Joni 12
12
Lumuti ko Jisu Mai Pecani
(Maciu 26.6-13; Marika 14.3-9)
1Sa vo e ono na bogi me qai ia na solevu ni Lako-sivia, sa qai lako mai ko Jisu ki Pecani, sa tiko kina ko Lasarusa, ka mate eliu ko koya ka vakatura cake tale mai na mate ko koya. 2A ra sa cakava kina na kenai vakayakavi. A sa qarava ko Marica, a sa dua vei ira sa kana vata kaya ko Lasarusa.
3 #
Luke 7.37,38 Sa qai kauta mai ko Meri e dua na paudi waiwai talei sara, a narita dina, ka lumuta na yava i Jisu, ka solota na yavana e na drau ni uluna. Sa vakasinaiti na vale e nai boi ni waiwai.
4Sa qai kaya e dua vei ira na nona tisaipeli, ko Jutasa Isikarioti, ko koya ena soli koya yani, 5“Ena cava sa sega ni volitaki na waiwai oqo e na pene e tolu na drau, ka soli vei ira na dravudravua?” 6Sa sega ni nona nanumi ira na dravudravua, sa vosa kina vakaoqo ko koya, e na vuku ga ni sa daubutako, ka taura na taga i lavo, a sa kauta na ka sa biu kina. 7Sa qai kaya ko Jisu, “Laivi koya ga, sa maroroya na ka oqo ko koya ki na siga ka'u na bulu kina. 8#Vrua 15.11Era sa tiko vakadua kei kemudou ko ira na dravudravua, ia koi au, ka'u sa sega ni tiko vakadua kei kemudou.”
Na Bukiveretaki i Lasarusa
9Ia sa lewe vuqa sara vei ira na Jiu, ni ra sa kila sa tiko mai kina ko koya, era sa lako mai, sa segai e na vuku i Jisu ga, ka me ra raici Lasarusa talega, ko koya ka vakatura cake tale mai na mate ko koya. 10Ia ko ira na bete levu era sa bose vata me ra vakamatei Lasarusa talega, 11ni ra sa lewe vuqa na Jiu sa lako yani e na vukuna, ka vakabauti Jisu.
Na Curu Vakatui ki Jerusalemi
(Maciu 21.1-11; Marika 11.1-11; Luke 19.28-40)
12E na mataka e lewe vuqa sara era sa lako mai ki na kana vata, ni ra sa rogoca sa lako mai ki Jerusalemi ko Jisu. 13#Same 118.25,26Era sa kauta na drau ni niu-sawa, a ra sa lako yani me veitavaki kaya, ka kacivaka,
“Osana!
Sa kalougata ko koya sa lako mai e na yaca ni Turaga—
na nodra Tui na Isireli!”
14Ia ko Jisu, ni sa kunea e dua na luve ni asa, sa vodoka, me vaka sa volai,
15 #
Saka 9.9
“Oi kemuni sa toka mai Saioni, kakua ni rere.
Raica, sa lako mai na nomuni Tui,
ka sa vodo tiko e na dua na luve ni asa!”
16Ia na veika oqo era sa sega mada ni kila ko ira na nona tisaipeli, ia ni sa vakarokorokotaki oti ko Jisu, era sa qai nanuma ni sa volai ko koya e na veika oqo, a ra sa kitaka vua na veika oqo.
17Ko ira na lewe vuqa era sa tiko kaya ni sa kacivi Lasarusa mai nai bulubulu, ka vakaturi koya cake tale mai na mate, era sa tukuna. 18E na vuku ni ka oqo sa veitavaki kaya talega na lewe vuqa, ni ra sa rogoca sa cakava na ka-mana oqo ko koya. 19O ira na Farisi era sa qai kaya vakai ira, “Dou sa kila beka ni dou sa sega ni rawata e dua na ka? Raica, sa muri koya na kai vuravura kecega.”
Era Vakasaqarai Jisu Eso na Kai Kirisi
20Ia sa so mai na veimatanitu tani, era sa lako cake mai ki na solevu me ra sokalou. 21Ko ira oqo era sa lako mai vei Filipe, a kai Pecisaita e Kalili, ka tarogi koya, ka kaya, Keitou via raici Jisu, saka. 22Sa lako ko Filipe ka tukuna vei Adriu; ia koi rau ko Adriu kei Filipe, erau sa tukuna vei Jisu. 23A sa vosa vei rau ko Jisu, ka kaya, “Sa qai yaco mai na gauna me vakarokorokotaki kina na Luve ni Tamata. 24E dina, e dina, au sa kaya vei kemudou, kevaka ena sega ni mate na vua ni sila ni sa lutu ki na qele, sa tiko duaduaga; ia kevaka sa mate, sa vua vakalevu. 25#Maciu 10.39; 16.25; Mari 8.35; Luke 9.24; 17.33O koya sa lomana na nona bula, ena vakayalia, ia ko koya sa cata na nona bula e vuravura oqo, ena maroroya ki na bula tawa mudu. 26Kevaka sa qaravi au e dua, me muri au ga, ia na vanua ka'u sa tiko kina, ena tiko talega kina ko koya sa qaravi au. Ia kevaka sa qaravi au e dua, ena vakarokorokotaki koya ko Tamaqu.
Sa Tukuna Tiko na Nona Mate ko Jisu
27 “Sa qai rarawa na lomaqu. Ia ka cava me'u kaya? — ‘I Tamaqu, ni vakabulai au mai na aua oqo’? Ia e nai naki oqo ka'u sa lako mai kina ki na aua oqo. 28I Tamaqu, ni vakarokorokotaka na yacamuni.” Sa qai voqa mai e dua na domo mai lomalagi, “Au sa vakarokorokotaka, ka'u na vakarokorokotaka tale.” 29Ko ira na lewe vuqa ka tiko ka rogoca, era sa kaya sa kurukuru. Sa kaya eso tale, “Sa dua na agilosi sa vosa vei koya.” 30Sa vosa ko Jisu, ka kaya, “Sa sega ni lako mai na vosa oqo e na vukuqu, e na vukumudou ga. 31Oqo na gauna me lewai kina ko vuravura; oqo na gauna me biu kina ki tautuba na tui ni vuravura oqo. 32Ia koi au, ni'u sa laveti cake mai vuravura, ka'u na vakayarayarataki ira na tamata kecega kivei au.” 33A sa vosataka na ka oqo ko koya me vakatakila na mataqali mate ena mate kina ko koya. 34#Same 110.4; Aisea 9.7; Isi 37.25; Tani 7.14Sa kaya vua na lewe vuqa, “Keimami a rogoca mai na vunau ni sa tiko vakadua na Karisito. Ia ko sa kaya vakacava, Ena laveti cake na Luve ni Tamata? Ko cei na Luve ni Tamata oqo?” 35Sa qai kaya vei ira ko Jisu, “Sa tiko vakalailai ga vei kemudou na rarama. Dou lako ni sa tu vei kemudou na rarama, de yacovi kemudou na butobuto. Ia ko koya sa lako e na butobuto, sa sega ni kila se sa lako kivei. 36Ni sa tu vei kemudou na rarama, dou vakabauta na rarama, mo dou yaco me luve ni rarama.”
Na Nodra Tawa Vakabauta na Tamata
Sa vosataka na veika oqo ko Jisu, ka qai lako yani, ka vunitaki koya vei ira. 37Ia e dina ga sa cakava ko koya e matadra e vuqa na cakacaka mana, a ra sa sega ga ni vakabauti koya, 38#Aisea 53.1me vakayacori kina na ka sa kaya ko Aisea na parofita, ka vaka,
“I Jiova, ko cei sa vakabauta na neitou i tukutuku?
A sa vakatakilai vei cei na liga i Jiova?”
39A ka oqo era sa sega kina ni vakabauta rawa, ni sa kaya talega ko Aisea,
40 #
Aisea 6.10
“Sa vakamatabokotaka na matadra
ka vakaukauwataka na lomadra ko koya,
me kakua ni rai na matadra,
ka kila na lomadra, ka saumaki mai—
ka me'u vakabulai ira.”
41Sa vosataka na veika oqo ko Aisea, ni sa raica na nona i serau, ka tukuni koya.
42Ia sa lewe vuqa vei ira talega na turaga era sa vakabauti koya, ia, e na vukudra na Farisi, era sa sega ni tukuna, de ra sa vakatatabui mai na valenilotu; 43ni ra sa vinakata vakalevu me vakarokorokotaki ira ko ira na tamata, ka vakalailai ga me vakarokorokotaki ira na Kalou.
Na Veilewai mai na Vosa i Jisu
44Sa qai kaci ko Jisu, ka kaya, “O koya sa vakabauti au, sa sega ni vakabauti au ga, sa vakabauti koya talega sa talai au mai. 45Ia ko koya sa raici au, sa raici koya sa talai au mai. 46Au sa lako mai ki vuravura me'u kena rarama, me kakua ni tiko e na butobuto ko koya yadua sa vakabauti au. 47Ia kevaka e dua sa rogoca na noqu vosa, ka sega ni vakabauta, au sa sega ni lewai koya; ni'u sa sega ni lako mai me'u lewai ira na kai vuravura, me'u vakabulai ira ga na kai vuravura. 48Sa dua sa lewai koya sa biuti au, ka sega ni vakabauta na noqu vosa, a vosa ka'u sa vosataka, sai koya oqo ena lewai koya e na siga mai muri. 49Ni'u sa sega ni vosa vakataki au, ia ko Tamaqu sa talai au mai, sa vakarota vei au na ka me'u kaya, kei na ka me'u tukuna. 50Ia ka'u sa kila sa vu ni bula tawa mudu na nona i vakaro. O koya ga, e na ka kecega ka'u sa vosataka, au sa vosa me vaka na ka sa kaya vei au ko Tamaqu.”
Currently Selected:
Joni 12: FRV21
Highlight
Share
Copy
Want to have your highlights saved across all your devices? Sign up or sign in
