युहन्ना 13
13
येशुइ राःङगीइ योबाक्याइ काङ्बा ठुक्योक
1नीस्तार मेःलीङ ओःङ्जे तोःङ्ला खुङ दी जाम्बुलीङ पोःर्ती राःङगीइ आबासाःला डोगेन तीःजी ओःङ्सी लाःती येशुइ छोर्सी। जाम्बुलीङला एःक्योक राःङगीइ मीःक्याला खुङगीइ तेन्दुरा च्याःम्बु पेःसी ओःले ताःसे येशुइ खुङक्याला तीङ्थुपरा च्याःम्बु पेःसी।
2ओःले कुङ्मुइ डेन साःगेन तीःजीला शैतानगीइ सीमोनगीइ पुः यहुदा इस्करीयोतकीइ सेमला येशुला जुम्दी तेर्केन ठीवा तोःङ्लारा लुतेरसीःङ्दी एःके। 3आबाइ राःङला थाम्जेर क्युःक्याखाला थाम्जेर आङ्ज्या तेर्ती एः लाःकेन ताम येशुइ छोर्ती एःके ओःले खुङ कोन्ज्योलाःम्ले ओःङ्क्योक ओःले फीर्च्या कोन्ज्योसाःलारा डोदेरा एः लाःकेन तामाङ खुङगीइ सेदी एःके। 4ओःले खुङ साःगेन ठाउँलाःम्ले लाःङ्सी, ओःले फीछ्योइ केःला पीती छ्यो चीगला ज्यादी तौलीया राःङगीइ केपाला चीङ्सी। 5ओःले खुङगीइ नेकीला छ्यु लुदी योबाक्याइ काङ्बा ठुगाला स्युःसी ओःले केपाला चीङ्क्योक तौलीयाइ फ्यासी। 6ओःले खुङ सीमोन पत्रुससाःला ओःङ्सी, पत्रुसकीइ खुङला लाःसी, “प्रभु, ची ख्याइ ङाःइ काङ्बा ठुगेन्दी?”
7येशुइ पत्रुसला लाःसी, “ङाःइ ची पेःदेरा एःपा ओःखो ख्योइ ताःसे मेसेए, इःनाङ ख्योइ तीङ्ला सेगेन एः।”
8पत्रुसकीइ खुङला लाःसी, “ख्याइ ङाःइ काङ्बा नाःमाङ ठुजे मेःयुङे।”
येशुइ खुङला लाःसी, “ङाःइ ख्योइ काङ्बा माःठु लाःना ख्यो ङाःइ योबारा मेःयोङ एः।”
9सीमोन पत्रुसकीइ खुङला लाःसी, “ओःन्डु इःङे लाःना प्रभु, ङाःइ काङ्बा चीग्रा मीःङे, इःनाङ लाःक्पा रा गोङ ठुतेर।”
10येशुइ खुङला लाःसी, “ठुसीःङ्क्योक मीःला काङ्बाबाहेक राःङ्सा चीङ ठुमेःको, ओःखो थाम्जेर चाङ्मा एः। ख्याक्या चाङ्मा एः, इःनाङ थाम्जेर नी मीःङे।” 11राःङला सुइ जुम्जे चल्दी एःपा, ओःखो येशुइ छोर्ती एःके। ओः सोङ्गारा, येशुइ खुङक्या थाम्जेर चाङ्मा म्याः लाःती एःके।
12योबाक्याइ काङ्बा ठुसीःङ्मीजीक येशुइ राःङगीइ फीइ केःला केःङ्सी ओःले फीर्च्या साःजेला तेःसी ओःले लाःसी, “ङाःइ चीले ख्याक्याइ काङ्बा ठुक्योक, ख्याक्याइ सेबा? 13ख्याक्याइ ङाःला लोबेन रा प्रभु लाःकुए। दी ताम डीक्पुरा इःङे, ङाः ख्याक्याइ प्रभु रा लोबेन इःङे। 14ङाः प्रभु रा लोबेन एःनाङ ख्याक्याइ काङ्बा ठुदी एः लाःना, ख्याक्याइयाङ चीगकीइ राःङ्साइ काङ्बा ठुकोःए। 15ङाःइ ख्योक्याला पेःक्योक च्योःङ्रा ख्याक्याइयाङ पेःज्युक लाःतीरा ङाःइ उदाहरण चीग तेङ्क्योक इःङे। 16तेःन्दामरा ङाः ख्याक्याला लाःके, ताःक्पु भन्दा लाबु छ्योम्बो मेःयुङ एः ओःले लेःङ्गो ताङेन्दी भन्दा लेःङ्गो ख्याङेन्दी छ्योम्बो मेःयुङ एः। 17ख्याक्याइ दी ताम सेमीःजीक, दीखो च्योःङ्रारा पेःसी लाःना कोन्ज्योइ ख्याक्याला मोलाम तेर्केन एः।
येशुला जुम्दी तेर्केन योबा
(मत्ती २६:२०-२५; मर्कुस १४:१७-२१; लुका २२:२१-२३)
18ङाःइ ख्याक्या थाम्जेरकीइ बारेला लाःक्योक मीःङे, ङाःइ दाम्क्योकक्याला ङाः ङोःसेगे। इःनाङ छ्येइ पेज्याला ‘ङाः ङीमुरा खुरा साःगेन मीःइ ङाःइ टाःलाङ काःल्सी’#भजन ४१:९ लाःती प्रुःक्योक ताम छाङ्राकोःउए। 19दी छाङ्जे तोःङ्लारा ङाःइ ख्याक्याला लाःतेरा एः, ओः सोङ्गारा, ओः ताम छाङ्गासुना ख्याक्याइ ‘ङाः ओःखोरा इःङे’ लाःती ख्याक्याइ सेमल्हुक लुखुज्युक। 20तेःन्दामरा ङाः ख्याक्याला लाःके, ङाःइ ताङ्क्योक मीःक्याला ग्रहण पेःगेनक्याइ ङाःलाङ ग्रहण पेःउए ओःले ङाःला ग्रहण पेःगेनक्याइ ङाःला ताङेन्दीला ग्रहण पेःउए।”
21येशुइ दी ताम लाःसीःङमीःजीक येशुइ सेम माःङ्बुरा सुःक्याःप्सी ओःले एःन्डु लाःसी, “तेःन्दामरा ङाः ख्याक्याला लाःके, ख्याक्या नाःङ्ला मेःराङ चीगकीइ ङाःला जुम्दी तेर्केन एः।” 22येशुइ दी ताम सुइ बारेला लाःक्योक इःङे लाःती योबाक्याइ मासे ओःले चीगकीइ राःङ्साइ छेन्दाला तालुङ चासी। 23येशुइ योबाक्या नाःङ्ला खुङगीइ च्याःम्बु पेःक्योक योबा खुङ ङीमुरा ज्यार्ती तेःती एःके। 24ओःले सीमोन पत्रुसकीइ खुङला लाःक्पाइ लाःदाप पेःदी टीःसी, “प्रभुइ दी ताम सुइ बारेला लाःक्योक इःम्बा, टीःदो ले।” 25ओः योबाइ येशुइ प्र्याःङ्गोगला ज्यार्ती टीःसी, “प्रभु, ओः मीः सु इःङे?” 26येशुइ लाःसी, “काःखोला ङाः खुराइ पुःजुप पादी तेर्पा, ओःखोरा इःङे।” ओःले खुङगीइ खुराइ पुःजुप पादी सीमोन इस्करीयोतकीइ पुः यहुदाला तेर्सी। 27यहुदाइ खुरा लेःङ्लुङम्याःपा खुङगीइ सेमला शैतान स्युःसी ओःले येशुइ खोला लाःसी, “ख्योइ ची पेःजे चाल्दी एःपा, ओःखो गेबुरा पेःदो।” 28इःनाङ खुङगीइ चीले खोला एःन्डु लाःपा लाःती डेन साःगाला तेःकेनक्या सुइयाङ मासे। 29डेबाइ काःल्ज्युमदी यहुदाइ ज्यागेन्दी सोङ्गारा, काःजे योबाक्याइदी येशुइ खोला मेःलीङगीइ लागी खुङक्याला कोःकेन स्याःक्या ङ्योःगाला सुङ लाःक्योक इःङ्स्वाँ लाःती टेःम्बा साल्सी ओःले काःजेइदी प्राङ्नाक्याला चीङ तेर्चेला सुङ लाःक्योक इःङ्स्वाँ लाःती ठीवा चेसी। 30यहुदादी खुराइ पुःजुप लेःङमीःजीक खुङ खेप चीगलारा फीला थेङ्सी। ओः तीःजी कुःङ्मु छेसीःङ्दी एःके।
येशुइ सेम्बा आज्ञा चीग तेर्क्योक
31यहुदा काःल्मीःजीक येशुइ लाःसी, “ताः मीःइ पुःइदी महीमा काःल्दी एः, ओःले कोन्ज्योइ महीमा खुङलाःम्ले थोङ्दी एः। 32मीःइ पुःखाला कोन्ज्योइ महीमा काःल्सी लाःना कोन्ज्योइ राःङगीइरा मीःइ पुःइ महीमा पेःगेन एः ओःले खुङगीइ दी लेःगा गेबुरा पेःगेन एः।
33ङाःइ पीःजाक्या, ङाः ख्याक्या ङीमु तीबी चीग तीःनामथुप चीग्रा तेःकेन एः। ख्याक्याइ ङाःला छोल्गेन एः, इःनाङ ङाःइ यहुदीक्याइ गोछेस्योक्याला लाःक्योक च्योःङ्रारा ख्योक्यालाङ ताःसे लाःके, ‘ङाः काःला डोदेरा एःपा, ओःला ख्योक्या ओःङ्जे मीःखुए।’ 34ताः ङाः ख्याक्याला सेम्बा आज्ञा चीग तेर्के– ख्याक्या चीगकीइ राःङ्साला च्याःम्बु पेःदो। ङाःइ ख्याक्याला काःन्डुले च्याःम्बु पेःदी एःपा, ख्याक्याङ चीगकीइ राःङ्साला ओःन्डुलेरा च्याःम्बु पेःगेन्दी पेःदो। 35ख्याक्याइ चीगकीइ राःङ्साला च्याःम्बु पेःसी लाःना ख्याक्या ङाःइ योबाक्या इःङे लाःती थाम्जेर मीःक्याइ ङोःसेगेन एः।”
पत्रुसकीइ येशुला इन्कार पेःउए लाःती येशुइ लाःक्योक
(मत्ती २६:३१-३५; मर्कुस १४:२७-३१; लुका २२:३१-३४)
36सीमोन पत्रुसकीइ येशुला टीःसी, “प्रभु, ख्या काःला डोदेरा एःपा?”
येशुइ लेःन लोदी लाःसी, “ङाः डोदेरा एःक्योक ठाउँला ख्यो ताःसे ङाःला ब्र्याङ्दी ओःङ्जे मीःखुए, इःनाङ तीङ्ला नी ख्योइ ङाःला ब्र्याङेन एः।”
37पत्रुसकीइ लाःसी, “प्रभु, ङाःइ चीले ताःसे ख्याला ब्र्याङ्जे मीःखुबा? ख्याइ लागी नी सीकोःनाङ ङाः सीजेला तयार एः!”
38येशुइ लेःन लोदी लाःसी, “ची ख्यो ङाःइ लागी तेःन्दामरा सीजेला तयार एःपा? ङाः ख्योला तेःन्दामरा लाःके, ङार्तो ङामु च्याःबु प्रेःचे तोःङ्ला थाङ्मा सुमथुप ख्योइ ङाःला ङोःमेसेए लाःती लाःकेन एः!”
Currently Selected:
युहन्ना 13: SYW
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
