मट्टि 6
6
आचुखुबाचि पिॽमा लॆःॽमि
1“नुःर पेनानॆ, याॽमिचि खाङ्मिॽमाम् लागि आन्नॆ निवाँनेन् योम्पक् आयिगानॆ। हॆॽनॆ हाङ्ग आन्नॆ पारुबिऎ आपाबाङ् माङ्स नाम्याक् टक्चाआम्निनि।
2“मसॆ पाबुऎ ठका आन्नॆ पिॽमार हुन्नहा याॽमिचिऎर म पिॽमिम्पा खानावाँ याहुडिचि खोम्ठाम् खिम्पि हाङ् फाॽलाम्पि आफुटिटाम्नॆ। चाइबान कॆ आन्ना लोकानि, खोचिऎ उम्चि नाम्याक् टक्चाखॆडुचि। 3टर पाबुक्मिहा याॽमिचि पिॽमार चुप्ठिङ् हुगॆ पिॽमिम्पा ठका बॆङ्सिङ् हुगॆ आलेटकुर। 4मसॆ खुनिङ्म पिट्टॆ हाङ् खुनिङ्म खाङ्टखुबॆ आम् निवाँहाङ् आपाऎ आना नाम्याक्पि।”
पारठाना लॆःॽमॆ खानावाँ
(लुका ११:२-४)
5“आन्ना पारठाना लॆःॽमार हुन्नहा याॽमिचिर आलॆटानॆ, मान्ठाभनॆ खोचि ग याॽमिचिऎ खाङ्टॽङामिर मिन्मानुङ् येप्से याहुडिचि खोम्ठाम् खिम्पि हाङ् फाॽलाम्पि पारठाना लॆःॽमा मिनुक्मि। चाइबान कॆ आन्ना लोकानि, खोचिऎ उम्चि नाम्यक् टक्चाखॆडुचि। 6टर आना चाइ पारठाना लॆःॽमार खिम् हङ्सिॽयु भॆनॆ हाङ् लम्भॆरॆङ्मा सॆक्ठाङ्सॆ हाङ् खाङ्मुनॆ आम् निवाँहाङ् आपा पारठाना लॆटॆ। हाङ् खाङ्मुनॆ ठका स खाङ्टखुबा आम् निवाँहाङ् आपॆ आना नाम्याक् पि।”
7“आन्ना होइढा हॆॽनिबारेक्चिर हुन्न टक्भॆहा टक्भॆहा पारठाना आलॆटानॆ। खोचि ग टक्भॆहा टक्भॆहा पारठाना लॆःॽमार रे उम्चि निवाँहाङ्ऎ खेम्पिकि कामानुङ् मिनुक्मि। 8मसॆ आन्ना चाइ आक्खाचिर आलिसानॆ, मान्ठाभनॆ, आन्नॆ खोनुङ् ङाग्माबाङ् याॽलन आन्ना माङ् पाबुकानिहा लोमॆ खानावाँ आन्नामि निवाँहाङ् आपॆ लेकु। 9मसॆ आन्ना चाइ गरहाङ् पारठाना लॆटानॆ,
“पारुबि पेन्खुबा कानिम् आपा,
“आनाम् निङ् सॆङ्सॆङॆ लिर।
10“आनाम् हाङ्डाम् टार,
“आनाम् निवाँ पारुबि रक्न ग बाखाटेम्पि स टङ्ल।
11“डिनाहुँ काङ्कामि चामा आयु स पिच्चिमॆ,
12“काङ्कॆ मान्टहाङ् काङ्का हिङ्वा लॆखुबाचि यङ्निडुङ्का,
“मरहाङ्न काङ्कामि हिङ्वा यङ्निपिच्चिमॆ।
13“काङ्का ठाःक्माबि आसिॽमिच्चिमॆ,
“टर साइटानबाङ् फाक्चिमॆ। मान्ठाभनॆ हाङ्डाम्, चॆक्मावा हाङ् निङ्लावा हानाम्स आनाम्न। आमेन।#६:१३ ग “मान्ठाभनॆ हाङ्डाम्, चॆक्मावा हाङ् निङ्लावा हानाम्स आनाम्न” लोमॆ खानावाँ चोब्बाङ् याॽलहा साब्चिराबि माआ। टर डॆङ्पि म येट्टिम्पा रेम। ”
14“आन्ना काइर लॆसे हिङ्वा लॆखुबा याॽमिचि आन्नॆ हिङ्वा यङ्निटाम्नि हाङ्ग, पारुबि चुऎ आन्नामि आपाऎ सङ्क आन्ना यङ्निकानि। 15टर आन्नॆ याॽमिचि यङ्निटाम्चिनि हाङ्ग आन्नामि आपाऎ सङ्क यङ्निटानिनि।”
साक्नेॽमॆ खानावाँ
16“आन्नॆ साक्नेॽमार हुन्नहा याॽमिचिर ङाचिक् सिङ्किकि आमुसाम्नॆ, मान्ठाभनॆ खोचि ग साक्नेॽमिम्पा खानावाँ याॽमिचि खाङ्मिसि उम्चि ङाचिक् सिङ्किकि मुकुचि। चाइबान कॆ आन्ना लोकानि, खोचिऎ टक्चामॆ नाम्याक् टक्चाखॆडुचि। 17टर आन्ना चाइ साक्नेॽमार टाङ्पाम् निङ्टवाँबि केवा सिरानॆ हाङ् ङाचिक् सगानॆ। 18मसॆ आनॆ साक्नेॽमिम्पा याॽमिचिऎ ऎखाङ्टकुचिर, टर खाङ्मुनॆ आनाम् निवाँहाङ् आपाऎ खाङ्टकुर हाङ् खुनिङ्म खाङ्टखुबा आनाम् निवाँहाङ् आपाऎ नाम्याक् पिॽल।
पारुबि खोम्मा लॆऎ चासुम्
(लुका १२:३३-३६; १६:१३)
19“आन्नॆ टाङ्पाम् लागि बाखाटेम्पि चासुम् आखोमाम्नॆ। गुबि ग सिङ्किपाऎ चाकु हाङ् याम्खॆसे खॆ हाङ् खुसुबाङ्ऎ खिम् योकुहाङ् खुफॆकु। 20टाङ्पाम् लागि पारुबि चासुम् खोमानॆ। आक्कुबि सिङ्किपाऎ चाउनि, यासयाम्खॆटुनि हाङ् खुसुबाङ्ऎ स खुसुनि। 21मान्ठाभनॆ हाबि आनामि चासुम् चु, आक्कुब्न आनाम् निवाँ सङ्क लि।
22“सालुङ्मि ओप्लिङ् मिक् रेम। मसॆ आनाम् मिक् नुऎ लॆ हाङ्ग आम् चोब्न सालुङ् हा।#६:२२ काम्नुऎ मिक् लोमिम्पा चाइ याहुडिचिम् चालाना रक्न काम्नुऎ निवाँ नुङ् होइढा याॽमिचि खाङ्माचिहा आठावा पिॽमाचिहा रेम। 23टर आनाम् मिक् नुऎ लॆःॽनि हाङ्ग, आम् चोब्न सालुङ् माइऎ लि। गरहाङ्न आना हङ्सिॽयु चुऎ ओप्लिङ् सिखारा हाङ्ग एट्टान माॽयाक्ट लि!
24“आसॆस हिप्पा टुङ्घङ्पामि योम्पक् मुहिसुनि। हॆॽनॆ हाङ्ग खोसॆ एक्क सिच्चाकु हाङ् होइक चाइ नाम्नाम् पिसिकु। एक्कसॆ लोमिम्पा खेम्कु हाङ् होइकसॆ लोमिम्पा चाइ खेमुनि। मरहाङ्न आन्नॆ निवाँहाङ् नुङ् चासुम् हिच्चिम्न योम्पक् मुहिसाम्निनि।
निवाँ यामुमॆ खानावाँ
(लुका १२:२२-३१)
25“मसॆ कॆ आन्ना लोकानि, हिङ्चामाम् लागि माङ् चामॆ हाङ् डुङ्मॆ हाङ् सालुङ् माङ्ऎ डॆक्मॆ मिन्मानुङ् निवाँ आफॆरानॆ। माल हिङ्खामा चामाठकाबाङ् हाङ् सालुङ् चेबाङ् ढ्या हॆॽनॆ? 26सवाँचि खाङाम्चिनॆ, आक्खाचि रोपा सङ्क लिःॽमिनि, चरुङ् सङ्क खोम्मिनि ना बॆङ्टवाँप्न खोमुकुचि। हाङ्स पारुबिऎ आन्नामि आपॆ खोचि चामा पिकुचि। माल् आन्ना आक्खा सवाँचिबाङ् डिरिक् योम्पक् पिक्खुबा लॆटानिनिहॆ? 27निवाँ यामुकानि हाङ् आन्नॆ आसॆ आम्नि हिङ्चामॆ डिना इॽयाक् येप्हिकाम्नॆ?
28“हाङ् माङ् चाङ्मॆ कामानुङ् आन्ना मान्ठा निवाँ यामुकानिहा? रोपाबिहा लिलि बुङ् खाङाम्नॆ, आक्खा बुङ् मान्टहाङ् पुःक्मिहा। खोचि योम्पक् स मुमिनि हाङ् चे स डाक्मिनि। 29टर कॆ आन्ना लोकानि, सोलोमान हाङ् मरऎ चासुम्टाङ्पा लॆटा हाङ्स खो आक्खा लिलिबुङ्बाङ् एक्क र स माचाक्हि। 30आइ बॆक्खुबा हाङ् वेन्डा मिःबि कहाङ्मॆ याॽवा टा निवाँहाङ्ऎ गरढारि चागुकु हाङ्ग खोसॆ आन्ना चाङ्मॆ चे पिट्टानिनि हॆ? खोइर आन्नामि ढ्या निवाँयुङ्?
31“मसॆ माङ् चामॆ, डुङ्मॆ हाङ् चाङ्मॆ कामानुङ् निवाँ आयामुसानॆ। 32मान्ठाभनॆ निवाँयुङ् आलॆखुबाचिऎ रे आक्रहाङ् निवाँ यामुक्मि। इघा चोब्न ठका आन्ना पाबुकानि कामानुङ् आम्नि पारुऎबिऎ आपॆ लेकु। 33टर याॽल निवाँहाङ्मि हाङ्डाम् हाङ् निवाँनेन् खानावाँबि निवाँ टिसानॆ हाङ् इघा चोब्न ठःका आन्नामि लागि येप्टिबि। 34मसॆ वेन्डाऎमि लागि निवाँ आफॆरानॆ, मान्ठाभनॆ वेन्डाऎ डिनामि लागि खोसॆॽन निवाँ यामुकु। आयुऎ डुखा आयुमि लागि खॆःॽल चु।”
Currently Selected:
मट्टि 6: LBR
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society