Maciu 25
25
Na Vosa Vakatautauvata ni Goneyalewa e Lewe Tini
1 #
Luke 12.35
“Ena qai vakatautauvatataki na matanitu vakalomalagi kei na goneyalewa e lewe tini, eratou sa dui kauta na nona cina, ka laki veitata kei na tagane sa qai vakawati. 2Ka lewe lima vei iratou sa vuku, ka lewe lima sa lialia. 3O iratou na lialia eratou sa kauta na nodratou veicina, a ratou sa sega ni kauta vata kei na waiwai, 4ia ko iratou na vuku eratou sa kauta na waiwai e na nodratou tavaya, kei na nodratou cina. 5Ia ni sa dede mai na tagane sa qai vakawati, eratou sa sosovu kecega ka moce. 6Ni sa qai lomaloma ni bogi na vanua, sa ia na kacikaci, ‘Raica, sa lako mai na tagane sa qai vakawati! Dou laki veitatavaki kaya.’ 7Eratou sa qai tucake kecega na goneyalewa oqo, a ratou sa vakarautaka na nodratou cina. 8A sa kaya ko iratou na lialia vei iratou na vuku, ‘Solia mai vei keitou e dua na nomudou waiwai, ni sa boko na neitou cina.’ 9A sa kaya ko iratou na vuku, ‘De se sega ni veirauti vei keda; e vinaka mo dou lako ga vei ira na dauveivoli ka volia na nomudou.’ 10Ia ni ratou sa lako me ratou volivoli, sa tadu mai na tagane sa qai vakawati, ia ko iratou sa vakarau oti tu, eratou sa curu vata kaya ki na kana magiti ni vakawati, a sa qai sogo na katuba. 11#Luke 13.25Sa qai lako talega mai e muri ko iratou na goneyalewa ko ya, ka kaya, ‘Noqu Turaga, Noqu Turaga, dolavi keitou.’ 12A sa vosa ko koya, ka kaya, ‘Au sa kaya vakaidina vei kemudou, au sa sega ni kilai kemudou.’ 13O koya mo dou qai vakatawa, ni dou sa sega ni kila na siga, se na tiki-ni-siga sa lako mai kina na Luve ni Tamata.
Na Vosa Vakatautauvata ni Taledi
(Luke 19.11-27)
14 #
Luke 19.11-27
“Ni sa tautauvata ko koya kei na dua na tamata sa lako ki na dua na vanua tani, ka sa kacivi ira mada na nona tamata, ka solia vei ira na nona i yau. 15Sa solia vua e dua e lima na taledi, vua tale e dua e rua, vua tale e dua e dua bauga, vei ira yadua me vaka sa dui rauti ira yadua. A sa qai lako sara yani. 16Ia ko koya sa taura na taledi e lima sa laki veivoli kina, a sa rawata e lima tale na taledi. 17Sa vaka talega kina ko koya sa taura e rua, sa rawata e rua tale. 18Ia ko koya sa taura e dua bau, sa lako ka kelia e dua na qara, ka vunia kina nai lavo ni nona turaga. 19Sa dede sara sa qai lako mai na nodra turaga na tamata oqori, a sa tarogi ira. 20Ia ko koya ka taura na taledi e lima, sa lako mai ka kauta mai e lima tale na taledi, ka kaya, ‘Noqu Turaga, e lima na taledi ko ni a solia mai vei au; raica, au sa rawata e lima tale na taledi me kenai kuri.’ 21A sa kaya vua na nona turaga, ‘E vinaka, a tamata vinaka ka dina. Ko sa dina e na ka e vica ga, au na lesi iko mo lewa na ka e vuqa. Curu ki na marau ni nomu turaga.’ 22O koya talega ka taura na taledi e rua, sa lako mai ka kaya, ‘Noqu Turaga, e rua na taledi ko ni a solia mai vei au, raica, au sa rawata e rua tale na taledi me kenai kuri.’ 23Sa kaya vei koya na nona turaga, ‘E vinaka a tamata vinaka ka dina. Ko sa dina e na ka e vica ga, au na lesi iko mo lewa na ka e vuqa. Curu ki na marau ni nomu turaga.’ 24Ia ko koya ka taura na taledi e dua bauga, sa lako mai ka kaya, ‘Noqu Turaga, au sa kilai iko, ni ko sa tamata lawaki dredre, ko sa tamusuka e na vanua ko a sega ni kaburaka kina, ka kumuna mai na vanua ko a sega ni veibiuyaka kina, 25ia ka'u a rere kina, ka laki vunia na nomu taledi e na qele. Raica, oqo na nomu sa tu tale vei iko.’ 26Sa qai vosa vei koya na nona turaga, ka kaya, ‘A tamata ca ka vucesa! Ko sa kila ni'u sa tamusuka e na vanua ka'u a sega ni kaburaka kina, ka kumuna mai na vanua ka'u a sega ni veibiuyaka kina. 27O koya ga oqo e kilikili kina kei iko mo solia na noqu i lavo vei ira nai taukei ni baqe, ka ni'u sa lako mai me'u sa qai taura na noqu kei na kenai kere talega. 28O koya mo dou qai kauta tani vua na taledi, ka solia vua sa tu vei koya na taledi e tini. 29#Maciu 13.12; Mari 4.25; Luke 8.18Ni sa tu vua na tamata e dua na ka, ena qai soli vua ka na levu na nona, ia na tamata sa sega ni tu vua e dua na ka, ena qai kau tani mai vua na ka sa tu vua. 30#Maciu 8.12; 22.13; Luke 13.28Ia na tamata tawa yaga oqo mo dou biuta ki na butobuto e tautuba, ena dautagi kina, ka vakasequruquru bati.’
Nai Otioti ni Veilewai
31 #
Maciu 16.27; 19.28 “Ia e na siga ena lako mai kina na Luve ni Tamata e na nona i ukuuku, kei ira vata kaya na agilosi yalosavasava kecega, ena qai tiko e na nona i tikotiko vakaturaga sa vakaiukuuku. 32Ena qai soqoni vata e matana na lewe ni veivanua kecega, ena qai tawasei ira rua ko koya, me vaka nai vakatawa ni sipi sa tawasei ira na sipi mai vei ira na me. 33Ia ena vakatikori ira na sipi e na ligana i matau, kei ira na me e na ligana i mawi. 34Ena qai kaya na Tui vei ira e na ligana i matau, ‘Ni lako mai, koi kemuni sa vakalougatataki vei Tamaqu, mo ni rawata na matanitu sa vakarautaki me nomuni mai nai vakatekivu kei vuravura. 35Ni ka'u a viakana, ko ni a solia mai vei au na kakana, au a viagunu, ko ni a vagunuvi au, au a vulagi, ko ni a kauti au ki vale; 36au a luvawale, ko ni a vakasulumi au; au a tauvi-mate, ko ni a mai raici au, au a tiko e na valeniveivesu, ko ni a mai sikovi au.’ 37Ena qai vosa vua ko ira na yalododonu, ka kaya, ‘Na Turaga, keimami a raici kemuni mada ninaica ni kemuni a viakana, ka vakani kemuni? Se viagunu, ka vagunuvi kemuni? 38Se keimami a raici kemuni ninaica ni kemuni a vulagi, ka kauti kemuni ki vale? Se luvawale, ka vakasulumi kemuni? 39Se keimami a raici kemuni ninaica ni kemuni a tauvi-mate, se tiko e na valeniveivesu, ka sikovi kemuni?’ 40Ena qai vosa na Tui, ka kaya vei ira, ‘Au sa kaya vakaidina vei kemuni, ni veika kemuni a cakava vua e dua sa lailai vei ira na wekaqu oqo, o ni a cakava vei au.’
41 “Ena qai vosa talega ko koya vei ira e na ligana i mawi, ‘Ni lako tani vei au koi kemuni sa cudruvi, ki na bukawaqa tawa boko sa vakarautaki me nona na tevoro kei na nona agilosi; 42ni ka'u a viakana ka o ni a sega ni solia mai vei au na kakana, au a viagunu, ka o ni a sega ni vagunuvi au, 43au a vulagi, ka o ni a sega ni kauti au ki vale, luvawale ka o ni a sega ni vakasulumi au, tauvi-mate ka tiko e na valeniveivesu ka o ni a sega ni mai raici au.’ 44Ena qai vosa vua ko ira talega, ka kaya, ‘Na Turaga, keimami a raici kemuni ninaica ni kemuni a viakana, se viagunu, se vulagi, se luvawale, se tauvi-mate, se tiko e na valeniveivesu, ka sega ni qaravi kemuni?’ 45Ena qai vosa vei ira ko koya, ka kaya, ‘Au sa kaya vakaidina vei kemuni, Ni kemuni a sega ni cakava vua e dua sa lailai vei ira oqo, kemuni a sega talega ni cakava vei au.’ 46#Tani 12.2Era na qai lako ko ira oqo ki na cudruvi tawa mudu; ia ko ira na yalododonu ki na bula tawa mudu.”
Currently Selected:
Maciu 25: FRV21
Highlight
Share
Copy
Want to have your highlights saved across all your devices? Sign up or sign in
