लुका 23
23
येशुला पीलातसकीइ तोःङ्ला ख्योङ्क्योक
(मत्ती २७:१-२,११-१४; मर्कुस १५:१-५; युहन्ना १८:२८-३८)
1ओः तीङ्ला यहुदीक्याइ महासभाइ थाम्जेर मीःक्याइ येशुला रोमीइ हाकीम पीलातससाःला खेर्सी। 2खुङक्याइ येशुला माःताक्पा च्याःङ्देरा लाःसी, “दीखोइ राःङलारा खुङ क्याःल्बु, थार्च्युगेन ख्रीष्ट, इःङे ओःले रोमी क्याःल्बु कैसारला च्याल्गो च्याल्मेःको लाःती उःइ देशकीइ मीःक्याला लाःतेरा पेःक्योक ङीःइ फ्रेसी।”
3खुङक्याइ ताम कोःदी पीलातसकीइ येशुला टीःसी, “ची ख्या यहुदीक्याइ क्याःल्बु इःङे?” येशुइ लेःन लोदी लाःसी, “ख्यारा ओःन्डु लाःतेरा एः।” 4पीलातसकीइ छेस्यो पुजाहारीक्या ओःले मीःक्याइ पोर्चोमला लाःसी, “ङाःइ दी मीःला चीङ माःताक्पा माःथोङ।” 5इःनाङ खुङक्याइ ताःरुङ छ्योम्बो के तेङ्देरा लाःसी, “दीखोइ गालीललाःम्ले छुदी थाम्जेर यहुदीया ओःले दीलाङ राःङगीइ ताम लोप्तेरा मीःक्याला भड्काइतीदेरा एः।” 6दीखो कोःदी पीलातसकीइ टीःसी, “ची दीखो मीः गालीलगीइदी इःङे?”
येशु हेरोदकीइ तोःङ्ला
7ओःले येशु हेरोदकीइ क्याःल्खाप पेःगेन क्षेत्रइदी इःङेन्दुबा लाःकेन ताम छोर्मीःजीक पीलातसकीइ खुङला हेरोदसाःला ताङ्तेर्सी। ओः तेःकासु हेरोदाङ यरुशलेमलारा एःके। 8येशुला थोङ्जे ज्योर्सुना हेरोद केःदाङ काःल्सी चीलेलाःना खुङगीइ येशुइ बारेला कोःदी एःके ओःले माःङ्बुरा तोःङ्मीःजीक खुङला ताजे सेम पेःदी एःके। खुङ येशुइ चीङ याःमाछाककीइ लेःगाक्या पेःक्योक ताजे सेम पेःदी एःके। 9खुङगीइ येशुला माःङ्बुरा तामक्या टीःसी, इःनाङ येशुइ चीङ लेःन मालो। 10छेस्यो पुजाहारीक्या ओःले छ्येइ ठीमगीइ लोबेनक्या ओःला लाःङ्सी ओःले येशुला माःङ्बुरा माःताक्पा च्याःङ्सी। 11ओःले हेरोद ओःले खुङगीइ थेक्याइ येशुला केःमु क्याःप्तेरा खुङला अपमान पेःसी। खुङक्याइ येशुला क्याःल्बुइ केःङेन च्योःङ्रारा केःला केङ्तेर्ती पीलातससाःलारा लोताङ्सी। 12तोःङ्ला हेरोद रा पीलातस टाःलाङ एःनाङ ओः ङीःमामीःजीक खुङक्या रोः काःल्सी।
येशुला मृत्युदण्ड तेर्क्योक
(मत्ती २७:१५-२६; मर्कुस १५:६-१५; युहन्ना १८:३९–१९:१६)
13ओः तीङ्ला पीलातसकीइ छेस्यो पुजाहारीक्या, छेस्यो मीःक्या ओःले राःङ्सा मीःक्याला केक्याःप्ती लाःसी, 14“मीःक्याला भड्काइतीसी लाःती ख्याक्याइ दीखो मीःला ङाःसाःला ख्योङ्सी। ताःसे ङाःइ ख्याक्याइ तोःङ्लारा दी मीःला माःङ्बुरा तामक्या टीःसी, इःनाङ ख्याक्याइ दीखो मीःला च्याःङ्क्योक माःताक्पा ङाःइ खुङ ङीमु चीङ माःथोङ। 15हेरोदकीइयाङ चीङ माःताक्पा माःज्योर्कारा दीखोला ङीःसाःलारा लोताङ्सी। तादो दीखो मीःइ मृत्युदण्ड ज्योर्कोःन लेःगा चीङ पेःदी म्याः। 16ताः ङाः दीखोला कोर्रा क्याःप्ती पोःर्तेर्के।” 17[ओःलाइ चलन च्योःङ्राले नीस्तार मेःलीङला पीलातसकीइ मेःन्दा चीग कैदीला पोःर्तेर्कोःउके।]#२३:१७ तोःङ्गीइ चीङ छ्येइ पेज्याक्याला १७ पददी म्याः। 18इःनाङ थाम्जेर मीःक्याइ केताङ्देरा लाःसी, “दीखोलादी सेतो, ओःले ङीःइ लागी बारब्बाला पोःर्तेर।” 19बारब्बाइदी क्याःसाला वीद्रोह पेःक्योक सोङ्गारा ओःले मीःक्या सेक्योक सोङ्गारा चेङाङला कादी एःके।
20येशुला पोःर्तेर्चे सेम थेती पीलातसकीइ मीःक्याला फीर्च्या लाःसी। 21फीर्च्या खुङक्या थाम्जेर एःन्डुले केताङ्दीरा तेःसी, “ओःखोला क्रुसला प्याङ्तेर, ओःखोला क्रुसला प्याङ्तेर!” 22इःनाङ थाङ्मा सुमगीइ पाली पीलातसकीइ खुङक्याला लाःसी, “चीले? दीखो मीःइ ची लाःयो पेःदी एःपा? ङाःइ नी दीखोला मृत्युदण्ड तेर्कोःन्दी चीङ माःताक्पा माःफ्रे। ओः सोङ्गारा, ङाः दीखोला कोर्रा क्याःप्ती पोःर्तेर्के।” 23इःनाङ खुङक्याइ ताःरुङ छ्योम्बो के तेङ्देरा लाःसी, “ओःखोला क्रुसला प्याङ्रा कोःउए!” एःन्डुले मीःक्याइ केताङ्दीरा क्याःल्सी। 24ओः सोङ्गारा, पीलातसकीइ खुङक्याइ लाःक्योक च्योःङ्रारा येशुला क्रुसला प्याङेन हुकुम तेर्सी। 25खुङगीइ खुङक्याइ सेम पेःक्योक बारब्बालादी पोःर्तेर्सी। ओःखोला वीद्रोह पेःक्योक ओःले मीःक्या सेक्योक सोङ्गारा चेङाङला लुदी एःके। ओःले पीलातसकीइ येशुलादी खुङक्याइ चीरा पेःज्युक लाःती खुङक्याइ लाःक्पाला तेर्सी।
येशुला क्रुसला प्याङ्क्योक
(मत्ती २७:३२-४४; मर्कुस १५:२१-३२; युहन्ना १९:१७-२७)
26येशुला खेर्ती डोदेरा एःकासुना खुङक्याइ कुरेनी लाःकेन ठाउँगीइ सीमोन मीःन पेःक्योक मीःला फ्रेसी। खुङ युःललाःम्ले क्याःसाछ्योले ओःङ्देरा एःके। खुङक्याइ खुङला जुम्सी ओःले क्रुस खुर्च्युदी येशुइ तीङ तीङ्ला डोच्युसी। 27मीःक्याइ छ्योम्बो पोर्चोम येशुइ तीङ तीङ्ला ओःङ्देरा एःके। ओः पोर्चोमला पेःन्पीःजाक्याङ येशुइ लागी तुःङाल पेःदेरा ङुःदेरा एःके। 28खुङक्याछ्योले लोःदी येशुइ लाःसी, “ए यरुशलेमला तेःकेन पेःन्पीःजाक्या, ङाःइ लागी मीःङे, बरु राःङ ओःले राःङगीइ पीःजाक्याइ लागी ङुःदो। 29चीलेलाःना ओःन्डुबा ङीःमा ओःङेन एः, ओःले मीःक्याइ ‘पीःजा केमीःखुगेन पेःन्पीःजाक्या, पीःजा मेकेगेन पेःन्पीःजाक्या ओःले ओःमा थुङ्मीच्युगेन पेःन्पीःजाक्याइ काःजे मोलाम ज्योर्ती एः’ लाःकेन एः। 30ओःले मीःक्याइ काःङक्यालाङ ‘ङीःखाला ताःप्तो’ ओःले प्य्राःक्याला ‘ङीःला उप्तो’#होशे १०:८ लाःकेन एः। 31चीलेलाःना तोःङ्बो ङोम्बो एःकासुना नी दीखुङक्याइ एःन्डु पेःउए लाःना ताःरुङ तोःङ्बो काम्सुना ची पेःडो?”
32खुङक्याइ मेःन्दा ङी माःताक्पाक्यालाङ येशु ङीमुरा सेचेला खेर्तेरा एःके। 33खुङक्या खप्परे लाःकेन ठाउँला लेप्सी। ओःला खुङक्याइ येशुला क्रुसला प्याङ्सी ओःले ओः मेःन्दा ङी माःताक्पाक्यालाङ चीगला येशुइ च्याःबुछ्योले ओःले राःङ्सालादी योमाछ्योले क्रुसला प्याङ्सी। 34ओःले येशुइ लाःसी, “ए आःबा, दीखुङक्याला क्षमा पेःतेर चीलेलाःना दीखुङक्याइ ची पेःदेरा एःपा, ओःखो छोर्ती म्याः।” थेक्याइ चीट्ठा लुदी खुङगीइ केःला केःसी।#२३:३४ यहुदीक्याइ चलन च्योःङ्राले काःन्दीङ काःबु नीर्णय पेःकोःसी लाःना छ्यामे तोः की सीःङ्का क्युर्तीमारा नीर्णय पेःउके। 35मीःक्याइ लाःङ्दी तादी तेःती एःके ओःले यहुदीक्याइ छेस्योक्याइदी खुङला ङ्याप्च्युक पेःदेरा लाःसी, “दीखोइ राःङ्साक्याला नी सेन्च्युसी। दीखो तेःन्दामरा कोन्ज्योइ दाम्क्योक थार्च्युगेन ख्रीष्टरा इःङे लाःना राःङलाङ सेन्च्युज्युक।”
36थेक्या ओःङ्दी येशुला केःमु क्याःप्तेरा कीर्पु अङ्गुरकीइ नीःङ्गार खाला लुतेर्सी, 37ओःले लाःसी, “ख्यो यहुदीक्याइ क्याःल्बु इःङे लाःना राःङलारा सेन्च्युदो।” 38खुङगीइ गोइ थोला क्रुसला “दीखो यहुदीक्याइ क्याःल्बु इःङे” लाःती प्रुःक्योक पाङ्लेक एःके। 39येशु ङीमुरा प्याङ्क्योक मेःन्दा ङी माःताक्पाक्यालाःम्ले मेःन्दा चीगकीइ येशुला ङ्याप्च्युक पेःदेरा लाःसी, “ची ख्या थार्च्युगेन ख्रीष्ट मीःङे? ख्या राःङलारा ओःले ङीःलाङ सेन्च्युदो!” 40इःनाङ राःङ्सा माःताक्पाइ ओःखोला हाप्स्याल तेङ्देरा लाःसी, “ख्योला कोन्ज्योइ जीबा मेःलाःङ्बा? ख्योइयाङ नी खुङगीइ च्योःङ्रारा दण्ड ज्योर्ती एः। 41उःइ नी माःइबा लेःगा पेःगारा ज्योर्कोःन दण्ड ज्योर्सी, इःनाङ तादो, खुङगीइ नी चीङ माःइबा लेःगा पेःदी म्याःके।” 42ओःले खुङगीइ येशुला लाःसी, “ए येशु, ख्या राःङगीइ क्याःल्खापला ओःङ्गासुना ङाःलाङ टेःम्बा साल्दो!” 43येशुइ खुङला लाःसी, “ङाः ख्याला लाःके, तीःरीङरा ख्या ङाः ङीमुरा नाःम्खालीङला ओःङेन एः।”
येशु सीक्योक
(मत्ती २७:४५-५६; मर्कुस १५:३३-४१; युहन्ना १९:२८-३०)
44-45छाकालगीइ चीङ्ङी बज्तीदी एःके, ओःले सुम बज्मातीथुप ङीःमा मास्यार ओःले देशकाःङरा नाक्जुककीइ उप्सी। ओःले कोन्ज्योइ मन्दीरला प्याङ्क्योक पर्दा कील्ला राःल्दी बो ङी काःल्सी।#२३:४४-४५ ओःला प्याङ्क्योक पर्दादी चाङ्मा रा थाम्जेर भन्दा चाङ्मा ठाउँगीइ कील्ला एःके। आबा कोन्ज्योइ ओः पर्दादी बो ङीला राल्सी। ओः पर्दा राल्क्योककीइ मतलबदी ओःमीःजीक चोइ पुजाहारी चीग्रा मीःङे, थाम्जेर मीःक्या खुङगीइ सुःरला ओःङ्खुगेन एः। 46ओःले छ्योम्बो केइ येशु केताङ्सी, “ए आःबा, ङाः ङाःइ ला ख्याइ लाःक्पाला तेर्के।”#भजन ३१:५ एःजे लाःती खुङगीइ उ काःल्सी।
47एःन्डुबा काःल्क्योक थोङ्दी रोमी थेक्याइ कप्तानगीइ कोन्ज्योला प्रशंसा पेःदेरा लाःसी, “तेःन्दामरा दी मीः ताःक्पा एःके।” 48दी थाम्जेर तागाला ओःङ्क्योक मीःक्याइ ओःला काःल्क्योक थाम्जेर तामक्या थोङ्सी ओःले प्राःङ्गोक तुःङ्देरा तुःङाल पेःदेरा खीमछ्योले लोःसी। 49थाम्जेर येशुला ङोःसेगेनक्याइ ओःले गालील क्षेत्रलाःम्ले खुङगीइ तीङ तीङ्ला ओःङेन पेःन्पीःजाक्याइ थारीःङ्बुलेरा लाःङ्दी ओः काःल्क्योक थाम्जेर तामक्या तादी तेःती एःके।
येशुला तुःर्सा नाःङ्ला ज्याक्योक
(मत्ती २७:५७-६१; मर्कुस १५:४२-४७; युहन्ना १९:३८-४२)
50-51यहुदीक्याइ महासभाइ मीःक्या नाःङ्ला यहुदीया क्षेत्रइ अरीमाथीया क्याःसालाःम्ले ओःङ्क्योक मेःन्दा चीग योसेफ मीःन पेःक्योक मीः एःके। खुङ याःबु ओःले ताःक्पा मीः एःके ओःले खुङगीइ कोन्ज्योइ क्याःल्खापला कुःदी तेःती एःके। यहुदीक्याइ महासभाइ मीःक्याइ येशुला सेचेला पेःक्योक ठीवाला ओःले खुङक्याइ पेःक्योक लेःगाला खुङगीइ ङीःन्दी म्याःके। 52खुङगीइ पीलातससाःला काःल्दी येशुइ रोः खेर्चेला टीःसी। 53ओःले खुङगीइ येशुइ रोःला क्रुसलाःम्ले पाप्सी ओःले याःबु सुतीइ केःलाइ तुम्दी च्यार्का तोः तुप्ती फुक च्योःङ्रा जोज्याक्योक तुःर्साला ज्यासी। ओः तुःर्साला तोःङ्ला सुइदीङ रोः ज्यादी म्याःके। 54ओः ङीःमादी यहुदीक्याइ ङाःल सोगेन ङीःमाइ तोःङ्गीइ ङीःमु एःके ओःले यहुदीक्याइ ङाःल सोगेन ङीःमा स्याम्जे छोल्दी एःके। 55गालील क्षेत्रलाःम्ले येशुला ब्य्राङ्दी ओःङ्क्योक पेःन्पीःजाक्या योसेफकीइ तीङ तीङ्ला काःल्सी ओःले तुःर्साला रोः ज्याक्योक तासी। 56ओःले खुङक्या खीमला लोःसी ओःले रोःला टुःल्जेला याःबु टीःमा तेर्केन्दी मलम ओःले अत्तर तयार जोसी। ओःले मोशाइ ठीम च्योःङ्राले यहुदीक्याइ ङाःल सोगेन ङीःमाला खुङक्याइ ङाःल सोसी।
Currently Selected:
लुका 23: SYW
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
