मरकुस 11

यरुशलेम शेहर अन्तर घेण

मत्ती 21:1-11; लूका 19:28-40; यूहन्ना 12:12-19

1जपल यीशु त तसे चेले यरुशलेम शेहरे भेएड़, जैतुन नओएं यक फाट पुठ बैतफगे त बैतनिया ग्रां भेएड़ पुजे, त तेन अपु चेली अन्तरा दुई जेईं ईं बोलु कइ लंघाए कि 2“जे ग्रां हें सामणि असु, अठि घिए। ग्रां अन्तर पुजते ईं तुसी तठि यक खोतुड़ु बच्चा बन्हो मेता। तस पुठ आज तकर कोई नेईं चढ़ो। तेस खोल कइ घिन एईए। 3अगर तुसी जे कोउं पुछियाल, ‘ईं किस करण लगो असे?’ त बोलुण, ‘प्रभु असे जरूरत असी, त से झट एस वापिस लंघाई छता।’” 4से गे त तेन्हि से बच्चा बाहर दुआर केईं बन्हो मेआ, त से खोलुण लगे। 5त जे तठि खड़ खड़ थिए तेन्हि अन्तर कोई कोई बोलुण लगे, “ई किस करण लगो असे? खोतुड़ु बच्चे को जे खोलुण लगो असे?” 6त जीं यीशु बोलो थिउ, तिहांणि तेन्हि, तेन्हि जे बोलु; तोउं मेह्‍णु से नेण दिता। 7से खोतुड़ु बच्चा यीशु केईं घिन आए त तेस पुठ कुछ झिणे छड़े त से तेस पुठ बिश गा।#जकर्याह 9:9 8त सुआ जेईं अपु अपु फुलो टलिड़ बथ टडी त केहि केहि बगा डा लुण कइ आणते त बथ टड छड़े। 9त जे तसे अगर त तसे पता हंटो थिए जोरी जोरी बोलुण लगे,

“होशान्ना#11:9 होशान्ना: एसे मतलब “परमेश्वरे महिमा भुओ लौती”।! हें परमेश्वरे जे राजा, असी जे लंघो असा,

परमेश्वरे तसे धे अशुश दुतो असी।

10हें बोउ दाऊदे जे राज्य एण लगो असा, से सुआ खास असा।

स्वर्ग पुठ परमेश्वरे महिमा भो!”#छुआंरी 118:26

11पता से यरुशलेम शेहर पूज कइ देहेर अन्तर गा त चोहरो कना सोबी चीजी ध्यान जुए हेर कइ अपु बाराह चेली जोई बैतनिया ग्रां जे गा, किस कि झवादी भोई गो थी।

बगैर फले अंजीरे बुटा

मत्ती 21:18-19

12दोके रोजे, जपल यीशु त तसे चेले बैतनिया ग्रां केआं यरुशलेम शेहर जे गे त तस ढुक लगी। 13तेन दूरा यक नीला अंजीरे बुटा काआ त ई उम्मीद जुए कि एस बुटे पुठ किछ फल भोल, तसे भेएड़ घेई कइ हेरु। तेस पुठ किछ फल नेओथ, किस कि तिखेईं फले टेम न थिआ, त तेस पुठ सद पन्ने ईं थिए। 14तोउं तेन तेस जे बोलु, “अभेईं केआं खड़ तें फल कोई न खांता!” त तसे चेले ई बोक शुणुण लगो थिए।

यीशु यरुशलेमे देहेर अन्तरा व्यापारी बाहर लाण

मत्ती 21:12-17; लूका 19:45-48; यूहन्ना 2:13-22

15तोउं यीशु त तसे चेले यरुशलेम शेहर पुजे, त यीशु देहेर अन्तर गा। तठि जे लेण देण करण लगो थिए तेन्हि बाहर किढ़ण लगा। रुपेई के अटा-बाटा करणे बाड़ी के ठेले त अलिण बेचणे बाड़ी के कुण्सी फटाई छेई। 16देहरे अन्तरी बइ केसे जेईं बि कोई सामान अण्हण त नेण ना दिता। 17त शिक्षा दी कइ तेन बोलु, “धरमे कताब अन्तर ईं नेईं न लिखो कि

‘में गी सोबी जाति जे प्रार्थना करणे गी बोलिन्तु?

पर तुसी ए डाकु के कुड बणाई छओ असी।’”#यशायाह 56:11; यिर्मयाह 7:8-11

18ईं शुण कइ मुख्य पुजारे त धर्मशास्त्री यीशु खतम करण जे मौका तोपुण लगे; किस कि सम्हाई मेह्‍णु बोडे चह जुए तसे शुणतेथ त मुख्य पुजारे त धर्मशास्त्री तेन्हि मेह्‍णु हेर डरतेथ। 19जपल झवादी भुई त से शेहर केआं बाहर घेई गे।

शुखो अंजीरे बुटे केआं शिक्षा

मत्ती 21:20-22

20होउस भ्यागे जपल यीशु त तसे चेले तेन बइ गे त तेन्हि से अंजीरे बुटा जड़ तकर शुखो काआ। 21पतरस से बोक याद आई, त तेन यीशु जे बोलु, “ए गुरु, हेर! ई से अंजीरे बुटा जेस तुसी शराप दुतो थिआ, शुख गो असा।” 22यीशु तेन्हि जे जवाब दुतु, “परमेश्वर पुठ विश्वास रखे। 23अउं तुसी जे बोता कि जे कोउं इस फाट जे बोलाल, ‘तु उखिड़ गा, त तथ अन्तर झड़’, होर अपु मन अन्तर धिक बि शक न कता, पर पूरा विश्वास कता कि तेन जे बोलो असु, से जरूर भुन्तु, तेस जे तिहांणि भुन्तु।#मत्ती 17:20; 1 कुरिन्थ 13:2 24तोउं त, अउं तुसी जे बोता कि जे कुछ तुस प्रार्थना कर कइ परमेश्वर केआं मगते, होर तस मेणे पक्का विश्वास कते त तुसी से मेई घेन्तु। 25त जपल कदी तुस प्रार्थना दुआ कते, होर अगर तुं मन अन्तर केसे जे बदला नेणे भावना असी त तेन्हि माफ करे ताकि तुं स्वर्गे बोउ बि तुं पाप माफ करियाल।#मत्ती 6:14,15 26अगर तुस तेन्हि माफ न करियेल त तुं स्वर्गे बोउ बि तुं पाप माफ न कता।”

यीशु हक पुठ सवाल

मत्ती 21:23-27; लूका 20:1-8

27पता फि यीशु त तसे चेले यरुशलेम शेहर आए। जपल यीशु देहेर अन्तर हंटण लगो थिआ त मुख्य पुजारे, धर्मशास्त्री त टजे स्याणे तसे भेएड़ एई कइ पुछुण लगे, 28“तु ई सोब कम केस हक जोई कता? त ई सोब कम करण जे ए हक तेन्धे केन दुतो असा?” 29यीशु तेन्हि जे बोलु, “अउं बि तुसी केआं यक सवाल पुछता; मोउं जे जवाब दिए। तोउं अउं बि बतान्ता कि ई सोब कम केस हक जोई कता। 30यूहन्ने मेह्‍णु चुसुणे हक स्वर्गे कनारा थिआ या मेह्‍णु के कनारा थिआ?” 31तपल से अपफ बुच बोक विचार करण लगे कि “अगर अस बोलियेल कि ‘स्वर्गे कनारा’, तोउं से बोता ‘त फिर तुसी तेसे बोकी पुठ विश्वास किस न किआ?’ 32होर अगर अस बोलियेल, ‘मेह्‍णु के कनारा’, त ए हुसुड़ा असी मुकाई छता।” से तेन्हि मेह्‍णु हेर डरो थिए किस कि सोब मानतेथ कि यूहन्ना यक सच्चा भविष्य वक्ता थिआ। 33त तेन्हि यीशु जे जवाब दिता, “असी नेईं पता”। त यीशु तेन्हि जे बोलु, “अउं बि तुसी जे न बोता कि ई सोब कम अउं केस हक जोई कता।”

Currently Selected:

मरकुस 11: pgg

Highlight

Copy