मत्ती 15
15
रीमठीमक्याइ बारेला लोप्क्योक
(मर्कुस ७:१-१३)
1चीङ फारीसीक्या ओःले छ्येइ ठीमगीइ लोबेनक्या यरुशलेम क्याःसालाःम्ले ओःङ्दी येशुला टीःसी, 2“ख्याइ योबाक्याइ उःक्याइ फाफामुमीःजीक ङीःन्दी ओःङ्क्योक रीमठीमक्या चीले मीःङीःन्बा? चीलेलाःना खुङक्याइ साःजे तोःङ्ला याःबुले लाःक्पा मीःठुए।” 3येशुइ लेःन लोदी लाःसी, “ओःले ख्याक्यादी चीले कोन्ज्योइ आज्ञाला मीःङीन्बा ओःले राःङगीइ रीमठीमला ङीःन्दी तेःकुबा? 4चीलेलाःना कोन्ज्योइ एःन्डु लाःती एः, ‘राःङगीइ आबा आमाला सेःसा पेःदो’#प्रस्थान २०:१२; व्यवस्था ५:१६ ओःले ‘काँःदीइ राःङगीइ आबा आमाला खाम्सी क्याःप्पा, ओःखोला सेराकोःउए।’#प्रस्थान २१:१७; लेबी २०:९ 5इःनाङ ख्याक्याइ एःन्डु लाःकुए, सुइयाङ राःङगीइ आबा आमाला, ‘तादो ख्याक्याला तेर्कोःन ताम ङाःइ कोन्ज्योला तेर्सीःङ्दी एः’ लाःसी लाःना, 6खुङगीइदी राःङगीइ आबा आमाला सेःसा पेःमेःकोःउए। एःन्डुले ख्याक्या राःङगीइ रीमठीमला ङीःन्दी कोन्ज्योइ आज्ञाला लेःगा म्याःक्योक जोउए। 7ए खोक्नाक्या! कोन्ज्योइ लेःङ्गो तेर्केन यशैयाइ लाःक्योक ताम ख्याक्याला डीक्कोए,
8‘दी मीःक्याइ ङाःला खाइ चीग्रा सेःसा पेःउए,
इःनाङ खुङक्याइ सेमदी ङाःलाःम्ले माःङ्बुरा थारीङ्बु एः।
9दीखुङक्याइ ङाःला तेःमेला मेःबा पेःउए,
चीलेलाःना खुङक्याइ मीःक्याइ जोक्योक ठीमक्या चीग्रा लोप्कुए।’#यशैया २९:१३”
मीःक्याला असुद्ध जोगेन तामक्या
(मर्कुस ७:१४-२३)
10ओः तीङ्ला येशुइ मीःइ पोर्चोमला केक्याःप्ती लाःसी, “ङाःइ ताम याःबु पेःदी कोःदो ओःले सेदो। 11मीःक्याइ खालाःम्ले साःगेन साःप्च्याइ खुङक्याला चीबु मेःजोए, इःनाङ खुङक्याइ खालाःम्ले थेङेन माःइबा तामक्याइ खुङक्याला चीबु जोउए।”
12ओःले योबाक्या खुङसाःला ओःङ्दी लाःसी, “ची ख्याइ छोर्पा, ख्याइ लाःक्योक तामगीइ पेःगासुना फारीसीक्या सीःताङ पेःदी एः?” 13येशुइ लाःसी, “नाःम्खालीङला तेःकेन ङाःइ आबा कोन्ज्योइ माचुक्योक थाम्जेर पुःङ चार्ङेमीःजीकरा पोगेन एः। 14खुङक्याइ बारेला तुःङाल माःबे, खुङक्या नी स्याःर्नाकक्याला तोःङ क्याःप्केन स्याःर्नाकक्या इःङे। स्याःर्नाक चीगकीइ राःङ्सा स्याःर्नाकला तोःङ क्याःप्सी लाःना ङीक्कार होपला स्युःउए।”
15पत्रुसकीइ लाःसी, “मीःक्याइ खालाःम्ले साःगेन साःप्च्याइ खुङक्याला चीबु मेःजोए लाःकेन पेदामगीइ लेःन ची इःम्बा ङीःला लोप्तेर।” 16येशुइ लाःसी, “ची ख्याक्या ताःरुङ मेसेबा? 17ची ख्याक्याइ छोर्ती म्याःपा ले, मीःइ खालाःम्ले साःगेन स्याः नी ओःखो टोःपाला लेप्कुए ओःले ओः तीङ्ला ओःखो जुबु नाःङ्ले फीला थेङ्दी डोउए? 18इःनाङ मीःइ खालाःम्ले थेङेन तामक्या खुङगीइ सेम नाःङ्ले थेङ्गुए। दीखोरा तामगीइ मीःला चीबु जोउए। 19चीलेलाःना मीःइ सेम नाःङ्ले माःरीक्पा ठीवाक्या, मीः सेचे, थाम्जेर खालेइ व्यभीचार पेःजे, कुजे, स्योप क्युःर्चे ओःले राःङ्साक्याइ बारेला माःरीक्पा ताम लाःचे माःताक्पा च्याःङ्जे च्योःङ्रा तामक्या थेङ्गुए। 20दी तामक्याइरा मीःला चीबु जोउए। इःनाङ लाःक्पा माःठुबा साःगासुना नी मीः चीबु मेःयोङ्ए!”
कानानी पेःन्पीःजा चीगकीइ सेमल्हुक लुक्योक
(मर्कुस ७:२४-३०)
21येशु ओः ठाउँ पोःर्ती टुरोस रा सीदोन क्याःसाइ छुरफारला काःल्सी। 22ओःला तेःकेन मेःन्दा चीग कानानी पेःन्पीःजा ओःङ्दी केताङ्देरा लाःसी, “ए प्रभु, दाऊदकीइ पुः, ङाःला नीङ च्योःदो! ङाःइ पोःमोला हेन्डीइ माःङ्बुरा तुःक्पु तेर्ती एः।” 23इःनाङ येशुइ खुङला चीङ लेःन मालो। ओःले खुङगीइ योबाक्या ओःङ्दी खुङला वासी पेःसी, “दीखो पेःन्पीःजाला ताङ्तेर। खुङ नी केताङ्देरा उःइ तीङ तीङ्ला ओःङ्देरा एः!” 24येशुइ लाःसी, “ङाःला नी तोर्क्योक लुःकक्या च्योःङ्रा काःल्क्योक इस्राएली क्युःपाइ मीःक्याइ लागी चीग्रा ताङ्क्योक इःङे।” 25इःनाङ दीखो कोःदी ओः पेःन्पीःजा येशुइ तोःङ्ला खाप्लु क्याःप्ती लाःसी, “ए प्रभु, ङाःला रोः पेःदो।” 26इःनाङ येशुइ लाःसी, “राःङगीइ पीःजाक्याइ साःगेन स्याः फ्रोदी खीक्याला#१५:२६ खीक्याला दीला “पीःजाक्या” लाःती यहुदी मीःक्याला लाःक्योक इःङे। ओःले ओः तेःकासु, यहुदीक्याइ खुङक्याइ छीबा क्युःपाइ मीःक्याला “खीक्या” लाःती लाःकुके। क्युर्तेर्चे डीक्पु मीःङे।” 27ओःले ओः पेःन्पीःजाइ लाःसी, “इःङे प्रभु, इःनाङ खीक्याइयाङ नी राःङगीइ ताःक्पुइ च्योर्तेनखाले ताःप्क्योक पुःजुक्या साःउए।” 28ओःले येशुइ खुङला लाःसी, “ए आजी, ख्याइ सेमल्हुक छ्योम्बो दु। ख्योइ सेम पेःक्योक च्योःङ्रारा ख्योइ लागी काःल्ज्युक।” ओः तीङ्ला ओः तेःकासुरा खुङगीइ पोःमो टाःसी।
येशुइ माःङ्बुरा मीःक्याला टाःच्युक्योक
29येशु ओः ठाउँ पोःर्ती गालील छोइ सुःरले पेःदी काःल्सी। ओःले खुङ याःरला काःङ चीगला काःल्सी ओःले साला तेःसी। 30मीःइ छ्योम्बो पोर्चोम चीग खुङसाःला ओःङ्सी, ओःले खुङक्याइ स्याःल्ठाकक्या, मी मेःथेङेन्दी, चा खोङ्क्योकक्या, लेम्बा ओःले राःङ्सा माःङ्बुरा नेःपाक्या ख्योङ्दी ओःङ्सी। खुङक्याइ ओः नेःपाक्याला येशुइ तोःङ्ला ज्यातेर्सी ओःले येशुइ खुङक्याला टाःच्युसी। 31लेम्बाक्या ताम लाःकाला स्युःसी, चा खोङ्क्योकक्या याःबु काःल्सी, स्याःल्ठाक्याकक्या डोगाला स्युःसी ओःले मी मेःथोङेनक्या थोङेन्दी काःल्सी। दीखो थोङ्दी मीःक्या याःमाछाक नेसी ओःले खुङक्याइ इस्राएगीइ कोन्ज्योला प्रशंसा पेःसी।
येशुइ हाजार सीः मीःक्याला साःजे तेर्क्योक
(मर्कुस ८:१-१०)
32येशुइ राःङगीइ योबाक्याला केक्याःप्ती लाःसी, “दी मीःक्याला थोङ्दी ङाःला नीङ च्योःदी ओःसी। दीखोक्या ङाः ङीमु तेःक्योक तीःरीङ ङीःमा सुम काःल्सीःङ्सी, ताः दीखुङक्याइ साःगेन स्याःक्याङ सीःङ्दी एः। दीखुङक्याला तोःपा तोबारा ताङ्जेला ङाःला सेम थेती म्याः, मीःङे लाःना नी खुङक्या खीमला डोदेरा पेःगासुना लाःमलारा तोःपा तोबाइ लुङला डोडो।”
33योबाक्याइ लाःसी, “एःजेइ छ्योम्बो मीःइ पोर्चोमला साःजे तेर्चेला दी काम्बु साला काःलाःम्ले साःप्च्या ख्योङेन्दी?” 34येशुइ खुङक्याला लाःसी, “ख्योक्या ङीमु काःजे थाल खुरा एःपा?” खुङक्याइ लाःसी, “तीःनथाल खुरा ओःले तीबी चीग छीमी छीमी ङ्याः एः।”
35ओःले येशुइ मीःक्याला थाङला तेःच्युसी। 36खुङगीइ ओः तीःनथाल खुरा ओःले ङ्याःक्या लेःङ्दी कोन्ज्योला थुजीछे तेर्मीःजीक च्यादी योबाक्याला तेर्सी, ओःले योबाक्याइ मीःक्याला केःतेर्सी। 37खुङक्या थाम्जेरकीइ डाङेनथुप साःसी। ओःले ल्हाक्योक पुःजुपक्या योबाक्याइ पती तीःन तुःसी। 38ओःला साःगेन्दी पेःन्पीःजा रा पीःजाक्याबाहेक ख्य्वापीःजाक्या चीग्रा हजार सीः एःके। 39ओः तीङ्ला येशुइ ओः मीःक्याला बीदा तेर्सी। ओःले खुङदी टुःला जादी मगादान लाःकेन क्षेत्रला काःल्सी।
Currently Selected:
मत्ती 15: SYW
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
