu Karisito 1.1—2.23
Na cakacaka i Joni na Dauveipapitaisotaki 3.1-12
Na papitaiso kei na veretaki i Jisu 3.13—4.11
Na cakacaka i Jisu mai Kalili 4.12—18.35
Mai Kalili ki Jerusalemi 19.1—20.34
Nai otioti ni macawa e Jerusalemi kei na veivanua volekata 21.1—27.66
Na tucake tale kei na nona rairai na Turaga 28.1-20
Currently Selected:
Maciu Nai Vakamacala Taumada: FRV21
Highlight
Share
Copy
Want to have your highlights saved across all your devices? Sign up or sign in