मट्टि 22
22
भ्यामि भोजा
(लुका १४:१५-२४)
1हाङ् येसुऎ फेरि आक्खाचि काठाबि लोसुचि, 2“पारुमि हाङ्डाम् मान्टक्मार लोमॆ खानावाँ एक्क हाङ् नुङ् ङेप्हि खोसॆ टाङ्पामि पासामि भ्यामि ढ्या भोजा टिकु। 3हाङ् आक्क हाङ्ऎ भ्याबि सेःॽमिम्पा याॽमिचि सेःॽमाम् लागि खोम् योम्पक् मुखुबाचि पाहाङ्सुचि। टर आक्खा याॽमिचिऎ डाप्मॆ निवाँ मामुसुचि। 4हाङ् फेरि खोसॆ होइढा योम्पक् मुखुबाचि गर लोमानुङ् पाङ्हाङ्सुचि, ‘सेःॽमिम्पा याॽमिचि गर लोसाम्चिनॆ, कॆ काम् भोजा परःक्सिडुङ। काम् सावाँचि याम्नुहा याम्नुहा पोसुचि सेडुङ। चोब्न ठका परःक्सिडा। ह भ्या चासि डाबानॆ।’ 5टर आक्खा सेःॽमिम्पा टाबाङ्चिऎ माखेमिन्ट लॆमानुङ् उम्चि योम्पक् मुसि एक्क उम् रोपाबि हाङ् होइक चाइ बेप्पाराबि खाइटा। 6हाङ् होइढाचिऎ चाइ हाङ्मि योम्पक् मुखुबाचिन लाबुचि हाङ् ङेसिमा लुलु मुसुचि हाङ् सेइटुचिमि। 7आक्क हाङ् एट्टान सिर्डे याक्चाउ हाङ् उम् टिलिङ्गाचि पाङ्हाङ्सुचि खोम् योम्पक् मुखुबाचि सेक्खुबाचि सेॽमिटुचिमि हाङ् उम्चि हाटा मिऎ हिड्ढाङ् पिट्टुचि।
8“आक्क डॆङ्पि खोसॆ खोम् योम्पक् मुखुबाचि लोसुचि, ‘भोजा ग परःक्सिडा, टर सेःॽमिम्पाचि भोजाबि टामा माखॆन्चोउचि। 9मसॆ हाटाबिहा फाॽलाम्पि खारानॆ हाङ् आसा आसा भॆट्टकाम्नि खोचि भोजाबि सेःॽलापाम्चिनॆ।’ 10हाङ् योम्पक् मुखुबाचि लाम्फुबि खारामि हाङ् खोचिऎ चुप्मिम्पा चोब्न खालाह काम्नुहा नुङ् काइसा खोम्टॆटुचिमि। हाङ् भोजा चामॆ खिम् टाबाङ्चिऎ चेप्खॆटु।
11“टर हाङ् टाबाङ्चि खाङ्मा कामानुङ् हङ्सिॽयु भॆन्मार खोसॆ आक्कुबि एक्क याॽमिऎ भ्याबि चाङ्मा लॆऎ चेन माचाङ्मिम्पा खाङ्टकु। 12हाङ्ऎ आक्क याॽमि सिमु, ‘लाङ्काम्, आना मान्टक्ल भ्यामि चेन मॆचाङ्रे गुबि डाबानॆ?’ आक्क याॽमि खानावाँ मॆड्डिङ् लिसा। 13मसॆ हाङ्ऎ योम्पक् मुखुबाचि लोसुचि, ‘इग याॽमिमि लाङ् हुक् ठुबाम्नॆहाङ् बाहिरा गुरढुम्पि कक्हाङ्साम्नॆ, आक्कुबि याॽमिचि हाबुक्मिहाङ् कॆङ् यिःगुक्मि’।”
14हाङ् येसुऎ लोसुचि, “मान्ठाभनॆ सेःॽमिम्पा याॽमिचि डिरिक् चुक्मि, टर सॆःक्मिम्पाचि चाइ मिःक्म टेः लॆकुचि।”
यावॆङ्ग फङ्मॆ खानावाँ
(मारकुस १२:१३-१७; लुका २०:२०-२६)
15हाङ् फारिसिचि खारामिहाङ् येसुमि खोम् खानावाँबिन मान्टहाङ् फोप्सिमॆ कामानुङ खानावाँ टङामि। 16हाङ् खोचिऎ खोचिम् टिङ्खुबाचि हेरोडमि याॽमिचि नुङ् टङ्से येसुबि पाङ्हाङसुचि। खोचि येसुबि टाआमिहाङ् लोसुचि, “चिन्खुबो, काङ्कॆ लेकुङ्का आना निवाँयुङ्मा लॆःॽना हाङ् चाइबान याॽमिचि निवाँहाङ्मि खानावाँ नुःर चिनुकुचिना। आना आसानुङ्स किसिनानि मान्ठाभनॆ आनॆ चोब्न याॽमिचि एक्कन खाङ्कुचिना। 17ह काङ्का लोचिमॆ, मोसामि यायेॽमा रक्न रोमि ढ्या हाङ् काइसार यावॆङ्ग फङ्मा नुऎ रु फॆन्नॆ?” 18टर येसुऎ आक्खाचिम् काइसॆ निवाँ वाप्टकुहाङ् लोसुचि, “ओ आन्ना हुन्नहा याॽमिचि, आन्नॆ काङा मान्ठा ठागुक्ङानिहा? 19यावॆङ्ग फङ्मॆ एक्क ढॆक्का याङ् काङा खाङ्मिङानॆ।” हाङ् आक्खा याॽमिचिऎ खो एक्क ढॆक्का याङ् लाटॆबिट्टुचि। 20हाङ् खोसॆ आक्खाचि सिमुचि, “गुबि आसाम् लायुङ् नुङ् निङ् डुःक्डॆ?” 21खोचिऎ लोसुचि, “काइसारमि” हाङ् येसुऎ लोसुचि, “आक्रहाङ्ग काइसारमि ठका काइसारन पिट्टाम्नॆ, हाङ् निवाँहाङ्मि ठका निवाँहाङ्न पिट्टाम्नॆ।” 22येसुमि गरक्मा खानावाँ खेमुचिहाङ् खोचि आक्टिखारामि हाङ् आक्कबाङ् खाइटामि।
सिखॆमिम्पाबाङ् हिङ्पॽमॆ खानावाँ
(मारकुस १२:१८-२७; लुका २०:२७-४०)
23म डिनान एक्क हिप्पा साडुकिचि येसुबि टाआमि। साडुकि लोमाहा याॽमिचिऎ चाइ याॽमि सिखॆमिम्पाबाङ् हिङ्पॽनि लोमॆ खानावाँबि निवाँयुङ् लॆःॽमि। हाङ् खोचिऎ येसु सिमुचि, 24“चिन्खुबो, मोसाऎ गरक्मा खानावाँ इडु, बुबुमि चाचा मालिरे खो सिखारा हाङ्ग उम् नुसाऎ म लाङ्मिॽमा भ्या लॆःॽमा लॆ हाङ् बुबुमि लागि चाचा मुमा लॆ।#यायेॽमा २५:५-६ 25ह कानिम् लुम्पि वाङ्चि बुबुनुसाचि चुआमि। टुम्मिऎ भ्या लॆटुहाङ चाचा मालिरे खो सिखारा। हाङ् उम् सारुम्पा नुसाऎ लाङ्मिॽमा किॽना भ्या लॆटु। 26टर खो सङ्क चाचा मालिरे सिखारा। हाङ् उम् साइला नुसाऎ किॽना लाखॆटु हाङ् गरहाङ्न वाङ्चि बुबुनुसाचिऎन भ्या लॆटुचि, टर चाचा मालिरे चोब्न सिखारामि। 27आक्खाचि चोब्न सिखारामिहाङ् डॆङ्पि आक्क मेॽनुङ्मा सङ्क सिखारा। 28मसॆ सिखॆम्पाबाङ् हिङ्पमिर आक्क मेॽनुङ्मा आक्खा वाङ्चि हङ्सिबि आसाम् खिम्टाङ्मा लिऎ? मान्ठाभनॆ चोब्न वाङ्चि बुबुनुसाचिऎ आक्क मेॽनुङ्मा भ्या लॆःॽडुचि।”
29येसुऎ आक्खा याॽमिचि लोसुचि, “आन्नॆ गमि बारेबि माङ्स लेसाम्निनि, मान्ठाभनॆ निवाँनेन् साब्चिराऎ लोमा यकुवॆ खानावाँ हाङ् निवाँहाङ्मि चॆक्मावा लेसाम्निनि। 30मान्ठाभनॆ सिखॆम्पाबाङ् हिङ्पमिहाङ् भ्या लॆःॽमॆ हाङ् लॆपिॽमॆ योम्पक्न लिनि। आक्खाचि चोब्न पारुबिऎ निवाँखाटॆखुबाचि रक्मान लिःक्मि 31टर सिखॆम्पाबाङ् हिङ्पम्पाचिम् बारेबि निवाँहाङ्ऎ गर लोमिम्पा खानावाँ आन्नॆ मापाढालॆटिटाम्नॆ? 32‘काङा आबाराहाममि निवाँहाङ् इसाहाकमि निवाँहाङ् नुङ् याकुबमि निवाँहाङ्ङा यो।’#पारास्ठान ३:६ खो सिखॆम्पाचिम् निवाँहाङ् हॆॽनॆ टर हिङ्चाक्मिहाचिम् निवाँहाङ्ङा।”#२२:३२ गसॆ लोमिम्पा चाइ सिःखॆम्पा याॽमिचि खो निवाँहाङ् लिनि आठावा हॆॽनि लोमिम्पा चाइ हॆॽनॆ, टर खोम् लागि याॽमिचि हानाम्स हिङ्चाढाङ्मि लोमिम्पा यो। 33खोम् खानावाँ खेमुचिहाङ् याॽमिचि आक्खॆटुचि।
चोब्बाङ् ढ्या खानावाँ
(मारकुस १२:२८-३४; लुका १०:२५-२८)
34येसुऎ साडुकिचि यङ् उप्खॆमिट्टुचि लोमॆ खानावाँ खेमुचिहाङ् फारिसिचि खोम्टाआमि हाङ् खोबि टाआमि। 35हाङ् खोचिबाङ् यायेॽमा लेक्खुबा एक्कसॆ ठाःक्मॆ निवाँऎ येसु एक्क खानावाँ सिमु, 36“चिन्खुबो, मोसामि यायेॽमाबि चोब्बाङ् ढ्या खानावाँ चाइ हाम्पॆर?” 37खोसॆ खानावाँ ऎन्पिटु, “ ‘आनॆ पारभु आनाम् निवाँहाङ् आम् चोब्न लावाऎ, चोब्न सक्माऎ हाङ् चोब्न निवाँऎ नाम्नाम् पिस्सिटॆ।’#यायेॽमा ६:५ 38गन चोब्बाङ् याॽलऎ हाङ् ढ्या खानावाँ रेम। 39हाङ् होइक सङ्क आक्रक्मान लॆ, ‘आनॆ आम् खिम् नेन्टाङ्हाचि टाङ्पा रक्न नाम्नाम् पिसिमा लॆ।’#लेबि १९:१८ 40मोसामि चोब्न यायेॽमा हाङ् निवाँहाङ्मि खानावाँ लोखुबाचिऎ लोमिम्पा खानावाँमि साम् चाइ इघा हिच्चि खानावाँन।”
खिरिस्टमि खानावाँ
(मारकुस १२:३५-३७; लुका २०:४१-४४)
41हाङ् येसुऎ खोम्टि खॆडामिहा फारिसिचि सिमुचि, 42“आन्ना खिरिस्टमि बारेबि माङ् मिनुकानिहा? खो आसाम् पासार?” खोचिऎ खानावाँ ऎम्पिटुचि, “खो डाउडमि पासा रेम।” 43खोसॆ आक्खाचि लोसुचि, “आक्रहाङ्ग लावाबाङ् पाङ्नुमा टक्चामानुङ् मान्टक्ल डाउडऎ खो ‘पारभु’ कामानुङ् लोसुवॆ? मान्ठाभनॆ डाउडऎ लोकु,
44‘पारभु निवाँहाङ्ऎ काम् पारभु लोसु,
कॆ आना सिच्चोखुबाचि आनाम् लाङ्पि आसिॽमिॽलढारि,
आना काम् चुप्ठिङ् हुक् पोट्टा पेनॆ।’#खोम्मिम्पासाम् ११०:१
45“गरहाङ् डाउडऎ खो ‘पारभु’ लोकु हाङ्ग मान्टक्ल खो डाउडमि पासा लिऎ?” 46टर आसॆस एक्क खानावाँ सङ्क माऎन्हिसुचि हाङ् आक्क डिनाबाङ् आसॆस फेरि येसु खानावाँ सिम्मॆ निवाँ मामुहिसुचि।
Currently Selected:
मट्टि 22: LBR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
