Maciu 2
2
Ko Iratou na Tamata Vuku mai na Tokalau
1Ia ni sa sucu ko Jisu mai Peceliema e Jutia e na gauna sa tui kina ko Eroti, raica, eso na tamata vuku mai natuicake (mai na tokalau) era sa lako mai ki Jerusalemi, 2a ra sa kaya, “Evei ko koya sa sucu me nodra tui na Jiu? Ni keitou a raica na nona kalokalo mai natuicake, ka keitou sa lako mai me cuva vua.” 3Ia ni sa rogoca ko Eroti na tui, sa kidroa, kei Jerusalemi taucoko vata kaya; 4ia ni sa vakasoqoni ira vata kecega na bete levu kei ira na vunivola ni tamata, sa tarogi ira ko koya se na sucu beka evei na Karisito. 5Era sa kaya vua, “Mai Peceliema e Jutia; ni sa vola vakaoqo na parofita:
6 #
Maika 5.2
“ ‘Ia ko iko, Peceliema, e na vanua ko Juta,
ko sa sega ni lailai sara vei ira na veiyasana e Juta;
ni na tubu mai vei iko e dua na Turaga,
ko koya ena lewai ira na noqu tamata na Isireli.’ ”
7Ia ko Eroti, ni sa kacivi ira lo na tamata vuku, sa qai taroga matua vei ira na gauna sa rairai kina na kalokalo. 8A sa talai ira ki Peceliema, ka kaya, “Dou laki vakasaqara matua sara na gone lailai; ia ni dou sa kunea, tukuna mai vei au, me'u laki cuva talega vua.” 9Ia ni ra sa rogoca na vosa ni tui, era sa lako; ka raica, na kalokalo era a raica mai natuicake (mai na tokalau), sa liutaki ira, a sa laki tu vakadua, ni sa donuya na tikina sa koto kina na gone lailai. 10Ia ni ra sa raica na kalokalo, era sa reki vakalevu sara. 11Ia ni ra sa curu ki vale, era sa raica na gone lailai kei Meri na tinana, a ra sa cuva sobu, ka vakarokoroko vua. Ia ni ra sa sereka na nodra i solesole kamunaga, era sa vakacabora vua eso nai solisoli, na koula, kei na drega me vakamai, kei na mura. 12Ia ni sa vakasala vei ira e na tadra na Kalou me ra kakua ni lako tale vei Eroti, era sa lesu tale ki na nodra vanua e na sala tani.
Dro ki Ijipita
13Ia ni ra sa lako tani, raica, sa qai rairai vei Josefa e na tadra e dua na agilosi ni Turaga, ka kaya, “Mo cavu tu, mo kauta na gone lailai kei tinana, ka dro ki Ijipita, ka waraka kina na noqu vosa vei iko; ni na vakasaqara na gone lailai ko Eroti me vakamatea.” 14Sa qai cavu tu ko koya, ka kauta na gone lailai kei tinana e na bogi, ka lako ki Ijipita, 15#Osea 11.1a sa tiko kina ka yacova na mate i Eroti. Oqo me vakayacori kina na vosa ni Turaga ko ya sa tukuna na parofita, ka kaya, “Au a kaciva na luvequ mai Ijipita.”
Na Nodra Vakamatei na Gone Lalai
16Ia ko Eroti, ni sa qai kila era a vakaisini koya ko ira na tamata vuku, sa cudru vakalevu sara, ka sa talatala yani, me vakamatei ira kecega na gonetagane lalai era sa tiko mai Peceliema, kei na kena veiyasana kecega, ko ira era yabaki yarua kei ira era lalai sobu, me rauta na gauna ka taroga matua kina ko koya vei ira na tamata vuku. 17Sa qai vakayacori na ka sa vosataka ko Jeremaia na parofita, ka kaya,
18 #
Jere 31.15
“E dua na domo sa rorogo mai Rama,
a qoqolou, kei na tagi, kei na somate levu,
sa tagicaki ira na luvena ko Raijeli;
ka sa bese ni vakacegui, ni ra sa yali vua.”
Na Lesu mai Ijipita
19Sa mate ko Eroti, sa qai rairai vei Josefa mai Ijipita e na tadra, e dua na agilosi ni Turaga, 20ka kaya, “Cavu tu, mo kauta na gone lailai kei tinana, ka lako ki na nodra vanua na Isireli, ni ra sa mate ko ira sa vakasaqara na gone me ra vakamatea.” 21Sa qai cavu tu ko koya, ka kauta na gone lailai kei tinana, a sa lako mai ki na nodra vanua na Isireli. 22Ia ni sa rogoca sa tui mai Jutia ko Arikeleo nai sosomi kei Eroti na tamana, sa rere ni lako kina; ia ni sa vakasala vua na Kalou e na tadra, sa lesu ko koya ki na yasayasa vaka-Kalili. 23#Mari 1.24; Luke 2.39; Joni 1.45A sa laki tiko vakadua ki na koro na yacana ko Nasareci, a sa vakayacori kina na ka era sa vosataka ko ira na parofita, “Ena vakatokai ko koya, a kai Nasareci.”
Currently Selected:
Maciu 2: FRV21
Highlight
Share
Copy
Want to have your highlights saved across all your devices? Sign up or sign in
