Luke 7
7
Sa Vakabula ko Jisu na Nona Tamata na Turaganivalu
(Maciu 8.5-13)
1Ia ni sa vakaotia na nona vosa kecega ni ra sa rogoca tiko na lewe vuqa, sa qai curu ko koya ki Kapenaumi.
2Ia sa dua na turaga-ni-valu, sa tauvi-mate e dua na nona tamata, sa dau lomana ko koya, a sa voleka ni ciba. 3Ia ni sa rogoca nai tukutuku kei Jisu, sa tala vua eso na qase ni Jutia, me vakamasuti koya me lako mai ka vakabula na nona tamata. 4Ia ni ra sa tadu vei Jisu, era vakamasuti koya vakalevu, ka kaya, “Sa yaga ko koya mo ni kitaka kina na ka oqo; 5ni sa lomana na noda matanitu, a sa tara ko koya na neimami valenilotu.” 6Sa qai lako vata kei ira ko Jisu. Ia ni sa voleka ki vale ko koya, sa tala eso na wekana na turaga-ni-valu, me ra kaya vua, “Kemuni na Turaga, kakua ni vakaceguocataki kemuni, ni’u sa sega ni yaga mo ni curu ki na noqu vale; 7ka’u sa sega talega ni nanumi au me’u yaga me’u lako vei kemuni. Ia mo ni cavuta na vosa, ena bula kina na noqu tamata dauveiqaravi. 8Ni’u sa turaga e vakarorogo ki na ruku ni lewa koi au, ka’u sa lewa na sotia eso; ka’u sa kaya vua oqo, ‘Mo lako yani,’ a sa lako yani; vei koya e dua tale, ‘Mo lako mai,’ a sa lako mai; ka vei koya na noqu tamata, ‘Mo kitaka oqo,’ ka sa kitaka.” 9Ia ni sa rogoca na veika oqo ko Jisu, sa kurabuitaki koya, ka sa vuki vei ira na lewe vuqa sa muri koya, ka kaya, “Au sa kaya vei kemudou, au sa sega ni kunea vei ira na Isireli e dua na vakabauta levu vakaoqo.” 10Ia ni sa lesu tale ki vale ko ira era sa talai, era sa kunea na tamata dauveiqaravi ka tauvi-mate ni sa qai bula vinaka.
Sa Vakabula Tale ko Jisu e Dua na Luve ni Yada
11Ni oti ko ya, sa lako ko koya ki na dua na koro na yacana ko Neini. A ra sa lewe vuqa na nona tisaipeli era sa lako vata kaya, kei ira talega na lewe vuqa sara. 12Ia ni sa toro voleka ki na matamata-ni-koro, raica, sa dua na mate sa colati ki nai bili. A sa luve i tinana e dua bauga, ka sa yada ko koya; a sa lewe vuqa sara na lewe ni koro era sa lako vata kaya. 13Ia ni sa raici koya na Turaga, sa lomana, ka kaya vua, “Kakua ni tagi.” 14A sa lako ko koya, ka tara na tavata ni yago ni mate, ka ra sa tu vakadua ko ira sa colata. A sa kaya ko koya, “Ko iko na cauravou, au sa kaya vei iko, mo duri cake mai!” 15A sa duri cake na mate, ka vakatekivu me vosa. A sa solia ko koya vei tinana. 16A ra sa rere ko ira kecega, ka ra vakarokorokotaka na Kalou, ka kaya, “Sa qai tubu cake vei keda e dua na parofita levu!” ka kaya talega, “Sa lako mai na Kalou kivei ira na nona tamata!” 17Ia na kenai rogorogo oqo sa kuruseti Jutia taucoko kei na yasana kecega sa vakavolivolita.
Sa Tukuni Koya vei rau na Tisaipeli i Joni ko Jisu
(Maciu 11.2-19)
18A sa vakatakila vei Joni na ka kecega oqo ko ira na nona tisaipeli. 19A sa kacivi rau e lewe rua na nona tisaipeli ko Joni, ka talai rau vei Jisu, me kaya, “Oi kemuni beka ko koya e lako mai, se da waraka e dua tale?” 20Ia ni rau sa yaco vua, erau sa kaya, “Sa talai keirau mai vei kemuni ko Joni na dauveipapitaisotaki, me kaya, ‘Oi kemuni beka ko Koya e lako mai, se da waraka e dua tale?’ ” 21Ia e na tiki-ni-siga ko ya era sa lewe vuqa sa vakabula ko koya mai na mate kei na rarawa, ka mai vei ira na yalo ca; a ra sa lewe vuqa era sa mataboko sa lewa ko koya me ra rai rawa. 22#Aisea 35.5-6; 61.1Sa qai vosa ko Jisu, ka kaya vei rau, “Drau lako, ka tukuna vei Joni na veika drau sa raica ka rogoca; ni ra sa rai na mataboko, sa lako na lokiloki, sa vakasavasavataki na vukavuka, sa rogo na didivara, sa vakaturi cake tale na mate, sa vunautaki nai tukutuku-vinaka vei ira na dravudravua. 23Ka sa kalougata ko koya ena sega ni tarabe e na vukuqu.”
24Ia ni rau sa lako tale koi rau ka tala ko Joni, sa kaya ko koya vei ira na lewe vuqa e na vuku i Joni, “A cava dou a lakova ki na loma ni vanua lala mo dou raica? A gasau li sa yavalati e na cagi? 25Ia ka cava dou a lakova mo dou raica? A tamata sa vakaisulu li e nai sulu malumalumu? Raica, ko ira sa vakaisulu vakaiukuuku, ka daukana vinaka, era sa tiko e na veivale vakaturaga. 26Ia ka cava dou a lakova mo dou raica? A parofita? Io, au sa kaya vei kemudou, e dua sa uasivia na parofita. 27#Mala 3.1Sai koya ka volai vakaoqo,
‘Raica, au sa tala yani na noqu i talai me liutaki iko,
ena caramaka ko koya na nomu sala e matamu.’
28 Ni’u sa kaya vei kemudou, vei ira sa sucu mai na yalewa, sa sega na parofita sa uasivi cake vei Joni na dauveipapitaisotaki. Ia ko koya sa lailai sara e na matanitu ni Kalou sa uasivi vei koya.” 29#Maciu 21.32; Luke 3.12(Ia ko ira kecega na tamata era rogoca, kei ira sa daukumuna nai vakacavacava, era sa vakadinadinataka na lewa dodonu ni Kalou, ka ni ra sa papitaisotaki e na papitaiso i Joni. 30Ia ko ira na Farisi kei ira talega na vu-ni-vunau, era sa cata na ka sa nakita na Kalou e na vukudra, ka ra sa sega ni papitaisotaki vua.)
31A sa kaya na Turaga, “A cava me’u vakatautauvatataki ira kina na tamata e nai tabatamata oqo? Se ra tautauvata beka kei na cava? 32Era sa tautauvata kei ira na gone sa tiko e na rara ni veivoli, ka veikaciyaki, ka kaya,
‘Keitou a uvu bitu vei kemudou, ka dou a sega ni meke;
keitou a tagi vei kemudou, ka dou a sega ni tagiyaso.’
33 Sa lako mai ko Joni na dauveipapitaisotaki ka sega ni daukana madrai se daugunu waini; ia dou sa kaya, ‘Sa tiko vua e dua na tevoro.’ 34Sa lako mai na Luve ni Tamata ka sa kana ka gunu, ia dou sa kaya, ‘Raica, a tamata daukana ka daugunu waini, a nodra i tau era kumuna nai vakacavacava kei na tamata i valavala ca!’ 35Ia sa vakadonuya na vuku ko ira kecega na luvena.”
Sa Vosoti na Yalewa i Valavala Ca
36A sa kerei koya e dua na Farisi me kana vata kaya. A sa curu ki na vale ni Farisi ko koya, ka tiko sobu me kana.
37 #
Maciu 26.7; Mari 14.3; Joni 12.3 Ka raica, sa dua na yalewa e na koro, o koya sa yalewa i valavala ca, ni sa kila sa tiko ko koya e na vale ni Farisi me kana, sa kauta mai e dua na tavaya alapasita sa tawa e nai lumu. 38A sa tu mai dakuna ki yavana, ka tagi, a sa vuya na yavana e na wai ni matana, a sa quaraka e na drau ni uluna, a sa reguca na yavana, ka lumuta e nai lumu. 39Ia ni sa raica oqo na Farisi ka sureti koya, sa nanuma ga e lomana, ka vaka, “Kevaka sa parofita ko koya oqo, sa na kila rawa ko koya na yalewa oqo sa tarai koya, kei na nona i valavala talega—ni sa yalewa i valavala ca.” 40Sa qai vosa ko Jisu, ka kaya vua, “I Saimoni, sa dua na ka ka’u sa via taroga vei iko.” A sa kaya ko koya, “Vakavuvuli, mo kaya ga mai.”
41 “Sa dua na turaga, sa lewe rua na tamata erau sa dinau vua. E dua, sa lima na drau na pene na nona dinau; e dua tale, sa limasagavulu. 42Ia ni sa sega ni rawa ni rau sauma lesu, sa qai bokoca na nodrau dinau ruarua. Mo tukuna mada mai se ko cei vei rau ena lomani koya vakalevu cake?” 43Sa vosa ko Saimoni, ka kaya, “Na noqu vakasama, ni ko koya sa levu cake na dinau sa bokoci vua.” A sa kaya vua ko koya, “O sa lewa vakadodonu.” 44A sa vuki vaka vua na yalewa ko koya, ka kaya vei Saimoni, “Ko sa raica na yalewa oqo, ne? Au sa curu ki na nomu vale; ka sa sega na wai ko solia me vui kina na yavaqu, ia sa vuya na yavaqu ko koya e na wai ni matana, ka sa quaraka e na drau ni uluna. 45Ko sa sega ni reguci au, ia ko koya oqo sa sega ni cegu ni reguca na yavaqu ni’u sa tiko eke. 46Ko sa sega ni lumuta na uluqu e na waiwai, ia ko koya oqo sa lumuta na yavaqu e nai lumu. 47O koya oqo ka’u sa kaya kina vei iko, ni nona i valavala ca, ka sa vuqa tu, sa vosoti—ni sa loloma vakalevu ko koya. Ia ko koya sa vosoti vakalailai, sa loloma vakalailai.” 48Sa qai kaya vua na yalewa ko koya, “Sa vosoti na nomu i valavala ca.” 49Ia ko ira era sa tiko vata kaya me kana, era sa kaya vakai ira, “Ko cei oqo sa vosota talega nai valavala ca?” 50A sa kaya ko koya vua na yalewa, “Sa vakabulai iko na nomu vakabauta; mo lako e na vakacegu.”
Currently Selected:
Luke 7: FRV21
Highlight
Share
Copy
Want to have your highlights saved across all your devices? Sign up or sign in
