लुका 3
3
बप्तीस्मा तेर्केन्दी युहन्नाइ प्रचार
(मत्ती ३:१-१२; मर्कुस १:१-८; युहन्ना १:१९-२८)
1रोमीइ छ्योम्बो क्याःल्बु तीबेरीआसकीइ क्याःल्खाप पेःक्योक लोः चेङा काःल्दी एःके। ओः तेःकासु पन्तीयस पीलातस यहुदीया क्षेत्रइ छ्योम्बो हाकीम एःके। ओः तेःकासु हेरोदकीइ गालील क्षेत्रला क्याःल्खाप पेःउके ओःले खुङगीइ नोः फीलीपकीइ इतुरीया ओःले त्राखोनीतीस क्षेत्रला क्याःल्खाप पेःउके। ओःले अबीलेन क्षेत्रला लुसानीयास लाःकेन मीःइ क्याःल्खाप पेःउके। 2ओःले चोइ पुजाहारीक्यादी हन्नास रा कैयाफा एःके। ओः तेःकासु उजाड ठाउँला तेःकेन्दी जकरीयाइ पुः युहन्नाला कोन्ज्योलाःम्ले लेःङ्गो ओःङ्सी।
3युहन्नाइ यर्दन लुःङ्बाइ छुरफारकीइ थाम्जेर क्षेत्रछ्योले काःल्दी मीःक्याला एःन्डुले प्रचार पेःगाला स्युःसी, “थाम्जेरकीइ स्याबा पेःदी लाःयो पोःर्तो ओःले बप्तीस्मा लेःङ्दो ओःले ख्याक्याइ पेःक्योक लाःयो कोन्ज्योइ क्षमा पेःगेन एः।” 4एःन्डुले कोन्ज्योइ लेःङ्गो तेर्केन्दी यशैयाइ छ्येइ पेज्याला दी तामक्या प्रुःदी एः,
“कोःदो, उजाड ठाउँला मेःराङ चीगकीइ छ्योम्बो के तेङ्दी एःन्डु लाःतेरा एः,
‘प्रभु ओःङेन लाःम तयार जोदो,
खुङ डोगेन लाःमक्या थेका जोदो।
5थाम्जेर ओःप साक्या काङ्कोःउए,
काःङ्दोकक्या ओःले प्य्राःक्या थाङ जोकोःउए, इक्र्योक लाःम थेका ओःले काःबु लाःम तेःमु जोकोःउए
6ओःले थाम्जेर मीःक्याइ कोन्ज्योइ ताङ्क्योक थार्चे थोङेन्दी एः।’”#यशैया ४०:३-५
7माःङ्बुरा मीःक्या युहन्नासाःला बप्तीस्मा लेःङ्गाला ओःङ्सी। इःनाङ युहन्नाइ खुङक्याला लाःसी, “ए वीषालु प्रुःलगीइ छार्क्युक्या! ‘कोन्ज्योइ पेःगेन ठीमलाःम्ले उःक्या स्योर्खुडो’ लाःती ख्याक्याला सुइ लोप्पा? 8ख्याक्याइ तेःन्दामरा स्याबा पेःदी लाःयो पोःक्र्योक इःङे लाःना ओः च्योःङ्रारा पेःदो। ओःले ‘उःक्या अब्राहामगीइ छार्क्युफुर्क्यु इःङे’ लाःतीमाराङ ख्याक्या लाःयोलाःम्ले स्योर्खुउए लाःती टेःम्बा मासाल। ङाः ख्याक्याला लाःके, कोन्ज्योइ अब्राहामला छार्क्युफुर्क्युक्यादी दी तोःक्यालाःम्लेङ केच्युखुउए। 9तोःङ्बोइ डाकला तारी फोजे छोल्सीःङ्दी एः। याःबु ब्रुम्दो मेःकोङेन्दी थाम्जेर तोःङ्बोक्याला तुप्ती मेःला क्युर्केन एः।”
10मीःक्याइ युहन्नाला टीःसी, “ओःन्डु इःङे लाःना ङीःक्याइ ची पेःकोःन्दी ले?” 11युहन्नाइ खुङक्याला लेःन लोदी लाःसी, “ङीथाल केःला एःकेन्दीइ केःला म्याःकेन्दीला चीग तेर्च्युक। ओःन्डुलेरा साःगेन स्याः एःकेन्दीइ म्याःकेन्दीला तेर्च्युक।” 12च्याल्गो तुःगेन मीःक्याङ बप्तीस्मा लेःङ्जेला ओःङ्सी ओःले युहन्नाला टीःसी, “लोबेन, ङीःक्याइदी ची पेःकोःन्दी इःङे ले?” 13खुङक्याला युहन्नाइ लाःसी, “सरकारकीइ लाःक्योक भन्दा लाःक्पु च्याल्गो मालाङ।” 14थेक्याइयाङ टीःसी, “ङीःक्याइ ची पेकोःउबा?” युहन्नाइ खुङक्याला लाःसी, “ग्याक पेःदी ओःले स्योप क्युःर्ती माःताक्पा च्याःङ्दी सुङ ङीमु डेबा माःलेःङ। ख्याक्याइ ज्योःक्र्योक लाइ डेबालारा सेम ज्यो।”
15मीःक्या थार्च्युगेन ख्रीष्टला ज्योर्केन सेमला एःके ओःले खुङक्याइ “युहन्नारा ख्रीष्ट इःङे ना?” लाःती ठीवा साल्देरा एःके। 16ओःले युहन्नाइ थाम्जेरला लाःसी, “ङाः ख्याक्याला छ्युइ बप्तीस्मा तेर्के। इःनाङ ङाःलेङ छ्योम्बो मेःराङ चीग ओःङ्देरा एः। ङाः नी खुङगीइ लेःखाम पीचेलाङ रीःक्पु म्याः। खुङगीइ ख्याक्याला चाङ्मा ला रा मेःइ बप्तीस्मा तेर्कुएः। 17तादो, खुङगीइ डु टाप्चेला लोमा लाःक्पाला लेङ्सीःङ्दी एः। टाप्तीसीःङ्दी डुदी योःङला ज्यागेन एः, इःनाङ पोलादी नाःमाङ मीसीगेन मेःला सातेर्केन एः।”
18एःन्डुबा राःङ्सा माःङ्बुरा अर्तीक्या तेर्तेरा युहन्नाइ मीःक्याला याःबु लेःङ्गो लाःतेर्सी। 19क्याःल्बु हेरोदकीइ राःङगीइ नोःइ पेःमे हेरोदीयासला ज्याक्योक सोङ्गारा युहन्नाइ खुङला हाप्स्याल तेङ्सी ओःले खुङगीइदी राःङ्सा माःङ्बुरा लाःयोक्याङ तेङ्तेर्सी। 20ओः सोङ्गारा हेरोदकीइ युहन्नाला चेङाङला काक्योक सोङ्गारा खुङगीइ छ्योम्बो माःरीःक्पा लेःगा पेःसी।
येशुइ बप्तीस्मा लेःङ्क्योक
(मत्ती ३:१३-१७; मर्कुस १:९-११; युहन्ना १:३२-३४)
21थाम्जेर मीःक्याइ बप्तीस्मा लेःङ्देरा पेःगासुना येशुइयाङ बप्तीस्मा लेःङ्सी ओःले खुङगीइ कोन्ज्योला प्रार्थना तेःकासुना नाःम्खालीङ फ्यासी। 22ओःले चाङ्मा ला तुःङ्कुःकुरकीइ छेन्दाला माःर्ला ओःङ्दी येशुखाला तेःसी, ओःले नाःम्खालीङले एःन्डुबा के ओःङ्सी, “ख्या ङाःइ च्याःम्बु पुः इःङे, ख्या ङीमु ङाः माःङ्बुरा केःदाङ काल्दी एः।”
येशु ख्रीष्टकीइ फामाक्या
(मत्ती १:१-१७)
23येशुइ कोन्ज्योइ लेःगा छुसुना खुङ लोः खाल चीग रा च्युइदी काःल्दी एःके। मीःक्याइ योसेफलारा खुङगीइ आबा लाःती टेःम्बासाल्गुके। योसेफकीइ आबादी एली एःके, 24एलीइ आबा मत्तात, मत्तातकीइ आबा लेबी, लेबीइ आबा मल्की, मल्कीइ आबा यान्ना, यान्नाइ आबा योसेफ, 25एःन्डुलेरा योसेफकीइ आबा मत्ताथीयास, मत्ताथीयासकीइ आबा आमोस, आमोसकीइ आबा नहुम, नहुमगीइ आबा इसली, इसलीइ आबा नग्गै, 26नग्गैइ आबा माथ, माथकीइ आबा मत्ताथीयास, मत्ताथीयासकीइ आबा सेमैन, सेमैनगीइ आबा योसेख ओःले योसेखकीइ आबा योदा, 27योदाइ आबा योआनन, योआननगीइ आबा रेसा, रेसाइ आबा यरुबाबेल, यरुबाबेलगीइ आबा सालतीएल, सालतीएलगीइ आबा नेरी, 28नेरीइ आबा मल्की, मल्कीइ आबा अद्दी, अद्दीइ आबा कोसाम, कोसामगीइ आबा एलमादम, एलमादमगीइ आबा एर्, 29एर्कीइ आबा यहसु, यहसुइ आबा एलीएजर, एलीएजरकीइ आबा योरीम, योरीमगीइ आबा मत्तात, मत्तातकीइ आबा लेबी, 30लेबीइ आबा सीमीयोन, सीमीयोनगीइ आबा यहुदा, यहुदाइ आबा योसेफ, योसेफकीइ आबा योनान, योनानगीइ आबा एल्याकीम, 31एल्याकीमगीइ आबा मलेआ, मलेआइ आबा मीन्ना, मीन्नाइ आबा मत्ताथा, मत्ताथाइ आबा नातान, नातानगीइ आबा दाऊद, 32दाऊदकीइ आबा यीसै, यीसैगीइ आबा ओबेद, ओबेदकीइ आबा बोअज, बोअजकीइ आबा सल्मोन, सल्मोनगीइ आबा नहसोन, 33नहसोनगीइ आबा अम्मीनादाब, अम्मीनादाबकीइ आबा आदमीन, आदमीनगीइ आबा आराम, आरामगीइ आबा हेस्रोन, हेस्रोनगीइ आबा फारेस, फारेसकीइ आबा यहुदा, 34यहुदाइ आबा याकुब, याकुबकीइ आबा इसहाक, इसहाककीइ आबा अब्राहाम, अब्राहामगीइ आबा तेरह, तेरहइ आबा नाहोर, 35नाहोरकीइ आबा सरुग, सरुगगीइ आबा रऊ, रऊगीइ आबा पेलेक, पेलेककीइ आबा एबेर, एबेरकीइ आबा सेलह, 36सेलहइ आबा केनान, केनानगीइ आबा अर्पक्षद, अर्पक्षदकीइ आबा सेम, सेमगीइ आबा नोआ, नोआइ आबा लेमेख, 37लेमेखकीइ आबा मतुसेलह, मतुसेलहइ आबा हनोक, हनोककीइ आबा येरेद, येरेदकीइ आबा महलालेल, महलालेलगीइ आबा केनान, 38केनानगीइ आबा एनोस, एनोसकीइ आबा सेत, सेतकीइ आबा आदम एःके ओःले आदमगीइ आबा कोन्ज्यो एःके।
Currently Selected:
लुका 3: SYW
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
