मत्ती 4
4
शैतानगीइ येशुला परीक्षा लेःङ्क्योक
(मर्कुस १:१२-१३; लुका ४:१-१३)
1ओः तीङ्ला चाङ्मा लाइ येशुला शैतानलाःम्ले खुङगीइ परीक्षा पेःज्युक लाःती उजाड ठाउँला खेर्सी। 2येशु ङीःमा खाल ङी रा कुःङ्मु खाल ङीथुप खा चाङ्मा तेःमीःजीक खुङला माःङ्बुरा तोःपा तोदी एःके। 3ओःले शैतान खुङसाःला ओःङ्दी लाःसी, “तेःन्दामरा ख्या कोन्ज्योइ पुः इःङे लाःना दी तोःक्याला खुरा काःल्ज्युक लाःती लोःप।” 4ओःले येशुइ लेःन लोदी लाःसी, “छ्येइ पेज्याला एःन्डुबा प्रुःदी एः, ‘खुराइ चीग्रा साःदी मीः मेसेन एः, इःनाङ कोन्ज्योइ खालाःम्ले थेङ्क्योक थाम्जेर तामगीइ सेन्गुए।’#व्यवस्था ८:३”
5ओःले शैतानगीइ येशुला चाङ्मा क्याःसा यरुशलेमला खेर्सी ओःले कोन्ज्योइ मन्दीरकीइ थाम्जेर भन्दा थोम्बो ठाउँला ज्यासी, 6ओःले लाःसी, “तेःन्दामरा ख्या कोन्ज्योइ पुः इःङेलाना ताः ख्या दीलाःम्ले माःर्ला फीर्तो, चीलेलाःना छ्येइ पेज्याला एःन्डुले प्रुःदी एः,
‘ख्याला ह्रुङ्जेला कोन्ज्योइ स्वर्गदुतक्याला ताङ्तेर्केन एः,
ओःले ख्याइ काङ्बा तोःक्याला माःफोज्युक लाःती
खुङक्याइ ख्याला लाःक्पा लाःक्पालारा सेःकेन्दी एः।’#भजन ९१:११-१२”
7येशुइ लेःन लोदी लाःसी, “छ्येइ पेज्याला एःन्डुबाङ प्रुःदी एः, ‘ख्याइ प्रभु राःङगीइ कोन्ज्योला परीक्षा माःलेङ।’#व्यवस्था ६:१६”
8ओःले शैतानगीइ येशुला माःङ्बुरा थोम्बो काःङला खेर्सी ओःले जाम्बुलीङगीइ थाम्जेर क्याःल्खापक्या ओःले खुङक्याइ याःबु याःबु तामक्या तेङ्सी। 9ओःले शैतानगीइ खुङला लाःसी, “ख्याइ ङाःला पीमु चुदी फ्या छाल्सी लाःना ङाः दी थाम्जेर क्याःल्खापक्या ख्याला तेर्के।” 10येशुइ लाःसी, “ए शैतान, दीलाःम्ले सुङ! चीलेलाःना छ्येइ पेज्याला एःन्डुबा प्रुःदी एः, ‘ख्याइ प्रभु राःङगीइ कोन्ज्योला चीग्रा पीमु चुदी फ्या छाल्दो ओःले खुङ्ला चीग्रा मेःबा पेःदो।’#व्यवस्था ६:१३”
11ओःले शैतानगीइ येशुला पोःर्ती काःल्सी ओःले स्वर्गदुतक्या ओःङ्दी येशुइ मेःबा पेःसी।
येशुइ गालीलला राःङगीइ लेःगा छुक्योक
(मर्कुस १:१४-१५; लुका ४:१४-१५)
12बप्तीस्मा तेर्केन युहन्नाला चेङाङला कादी एः लाःकेन ताम कोःगारा येशु गालीलछ्योले काःल्सी। 13ओःले खुङ नासरत क्याःसा पोःर्ती कफर्नहुम क्याःसाला तेःकाला काःल्सी। कफर्नहुम क्याःसादी जबुलुन रा नप्ताली क्षेत्रइ गालील छोइ सुःरलारा एःके। 14एःन्डुले कोन्ज्योइ लेःङ्गो तेर्केन यशैयाइ लाःक्योक दी ताम छाङ्सी,
15“यर्दन लुःङ्बाइ फार्केनला चाङ्बुछ्योले डोगेन लाःमला एःक्योक जबुलुन रा नप्तालीइ मीःक्या,
ओःले गालीलला तेःकेन राःङ्सा क्युःपाइ मीःक्या,
16नाक्जुकला तेःकेन मीःक्याइ छ्योम्बो साङ्बु थोङेन एः।
सीगेन रा नाक्जुकला एःकेन मीःक्या,
खुङक्याखाला ओः साङ्बु स्यार्ती एः।”#यशैया ९:१-२
17ओः तेःकासुमीःजीक येशुइ एःन्डु लाःतेरा लेःङ्गो टाःम्गाला स्युःसी, “स्याबा पेःदी राःङ राःङगीइ लाःयोला पोःर्तो चीलेलाःना नाःम्खालीङगीइ क्याःल्खाप थामालारा एः।”
येशुइ ङ्याः सेकेन मेःन्दा सीः मीःक्याला केक्याःप्क्योक
(मर्कुस १:१६-२०; लुका ५:१-११)
18ङीःमा चीग येशु गालील छोइ सुःरी सुःर डोदेरा एःकासुना खुङगीइ मेःराङ ङी ङ्याः सेकेनक्याइ जाल क्याःप्तेरा पेःक्योक थोङ्सी। खुङक्या पत्रुस लाःकेन सीमोन ओःले खुङगीइ नोः अन्द्रीयास एःके। 19येशुइ खुङ ङीला लाःसी, “ङाः ङीमु ब्य्राङ्दो, ङाः ख्योक्याला ङ्याः जुम्क्योक च्योःङ्रारा मीःक्याला जुम्ङेन्दी ज्योगे।” 20दी ताम कोःलुङ्म्याःपा खुङक्याइ राःङगीइ जालक्या पोःर्ती येशुइ तीङ्ला काःल्सी।
21ओः तीङ्ला खुङगीइ जब्दीयाइ पुः ङी याकुब रा युहन्नाला थोङ्सी। खुङक्या राःङगीइ आबा जब्दीया ङीमु टुःला तेःती जाल जोदेरा एःके। येशुइ खुङक्यालाङ केक्याःप्सी। 22ओः तेःकासुरा खुङक्याइ टुःला ओःले राःङगीइ आबाला पोःर्ती येशुइ तीङ्ला काःल्सी।
गालीलला येशुइ लोप्क्योक, लेःङ्गो टाःम्क्योक ओःले टाःच्युक्योक
(लुका ६:१७-१९)
23ओःले येशुइ जोम्साखीमक्याला लोप्तेर, नाःम्खालीङगीइ क्याःल्खापकीइ याःबु लेःङ्गो टाःम्देरा ओःले थाम्जेर खाले नाःजाक्या क्याःप्क्योक रा नेःपा काःल्क्योक मीःक्याला टाःच्युदेरा गालील काःङ्रा काःल्सी। 24ओः सोङ्गारा, खुङगीइ बारेला सीरीया ठाउँ काःङ्रा फेल्सी। मीःक्याइ नेःपा काःल्क्योक थाम्जेर मीःक्या, थाम्जेर खालेइ नाःजाक्या क्याःप्क्योक मीःक्या, स्युःसेरकीइ तुःक्पु तेर्क्योक नेःपाक्याला येशुसाःला ख्योङ्सी। खुङक्या नाःङ्ला काःजेलादी हेन्डी क्याःप्ती एःके, काःजेलादी उप्केन नाःजा क्याःप्ती एःके ओःले काःजेदी चा खोङ्क्योक एःके। ओःले येशुइ थाम्जेरला टाःच्युसी। 25माःङ्बुरा मीःक्याइ खुङला ब्य्राङ्सी। ओः मीःक्या गालील क्षेत्रले, डेकापोलीस लाःकेन च्युथाल क्याःसालाःम्ले, यरुशलेम क्याःसालाःम्ले, यहुदीया क्षेत्रले ओःले यर्दन लुःङ्बाइ फार्केनलाःम्ले ओःङ्दी एःके।
Currently Selected:
मत्ती 4: SYW
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.