मारकुस 1
1
बाप्टिस्मा पिक्खुबा युहान्नामि खानावाँ
(मट्टि ३:१-१२; लुका ३:१-१८; युहान्ना १:१९-२८)
1निवाँहाङ्मि पासा#१:१ एक्क हिच्चि साब्चिराबि निवाँहाङ्मि पासा लोमॆ खानावाँ माआ। येसु खिरिस्टमि बारेबि नुऎ खानावाँ गरहाङ् लिबक्। 2निवाँहाङ्मि खानावाँ लोखुबा यासाइयाऎ गरहाङ् साब्डु,
“खाङॆ, कॆ काम् पाङ्कुचा आनाबाङ् याॽलन
पाङ्हाङ्कुङ्, खोसॆ आनाम् लाम्फु मुकु।”#मालाकि ३:१
3आसास पेन्मिनिहा ठालबि एक्क याॽमिमि साम्लाऎ गर लोकु,
“पारभुमि लाम्फु चेन्चेन् मुसाम्नॆ, हाङ् खो टाऎ लाम्फु टङ्पकाम्नॆ।”#यासाइया ४०:३
4बाप्टिस्मा पिक्खुबा युहान्ना आसास पेन्मिनिहा ठालबि हिङ्वाबाङ् ऎम्पकानॆ हाङ् बाप्टिस्मा लासानॆ हाङ् निवाँहाङ्ऎ आन्नामि हिङ्वा यङ्नि पिकानि कामानुङ् खानावाँ इसे टाआ। 5हाङ् याहुडिया हाङ्टेम्बिहा नुङ् यारुसालेमबिहा चोब्न याॽमिचि खोबि खारामि। हाङ् उम्चि हिङ्वाबाङ् ऎम्पकामि, हाङ् युहान्नाबाङ् यारडान हङ्माबि बाप्टिस्मा लासामि। 6युहान्नाऎ उटामि टाङाक्बाङ् डाक्मिम्पा चे चाङ्युक्सु हाङ् मिचिक्पि साखक्मि हम्डङ् डङ्युक्सु हाङ् लुङ्खिक् हाङ् ठाॽनाम् खुड चायुक्सा। 7हाङ् खो गर कायुक्सा, “काङा डॆङ्पि एक्क चॆक्मावा नुङ्मा टामॆ पाइ, काङा ग खोम् ङारिङ्पि माङ्स हॆॽनॆ। 8कॆ आन्ना योवाऎ बाप्टिस्मा पिट्टानि, टर खोसॆ ग आन्ना सॆङ्सॆङॆ लावाऎ बाप्टिस्मा पिकानि।”
येसुऎ बाप्टिस्मा लामिम्पा
(मट्टि ३:१३-४:११; लुका ३:२१-२२; ४:१-१३)
9युहान्नाऎ आक्रक्मा खानावाँ खेम्मिॽढाङ्पा बेला येसु गालिलमि नासाराट लोमॆ ठालबाङ् टाआ हाङ् युहान्नामि हुक्बाङ् यारडान हङ्माबि बाप्टिस्मा लासु। 10खो योवाबाङ् आम्पक्मॆ अक्सि येसुऎ पारु हेम्बम्पा हाङ् सॆङ्सॆङॆ लावा खो सक्पि उक्खिरिॽवा रक्न उङ्ढाङ्पा खाङु। 11हाङ् पारुबाङ् एक्क गरक्मा साम्ला टाआ, “आना काम् नाम्नाम् पिसिम्पा पासाना, आनानुङ् काङा एट्टान चेन्चाडिङ।”
12आक्क डॆङ्पि मरक्लन सॆङ्सॆङॆ लावाऎ येसु आसास पेम्मिनिहा ठालबि लाखॆटु। 13हाङ् खो आक्कुबि रिपङ् डिनाढारि साइटानबाङ् ठाःक्सिखॆस्से पेना। आक्कुबि ठाॽनाम् पोसुचि सङ्क चुआमि, हाङ् निवाँखाटॆखुबाचिऎ खो खाङ्युक्सुचि।
येसुऎ ङा लाप्खुबा रिचि याॽमिचि सेःॽमिम्पा
(मट्टि ४:१२-२२; लुका ४:१४-१५; ५:१-११)
14ह युहान्ना सॆक्चिम्पि सॆक्ढिङ्खारा हाङ् येसु निवाँहाङ्मि नुऎ खानावाँ इसे गालिलबि खारा। 15हाङ् खोसॆ लोसु, “लः गरक्लक्न यो, निवाँहाङ्मि हाङ्डाम् मुबिॽन टाखॆडा। मसॆ ह हिङ्वाबाङ् ऎम्पकानॆ हाङ् नुऎ खानावाँबि निवाँयुङ् लॆटानॆ।”
16इॽया येसु गालिल टोम्पलिॽवामि कॆक्पि लाङ्ढुमे सिसार पाट्रुस लोमॆ सिमोन हाङ् उम् नुसा आन्डेरेयासऎ जाला कक्मे पाइमिम्पा खाङ्टकुचि, मान्ठाभनॆ खोचि ङाः लाब्खुबा लॆटाचि। 17हाङ् येसुऎ आक्खाचि लोसुचि, “डाबाचॆ, हाङ् का टिङ्ङॆचॆ, कॆ आन्चिना याॽमिचि लाप्टॆखुबा मुक्चिना।” 18मरक्लन खोचिऎ उम्चि जाला याइडाआचु हाङ् येसु टिङ्पकाचु।
19हाङ् हस मिःक्म मिउ खॆॽमार खोसॆ जाब्डियामि हिप्पा पासाचि याकुब हाङ् खोम् नुसा युहान्ना खाङ्टकुचि। खोचि हिप्पा सिङ्खङ्पि पेन्से जाला ठिःॽमे सिसाचि।
20येसुऎ मरक्लन आक्खाचि सङ्क सेःरुचि। हाङ् खोचि सङ्क उम्चि आप्पा जाब्डिया म योवाखङ्पिॽन लाङ्काम्चि नुङ् याइडाआचु, हाङ् येसु टिङ्पकाचु।
खारिॽमाङ्ऎ लाप्मिम्पा एक्क याॽमि येसुऎ नुबक्मिॽमिम्पा
(लुका ४:३१-३७)
21येसु आक्खा टिङ्खुबाचि नुङ् कफारनुहुम लोमॆ हाटाबि खारा। हाङ् मरक्लन नाचामॆ डिना याहुडिचि खोम्ठाम् खिम्पि भॆनाहाङ् चिन्पकुचि। 22खोम् खानावाँ खेमुचिहाङ् याॽमिचि आक्खॆटुचि, मान्ठाभनॆ येसुऎ मोसामि यायेॽमा चिन्खुबाचिऎर हॆॽनॆ, टर ढ्या ढुप्पाट्ट नुङ् चिनुचि। 23याहुडि याॽमिचि खोम्ठाम् खिम्पि एक्क काइसॆ खारिॽमाङ्ऎ लाॽमिम्पा याॽमि चुआ। आक्क ढ्या साम्लाऎ गर कामानुङ् याकासा, 24“ओ नासारटमि येसु, आनॆ काङ्का माङ् लॆःॽमा परक्डाचिमॆ? माङ् आना काङ्का सेस्सि टाडानॆ हॆ? आना निवाँहाङ्ऎ पाङ्हाङ्पा सॆङसॆङ्ऎ याॽमिना कामानुङ् कॆ लेःॽना।” 25टर येसुऎ आक्क खारिॽमाङ् गर कामानुङ् वोसु,
“यङ् उगॆ हाङ् ग याॽमिबाङ् खाइहाङ् इट्टॆ!” 26हाङ् आक्क खारिॽमाङ्ऎ आक्क याॽमि हुरेॽवॆ चेबु हाङ् ढ्या साम्लाबि याकामानुङ् आक्क याॽमिबाङ् आम्पका हाङ् खाइटा।
27हाङ् आक्रक्मा योम्पक् खाङुचिहाङ् चोब्न याॽमिचि आक्खॆटुचि। हाङ् टाङ्पाटाङ्पाबि गर कासामि, “हॆॽनि, ग माल? गग उम्चङ्ऎ खानावाँरे रछ। गसॆ ग ढुप्पाट्ट टिसे खारिॽमाङ्चि वोकुचि हाङ् खारिॽमाङ्चिऎ सङ्क खोम् खानावाँ खेम्कुचिटा।” 28मरक्लन येसुमि निङ् गालिल नुङ् गॆअङ्मॆअङ्हा ठालबि फुबका।
येसुऎ डिरिक् टुक्खाचि नुबक्मिॽमिम्पा
(मट्टि ८:१४-१७; लुका ४:३८-४१)
29हाङ् मरक्लन याहुडिचि खोम्ठाम् खिम्बाङ् आम्पकाहाङ् याकुब नुङ् युहान्ना चिःक्मानुङ् खो सिमोन नुङ् आन्डेरेयासमि खिम्पि खारा। 30आक्रल सिमोनमि नाम्मा डॆटॆमाऎ टुक्पम्पा लॆटा। मसॆ खो इम्चाखॆम्पा लॆटा। येसु आक्कुबि टामे अक्सि याॽमिचिऎ म खानावाँ येसु खेम्मिटुचि। 31येसु खोम् कॆक्पि खारा, हाङ् उम् हुक्पि लाबुहाङ् येप्पक्मिट्टु। खो डॆटॆमा याइटु हाङ् खोसॆ खोचि चामा डुङ्मा टङ्पिटुचि।
32आक्क डिना नाम् डाखाराहाङ् याॽमिचिऎ चोब्न टुक्खाचि हाङ् खारिॽमाङ्ऎ लाप्मिम्पाचि येसुबि लाटॆटुचि। 33हाङ् हाटाबिहा चोब्न याॽमिचि लम्भॆरॆङ्मा गॆअङ्मॆअङ् खोम्टि खारामि। 34येसुऎ डिरिक् खालाह टुक्मावाऎ टुगुक्मिहा याॽमिचि नुबक्मिट्टुचि। हाङ् डिरिक् याॽमिचिबाङ् खारिॽमाङ्चि लाबकुचि। येसु आसार कामानुङ् आक्खा खारिॽमाङ्चिऎ लेमिम्पासॆ येसुऎ खोचि माङ्स यामुमा मापिट्टुचि।
येसुऎ गालिलबि खानावाँ चिन्मिम्पा
(लुका ४:४२-४४)
35वेन्डाक् लाम्पॆ नाम्स लिमा याॽलन येसु पगाहाङ् आसास माआमिहा ठालबि खारा, हाङ् पारठाना लॆटा। 36हाङ् सिमोन नुङ् खोम् लाङ्कम्चि खो यक्सि खारामि। 37खोचिऎ येसु खाङ्टकुचि हाङ् लोसुचि, “चोब्नऎ आना यक्मे पाइमि।” 38येसुऎ आक्खाचि लोसुचि, “कानि होइढा गाँवाँबि सङ्क खारियॆ। कॆ होइढा ठवाँबि सङ्क नुऎ खानावाँ खेम्मिॽमा लॆॽमि, मान्ठाभनॆ का आक्कम् लागिन टाडिङ।” 39हाङ् खो गालिलबिहा चोब्न ठालबिहा याहुडिचि खोम्ठाम् खिम्पि खानावाँ खेम्मिसे हाङ् खारिॽमाङ्चि लाबक्से वाइसा।
साखक्मि टुक्मावाऎ लाप्मिम्पा याॽमि नुबक्मिम्पा
(मट्टि ८:१-४; लुका ५:१२-१६)
40साखक्मि टुक्मावाऎ लाप्मिम्पा एक्क याॽमि येसुबि टाआहाङ् हुहु पोप्से लोसु, “आनॆ निवाँ टिसुना हाङ्ग काङा नुबक्मिॽहिङाना।”#१:४० येसुमि लःबि सॆङ्सॆङॆ आलिमिम्पा याॽमि कामानुङ् मिन्युक्सुचि 41गर लोमिम्पा येसुऎ खेमुहाङ् आक्क याॽमि नाम्नाम् पिसिॽमानुङ् लोसु, “कॆ आना नुबक्मिम्पा खाङ्मा मिन्ना, आना नुबक्खारॆ।” 42आक्रलन खो आक्क साखक्मि टुक्मावाऎ याइटु हाङ् खो नुबक्खारा।
43हाङ् येसुऎ मरक्लन आक्क गर लोमानुङ् पाङ्हाङ्इट्टु, 44“खाङॆ, ग खानावाँ आनॆ आसास आलोसॆचॆ। टर याटाङ्पाबि खारॆहाङ् खाङ्मिटॆ। हाङ् मोसाऎ लोमिम्पा रक्न सङ्टिसॆ। हाङ् आना सॆङ्सॆङॆ लिमिम्पा खानावाँमि चुमॆक्सङ् पिट्टॆ।”
45टर आक्क याॽमि खाराहाङ् चोब्न ठालबि खो नुबक्मिम्पा खानावाँ खेम्मिटुचि। मसॆ ओइर याॽमिचि खोम् गॆअङ्मॆअङ् खोम्टि खारामि। मसॆ येसु हाटाबि नुःर माभॆन्हि। हाङ् खो आसास माआमिहा ठालबि खारा, हाङ् याॽमिचि खोबि गॆअङ्मॆअङ्बाङ् खोम्टि खॆॽयुक्सामि।
Currently Selected:
मारकुस 1: LBR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
