Luke 18
18
Na Vosa Vakatautauvata Baleta na Yada kei na Turaganilewa
1Sa vakatakila talega ko Jisu vei ira e na dua na vosa vakatautauvata, ni sa dodonu me daumasu tiko ka kakua ni ceguoca. 2A sa kaya, “Sa dua na koro sa tiko kina e dua na turaga-ni-lewa, sa sega ni rerevaka na Kalou, se dokai ira na tamata. 3A sa dua na yada e na koro ko ya ka sa dau lako mai vei koya, ka kaya, ‘Mo ni lewai au mada vakadodonu kei na noqu meca.’ 4A sa bese taumada ko koya; ia sa qai kaya e muri e lomana, ‘Au sa sega ni rerevaka na Kalou, se’u dokai ira na tamata, 5ia ni sa mai vakasosataki au na yada oqo, ka'u na lewai koya vakadodonu mada, me kakua kina ni vakaceguocataki au ko koya ni sa sega ni mudu ni lako mai.’ ” 6A sa kaya na Turaga, “Dou rogoca na ka sa kaya na turaga-ni-lewa tawa dodonu. 7Ia na Kalou, ena sega li ni lewai ira vakadodonu na nona digitaki era dautagi tikoga vua e na siga kei na bogi? Ena vakaberaberataka li vakabalavu na nona vukei ira? 8Au sa kaya vei kemudou, ena lewai ira vakadodonu vakusarawa ko koya. Ia ni sa lako mai na Luve ni Tamata, ena kunea beka na vakabauta e vuravura, se segai?”
Na Vosa Vakatautauvata Baleta na Farisi kei na Daukumuni Vakacavacava
9A sa cavuta na vosa vakatautauvata oqo me tukuni ira era sa vakararavi ga kivei ira ni ra sa yalododonu, ka ra sa beci ira na tamata tani: 10“E lewe rua na tamata erau lako cake ki na vale-ni-soro me masu, e dua na Farisi, ka dua na daukumuna nai vakacavacava. 11Sa tu na Farisi ka masu vakai koya, vakaoqo: ‘Kemuni na Kalou, au vakamolimoli vei kemuni, ni’u sa sega ni vakataki ira na tamata eso, era sa daukovekove, era sa daubutako lo, era sa dauyalewa, se vakataki koya oqo na kumuna nai vakacavacava. 12Au sa lolo vakarua e na veimacawa, au sa solia nai katini ni ka kecega au sa rawata.’ 13Ia sa tu vakayawa ko koya na daukumuna nai vakacavacava, a sa sega ni via ta cake ki lomalagi, ia sa tavia ga na lomaserena, ka kaya, ‘Kemuni na Kalou, ni lomani au mai, koi au na tamata i valavala ca!’ 14#Maciu 23.12; Luke 14.11Au sa kaya vei kemudou, sa lako sobu ki na nona vale na tamata oqo ka sa vakadonui, ia ko koya kadua sa segai. Ni na vakayalomalumalumutaki ko koya yadua sa vakalevulevui koya, ia ko koya sa vakayalomalumalumutaki koya ena vakalevulevui.”
Sa Vakalougatataki Ira na Gone Lalai ko Jisu
(Maciu 19.13-15; Marika 10.13-16)
15A ra sa kauta talega vua na gone lalai, me tarai ira ko koya. Ia ni ra sa raica ko ira na tisaipeli, era sa vunauci ira. 16A sa kacivi ira mai ko Jisu, ka kaya, “Laivi ira na gone lalai me ra lako mai vei au, kakua ni tarovi ira, ni sa vakataki ira na lewe ni matanitu ni Kalou. 17Au sa kaya vakaidina vei kemudou, o koya ena sega ni vakabauta na matanitu ni Kalou me vaka na gone lailai, ena sega sara ni curu kina.”
Na Tamata Vutuniyau
(Maciu 19.16-30; Marika 10.17-31)
18A sa tarogi koya e dua na turaga, ka kaya, “Vakavuvuli vinaka, a cava me’u kitaka me'u rawata kina na bula tawa mudu?” 19A sa kaya vua ko Jisu, “Ko sa vakatokai au me’u vinaka e na vuku ni cava? Sa sega e dua tale e vinaka, na Kalou duaduaga. 20#Lako 20.12-16; Vrua 5.16-20Ko sa kila na vunau: ‘Mo kakua ni ia na veibutakoci; Mo kakua ni laba; Mo kakua ni butako; Mo kakua ni veibeitaki vakailasu; Mo vakarokoroko vei rau na tamamu kei na tinamu.’ ” 21Sa qai kaya ko koya, “A ka kecega oqo ka'u a vakabauta ni ka’u a gone ka yacova na siga oqo.”
22Ia ni sa rogoca na ka oqo ko Jisu, sa kaya vua, “E dua na ka sa sega vei iko, mo volitaka na ka kecega sa tu vei iko, ka solia vei ira sa dravudravua, ko na qai vakaiyau mai lomalagi; ka mo lako mai, mo muri au.” 23Ia ni sa rogoca oqo, sa rarawa sara na lomana, ni sa vutuniyau sara. 24Ia ni sa raica ko Jisu ni sa rarawa sara na lomana, sa kaya, “E dredre sara vei ira sa vutuniyau me curu ki na matanitu ni Kalou! 25Sa rawarawa me curuma na mata ni cula na kameli, ia ka dredre vua na tamata vutuniyau me curu ki na matanitu ni Kalou.”
26Ko ira era sa rogoca era sa kaya, “Ko cei beka ena vakabulai rawa?” 27Ia sa kaya ko koya, “A ka sa dredre sara vei ira na tamata sa rawarawa vua na Kalou.”
28Sa qai kaya ko Pita, “Raica, keitou sa biuta na ka kece, ka muri kemuni.” 29A sa kaya vei ira ko koya, “Au sa kaya vakaidina vei kemudou, sa sega e dua sa biuta na vale, se tamana se tinana, se tuakana se tacina, se watina, se luvena, e na vuku ni matanitu ni Kalou, 30me qai sega ni saumi, ena rawata vakalevu cake e na bula oqo, ia e na gauna mai muri na bula tawa mudu.”
Nai Katolu ni gauna e Tukuna Kina ko Jisu na Nona Mate
(Maciu 20.17-19; Marika 10.32-34)
31Sa qai kauti ira mai na le tinikarua, ka kaya vei ira, “Raica, eda sa lako cake ki Jerusalemi, ia na ka kecega era sa vola na parofita e na vuku ni Luve ni Tamata ena vakayacori mai. 32Ni na soli yani ko koya vei ira na matanitu tani, ena vakalialiai talega, ka vakaisini, ka kasiviti. 33Era na vakanakuitataka talega, ka vakamatea, ena qai tucake tale ko koya e nai katolu ni siga.” 34Ia era sa sega ni kila e dua na ka oqo. Na ka oqo sa vuni vei ira, ka ra sa sega ni kila na ka sa vosataki.
Sa Vakabula ko Jisu na Mataboko Daukerekere
(Maciu 20.29-34; Marika 10.46-52)
35Ia ni sa torovi Jeriko ko koya, sa dua na tamata mataboko sa tiko e na bati ni sala me kerekere. 36Ia ni sa rogoca era sa lewe vuqa sa lako tu, sa taroga ko koya se na cava sa yaco. 37A ra sa tukuna vua, “Sa lako tiko mai oqo ko Jisu na kai Nasareci.” 38Ka sa kaci ko koya, ka kaya, “I Jisu, na Luve i Tevita, ni lomani au mai!” 39A ra sa vunauci koya ko ira sa liu tiko, me tiko lo. A sa kaci vakalevu cake kina ko koya, “Na Luve i Tevita, ni lomani au mai!” 40Sa qai tu vakadua ko Jisu, ka kaya me kau mai ko koya vua. Ia ni sa yaco voleka, sa tarogi koya, 41“A cava ko sa vinakata me’u cakava vei iko?” A sa kaya, “Kemuni na Turaga, me’u rai rawa.” 42A sa kaya vua ko Jisu, “Mo rai rawa; sa vakabulai iko na nomu vakabauta.” 43A sa rai rawa vakasauri ko koya, a sa muri koya, ka vakarokorokotaka tiko na Kalou. Ia ko ira kecega na lewe vuqa, ni ra sa raica, era sa vakavinavinaka vua na Kalou.
Currently Selected:
Luke 18: FRV21
Highlight
Share
Copy
Want to have your highlights saved across all your devices? Sign up or sign in
