मत्ती 23
23
छ्येइ ठीमगीइ लोबेनक्या ओःले फारीसीक्याइ वीरुद्धला चेताउनी
(मर्कुस १२:३८-३९; लुका ११:४३,४६; २०:४५-४६)
1ओःले येशुइ मीःइ पोर्चोम ओःले राःङगीइ योबाक्याला एःन्डु लाःसी, 2“छ्येइ ठीमगीइ लोबेनक्या ओःले फारीसीक्याइ मोशाइ छ्येइ ठीम लोप्केन आङ्ज्या ज्योर्ती एः। 3ओः सोङ्गारा, खुङक्याइ लाःक्योक थाम्जेर ताम ङीःन्दो ओःले पेःदो। इःनाङ खुङक्याइ ची पेःबा ओःखोदी माःबे चीलेलाःना खुङक्याइ राःङ्साला नी लोप्कुए, इःनाङ राःङदी मेःबेए। 4खुङक्याइ राःङ्सालादी चेन्दी ओःले खुर्रा मीःखुगेन खुर्पु ताःम्दी क्याःपला काल्तेर्कुए, इःनाङ खुङक्या राःङदी ओःखो लाङ्जेला थेबु चीगकीयाङ मेःदेए। 5इःनाङ खुङक्याइ राःङगीइ थाम्जेर लेःगा मीःक्याला तेङ्जेला पेःउए। चीलेलाःना खुङक्या राःङगीइ प्रालाला ओःले पुङ्बाला छ्येइ ठीमगीइ आज्ञाक्या एःक्योक काःल्ज्युमक्या छ्योम्बो छ्योम्बो जोदी केःङ्गुए, ओःले राःङगीइ केःलाइ झुम्काक्या रीःङ्बु जोउए। 6डेनक्याला खुङक्याला सेःसाइ ठाउँ ओःले जोम्साखीमक्याला थाम्जेर भन्दा छ्योम्बो तेःसाक्या सेम थेकुए। 7छोङ्साक्याला युःगासुना मीःक्याइ खुङक्याला सेःसा पेःदी फ्या छाल्ज्युक ओःले ‘लोबेन’ लाःच्युक लाःती खुङक्याइ सेम थेकुए।
8इःनाङ ख्योक्याला सुइयाङ ‘लोबेन’ माःलाःप्च्युक चीलेलाःना ख्योक्याइ लोबेन मेःराङ चीग्रा चीग एः, ओःले ख्योक्या थाम्जेर आतानोःक्या इःङे। 9दी साजाम्बुलीङला ख्योक्याइ सुलाङ ‘आबा’ माःलाःप चीलेलाःना ख्योक्याइ आबादी चीग्रा चीग एः ओःले खुङ नाःम्खालीङला एः। 10ख्योक्या सुलाङ ‘ताःक्पु’ माःलाःप्च्युक, चीलेलाःना ख्योक्याइ ताःक्पुदी थार्च्युगेन ख्रीष्ट चीग्रा इःङे। 11ख्योक्या नाःङ्ला काःखोदी थाम्जेर भन्दा छ्योम्बो एःपा, ओःखोइ थाम्जेरकीइ मेःबा पेःकोःउए। 12काःखोइ राःङला छ्योम्बो जोउबा, ओःखोला छीमी जोगेन एः, ओःले काःखोइ राःङला याङ्छाबु जोउबा, ओःखोला छ्योम्बो जोगेन एः।
खोक्नाकक्याइ वीरुद्धला चेताउनी
(मर्कुस १२:४०; लुका ११:३९-४२,४४,५२; २०:४७)
13ए छ्येइ ठीमगीइ लोबेनक्या ओःले फारीसीक्या, ख्याक्याला काःन्डुबा जीबा लाःङ्जे च्योःङ्रा ओःङेन एः! ख्याक्या नी खोक्नाकक्या इःङे। ख्याक्याइ मीःक्याइ तोःङ्लारा नाःम्खालीङगीइ क्याःल्खापकीइ कोःला दीमीक क्याःप्ती एः। ख्याक्या राःङाङ नाःङ्ला मीःस्युए ओःले नाःङ्ला स्युःजे छोल्गेनक्यालाङ स्युःजे मेतेर एः।
14[ए छ्येइ ठीमगीइ लोबेनक्या ओःले फारीसीक्या, ख्याक्याला काःन्डुबा जीबा लाःङ्जे च्योःङ्रा ओःङेन एः! ख्याक्या नी खोक्नाकक्या इःङे। ख्योक्याइ मोःराङ्मुक्याइ खीमक्या फ्रोउए ओःले मीःक्याला तेङ्जेइ लागी रीःङ्बु प्रार्थना पेःउए। ओः सोङ्गारा, राःङ्सा मीःक्याइ भन्दा ख्योक्याइ ताःरुङ छ्योम्बो दण्ड ज्योर्केन एः।]
15ए छ्येइ ठीमगीइ लोबेनक्या ओःले फारीसीक्या, ख्याक्याला काःन्डुबा जीबा लाःङ्जे च्योःङ्रा ओःङेन एः! ख्याक्या नी खोक्नाकक्या इःङे। ख्योक्या राःङ्सा मीःक्याला राःङगीइ धर्मला ख्योङ्जेला जाम्बुलीङ काःङ्रा कोर्ती डोउए, ओःले ओः मीःक्याला ख्याक्याइ धर्मला ख्योङ्मीःजीक खुङक्याला ख्योक्या राःङ भन्दा ङीगुणा माःङ्बु ङ्याल्वाइ मेःला डोगेन रीःक्पु जोउए।
16ए स्याःर्नाक तोःङ क्याःप्केनक्या, ख्याक्याला काःन्डुबा जीबा लाःङ्जे च्योःङ्रा ओःङेन एः! ख्याक्याइ मीःक्याला एःन्डुले लोप्कुए, ‘कोन्ज्योइ मन्दीरकीइ मीःनला ख्योक्याइ ना लुगासुनादी चीङ मेःयोङे, इःनाङ मन्दीरकीइ सेरकीइ मीःनला ना लुसी लाःनादी ना सुःउए।’ 17ख्याक्या काःन्डुबा स्याःर्नाक ओःले आक्याक्पा दुबा! छ्योम्बो तामदी काँःदी इःङे, सेर की सेरला चाङ्मा जोगेन कोन्ज्योइ मन्दीर? 18ख्योक्याइ एःन्डुलेङ लोप्कुए, ‘वेदीइ मीःनला ना लुसी लाःना चीङ मेःयुङे, ओःले वेदीला फुल्क्योक भेटीइ मीःनला ना लुसी लाःनादी ना सुःउए।’ 19ए स्याःर्नाकक्या! वेदीला फुल्क्योक भेटी छ्योम्बो इःङे की भेटीला चाङ्मा जोगेन वेदी छ्योम्बो इःङे? 20वेदीला देदी ना लुगेन्दीइ नी वेदी ओःले ओःला फुल्क्योक थाम्जेर भेटीक्याइ मीःनला ना लुउए। 21ओःन्डुरा पेःदी मन्दीर देदी ना लुगेनदीइ मन्दीर रा मन्दीरला तेःकेन कोन्ज्योला देदी ना लुउए। 22नाःम्खालीङगीइ मीःन लेःङ्दी सुइयाङ ना लुसी लाःना, ओःखोइ कोन्ज्योइ छेसा ओःले ओःला तेःकेन कोन्ज्योइ मीःन लेःङ्दी ना लुउए।
23ए छ्येइ ठीमगीइ लोबेनक्या ओःले फारीसीक्या, ख्याक्याला काःन्डुबा जीबा लाःङ्जे च्योःङ्रा ओःङेन एः! ख्याक्या नी खोक्नाकक्या इःङे। ख्याक्या बाबरी, सुप रा जीरा कोःङ्क्योकक्याइ बो च्युलाःम्ले बो चीग कोन्ज्योला फुल्गुए। इःनाङ ठीम पेःजे, नीङ च्योःजे ओःले सेमल्हुक लुजे च्योःङ्रा छ्येइ ठीमगीइ छ्योम्बो तामक्यालादी ख्याक्या सेमरा मेतेरए। ख्योक्याइ ओःखो तामक्या ङीमु ङीमुरा राःङ्सा तामक्याङ ङीःन्कोःउए। 24ए स्याःर्नाक तोःङ क्याःप्केनक्या, ख्याक्या भुसुना चीग लेप्नाङ चादी तेङ्गुए, इःनाङ ऊँटलादी ङीःक्कुए!
25ए छ्येइ ठीमगीइ लोबेनक्या ओःले फारीसीक्या, ख्याक्याला काःन्डुबा जीबा लाःङ्जे च्योःङ्रा ओःङेन एः! ख्याक्या नी खोक्नाकक्या इःङे। ख्याक्या तेःर्मा ओःले मेःन्ज्याइ पाःङलाःम्ले ताःर्ती चाङ्मा जोउए, इःनाङ ख्योक्या नाःङछ्योले लाःना स्वार्थ रा फाङ्क्योक ओःङ्गुए। 26स्याःर्नाक फारीसीक्या, तोःङ्ला तेःर्मा रा मेःन्ज्याइ नाःङछ्योले चाङ्मा जोदो, ओःले ओःखोइ फीलाःम्लेङ चाङ्मा ओःङेन एः।
27ए छ्येइ ठीमगीइ लोबेनक्या ओःले फारीसीक्या, ख्याक्याला काःन्डुबा जीबा लाःङ्जे च्योःङ्रा ओःङेन एः! ख्याक्या नी खोक्नाकक्या इःङे। ख्याक्या नी कार्मु सेबीइ थेल्योक तुःर्सा#२३:२७ कार्मु सेबीइ थेल्योक तुःर्सा ओः तेःकासु, इस्राएलगीइ मीःक्याइ सीक्योक मीःला तीःप्मीःजीक ओःखोइ तुःर्साइ थोइ बो कार्मु सेबीइ थेल्गुके, ओः सोङ्गारा, ओः तुःर्साखाला कुःङ्मु सुङ मेःन्डोके। चीलेलाःना सुङ मीः ओः तुःर्साखाला काःल्सी लाःना ओःखो असुद्ध डोउके, ओःले खुङ राःङ्सा मीःक्याइ ङीःमु तेःती प्रार्थना पेःजे मेःयोङ्के। च्योःङ्रा इःङे, ओः तुःर्सा फीलाःम्ले तागासुना नी याःबु थोङ्गुए, इःनाङ नाःङ्ले लाःना सीक्योक मीःक्याइ रेःकोकक्या ओःले थाम्जेर चीबु तामक्याइ काःङ्क्योक ओःङ्गुए। 28ओःन्डुलेरा ख्याक्याङ फीलाःम्ले तागासुनादी मीःइ तोःङ्ला ताःक्पा थोङ्गुए, इःनाङ नाःङ्ला लाःना खोक्नाक ओःले लाःयोइ काःङ्क्योक ओःङ्गुए।
माःताक्पा मीःक्याइ दण्ड
(लुका ११:४७-५१)
29ए छ्येइ ठीमगीइ लोबेनक्या ओःले फारीसीक्या, ख्याक्याला काःन्डुबा जीबा लाःङ्जे च्योःङ्रा ओःङेन एः! ख्याक्या नी खोक्नाकक्या इःङे। ख्याक्याइ कोन्ज्योइ लेःङ्गो तेर्केनक्याइ लागी याःबु याःबु तुःर्साक्या जोउए ओःले ताःक्पा मीःक्याइ तुःर्साक्या छेदी ज्याउए। 30ओःले ख्याक्याइ लाःकुए, ‘उःक्या राःङगीइ फाफामुक्याइ तीःनामला एःक्योक एःना नी, उःक्याइ फाफामुक्याइ पेःक्योक च्योःङ्रा कोन्ज्योइ लेःङ्गो तेर्केन मीःक्याइ ठा बागाइतीजे म्याःके।’ 31एःन्डु लाःती ख्याक्या राःङगीइरा कोन्ज्योइ लेःङ्गो तेर्केनक्याला सेकेन्दीइ छार्क्युफुर्क्यु इःङे लाःती स्वीकार पेःउए। 32ओः सोङ्गारा, ख्याक्याइ फाफामुक्याइ छुक्योक लेःगाक्या ख्याक्याइ पुरा पेःदो!
33ख्याक्या राःङ्सा चीङ मीःङे, इःनाङ ख्याक्या नी प्रुःलक्या ओःले वीषालु प्रुःलगीइ छार्क्फुर्क्युक्या इःङे। ख्याक्या काःन्डुले ङ्याल्वाला डोजेलाःम्ले थार्खुगे? 34ताः याःबु पेःदी कोःदो, ङाः ख्याक्यासाःला कोन्ज्योइ लेःङ्गो तेर्केनक्या, नावा साल्बु मीःक्या ओःले छ्येइ ठीमगीइ लोबेनक्याला ताङे। खुङक्या नाःङ्ला ख्याक्याइ काःजेला सेकेन एः, काःजेलादी क्रुसला प्याङेन एः ओःले काःजेलादी जोम्साखीमक्याला कोर्रा क्याःप्केन एः ओःले क्याःसा चीगले राःङ्सा क्याःसाला त्याःगेन एः। 35ओःखोइ पेःगासुना, ताःक्पा हाबीलमीःजीक कोन्ज्योइ मन्दीर रा वेदीइ कील्ला सेक्योक बेरेक्याहइ पुः जकरीयाथुपकीइ थाम्जेर ताःक्पा मीःक्याला सेक्योककीइ माःताक्पा ख्योक्याखाला लेप्केन एः। 36तेःन्दामरा ङाः ख्याक्याला लाःके, ओः थाम्जेर माःताक्पा लेःगाक्याइ दण्ड तीःङ्साङगीइ मीःक्याइ ज्योर्केन एः।
यरुशलेमगीइ मीःक्याइ लागी येशुइ तुःङाल पेःक्योक
(लुका १३:३४-३५)
37यरुशलेमगीइ मीःक्या, ए यरुशलेमगीइ मीःक्या! ख्योक्या कोन्ज्योइ लेःङ्गो तेर्केन्दी मीःक्याला सेकुए ओःले कोन्ज्योइ ताङ्क्योक मीःक्याला तोः क्याःप्कुए। च्याःमु योमाइ राःङगीइ चीःप्रुक्याला राःङगीइ स्योक्पा वाःला उप्चेला रुःप चीःक्योक च्योःङ्रारा, ङाःइ काःजे थाङ्मा ख्योक्याला रुःप चीःजे सेम थेसी, इःनाङ ख्योक्याइ ङाःला ओःन्डु पेःजे मातेर। 38तादो, ख्योक्याइ मन्दीर उजाड ओःङेन एः। 39ङाः ख्योक्याला लाःके, ताःमीःजीक तीङ्ला ख्योक्याइ ‘प्रभुइ मीःनला ओःङेन्दीइ काःजे मोलाम ज्योर्ती एः’#भजन ११८:२६ लाःती माःलाःप थुप ख्योक्याइ ङाःला फीर्च्या नाःमाङ मेःथोङेन एः।”
Currently Selected:
मत्ती 23: SYW
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
