मट्टि 28
28
येसु सिखॆम्पाबाङ् हिङ्पॽमिम्पा
(मारकुस १६:१-११; लुका २४:१-१२; युहान्ना २०:१-१८)
1नाचामॆ डिना लुक्खारा नाम्लेट्टामि नाम्समाक्मि मारियम माग्डालिनि हाङ् होइक मारियम येसुमि येःॽमा खाङ्सि खाराचि। 2मरक्लन आक्कुबि ढ्या लुग्डिमा खारा, मान्ठाभनॆ पारभु निवाँहाङ्मि एक्क निवाँखाटॆखुबा पारुबाङ् उक्साहाङ् येःॽमाबि खाराहाङ् आक्कुबिऎ लुङ्कॽवा लाराङ्सु हाङ् आक्क सक्पि पेना। 3उम् ङारिङ् नाम्टुरुङ्मार हाङ् चे चाइ हिउर बिॽयाक्ट लॆटा। 4हाङ् येःॽमा हुङ्खुबाचि चाइ किसिमावॆ यङ्पकामि हाङ् सिखॆम्पा याॽमिर लिसामि।
5टर निवाँखाटॆखुबाऎ आक्खा मेॽनुङ्माचि लोसुचि, “ऎकिसिआनॆ, मान्ठाभनॆ कॆ लेकुङ्, कुरुसाबि सेॽमिम्पा येसु आन्नॆ यक्मे पाइकाम्नि। 6टर खो गुबि माआ। खो ग खोसॆ लोसिन्टक्न हिङ्पखॆडा। टाआनॆ हाङ् खो युङ्मिम्पा ठाल खाङाम्नॆ। 7ह सॆॽलॽन खारानॆ खोम् टिङ्खुबाचि गर लोसाम्नॆ, ‘येसु ग सिखॆमिम्पाबाङ् हिङ्पखॆडा। हाङ् आन्नाबाङ् याॽलन गालिलबि खॆॽमॆ पाइ हाङ् आन्नॆ खो आक्कुब्न खाङ्टकाम्नि।’ कॆ आन्ना गरटे लोकानि।”
8आक्खा मेॽनुङ्माचि किसुकिसिआमि हाङ् एट्टान चेसुचेन्चाआमि। हाङ् मरक्लन ग खानावाँ टिङ्खुबाचि खेम्मिॽमाम् लागि येःॽमाबाङ् हिरिरि पिन्खारामि।
9आक्खाचि खॆॽमॆ पाइमार येसुऎ खोचि चुबुचि हाङ् लोसुचि, “आन्ना स्यामिकानि!” हाङ् खोचि येसुबि टाआमि हाङ् खोम् लाङ्पि डिन्चासे खोम् निङ् ठेरुचि। 10हाङ् येसुऎ आक्खाचि लोसुचि, “ऎकिसिआनॆ, खारानॆहाङ् काम् टिङ्खुबाचि गालिलबि खारानॆ कामानुङ् लोसाम्चिनॆ। आक्कुबि खोचिऎ काङा खाङ्टःॽङामि।”
येःॽमा हुङ्खुबाचिऎ टॆःॽमिम्पा खानावाँ
11आक्खा मेॽनुङ्मा खॆॽमॆ पाइटामिर हाङ् येःॽमा हुङ्खुबा एक्क हिप्पा याॽमिचि सङ्क हाटाबि खारामि हाङ् आक्कुबि लिमिम्पा चोब्न खानावाँ ढ्या याटाङ्पाचि खेम्मिटुचिमि। 12हाङ् ढ्या याटाङ्पाचि होइढा टुङ्घङ्पाचि नुङ् “ह माङ् लॆःॽमॆ?” कामानुङ् खानावाँ इसामि। हाङ् खोचिऎ टिलिङ्गाचि डिरिक् याङ् पिट्टुचि 13हाङ् लोसुचि “आन्नॆ ‘काङ्का युटा इम्टिखॆॽमार खोम् टिङ्खुबाचि टाआमिहाङ् सिच्चि खुफॆडुचि’ कामानुङ् लोमान लॆ 14रोमि टुङ्घङ्पाऎ ग खानावाँ वाप्टकु हाङ्स काङ्कॆ खुनिङ् खानावाँ टङ्इकुङ्का। आन्ना किसिमा पाब्नि।” 15मसॆ टिलिङ्गाचिऎ सङ्क याङ् लासुचि हाङ् ढ्या याटाङ्पाचिऎ लोसिन्टक्न कासामि। हाङ् आइढारि सङ्क याहुडिचिम् लुम्पि ग खानावाँ फुसेखॆडा।
येसु टिङ्खुबाचि नुङ् खाङ्मुडॆ
(मारकुस १६:१४-१८; लुका २४:३६-४९; युहान्ना २०:१९-२३)
16हाङ् एपङ्ऎ टिङ्खुबाचि येसुऎ खारानॆ कामानुङ् लोमिम्पा गालिलबिऎ एक्क पङ्पङमाबि खारामि। 17खोचिऎ येसु खाङ्टक्मा अक्सि लाङ्पि स्यामिटुचि, टर ऎॽवाचिऎ चाइ येसुन रु हॆॽनॆ मिनामि। 18हाङ् येसु टाआहाङ् लोसुचि, “निवाँहाङ्ऎ काङा पारु नुङ् बाखाटेम्मि चोब्न ढुप्पाट्ट पिडिङ। 19मसॆ आन्ना खारानॆ हाङ् चोब्न याॽमिचि काम् टिङ्खुबाचि मुसाम्चिनॆ। हाङ् आक्खाचि आपा, पासा नुङ् सॆङ्सॆङॆ लावामि निङ्पि बाप्टिस्मा पिट्टाम्चिनॆ। 20हाङ् कॆ आन्ना लोमिम्पा चोब्न खानावाँ आक्खाचि लॆःॽमा चिनाम्चिनॆ। खाङाम्नॆ, चाइबान काङा आन्नानुङ् बाखाटेम् मालुक्खॆॽरढारि लिःॽङा।”
Currently Selected:
मट्टि 28: LBR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
