मरकुस 10

छुटिबा भुणे बारे यीशु शिक्षा

मत्ती 19:1-12; लूका 16:18

1फिर यीशु कफरनहुम शेहर केआं घेई कइ यहूदिया राज्य अन्तर त यरदन दरेउ पार आ। त तसे भेएड़ दुबारी हुसुड़ा किठा भोई गा, त से रोजेरीं ईं तेन्हि शिक्षा देण लगा। 2तपल फरीसी तसे भेएड़ एई कइ तस फसाण जे तेस केआं पुछु, “गुरुजी! हें नियमे हेसाब जुए मड़द अपु जुएली छुटिबा करण की ठीक असु ना?” 3तेन तेन्हि जे जवाब दिता, “मूसे तुन्धे की निआंग दुतो असी?” 4तेन्हि बोलु, “मूसे लिख तुखि कइ जुएली छड़ देणे इजाजत दुतो असी।”#मत्ती 5:31 5यीशु तेन्हि जे बोलु, “तुं नकठर मने बझई जुए ईं तेन तुसी जे ईं निआंग लिखि। 6पर सृष्टि शुरुवात अन्तर जपल परमेश्वर से बड़ाए, तेन मड़द त जिल्हाणु कर कइ बणाए।

7‘इस बझई जोई मड़द अपु ईया बोउ केआं बखी कइ

अपु जुएली जोई बिश्ता

8त से दुहे मी कइ यक जिसम बणते’#शुरुवात 2:24

तोउं त से अब दुई नेईं बल्कि यक जिसम बण गो असे।

9तोउं त जे परमेश्वरे जोड़ो असे, तेस मेह्‍णु बखरे न करे”।

10पता जपल से गी एई गे त चेली दुबारी छुटिबा करणे बारे तेस केआं पुछु। 11तेन तेन्हि जे बोलु, “जे कोउं अपु जुएली छड़ दी कइ होरी जोई ब्याह कता त से अपु पेहलकण जुएली खिलाफ नाजायज रिश्ता रखता।#मत्ती 5:32; 1 कुरिन्थ 7:10,11 12त अगर जुएली अपु धाणि छड़ दी कइ होरी जोई ब्याह कती त से बि नाजायज रिश्ता रखती।”

गभुर ईं भुण

मत्ती 19:13-15; लूका 18:15-17

13तोउं मेह्‍णु अपु गभुर यीशु केईं अण्हण लगे कि से तेन्हि पुठ हथ रख कइ अशुश दिए, पर चेले तेन्हि जे लेहरिए। 14यीशु ईं हेर कइ तेन्हि जोई नराज भोई गा त बोलु, “गभुर मोउं केईं एण दिए त अन्हि रोके नउ, किस कि परमेश्वरे राज्य इन्हि गभुर के ईं मेह्‍णु के भो। 15अउं तुसी जे बोता कि जे कोउं परमेश्वरे राज्य गभुर ईं ना अपणाल, त से तेस अन्तर कदी घेई ना सकते।”#मत्ती 18:3 16तोउं तेन से कल्हाई किए, त तेन्हि पुठ हथ रख कइ अशुश दिती।

अमीर मेह्‍णु त अमर जीवन

मत्ती 19:16-30; लूका 18:18-30

17पता, जपल से तठिआ निस कइ घेण लगा, त यक मेह्‍णु दौड़ता तेस केईं आ, तसे अगर उटेऊ बिश कइ पुछु, “ए खरा गुरु! मोउं अमर जीवन मेण जे की करुण?” 18यीशु तेस जे बोलु, “तु मोउं जे ‘खरा’ किस बोता? परमेश्वर छड़ दी कइ कोई खरा नेईं। 19तु नियम त जाणता :

‘कोउं मारण नउ,

नाजायज रिश्ता न रखण,

चोरुण नउ,

झुठी उगाही न देण,

कोउं ठगण नउ,

अपु ईये बोउए इज्जत करीण।’”#निसुणे 20:12-16; विधि 5:16-20

20तेन तेस जे बोलु, “ए गुरु! इन्हि सोबी त अउं मठड़ियार केआं मानता।” 21इस बोकी पुठ यीशु से ट्यारा लगा त तसे धे हेर कइ बोलु, “तोउ अन्तर यक बोकी कमी असी। गा, जे किछ तोउ केईं असु तेस बेच कइ गरीब कें धे बांट छड़, त में पता आई, तोउं तोउ स्वर्ग अन्तर धन मेता”। 22इ शुण कइ तसे चेहरा उदास भोई गा, त से दुखी भोई कइ घेई गा, किस कि से सुआ अमीर थिआ। 23यीशु चोहरो कना हेर कइ अपु चेली जे बोलु, “अमीरी के परमेश्वरे राज्य अन्तर घेण सुआ औखु असु!”

24चेले तसे बोकी बेलि हैरान भोई गे। त यीशु तेन्हि जे बोलु, “ए गभुरुओ! बचुण जे जे धन पुठ भरोसा कते, तेन्हि परमेश्वरे राज्य अन्तर घेण जे औखु असु! 25सच्चाई त ई असी कि अमीर मेह्‍णु के परमेश्वरे राज्य अन्तर घेण ईं औखु असु, जीं ऊंटे स्नाणि छिने बइ निशरुण।” 26से सुआ हैरान भोई कइ अपफ बुच बोलुण लगे, “त फि कोउं बच सकता?” 27यीशु तेन्के धे हेर कइ बोलु, “मेह्‍णु केईआं त ईं न भोई सकतु, पर परमेश्वर केईआं भोई सकतु; किस कि परमेश्वर केईआं सोब कुछ भोई सकतु”। 28त पतरस तेस जे बोलुण लगा, “हेर, अस त सोब किछ छड़ दी कइ तें पतोती ओ असे।” 29यीशु बोलु, “अउं तुसी जे बोता कि जेन बि में त खुश खबरी लिए अपु घरबार, भाई भेण, ई बोउ, गभुरु-छिएड़ु, बग-बघुई, छड़ दुतो असे, 30तस मेह्‍णु भुंजान्ते, फि बि इस टेम तस सद सौ गुणा घरबार, भाई भेण, ई बोउ, गभुरु-छिएड़ु, बग-बघुईएं ना मेती, बल्कि तस त एण बाड़े रोज अन्तर अमर जीवन बि मेता। 31पर सुआ जेईं जे अगर असे, से पतूं भोई घेन्ते; त जे पतूं असे, से अगर भोई घेन्ते।”#मत्ती 20:16; लूका 13:30

अपु मरणे बारे यीशु टेकी भविष्य वाणि

मत्ती 20:17-19; लूका 18:31-34

32यीशु त तसे चेले यरुशलेम शेहर जे घेन्त पेंत बथ थिए। त यीशु तेन्के अगर अगर हंटो थिआ : पर चेले हैरान थिए कि से यरुशलेम जे घेण लगो असा। त जे हुसुड़ा तसे पता थिआ से बि डरो थिए। तपल यीशु फिर से बाराह चेले बखरे नी कइ तेस जुए जे भुणे बाड़ु थिउ, तेस बारे बोक करण लगा। 33तेन बोलु, “हेरे, अस यरुशलेम शेहर जे घेण लगो असे, त तठि मुख्य पुजारी त धर्मशास्त्री मनखे कुआ मतलब मोउं टान्ते त मरणे दोषी कर कइ गैर यहूदी के हतेउ दी छते। 34से सोब में मखोल बणान्ते, मोउं पुठ थूकते, त चाबुके बइ मडी मडी कइ घायल कते, तोउं मार छते। पर टेके रोज बाद अउं दुबारी जी घेन्ता”।

याकूब त यूहन्ना

मत्ती 20:20-28

35तोउं जबदी कुआ याकूब त यूहन्ना तसे भेएड़ एई कइ बोलु, “ए गुरु, अस चहन्ते कि जे कुछ अस तुसी केआं मगुं, तुस असी जे करे”। 36तेन तेन्हि जे बोलु, “तुस की चहन्ते कि अउं तुं लिए करुं?” 37तेन्हि तेस जे बोलु, “अस चहन्ते कि तुं राज्य अन्तर तुं राजगद्दी जोई असी बि साते बिशुण दिए: यक जेईं देहणा कना त यक जेईं बउंआ कना।” 38यीशु तेन्हि जे बोलु, “तुस न जाणते कि तुस की मगण लगो असे? जे दुख अउं सेहणे बाड़ा असा, तुस कि सेह सकते ना; होर जीं अउं मरणे बाड़ा असा तुस कि तीं मर सकते ना?”#10:38 मूल भाषा अन्तर “जे दुख केआं भरो कटोरा अउं पीणे बाड़ा असा तुस कि पी सकते ना; होर मरणे जे अउं चुसीणे बाड़ा असा, तुस बि कइ सकते ना?” लिखो असु। #लूका 12:50 39तेन्हि तेस जे बोलु, “अस कइ सकते।” त यीशु तेन्हि जे बोलु, “जे दुख अउं सेहणे बाड़ा असा, तुस जरूर सेहन्ते; होर जीं अउं मरणे बाड़ा असा, तुस बि तिहांणि मरते। 40पर केस बि अपु देहणा त बउंआ कना बिशाणण हक मोउं केईं नेईं। ए जगाह तेन्के लिए असी जे परमेश्वरे पेहलाई चुणो असे।” 41याकूब त यूहन्ने बोके शुण कइ होरे दस चेले तेन्हि जोई नराज भोई गे। 42त यीशु से अपु भेएड़ भिए त तेन्हि जे बोलु, “तुस त जाणते कि जे मेह्‍णु पुठ राज कते, से तेन्हि पुठ जुलुम कते; त से तेन्हि पुठ अपु हक जतान्ते। 43पर तुसी बुछ तीं न भुओ लौतु, किस कि तुसी अन्तर अगर कोउं बोडा भुण चहन्ता से तुं सेवक बणे;#मत्ती 23:11; मरकुस 9:35; लूका 22:26 44होर जे कोउं तुं मुखिया बणुण चहन्ता, से सोबी के नौखर बणे। 45किस कि अउं मनखे कुआ तोउं नेईं अओ कि में सेवा करेउं। अउं तोउं अओ असा कि होरी के सेवा करुं, त सोबी मेह्‍णु पापे सज्जाई केआं बचाणे लिए अपु प्राण दिउं।”

अन्हा बरतिमाई सारा करण

मत्ती 9:27-31; 20:29-34; लूका 18:35-43

46पता, यीशु त तसे चेले यरीहो शेहर पुजे। जपल यीशु त तसे पता पता चेले होर मेह्‍णु के बोडा हुसुड़ा यरीहो शेहर केआं घेण लगे, तपल बरतिमाई नओएं यक अन्हा भिकारी, जे तिमाई कुआ थिआ, बते औत बिशो थिआ। 47से ईं शुण कइ कि नासरत ग्रांए यीशु घेण लगो असा, से हक दी दी कइ बोलुण लगा, “ए दाऊदे कोईया यीशु! मोउं पुठ दाह कर!” 48सुआ मेह्‍णु तेस डराई कइ चुप बिशाणणे कोशिश की, पर से जोरी जोरी हक देण लगा, “ए दाऊदे कोईया#10:48 यीशु सच्चे राजा दाऊदे कुआ नेओथ, पर से तसे ऊड़ी अन्तर जमो थिआ। मेह्‍णु मसीह जे “दाऊदे कुआ” बि बोतेथ।, मोउं पुठ दाह कर!” 49त यीशु रुक कइ बोलु, “अस इए भिए।” तोउं मेह्‍णु से अन्हा मेह्‍णु भिआ त तेस जे बोलु, “खड़ भो, हिम्मत कर! ए तोउ भिआण लगो असा।” 50त जे टलिड़ तेन फुलोउ थी तस फटाई कइ तिखेईं से खड़ी गा, त यीशु भेएड़ आ। 51त यीशु तेस जे बोलु, “तु मोउं केआं की चहन्ता?” अन्हे तेस जे बोलु, “ए गुरु, अउं हेरुण चहन्ता।” 52यीशु तेस जे बोलु, “गा, तेईं मोउं पुठ विश्वास किआ, तोउं त तु ठीक भुआ।” से तिखेईंए हेरण लग गा, त तसे पता पता घेण लगा।

Currently Selected:

मरकुस 10: pgg

Highlight

Copy