लूका 7
7
गलील राज्य अन्तर यीशु कम
(7:1—9:50)
यीशु सुबेदारे नौखर ठीक करण
मत्ती 8:5-13
1जपल तेन मेह्णु जोई सोब बोक कइ छइ त से कफरनहुम शेहर जे आ। 2तठि यक रोमी सुबेदार थिआ, जेसे यक नौखर बीमार थिआ त मरणे बाड़ा थिआ। से तस सुआ ट्यारा थिआ। 3तेन सुबेदारे यीशु बारे बोके शुणो थी। त तेन यहूदी के टजे स्याणे यीशु केईं लंघाई कइ से भिआ कि एई कइ तसे नौखर सुसुरेरिण दे। 4त से यहूदी मेह्णु यीशु केईं एई कइ हथ जोड़ुण लगे “से इस लेएक असा कि तुस तसे नौखर ठीक करे। 5किस कि से हें यहूदी जाति जुए परेम रखता त तेन असी जे यक अराधनालय बणो असा।” 6त यीशु तेन्हि जुए गा। पर जपल से तसे गीहे भेएड़ ईं पुजा त तेन सुबेदारे अपु मितरी जे ईं बोल कइ यीशु जुए मीण जे लंघाए, “ए प्रभु, हउ कष्ट ना करे, किस कि अउं अत धर्मी नेईं कि तु में गी आई। 7तोउं त अउं अपफ ना आ कि अउं तुं सामणे एई सकुं। तुस तठिआ निआंग दिए त में नौखर सुसुरी घेन्ता। 8किस कि अउं बि होरी पड्डे कम कता, त में पड्डे बि होरे सपाही असे। जपल अउं यक जेईं जे बोता कि ‘गा!’ से घेन्ता; त होरे जे बोता ‘आ!’ त से एन्ता; जपल अउं अपु नौखरी जे बोता ‘इस कम कर!’ त से तस कता।” 9ई शुण कइ यीशु हैरान भोई गा त तसे पता जतु मेह्णु अओ थिए, पतूं खिरक कइ तेन्हि जे बोलु, “अउं तुसी जे बोता कि मोउं पूरे इस्राएली मेह्णु अन्तर बि अत विश्वास करणे बाड़ा ना मेईंया।” 10पता जपल तसे मितर गी पुजे त से नौखर ठीक भोई गो थिआ।
यीशु विधवाई कुआ दुबारी जीआण
11तढ़ेया कुछ रोज अन्तर ईं, यीशु नाईने नओएं यक ग्रां जे गा। तसे चेले त मेह्णु के बोडा हुसुड़ा बि तसे पता पता गओ थिआ। 12जपल से तेस ग्रांए भेएड़ पुजा त तेन हेरु कि मेह्णु यक मुओ मेह्णु पथण जे बाहर नेण लगो थिए। से मेह्णु अपु ईये इकलौता कुआ थिआ, त तसे ई विधवा थी। बिचारी तेस जुओई ग्रांए सुआ मेह्णु थिए। 13तेस हेर कइ प्रभु दाह एई त तेन तस जे बोलु, “ना रोल!” 14तोउं तेन भेएड़ घेई कइ बमाण छुआ त कन्हा देण बाड़े रुक गे। त तेन बोलु, “ओई जवाना! अउं तोउ जे बोता, खड़ भो!” 15तिखेईंए से मुओ मेह्णु खड़ भुआ त बोक करण लग गा। त यीशु से तसे ईये धे दी छड़ा। 16ई हेर कइ सोब मेह्णु हैरान भोई गे त से परमेश्वरे गुणगान कर कइ ईं बोलुण लगे, “असी बुच यक बोडा भविष्य वक्ता खड़िए असा, त हें मदत करण जे परमेश्वर अओ असा।” 17त तसे बारे ई बोक पूरे यहूदिया त नीड़े भेएड़े इलाके#7:17 इठि पूरे यहूदिया अन्तर गलील इलाका बि असा। भेएड़ इलाके मतलब यहूदिया त गलीले बाहरी इलाका असा। अन्तर हू भोई गई।
चुसुणे बाड़े यूहन्ने यीशु केईं अपु चेले लंघाण
मत्ती 11:1-19
18इन्हि सोब बोकी के खबर यूहन्ने चेली यूहन्ने शुणाई। 19तिखेईं यूहन्ने अपु चेली बुच दुई भिआई कइ ई पुछुण जे यीशु केईं लंघाए, “कि परमेश्वरे बोलो से एणे बाड़ा तु भो ना, कि असी कोउं होरा भाड़ण?”#लूका 3:15-17 20त तेन्हि यीशु केईं एई कइ बोलु, “चुसुणे बाड़ा यूहन्ना अस तोउ केईं ई पुछुण जे लंघो असे ‘कि परमेश्वरे बोलो से एणे बाड़ा तु भो ना, कि असी कोउं होरा भाड़ण?’” 21तिखेईं यीशु सुआ बीमार मेह्णु ठीक किए, त जे दुष्ट आत्मा बेलि परेशान थिए, त अन्हे थिए से सोब ठीक कइ छड़े। 22त तेन तेन्हि जे बोलु, “जे बि तुसी हेरो त शुणो असु, घेई कइ सोब यूहन्ने जे बोलीण दिए। बोले कि अन्हे से हेरते, लटे से हंटते, कोढ़ी ठीक भोई घेन्ते, टौणे से शुणते त मरो से जीएईंते, होर जे कंगाल असे तेन्हि खुश खबरी शुणान्ते। 23होर धन्य असे से मेह्णु, जे मोउं पुठ विश्वास कते, त कदी शक ना कते।”
24जपल यूहन्ने लंघो चेले घेई गे त यीशु यूहन्ने बारे मेह्णु जे बोलुण लगा, “तुस अरुणि धार की हेरण जे गो थिए? ब्यारी बेलिए हिलतु घास हेरण जे गो थिए ना? ना! 25त फि तुस की हेरुण जे गो थिए? की तुस खरे झिणे डबो मेह्णु हेरुण जे ना? हेरे, जे खरे झिणे डबते त खरे खांते पीन्ते से राजमहल अन्तर बिश्ते। 26फि किस गो थिए? केस भविष्य वक्ता हेरण जे ना? हाँ, अउं तुसी जे बोता कि भविष्य वक्ती केआं बि बोडे हेरण जे गो थिए। 27से एईएं भो जेसे बारे धरमे कताब अन्तर लिखो असु,
‘हेर, अउं अपु दूत तें अगर अगर लंघान्ता,
जे तोउ जे बथ सुसुर जुढ़ेरता।’”
28“अउं तुसी जे बोता कि जे जिल्हाणु जमो असे, तेन्हि अन्तरा यूहन्ना केआं ज्यादा खास कोई न भो। पर परमेश्वरे राज्य अन्तर सोबी केआं मठुड़ बि यूहन्ना केआं खास असा।”
29“सोब मेह्णु त मामला नेणे बाड़े बि यूहन्ने बेलि पाणि अन्तर चुस कइ ई साबित किआ कि परमेश्वरे मेह्णु बचाणे तरीका सही असा। 30पर फरीसी त धर्मशास्त्री तसे बेलि पाणि अन्तर ना चुसी कइ हरालु कि तेन्हि परमेश्वरे योजना केआं मछोड़ा दुतो असा।”
31तोउं यीशु तेन्हि जे बोलु, “मोउं इस टेमे मेह्णु केस जोई बराबरी करीण, से केसे ईं असे? 32से बाजार अन्तर बिशो तेन्हि गभुरु केईं लगते, जे यक होरी जे हक दी कइ बोते
‘असी तोउ जे ढोंस बेईंछ बजाई, पर तु ना नचा; असी रोलो-गाश की, पर तेईं ना रोलु।’
33किस कि चुसुणे बाड़ा यूहन्ना ना रौठि खांते आ होर ना दाखरस पीन्ते आ। त तुस बोते कि तस अन्तर दुष्ट आत्मा असी। 34पर जपल मनखे कुआ खांता पीन्ता आ त तुस बोते, ‘हेरे, बोडपेटि त प्याकड़ मेह्णु, मामला नेणे बाड़े त पापी मेह्णु के मितर।’ 35तोउं बि कमी के फले बइ मेह्णु पता लगता कि परमेश्वरे ज्ञान सच्चा असा।#7:35 बुद्धि जे सच्ची असी, ए यूहन्ने त यीशु बेलि घोषणा किओ खुश खबरी के शुणणे त मानणे बाड़ी के बेलि सच ठहरती।”
फरीसी गी यक पापण जिल्हाणु माफी
36यक रोज, शमौन नोउए यक फरीसी यीशु जे धाम की। त यीशु तसे गी घेई कइ रौठि खाण जे बिठा। 37तेस ग्रांए यक पापण जिल्हाणु ई पता लगा कि फरीसी गी से रौठि खाण जे अओ असा, त तेन यक संगमरमरे बोतुल अन्तर मुश्कदार तेल अण्हा।#मत्ती 26:7; मरकुस 14:3; यूहन्ना 12:3 38त तसे भेएड़ एई कइ तसे खुरी पुठ रोलुण लगी। अपु आंखु बइ तसे खुर सैले। अपु झशुड़े बइ तसे खुर साफ की त तसे खुर घड़ी घड़ी फोकड़ियाई कइ मुश्कदार तेल ला। 39ई हेर कइ से फरीसी, जेन तस धाम किओ थी, अपु मन अन्तर सोचुण लगा, “अगर ए भविष्य वक्ता भुन्ताथ त एस पता लग घेन्ताथ कि ए जे जिल्हाणु तस छूण लगो असी ए कोउं भिन्थ त असे गुण कीं असे? किस कि ए त यक पापण असी।” 40जे से सोचुण लगो थिआ यीशु पता लग गा त तेन बोलु, “ए शमौना, मोउं तोउ जे कुछ बोलुण असु।” त तेन बोलु, “हाँ गुरु, बोलीण दिए।” 41यीशु बोलु, “केस यक लाले दुई कर्जदार थिए। यक पंज सौ दीनारे#7:41 दीनार रोमी मेह्णु के यक सिक्का असा, जेसे कीमत मजूरी के यक रोजे धिहाड़ी थी। त होरा पंझा दीनारे। 42जपल तेन्हि केईं तसे ऋण देण जे कुछ ना रेहु त तेन लाले दुहि के ऋण छड़ दुतु। त तेन्हि बुच कोउं जेईं तेस जिमदारे गुण ना बिसरीन्ता?” 43शमौने बोलु, “में हिसाब जुए त से, जेसे ज्यादा ऋण छड़ दुतो थिउ।” यीशु तस जे बोलु, “आं, तेईं ठीक बोलु।” 44त तेस जिल्हाणु कना जे खिरक कइ शमौन जे बोलु, “तु इस जिल्हाणु हेर! अउं तें गी आ, तेईं में खुर धूण जे मेन्धे पुओणि ना दुतु। पर एन अपु टीरे आंखु बइ में खुर सैले त अपु झशुड़ बइ साफ किए। 45तेईं में खुर ना बिने, पर जपल केआं अउं अओ असा, एन में खुर फोकड़िआ बन्न किओरे नेईं। 46तेईं में मगिर तेल#7:46 यहूदी मेह्णु के मेहमानी जे आबिश करणे तरीका ईं असु। से जपल मेहमान पुजतेथ त पेहले तेन्हि फोकड़िआन्तेथ, तेन्के खुर धूण जे पाणि देन्तेथ या से अपफ धोई छतेथ, तोउं तेन्के मगिर तेल लान्तेथ। ना ला, पर एनि में खुरी जुए मुश्कदार तेल ला। 47तोउं त अउं बोता कि एसे सुआ परेम जोई मोउं धराण हरालतु कि एसे सुआ पाप माफ भोई गो असे। पर जेसे धिक भइ पाप माफ भो असा, से घट परेम कता।” 48तोउं तेन तेस जिल्हाणु जे बोलु, “तें सोब पाप माफ भुए।” 49तपल जे मेह्णु तस जुए रौठि खाण बिशो थिए अपु अपु मन अन्तर सोचुण लगे कि ए कोउं भो जे पाप बि माफ कता? 50त यीशु तेस जिल्हाणु जे बोलु, “मोउं पुठ तें विश्वासे ईं तु बचाई छइ। खरी भोई कइ गा।”
Currently Selected:
लूका 7: pgg
Highlight
Share
Copy
Want to have your highlights saved across all your devices? Sign up or sign in
© 2023 (Active) Wycliffe Bible Translators, Inc. All rights reserved.
