Vakatekivu 12
12
Na Kaci ni Kalou vei Eparama
1 #
Caka 7.2,3; Ipe 11.8 Ia sa kaya oti vei Eparama ko Jiova, “Mo lako tani e na nomu vanua, ka biuti ira na wekamu, kei na vale nei tamamu, ka lako ki na vanua ka'u na vakatakila vei iko. 2Ia ka'u na vakayacori iko mo matanitu levu, ia ka'u na vakalougatataki iko, ka vakarogorogoya na yacamu, ia ko na vu ni veivakalougatataki. 3#Kala 3.8Ia ka'u na vakalougatataki ira era vosavakalougatataki iko, ka cudruvi koya sa rukaki iko; ena kalougata talega e na vukumu na veimataqali kecega e vuravura.”
4A sa lako tani ko Eparama, me vaka ka vosa vua ko Jiova; a sa lako vata kaya ko Loti. Sa vitusagavulu ka lima na yabaki i Eparama, ni sa lako tani e Karana. 5A sa kauti Serai na watina ko Eparama, kei Loti na luve ni tuakana, kei nai yau kecega eratou sa rawata, kei na tamata eratou sa rawata mai Karana; a ra sa lako tani me ra lako ki na vanua ko Kenani; a ra sa yaco sara ki na vanua ko Kenani. 6A sa lako tu e na vanua ko Eparama, ka yaco ki na yasana mai Sikemi, ki na kau mai More. A ra sa tiko e na vanua na kai Kenani e na gauna ko ya. 7#Caka 7.5; Kala 3.16A sa rairai vei Eparama ko Jiova, ka sa kaya, “Au na solia na vanua oqo vei ira na nomu kawa.” A sa cakava mai kea ko koya e dua nai cabocabo-ni-soro vei Jiova, ko koya ka rairai vua. 8A sa lako tani mai kea ko koya ki na ulunivanua vaka ki na tokalau mai Peceli, a sa birika na nona valelaca, a sa koto vaka ki na ra ko Peceli, ka vaka ki na tokalau ko Ai; a sa cakava mai kea e dua nai cabocabo-ni-soro vei Jiova, a sa masuta na yaca i Jiova. 9A sa lako tu ga ko Eparama, ka lako vaka ki na ceva.
Ko Eparama kei Serai mai Ijipita
10A sa dausiga na vanua. A sa lako sobu ki Ijipita ko Eparama me la'ki tiko vulagi kina; ni sa ka tani na dausiga e na vanua. 11Ia ni sa vakarau ko koya me curu ki Ijipita, sa kaya vei Serai na watina, “Raica, ka'u sa kila ni ko sa yalewa matavinaka; 12ia ni ra raici iko ko ira na kai Ijipita, era na qai kaya, Oqo na watina; era na qai vakamatei au, ka vakabulai iko. 13#Vteki 20.2; 26.7Au masuti iko kina mo kaya mada ko sa ganequ, me'u vinaka kina, ia ka'u na bula talega e na vukumu.” 14Ia ni sa yaco ki Ijipita ko Eparama, era sa raici koya na yalewa ko ira na kai Ijipita ni sa matavinaka sara ko koya. 15Sa ra raici koya talega na nona tamata turaga ko Fero, ka vosavakavinavinakataki koya vei Fero; a sa kau ki na vale i Fero na yalewa. 16A sa caka vinaka vei Eparama ko koya e na vukuna; a sa rawata ko Eparama na sipi, kei na bulumakau, kei na asa tagane, kei na tagane-bobula, kei na yalewa-bobula, kei na asa yalewa, kei na kameli.
17A sa vakararawataki Fero kei ira e nona vale ko Jiova e na mate ca sara, e na vuku i Serai na wati Eparama. 18A sa kacivi Eparama ko Fero, ka kaya, “A cava na ka oqo ko sa cakava vei au? A cava ko a sega kina ni tukuna vei au ni sa watimu ko koya? 19A cava ko a kaya kina, ‘A ganequ ko koya,’ ka sa rawarawa kina me'u taura me watiqu? Ia oqo, mo raica mada na watimu, mo kauta, ka lako.” 20A sa vakaroti ira na tamata ko Fero e na vukuna; a ra sa kauti koya e na nona lako tu, kei na watina, kei na nona ka kecega.
Currently Selected:
Vakatekivu 12: FRV21
Highlight
Share
Copy
Want to have your highlights saved across all your devices? Sign up or sign in
