Maciu 13
13
Na Vosa Vakatautauvata ni Daukabukaburaki
(Marika 4.1-9; Luke 8.4-8)
1E na siga ko ya sa lako tani mai vale ko Jisu, ka laki tiko sobu e matasawa. 2#Luke 5.1-3A sa lewe vuqa sara era sa soqoni vata vei koya, a sa vodoka kina e dua na waqa ko koya, ka tiko sobu, a sa tu kecega mai matasawa na lewe vuqa. 3A sa levu na ka sa vosataka vei ira ko koya e na vosa vakatautauvata, ka kaya: “Rogoca! Sa dua na daukabukaburaki sa laki kabukaburaki. 4Ia ni sa kabukaburaki lako, sa lutu eso e na tutu ni sala, a sa lako mai na manumanu vuka ka kania. 5A sa lutu eso ki na vanua veivatu, sa sega ni levu kina na qele, a sa tubu cake vakatotolo sara, ni sa sega ni vavaku na kena qele. 6Ia ni sa cabe na siga, sa malai; ia ni sa sega na wakana, sa raqosa sara. 7A sa lutu eso ki na veiwa-vakavotona, a sa tubu cake na veiwa-vakavotona, ka vakaruguta. 8A sa lutu eso ki na vanua vinaka, a sa vuavua vinaka, sa vuai drau eso, a sa onosagavulu eso, a sa tolusagavulu eso. 9O koya sa vakadaligana me rogoca, me mani rogoca sara.”
Na Kedra i Naki na Vosa Vakatautauvata
(Marika 4.10-12; Luke 8.9-10)
10Sa qai lako mai ko ira na tisaipeli, ka tarogi koya, “O sa vosa tikoga vei ira e na vosa vakatautauvata e na vuku ni cava?” 11Sa qai vosa ko koya, ka kaya vei ira, “Ni sa soli vei kemudou mo dou kila na veika vuni ni matanitu vakalomalagi, ia ka sega ga ni soli vei ira. 12#Maciu 25.29; Mari 4.25; Luke 8.18; 19.26Ni sa tu vua na tamata e dua na ka, ena qai soli vakalevu vua ka na levu na nona; ia na tamata sa sega ni tu vua e dua na ka, ena qai kau tani mai vua na ka sa tu vua. 13O koya oqo ka'u sa vosa kina vei ira e na vosa vakatautauvata, ‘ni ra sa raica ka sega ni kunea, a ra sa rogoca ka sega ni rogoca, ka lecava tu.’ 14#Aisea 6.9,10Ia sa vakayacori kina vei ira na parofisai i Aisea, ka vaka,
‘Dou na daurogoca tikoga, ka lecava tu,
ia dou na dauraica tikoga, ka sega ni kunea.
15 Ni sa uro mai na lomadra na tamata oqo,
a sa didivara na daligadra,
a sa bobo na matadra;
de dua na siga ena rai na matadra,
ka rogo na daligadra,
ka kila na lomadra ka ra saumaki mai—
ia ka'u na vakabulai ira.’
16 #
Luke 10.23,24 Ia sa kalougata na matamudou, ni dou sa raica, kei na daligamudou, ni dou sa rogoca. 17Ni'u sa kaya vakaidina vei kemudou, Era lewe vuqa na parofita kei na tamata yalododonu era a via raica na ka dou sa qai raica, ka ra a sega ni raica; ka rogoca na ka dou sa qai rogoca, ka ra a sega ni rogoca.
Vakamacala ni Vosa Vakatautauvata ni Daukabukaburaki
(Marika 4.13-20; Luke 8.11-15)
18 “O koya mo dou qai rogoca na vosa vakatautauvata ni daukabukaburaki. 19Ni sa dua e rogoca na vosa ni matanitu, ka lecava tiko, sa qai lako mai na vu-ni-ca, a sa kovea na ka sa kaburaki ki lomana. Sai koya oqo sa kaburaki e na tutu ni sala. 20Ia ko koya sa kaburaki e na vanua veivatu, sai koya oqo sa rogoca na vosa, a sa vakabauta sara e na reki; 21ia ni sa sega na wakana e lomana, sa tu dede vakalailai ga, ia ni sa tubu na rarawa, se na veivakacacani e na vuku ni vosa, sa tarabe sara. 22Ia ko koya sa kaburaki e na veiwa-vakavotona, sai koya oqo sa rogoca na vosa, ia na lomaocaoca e na vuku ni vuravura oqo, kei nai yau e dauveivakaisini, sa vakaruguta na vosa, a sa sega kina ni vua. 23Ia ko koya sa kaburaki e na vanua vinaka, sai koya oqo sa rogoca na vosa, a sa kila na kenai balebale, a sa vua, ka vuai drau eso, sa onosagavulu eso, sa tolusagavulu eso.”
Na Vosa Vakatautauvata ni Sila Ca e Loma ni Witi
24Sa dua tale na vosa vakatautauvata sa tukuna vei ira ko koya, ka kaya, “Sa vakatautauvatataki na matanitu vakalomalagi kei na dua na tamata sa kaburaka na sila vinaka e na nona were; 25ia ni ra sa moce ko ira na tamata, sa lako mai na nona meca ka kaburaka vata na sila ca e loma ni witi, a sa qai lako yani. 26Ia ni sa tubu mai na sila ka vua, sa qai rairai talega na sila ca. 27Sa qai lako mai vua na kenai taukei ko ira na nona tamata, ka kaya vua, ‘O a sega saka li ni kaburaka na sila vinaka e na nomu were? Sa qai kau mai vei na sila ca?’ 28Sa qai kaya vei ira ko koya, ‘A ka oqo sa kitaka e dua na meca.’ A ra sa kaya vua ko ira na tamata, ‘O sa vinakata beka me keitou laki kumuna vata oqori?’ 29A sa kaya ko koya, ‘Tei kakua mada, de dou cavuraka talega na witi ni dou kumuna vata na sila ca. 30Laiva ga me rau tubu vata ruarua me tei cava mada na yabaki. Ia ni sa cava na yabaki ka'u na kaya vei ira na dautamusuka, Dou kumuna vata mada na sila ca, ka vauca e na veivau me visa; ia dou kumuna vata na witi ki na noqu lololo.’ ”
Na Vosa Vakatautauvata ni Sore ni Musita
(Marika 4.30-32; Luke 13.18-19)
31Sa dua tale na vosa vakatautauvata sa tukuna vei ira ko koya, ka kaya, “Sa tautauvata na matanitu vakalomalagi kei na dua na sore ni musita, o koya sa kauta e dua na tamata, ka tea e na nona were, 32ia ko ya sa lailai sobu e na sore ni kau kecega. Ia ni sa tubu cake, sa levu cake e na kena mataqali ko ya, a sa yaco me kau dina, a sa laki ro e na tabana na manumanu vuka.”
Na Vosa Vakatautauvata ni Leveni
(Luke 13.20-21)
33Sa dua tale na vosa vakatautauvata sa tukuna vei ira ko koya: “Sa tautauvata na matanitu vakalomalagi kei na leveni, sa taura e dua na yalewa, ka vunia e loma ni madrai droka e tolu nai vakarau, me sa vakalevenitaki kece mada.”
Na Nona Vakayagataka na Vosa Vakatautauvata ko Jisu
(Marika 4.33-34)
34Na ka kecega oqo sa tukuna ko Jisu kivei ira na lewe vuqa e na vosa vakatautauvata; a sa sega ni vosa walega vei ira, sa vosavakatautauvata tikoga. 35#Same 78.2O koya oqo sa vakayacori kina na vosa sa tukuna na parofita, ni sa kaya,
“Au na vosa ga e na vosa vakatautauvata;
au na tukuna eso na ka sa vuni tu mai na gauna sa caka kina ko vuravura.”
Vakamacalataka ko Jisu na Vosa Vakatautauvata ni Kau Ca
36Sa qai talai ira yani na le vuqa ko Jisu, ka curu ki vale. A sa lako mai vua ko ira na nona tisaipeli, ka kaya, “Ni vakamacalataka mai vei keitou na vosa vakatautauvata ni sila ca mai na were.” 37A sa vosa ko koya, ka kaya vei ira, “O koya sa kaburaka na sila vinaka, ko ya na Luve ni Tamata; 38ia na were ko vuravura, kei na sila vinaka ko ira na gone ni matanitu. Ia na sila ca ko ira luve ni vu-ni-ca, 39kei na meca sa kaburaka sai koya na tevoro, ia na yabaki nai vakataotioti kei vuravura, ia na dautamusuka ko ira na agilosi. 40Ia me vaka sa kumuni vata na sila ca ka visa e na buka, ena vakakina e nai vakataotioti kei vuravura oqo. 41Ena talai ira yani na nona agilosi na Luve ni Tamata, me ra soqona vata mai na nona matanitu na ka kecega sa dauveivakacalai, kei ira sa kitaka tiko na ka ca; 42ia era na biuti ira ki na lovo ni buka waqa; era na dautagi kina, ka vakasequruquru bati. 43Era na qai serau na tamata yalododonu, me vaka na siga, e na matanitu nei Tamadra. O koya sa vakadaligana, me mani rogoca sara.
Na Vosa Vakatautauvata ni Yau e Vuni Tu
44 “Sa dua tale, sa tautauvata na matanitu vakalomalagi kei nai yau sa vuni tu e na dua na were; ka sa dua na tamata sa kunea, ka sega ni tukuna, ia ni sa rekitaka, sa laki volitaka na ka kecega sa tu vua, a sa volia na were ko ya.
Na Vosa Vakatautauvata ni Mataniciva
45 “Sa dua tale, sa tautauvata na matanitu vakalomalagi kei na tamata dauveivoli, sa vakasaqara eso na mataniciva vinaka, 46ia ni sa kunea e dua na mataniciva talei sara, sa lako ka volitaka na ka kecega sa tu vua, ka sa volia na ka ko ya.
Na Vosa Vakatautauvata ni Lawa ni Ika
47 “Sa dua tale, sa tautauvata na matanitu vakalomalagi kei na lawa-ni-yavi, sa viritaki ki wai, a sa rawa kina na ika eso mai na veimataqali kecega. 48Ia ni sa sinai, era sa yavia ki matasawa, a ra sa tiko sobu, ka tugana na kena vinaka ki na sova, ka biuta tani na kena ca. 49Ena vakakina e nai vakataotioti kei vuravura. Era na lako mai na agilosi, ka tawasei ira tani na tamata ca mai vei ira na yalododonu, 50ka biuti ira laivi tu ki na lovo ni buka waqa. Era na dautagi kina ka vakasequruquru bati.
Nai Yau Vou kei nai Yau Makawa
51 “Dou sa kila nai balebale ni ka kecega oqo?” Era sa kaya vua, “Io.” 52Sa qai kaya vei ira ko koya, “Ia na vu-ni-vola kecega sa vakatavulici e na ka ni matanitu vakalomalagi, sa tautauvata kei na tamata sa taukena e dua na vale, ko koya sa kauta mai na nona lololo na veika vou kei na veika makawa talega.”
Sega ni Vinakati ko Jisu mai Nasareci
(Marika 6.1-6; Luke 4.16-30)
53A sa yaco, ni sa vakaotia ko Jisu na vosa vakatautauvata kece oqo, sa lako tani mai kea. 54Ia ni sa tadu ki na nona vanua, sa vakavulici ira ko koya e na nodra valenilotu, a ra sa kurabui kina, ka kaya, “E rawata mai vei ko koya oqo na vuku oqo, kei na cakacaka-mana oqo? 55Sa sega li ni luve ni matai ko koya oqo? Sa sega li ni yaca i tinana ko Meri? Kei na tacina ko Jemesa, kei Josefa, kei Saimoni, kei Jutasa? 56Kei na ganena, eratou sa sega li ni tiko vata kece kei keda? Sa qai rawata mai vei ko koya na ka kecega oqo?” 57#Joni 4.44A ra sa tarabe e na vukuna. Ia sa kaya vei ira ko Jisu, “Sa vakarokorokotaki na parofita e na veivanua tani, ia sa sega ga e na nona vanua, se nona vale.” 58Ka sa sega ni cakava mai keri ko koya e vuqa na cakacaka-mana, ni ra sa sega ni vakabauta.
Currently Selected:
Maciu 13: FRV21
Highlight
Share
Copy
Want to have your highlights saved across all your devices? Sign up or sign in
