लूका 9

यीशु बाराह प्रतिनिधि लंघाण

मत्ती 10:5-15; मरकुस 6:7-13

1तोउं यीशु अपु बाराह चेले भिआई कइ तेन्हि सोबी कें धे दुष्ट आत्मा नशाणे त बीमारी ठीक करणे शक्ति दिती। 2त तेन से परमेश्वरे राज्य बारे प्रचार करण त बीमारी ठीक करण जे लंघाए। 3तेन तेन्हि जे बोलु, “बथ जे कुछ न नेण, न लठि, न झोड़ा, न रौठि, न रुपेई, होर न बदलण जे झिणे। 4जेस केसे गी घियेल त तेस जगाई केआं घेणे तकर तठि बिशे। 5जे कोई तुसी ना धराल त तेस ग्रां केआं घेन्त पेंत अपु खुरे तड़वाए धूड़ ठुटकी छड़े, ताकि परमेश्वर न्याय करणे वकत से तेन्के खिलाफ उगाह दियेल।”#लूका 10:4-11 6त से चेले ग्रां ग्रां घेई कइ परमेश्वरे राज्य एणे बार खुश खबर शुणाए त मेह्‍णु बीमारी केआं ठीक कते रिहे।

राजा हेरोदेसे परेशानी

मत्ती 14:1-12; मरकुस 6:14-29

7गलील राज्ये राजा हेरोदेस ई सोब बोके शुण कइ परेशान भोई गा। किस कि केनि केनि ई बोलु कि मुओ यूहन्ना दुबारी जी गो असा। 8त केनि केनि बोलु कि एलिय्याह भविष्य वक्ता काओ असा, त कुछ होर बोतेथ कि पुराणे भविष्य वक्ते बिचा कोउं यक जेईं जीओ असा। 9पर राजा हेरोदेसे बोलु, “मेईं त यूहन्ने म्युकुड़ कटवाई छो थिउ त अब ए कोउं भो जेस बारे अउं ईं बोक शुणता?” त से यीशु हेरण जे कोशिश कता रिहा।

पंज हजार मेह्‍णु खांजे खिलाण

मत्ती 14:13-21; मरकुस 6:30-44; यूहन्ना 6:1-14

10जपल से प्रतिनिधि वापिस यीशु केईं ए, त तेन्हि अपु कमे बारे बताउ। त से तेन्हि बखरे कर कइ बैतसैदा नओएं यक ग्रां घिन गा। 11जीं हुसुड़ा पता लगा त से तसे पता पता घेई गे। यीशु तेन्हि जुए खुशी जुए मिआ त परमेश्वरे राज्य बारे बोके की। होर से ठीक किए, जे बीमार थिए। 12जपल दिस ओलुण लगु त तेन्हि बारोह जेईं यीशु केईं एई कइ बोलु, “जे अत हुसुड़ा असा एन्हि लंघाई छड़े ताकि से नीड़े भेएड़े ग्राईं अन्तर घेई कइ अपु उंघणे त खाणे परबंध करियेल, किस कि इस जगाह कुछ खाण जे ना मेतु।” 13पर यीशु तेन्हि जे बोलु, “तुस अपफ एन्हि खिलाणे परबंध करे।” त तेन्हि बोलु, “असी केईं त सद पंज रौठि होर दुई मछली असी। त की कइ सकते? पर आं, अगर अस एन्हि सोबी जे खांजे खरीद कइ अण्ह सकियेल त भोई सकतु।” 14किस कि तठि सद मड़दे लगभग पंज हजार थिए। तोउं तेन अपु चेली जे बोलु, “पंझा पंझा मेह्‍णु बिशाणिण दिए।” 15तेन्हि तिरुह की त से सोब बिशाई छड़े। 16तोउं तेन से पंज रौठि त दुई मछली नी, त स्वर्गे धे हेर कइ परमेश्वरे धन्यवाद किआ, त टुकड़ेर कइ अपु चेली कें धे दिती, त बोलु कि मेह्‍णु कें धे दिए। 17त से सोब खाई-खुई रज्जि गे। त चेली बचो टुकुड़ के बाराह चाउं भरे।

पतरसे यीशु मसीह पिछाणण

मत्ती 16:13-19; मरकुस 8:27-29

18यक लिंग यीशु त तसे चेले अकेले थिए। यीशु बखरे घेई कइ प्रार्थना की। तोउं तेन तेन्हि केईआं पुछु, “मेह्‍णु में बारे की बोते?” 19तेन्हि बोलु, “केहि बोते कि तु चुसुणे बाड़ा यूहन्ना भो त होरे केहि बोते कि तु एलिय्याह भविष्य वक्ता भो। होरे केहि बोते कि पुराणे जमाने भविष्य वक्ती बुचा कोई यक दुबारी जीओ असा।”#मत्ती 14:1,2; मरकुस 6:14,15; लूका 9:7,8 20तेन तेन्हि केआं पुछु, “पर तुस में बारे की बोते?” पतरसे बोलु “तुस परमेश्वरे मसीह भो।”#यूहन्ना 6:68,69 21तपल यीशु तेन्हि जे सक्ति कइ बोलु कि इस बारे केसे जे बि ना बोलुण।

अपु मरणे बारे यीशु भविष्य वाणि

मत्ती 16:20-28; मरकुस 8:30—9:1

22तोउं यीशु तेन्हि जे बोलु, “मनखे कुआ जे अउं असा, ईं जरूरी असु कि अउं सुआ दुख सेहुं, त टजे स्याणे, मुख्य पुजारे त धर्मशास्त्री मोउं ना मानियेल त मोउं मार छड़ियेल, त टेके रोज दुबारी जीन्ता भोई घिउं।”

यीशु चेला बणणे मतलब

23तोउं यीशु सोबी जे बोलु, “अगर कोई में पता एण चहन्ता, त अपु मने मुताविक जीण छड़ दिए, त हर रोज अपु क्रूस उछिड़ कइ में पता एईए।#9:23 यीशु चेली जे “अपु क्रूस उछिणे” मतलब “यीशु पता घेणे त तसे शिच मनणे लिए मेह्‍णु के भुंजाण, दुख तकलीफ सेहण जे तेयार बिशुण” असु।#मत्ती 10:38; लूका 14:27 24किस कि जे कोउं अपु प्राण अपफ जे रखुंण चहन्ता, से तस गवाई छता, पर जे कोउं में लिए अपु प्राण देन्ता, से तेस मेई घेन्ते।#मत्ती 10:39; लूका 17:33; यूहन्ना 12:25 25अगर मेह्‍णु पूरा मतोक बि मेई घियाल, पर अपु प्राण जोखिम अन्तर छड़ाल या गवाल त तसे की फायदा असा? कुछ नेईं! 26जे कोउं मोउं केआं त में वचनी केआं लजिन्ता, त अउं मनखे कुआ जिखेईं अपु त अपु बोउए शान, होर शुचे स्वर्गेदूती के शान जोई साते दुबारी एन्ता तिखेईं तेस हेर बि लजिन्ता। 27पर अउं तुसी जे बोता कि इठि खड़ खड़ बिशो मेह्‍णु बिचा केहि ईं असे, जे जपल तकर परमेश्वरे राज्य एणे ना हेरियेल, तपल तकर ना मरते।”

यीशु रूप बदलण

मत्ती 17:1-8; मरकुस 9:2-8

28इन्हि बोकी केईआं कोई अठूं रोज बाद, से पतरस, यूहन्ना त याकूब अपफ जोई साते नी कइ प्रार्थना करुं जे यक फाट पुठ गा। 29त तठि से प्रार्थना करणे टेम तसे रूप बदली गा, त तसे झिणे बि हच्छे भोई कइ चमकुण लगे। 30त हेरे, मूसा त एलिय्याह ए दुई मेह्‍णु तस जुए बोके करुं लगे। 31ए बड़े शान जुएई केण लगो थिए। तेन्हि तस जुए तसे मरणे बारे बोके की, जे यरुशलेम शेहर अन्तर भुणे बाड़ा थी। 32पर पतरस त तसे साथी उंघो थिए। जपल से सुसुर खड़ भुए त तेन्हि यीशु शान काई त साते से दुई मेह्‍णु बि काए, जे तस जोई खड़ खड़ थिए। 33जपल से दुई जेईं तसे भेएड़ केआं घेण लगे त पतरसे यीशु जे बोलु, “हें इठि भुण खरी बोक असी। त अस इठि टाई डेरा बणान्ते; यक तोउ जे, यक मूसा जे त यक एलिय्याह जे।” तस ई पता नेओथ कि से की बोलुण लगो थिआ। 34पतरस ईं बोलुण लगो थिआ कि यक बदेए एई कइ से घट छड़े त से डर गे। 35त तेस बदेए केआं यक अवाज निथि, “ए में कुआ भो, जे मेईं चुणो असा! एसे शुणे।”#मत्ती 3:17; 12:18; मरकुस 1:11; लूका 3:22 36ईं अवाज एणे पता तठि यीशु अकेले मेईंया। जे कुछ तेन्हि तठि काओ थिउ, तसे बारे तेन्हि रोजी तेन्हि केसे जे किछ बि ना बोलु।

यीशु यक मिर्गी बीमारी बाड़ा कुआ ठीक करण

मत्ती 17:14-18; मरकुस 9:14-27

37दोका रोज, से फाट केआं एण पता, यक बोडा हुसुड़ा तेस जोई मेई। 38त हेरे, हुसुड़ा केआं यक मेह्‍णु जोरी जेईं बोलु, “ए गुरु, तुं छने कि में कुआ पुठ दाह करे, किस कि से में इकलौता कुआ असा। 39बोक ईं असु कि यक दुष्ट आत्मा तस अन्तर एन्ती त से अजगता जोरी जुओई लियार देन्ता। से तस मरोड़ रखती, जपल तकर कि तसे आसी बइ शोफे ना निस्ती, होर से लहुलुहान ना भोई घेन्ता। से तेस सुआ मुश्किल जोई छती। 40मेईं तुं चेली केईं छनेअरे किउ कि एस ठीक करे। पर तेन्हि से निसाण ना बटी।” 41यीशु बोलु, “ए अविश्वासी त हठि मेह्‍णुओ, बस करे! अउं कपल तकर तुसी जोई बिश्ता त कपल तकर तुं सेहन्ता? गा, अपु कुआ इएर अण्ह।” 42से कुआ एण ईं लगो थिआ कि दुष्ट आत्मा तस भीं फटाई कइ मरोड़ुण लगी। पर यीशु तसे अन्तरी जुठी आत्मा जड़कइ त से कुआ ठीक किआ। होर तसे बोउए धे दी छड़ा। 43तपल सम्हाई मेह्‍णु परमेश्वरे शक्ति हेर कइ हैरान भोई गे।

अपु मरणे बारे यीशु दोकी भविष्य वाणि

मत्ती 17:22-23; मरकुस 9:30-32

पर जपल सोब मेह्‍णु त सोबी कमी हेर कइ हैरान भुण लगो थिए, त तेन अपु चेली जे बोलु, 44“तुस इन्हि बोकी पुठ ध्यान दिए, किस कि मनखे कुआ मनखे हथे टोवेई घेण असा”। 45पर ए बोक तेन्के समझ अन्तर न आई। त ई बोके तेन्के दिमाख अन्तर ना आई, ताकि से ना समझ बटे। त से इन्हि बोकी के बारे तेस पुछुण हेर बि डरतेथ।

सोबी केआं बोडा कोउं?

46तोउं से चेले ई बोक पुठ अपफ बुच बेहसेईण लगे कि तेन्के बुच बोडा कोउं असा।#लूका 22:24 47पर जपल यीशु तेन्के मने भिहो बारे पता लगा त तेन यक गभुर अण्ही कइ अपु भेएड़ रखु। 48होर तेन तेन्हि जे बोलु, “जे कोई में नउ पुठ इसे ईं मठुड़ गभुर अपणान्ता से मोउं अपणान्ता, होर जे मोउं अपणान्ता से मोउं लंघाणे बाड़े बि अपणान्ता।#मत्ती 10:40; लूका 10:16; यूहन्ना 13:20 किस कि तुसी बुच जे सोबी केआं मठुड़ असा, सेईंए परमेश्वरे राज्य अन्तर बोडा असा।”

यीशु दुश्माण त मितर कोउं भो

मरकुस 9:38-40

49तिखेईं यीशु चेला यूहन्ने बोलु, “गुरुजी, असी यक मेह्‍णु तुं नओं पुठ दुष्ट आत्मा नशाणते हेरा। त असी से रोक छड़ा, किस कि से असी जुए मी कइ तें पता ना हंटता।” 50यीशु तस जे बोलु, “तस ना रोके, किस कि जे तुं बैरी नेईं, से तुं कना असा।”

यरुशलेम शेहर घेन्ते टेम यीशु कम

(9:51—19:27)

सामरिया राज्ये मेह्‍णु यीशु विरोध करण

51जपल यीशु स्वर्ग घेणे दन पूरे भुणे बाड़े थिए, त तेन यरुशलेम शेहर घेणे जे ठीक किउ। 52तेन अपु अगर कुछ मेह्‍णु लंघाए। त से सामरिया राज्ये#9:52 गलील त यहूदिया राज्य बुच जे इलाका असा तस जे सामरिया बोते। सामरिया राज्ये मेह्‍णु जे सामरी बोते। यहूदी मेह्‍णु सामरी मेह्‍णु जुठे मानतेथ होर से यक होरी हेर नफरत कतेथ। यक ग्रां पूज गे ताकि यीशु अग्रोई जे तेयारी कइ सकियेल। 53पर तठियाणि मेह्‍णु यीशु तठि एण ना दिता, किस कि से यरुशलेम शेहर जे घेण लगो थिआ। 54ई हेर कइ तसे चेले याकूब त यूहन्ने बोलु, “ए प्रभु, तुस की चहन्ते ना कि अस परमेश्वर जे ईं प्रार्थना करुं कि अम्बर केआं आग एई कइ एन्हि फुक छड़े?” 55पर यीशु पतूं जे खिरक कइ से जड़काए त बोलु, “अउं तुसी केसे प्राण नेण जे नियुक्त नेईं किओ।#9:55 मूल भाषा अन्तर “तुस ना जाणते कि तुस केसे आत्मा भिन्थ” लिखो असु। किस कि मनखे कुआ मेह्‍णु के प्राण नेण जे नेईं अओ, बल्कि प्राण बचाण जे अओ असा।” 56त से केसे होर ग्रां घेई गे।

यीशु चेले बणणे मुल

मत्ती 8:19-22

57जपल यीशु त तसे चेले बते बइ घेण लगो थिए त यक मेह्‍णु तस जे बोलु, “ए गुरु! तुस जेठि कोठि बि घेन्ते, अउं तुं पतोती एन्ता।” 58त यीशु तेस जे बोलु, “सगालि के खोपर त चड़ी चखुरु के गुल्हे असे, पर अउं जे मनखे कुआ भो, मोउं अपु मगिर नियोकाण जे बि जगाह नेईं।” 59यीशु यक होरे जे बोलु, “में पतोती आई।” पर तेन तस जे बोलु, “ए प्रभु, पेहले मोउं घेण दिए कि अउं अपु बोउए जीण मरुण कइ एऊं।”#9:59 “शयद तेस मेह्‍णु बोउ मुओरा नेईं, पर बीमार थिआ”। 60इस पुठ यीशु तस जे बोलु, “जे मरोरी के ईं असे, तेन्हि अपु मुड़दे पथण दे। पर तु गा त परमेश्वरे राज्ये बारे मेह्‍णु शुणाण दिए।”#9:60 ए मेह्‍णु शुची आत्माई बेलि दुबारी जी गो असा, ताकि से प्रभु यीशु मसीहे पतोती घियेल। यीशु मसीह तस जे बोता कि, तोउ अपु बोउ पथणे चिन्ता होरी जे छड़ दे। त में पतोती एई कइ परमेश्वरे राज्य बारे प्रचार कर। 61यक केनि होरी बि बोलु, “ए प्रभु, अउं तें पतोती एन्ता, पर पेहले मोउं अपु गीहे बाड़ी आबिश करण दिए।” 62यीशु तस जे बोलु, “जे कोउं अपु हथ हिएटुड़ पुठ रख कइ पतूं हेरता से परमेश्वरे राज्ये लेएक नेईं।”

Currently Selected:

लूका 9: pgg

Highlight

Copy