मत्ती 8
8
येशुइ जे नाःजा क्याःप्क्योक मीःला टाःच्युक्योक
(मर्कुस १:४०-४५; लुका ५:१२-१६)
1येशु काःङलाःम्ले माःर्ला पाःप्मीःजीक मीःइ छ्योम्बो पोर्चोम खुङगीइ तीङ्ला ओःङ्सी। 2ओःले मेःराङ चीग जे नाःजा थेङ्क्योक मीः ओःङ्दी खुङगीइ तोःङ्ला पीमु चुदी लाःसी, “ए प्रभु, ख्याइ सेम थेसी लाःना ङाःला टाःच्युखुउए।” 3येशुइ खुङखाला लाःक्पा ज्यादी लाःसी, “ङाः सेम पेःगे, ख्यो टाःज्युक!” ओः तेःकासुरा ओः मीःइ जे नाःजा टाःसी। 4ओःले येशुइ ओःखो मीःला लाःसी, “दी ताम सुलाङ माःलाःप, इःनाङ पुजाहारीसाःला काःल्दी राःङला ताच्युदो ओःले मोशाइ आज्ञा तेर्क्योक च्योःङ्रारा बली तेर्ती ख्यो चाङ्मा काःल्क्योक दास्यी थाम्जेरला तेर।”#८:४ यहुदीक्याइ ओः तीःनामलादी जे नाःजा थेङ्क्योक मीः राःङ्सा मीःक्या ङीमु तेःचे मेःयोःङ्के। खुङलादी खुङक्याइ युःललाःम्ले पाङ्ला तेःच्युउके। ओःन्डुबा नाःजा क्याःप्क्योक मीः टाःबा की माःटाःबा लाःती पुजाहारीइ चीग्रा ताजे ज्योर्कुके। ओःले ओः मीः ओःङ्दी राःङ्सा मीःक्याइ ङीमु तेःचे तोःङ्ला मोशाइ ठीमगीइ लाःक्योक च्योःङ्रा खुङगीइ कोन्ज्योइ मन्दीरला काःल्दी बली तेर्कोःउके।
रोमी कप्तानगीइ लाबु टाःक्योक
(लुका ७:१-१०)
5येशु कफर्नहुम क्याःसाला ओःङ्गासुना मेःराङ चीग रोमी कप्तान ओःङ्दी खुङला वासी पेःदी लाःसी, 6“ए प्रभु, ङाःइ लाबु चा खोङेन नाःजा क्याःप्ती खीमला लाःङ्रा मीःखुगेन्दी काःल्दी ङ्याःल्दी तेःती एः।” 7येशुइ खुङला लाःसी, “ङाः काःल्दी खुङला टाःच्युगे।” 8इःनाङ कप्तानगीइ लाःसी, “ए प्रभु, ख्याला ङाःइ राःङगीइ खीम नाःङ्ला च्युजेला ङाः डीक्पु म्याः।#८:८ यहुदीक्या नाःमाङ खुङक्याइ छीबा क्युःपाइ खीमक्याला मीःस्युःके लाःती ओः थेइ छोर्ती एःके। ख्याइ आज्ञा चीग्रा तेर ओःले ङाःइ लाबु टाःगेन एः। 9ङाः राःङाङ छ्योम्बो हाकीमक्याइ आङ्ज्याला तेःती एः, ओःले ङाःइ आङ्ज्यालाङ थेक्या एः। चीगला ‘सुङ’ लाःसी, ओःखो डोउए, राःङ्साला ‘स्यो’ लाःसी ओःखो ओःङ्गुए ओःले राःङगीइ लाबुलाङ ‘एःन्डु पेःदो’ लाःसी, ओःखोइ पेःउए।”
10दीखो ताम कोःदी येशु याःमाछाक काःल्सी ओःले राःङला ब्य्राङ्दी ओःङ्क्योक मीःक्याइ पोर्चोमछ्योले तादी खुङगीइ लाःसी, “ङाः ख्योक्याला लाःके, एःजे छ्योम्बो सेमल्हुक लुगेन मीः नी ङाःइ इस्राएलीक्या नाःङ्लाङ थोङ्दी म्याः। 11तेःन्दामरा ङाः ख्योक्याला लाःके, स्यार रा नुःपलाःम्ले राःङ्सा क्युःपाइ माःङ्बुरा मीःक्या नाःम्खालीङगीइ क्याःल्खापला ओःङेन एः, ओःले अब्राहाम, इसहाक रा याकुब ङीमु साःजेला तेःकेन एः। 12इःनाङ नाःम्खालीङगीइ क्याःल्खापला ओःङ्कोःन इस्राएलीक्यालादी फीला नाक्जुकला क्युर्तेर्केन एः ओःले ओःला खुङक्या ङुःदेर सो मुःर्ती तेःकेन एः।”
13ओःले येशुइ कप्तानला लाःसी, “ख्यो खीमला सुङ, ओःले ख्योइ सेमल्हुक लुक्योक च्योःङ्रारा ओःङेन एः।” ओः तेःकासुरा कप्तानगीइ लाबु टाःसी।
येशुइ माःङ्बुरा मीःक्याला टाःच्युक्योक
(मर्कुस १:२९-३४; लुका ४:३८-४१)
14येशु पत्रुसकीइ खीमला काःल्सी। ओःला खुङगीइ पत्रुसकीइ क्युःमुला छावा केःदी ङ्याःल्दी तेःक्योक थोङ्सी। 15येशुइ खुङगीइ लाःक्पाला देसी ओःले खुङला छावाइ पोःर्सी, ओःले खुङ लाःङ्दी येशुला मेःबा पेःगाला स्युःसी।
16कुःङ्से काःल्मीःजीक मीःक्याइ हेन्डी क्याःप्क्योक माःङ्बुरा नेःपाक्याला येशुसाःला ख्योङ्सी।#८:१६ यहुदीक्याइ ङाःल सोगेन ङीःलादी सुइयाङ चीङ लेःगा पेःजे मेःज्योर्के। इःनाङ ङीःमा डुप्मीःजीक लाःना खुङक्याइ थाङ सोगेन ङीःमा सीःङ्गुके, ओःले खुङक्याइ सेम थेक्योक लेःगा पेःजे ज्योर्कुके। ओःले येशुइ राःङगीइ तामगीइरा हेन्डीक्याला तेङ्सी ओःले थाम्जेर नेःपाक्याला टाःच्युसी। 17एःन्डुले कोन्ज्योइ लेःङ्गो तेर्केन यशैयाइ लाःक्योक दी ताम पुरा काःल्सी,
“खुङ राःङगीइरा उःइ तुःक्पुक्या लेःङ्तेर्सी
ओःले उःइ नाःजाक्या खुङगीइ खुर्ती खेर्सी।”#यशैया ५४:४
योबाइ खुर्कोःन तुःक्पु
(लुका ९:५७-६२)
18येशुइ राःङगीइ सुःरसाःरला मीःक्याइ पोर्चोम चीग थोङ्मीःजीक राःङगीइ योबाक्याला आज्ञा तेर्ती लाःसी, “उः छोइ फार्केनला डोगा।” 19मेःराङ चीग छ्येइ ठीमगीइ लोबेन खुङसाःला ओःङ्दी एःन्डु लाःसी, “लोबेन, ख्या काःला काःल्बा ङाःङ ख्याइ तीङ तीङ्लारा ओःङे।” 20येशुइ खुङला लेःन लोदी लाःसी, “लुःन्डीक्याइदी ङ्याःल्गेन्दी फुकक्या एः, च्याःज्युङ्माक्याइदी छाङक्या एः, इःनाङ ङाः मीःइ पुःइदी लाःना ङाःल सोजेला गो ज्यागेन सा चीगकाङ म्याः।”
21ओःले योबाक्या नाःङ्ला मेःराङ चीगकीइ लाःसी, “प्रभु, ङाः ख्याला ब्य्राङे, इःनाङ तोःङ्ला ङाःला डोजे तेर ओःले ङाःइ आबाला तीःप्चे तेर।” 22इःनाङ येशुइ खुङला लाःसी, “ङाःला ब्य्राङ्दो, मीःलीला सीक्योकक्याइरा फुम्बुला तीःप्च्युक।”#८:२२ सीक्योक मीःइ फुम्बुला तीःप्केन ताम यहुदीक्याइ लागी माःङ्बुरा छ्योम्बो एःके। इःनाङ येशुला ब्य्राङ्जे लाःक्योक सीक्योक मीःइ फुम्बुला तीःप्चे भन्दाङ माःङ्बु छ्योम्बो इःङे लाःती येशुइ लाःक्योक इःङे।
येशुइ ल्हाबालुजुपला छ्याबे जोक्योक
(मर्कुस ४:३५-४१; लुका ८:२२-२५)
23येशु टुःला जासी ओःले खुङगीइ योबाक्याङ खुङ ङीमुरा काःल्सी। 24इःक्पु चीगलारा छोला छ्योम्बो ल्हाबालुजुप ओःङ्सी ओःले छ्युइ हादी टुःला स्युःगाला स्युःसी। इःनाङ येशुदी ङीचु लोःदी एःके। 25ओःले योबाक्या येशुइ सुःरला काःल्दी खुङला लाङ्सी ओःले लाःसी, “प्रभु, उःक्याला सेन्च्युदो! उःक्या नी सीजे छोल्सी!” 26येशुइ लाःसी, “ख्योक्या चीले जीक्योक? खोइ ख्योक्याइ सेमल्हुक लुक्योक?” ओः तीङ्ला खुङ लाःङ्सी ओःले ल्हाबालुजुपला ओःले छ्युइ हादीला हाप्स्याल तेङ्सी। ओःले ओः थाम्जेर छ्याबे तेःसी। 27एःन्डुबा काःल्योक थोङ्दी थाम्जेर याःमाछाक काःल्दी एःन्डु लाःसी, “दी मीः नी काःन्डुबा दुबा? दीखोइ लाःक्योक नी ल्हाबालुजुपकीइ ओःले छ्युइ हादीइयाङ ङीःनगुदु!”
हेन्डी क्याःप्क्योक मेःराङ ङी मीः टाःक्योक
(मर्कुस ५:१-२०; लुका ८:२६-३९)
28येशु छोइ फार्केनछ्योले गदरीनीक्याइ छेत्रला लेप्कासुना, तुःर्साइ फुकक्यालाःम्ले थेङ्दी ओःङ्क्योक मेःराङ ङी हेन्डी क्याःप्क्योक मीःक्याइ खुङला फ्रेसी। खुङक्या एःजे जीबा लाःङ्जे च्योःङ्रा एःके, ओः लाःम पेःदी सुङ मेःन्डोके। 29ओःले खुङक्या एःन्डु लाःतेर केताङ्गाला स्युःसी, “ए कोन्ज्योइ पुः, ख्याइ ङीःला ची पेःजे छोल्क्योक? डीक्पु तीःजीरा माःकाल्बा ख्या ङीःला तुःक्पु तेर्काला ओःङ्क्योक इःङे?”
30तीबी चीग फार्च्योछ्योले पोर्चोम चीग फाक्या चार्तीदेरा एःके। 31ओःले ओः हेन्डीक्याइ येशुला वासी पेःदेरा लाःसी, “ख्याइ ङीःला तेङेनरा इःङे लाःना, ओः फाक्याइ पोर्चोम नाःङ्ला स्युःगेन आज्ञा ना।” 32ओःले येशुइ ओः हेन्डीक्याला लाःसी, “सुङ” ओःले ओः हेन्डीक्या थेङ्दी फाक्या नाःङ्ला स्युःसी, ओःले फाक्याइ थाम्जेर पोर्चोम प्य्राःलाःम्ले माःर्ला छोङ्देरा काःल्सी ओःले छोला ताःप्ती बीङ्दी सीसी।
33फा छोगेन मीःक्या क्याःसाछ्योले छ्योङ्देरा काःल्सी। ओःले खुङक्याइ ओःला काःल्क्योक थाम्जेर ताम ओःले ओः हेन्डी क्याःप्क्योक मीःक्या काःन्डुले टाःबा लाःकेन ताम लाःतेर्सी। 34दी ताम कोःमीःजीक क्याःसाइ थाम्जेर मीःक्या येशुला फ्रेचेला ओःङ्सी, ओःले खुङक्याइ येशुला खुङक्याइ छेत्रलाःम्ले सुङ लाःती खुङला वासी पेःसी।
Currently Selected:
मत्ती 8: SYW
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
