प्रेरीत 14
14
पावल रा बरनाबास आइकोनीयन क्याःसाला
1आइकोनीयन क्याःसालाङ पावल रा बरनाबास यहुदीक्याइ जोम्साखीमला काःल्दी खुङक्याइ येशुइ बारेला माःङ्बुरा याःबुले लाःक्योक कोःदी माःङ्बुरा यहुदी ओःले राःङ्सा क्युःपाइ मीःक्याइ प्रभु येशुला सेमल्हुक लुसी। 2इःनाङ सेमल्हुक मीलुगेन यहुदीक्याइदी राःङ्सा क्युःपाइ मीःक्याला क्यासी ओःले सेमल्हुक लुगेन मीःक्याला टाः पेःगेन्दी जोतेर्सी। 3इःनाङ पावल रा बरनाबास ओःला माःङ्बुरा ङीःमाथुप तेःसी ओःले खुङक्याइ माःजीबा पेःदी प्रभुइ लागी लाःसी। प्रभुइ खुङक्यालाःम्ले चुःन्डुलक्या तेङ्सी ओःले याःमाछाककीइ लेःगाक्या पेःदी खुङक्याइ लाःक्योक अनुग्रहइ लेःङ्गो तेःन्दामरा इःङे लाःती तेङ्तेर्सी। 4इःनाङ ओः क्याःसाइ मीःक्या खाफ्यासी। चीङ मीःक्या यहुदीक्याछ्योले काःल्सी ओःले चीङ मीःक्या प्रेरीतक्याछ्योले ओःङ्सी। 5ओःले राःङ्सा क्युःपाइ मीःक्या ओःले यहुदीक्या खुङक्याइ छेस्यो मीःक्या ङीमु डीक्ती पावल रा बरनाबासला तोः क्याःप्ती सेकेन तेःदाम पेःसी। 6इःनाङ पावल रा बरनाबासकीइ दी ताम कोःसी ओःले खुङक्या लुकोनीया क्षेत्रला एःक्योक लुस्त्रा रा डर्बी ओःले ओःक्याइ छुरफारकीइ ठाउँक्याला छ्योङ्सी। 7खुङक्याइ ओः क्षेत्रक्यालाङ प्रभु येशुइ बारेला याःबु लेःङ्गो प्रचार पेःसी।
पावल रा बरनाबास लुस्त्रा ओःले डर्बीला
8लुस्त्राला मेःन्दा चीग स्याःल्ठाक मीः तेःकुके। खुङ केगासुना मीःजीकरा स्याःल्ठाक एःक्योक सोङ्गारा खुङ नाःमाङ डोखुदी म्याःके। 9पावलगीइ लाःकासुना खुङगीइ सेम तेर्ती कोःसी। पावलगीइ खुङला थेकारा तासी, ओःले खुङगीइदी टाःखुगेन सेमल्हुक थोङ्दी 10छ्योम्बो केतेङ्दी लाःसी, “ख्यो राःङगीइ काङ्बाला थेका लोःङ!” ओःले खुङ जुरुक्क लाःङ्सी ओःले डोगाला स्युःसी।
11पावलगीइ एःन्डुबा लेःगा पेःक्योक थोङ्दी ओःलाइ मीःक्याइ राःङगीइ लुकोनीयाइ तामले छ्योम्बो केतेङ्दी लाःसी, “ल्हाक्यानी मीःइ छेन्दा लेःङ्दी उःक्यासाःला ओःङ्दी एः!” 12खुङक्याइ बरनाबासला जीउस लाःकेन ल्हा ओःले पावललादी हर्मेस लाःकेन ल्हा लाःती मीःन तेर्सी, चीलेलाःना पावलदी ताम लाःकेन्दी छेस्यो एःके। 13जीउस ल्हाइ मन्दीरदी ओः क्याःसाइ सुःरलारा एःके। ओः मन्दीरकीइ पुजाहारी लाङ्डुकक्या ओःले मेःन्दोइ लुःङक्या ख्योङ्दी क्याःसाइ कोःला ओःङ्सी। खुङक्याइ बरनाबास रा पावलला ओः लाङ्डुकक्या ओःले मेःन्दोक्या बली तेर्चे सेम पेःसी।
14दी ताम बरनाबास रा पावलगीइ छोर्मीःजीक खुङक्याइ नीराशकीइ राःङगीइ केःलाक्या राल्सी ओःले मीःक्याइ कील्ला छ्योङ्देरा काःल्दी केतेङ्देरा लाःसी, 15“रोःक्या, ख्याक्याइ दी ची पेःक्योक? ङीःङ ख्याक्या च्योःङ्रारा मीः इःङे। ङीः नी ख्याक्याला एःन्डुबा लेःगा म्याःक्योक तामक्यालाःम्ले नाःम्खालीङ, जाम्बुलीङ, चाङ्बु ओःले ओःक्याला एःक्योक थाम्जेर क्युःक्या जोगेन सोम्बो कोन्ज्योछ्योले लोःदो लाःती याःबु लेःङ्गो लाःचेला चीग्रा दीला ओःङ्क्योक इःङे। 16तोःङगीइ थाम्जेर मीःक्याला नी कोन्ज्योइ राःङला ची सेम थेपा ओःखोरा पेःजे तेर्सी। 17ख्याक्याइ खुङला ङोःमेसेनाङ, थाम्जेर याःबु तामक्या तेर्केन्दी खुङरा इःङे लाःती खुङगीइ थाम्जेर मीःक्याला तेङ्तेर्ती एः। खुङगीइ डीक्पु तीःनामला नाम्सार्गालाःम्ले नाम क्याःप्च्युए, सेनक्या कोःङ्च्युउए ओःले डुक्या छेच्युउए। खुङगीइ ख्याक्याला दाङेनथुप साःप्च्याक्या तेर्कुए ओःले ख्याक्याइ सेम केःदाङगीइ काङ्तेर्कुए।” 18दी थाम्जेर ताम लाःती पावल रा बरनाबासकीइ खुङक्याला बली तेर्चेला ख्योङ्क्योक लाङ्डुकक्या ओःले मेःन्दोक्या काःबु पेःदी कासी।
19ओःले चीङ यहुदीक्या एन्टीओखीया रा आइकोनीयनलाःम्ले ओःला ओःङ्सी। खुङक्याइ मीःइ पोर्चोमला खुङक्याछ्योले वाःम्सी ओःले पावलला तोः क्याःप्सी, ओःले खुङ सीसी लाःती क्याःसालाःम्ले पाङ्ला टीःतेरा खेर्सी। 20इःनाङ योबाक्या ओःङ्दी खुङगीइ छुरफारले जोम्सी, ओःले खुङ याःरला लाःङ्सी ओःले फीर्च्या ओः क्याःसाला काःल्सी। ङार्तो च्योःङ्रा खुङ बरनाबास ङीमुरा डर्बी क्याःसाला काःल्सी।
पावल रा बरनाबास सीरीयाइ एन्टीओखीयाला लोःदी काःल्क्योक
21पावल रा बरनाबासकीइ डर्बी क्याःसालाङ याःबु लेःङ्गो प्रचार पेःदी माःङ्बुरा योबाक्या जोसी। ओः तीङ्ला खुङक्या लुस्त्रा, आइकोनीयन ओःले पीसीदीयाइ एन्टीओखीयाला लोःदी काःल्सी। 22खुङक्याइ ओःला एःक्योक प्रभुला सेमल्हुक लुगेनक्याला सहास तेर्सी ओःले तेन्दुरा सेमल्हुक लुदी तेः लाःसी। “कोन्ज्योइ क्याःल्खाप नाःङ्ला स्युःजे तोःङ्ला उःइ माःङ्बुरा तुःक्पुक्या खुर्कोःउए” लाःती लोप्सी। 23पावल रा बरनाबासकीइ थाम्जेर कोःम्साक्याला तोःङ क्याःप्केन छेस्योक्या दाम्सी ओःले खुङक्या खा चाङ्मा तेःती कोन्ज्योला प्रार्थना पेःसी ओःले ओः छेस्योक्या रा प्रभुला सेमल्हुक लुगेनक्याला खुङक्याइ सेमल्हुक लुक्योक प्रभुइ लाःक्पाला क्याप च्योल्सी।
24तीङ्ला खुङक्या पीसीदीया छेत्रले पेःदी काःल्दी पामफीलीया छेत्रला ओःङ्सी। 25ओःला खुङक्याइ पर्गा क्याःसाला प्रभु येशुइ बारेला प्रचार पेःसी। ओः तीङ्ला खुङक्या अटालीयाला काःल्सी। 26ओःले ओःलाःम्ले खुङक्या जहाजला जादी सीरीयाइ एन्टीओखीयाला लोःदी काःल्सी। ओःलाइ प्रभुला सेमल्हुक लुगेनक्याइरा पावल रा बरनाबासला कोन्ज्योइ अनुग्रहला क्याप च्योल्दी प्रचार पेःगेन लेःगाला ताङ्दी एःके ओःले ओः लेःगा सीःङ्दी खुङक्या ओःलारा लोःदी ओःङ्सी।
27खुङक्या एन्टीओखीयाला लेप्मीःजीक खुङक्याइ कोःम्साइ थाम्जेर मीःक्याला केक्याःप्सी ओःले कोन्ज्योइ खुङक्यालाःम्ले पेःक्योक लेःगाक्याइ बारेला ओःले कोन्ज्योइ काःन्डुले राःङ्सा क्युःपाइ मीःक्याइ लागीङ सेमल्हुक लुजेला कोः फ्यातेर्पा ओः तामक्या लाःसी। 28ओः तीङ्ला खुङक्या माःङ्बुरा ङीःमाथुप एन्टीओखीयाला प्रभुला सेमल्हुक लुगेन आतानोःक्या ङीमु तेःसी।
Currently Selected:
प्रेरीत 14: SYW
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
