मट्टि 14
14
बाप्टिस्मा पिक्खुबा युहान्ना सेॽमिम्पा
(मारकुस ६:१४-२९; लुका ९:७-९)
1आक्रल गालिलबिऎ हाङ् हेरोड एन्टिपासऎ येसुमि बारेबि खानावाँ खेमु। 2हाङ् खोम् खुॽमाबि योम्पक् मुखुबाचि लोसुचि, “खो बाप्टिस्मा पिक्खुबा युहान्नान। खो सिखॆमिम्पाबाङ् हिङ्पकॆ रछ। मसॆ चॆक्मावा नुङ्मा योम्पक् यिगुक्।”
3मान्ठाभनॆ हेरोडऎ उम् नुसा फिलिपमि खिम्टाङ्मा हेरोडियासमि कारानऎ युहान्ना लाप्से ठुॽमानुङ सॆक्चिम्पि सॆक्ढाङ्मिम्पा लॆटु। 4मान्ठाभनॆ युहान्नाऎ हेरोड् गर लोमिम्पा लॆटु, “आनॆ आम् नुसामि खिम्टाङ्मा युङ्मा फॆन्नि।” 5मसॆ हेरोडऎ युहान्ना सेॽमा मिॽमिम्पा लॆटु, टर खो याॽमिचि नुङ् किसियुक्सा मान्ठाभनॆ खोचिऎ युहान्ना निवाँहाङ्मि खानावाँ लोखुबा लोयुक्सुचि।
6टर हेरोडमि जान्मा डिना टाआ, हाङ् आक्कुबि टाखुबाचिम् लुम्पि हेरोडियासमि साम्सामा लाॽलुसा हाङ् हेरोड हाङ् चेन्चामिट्टु। 7मसॆ हेरोडऎ मेॽनुङ्मा पिसा लोसु, “आना माङ् ङागुक्नार मन पिक्खाना” कामानुङ चुप्लाङ् ठुबु। 8हाङ् खोसॆ उम्माऎ चिन्मिम्पा रक्न “काङा बाप्टिस्मा पिक्खुबा युहान्नामि निङ्टावाँ ग ठालब्न ठालाबि पिॽङॆ” लोसु। 9हाङ् ग खानावाँ खेमुहाङ हेरोड चाइखॆट्टु। हाङ्स मरवॆॽलि टाबाङ्चिम् लुम्पि चुप्लाङ् ठुॽमिम्पासॆ मेॽनुङ्माऎ लोसिन्टक्न लॆटु। 10हाङ् हेरोडऎ युहान्नामि निङ्टवाँ सॆक्चिम् पिॽन बक्मिटु। 11हाङ् एक्कसॆ युहान्नामि निङ्टावाँ ठालाबि लाटॆटुहाङ आक्क मेॽनुङमा पिट्टु हाङ् खोसॆ म उम्मा पिट्टु। 12हाङ् युहान्नामि टिङ्खुबाचि टाआमिहाङ् खोम् सिच्चि लाखॆटुचि हाङ् हुमुचि। हाङ् खारामिहाङ् ग खानावाँ येसु खेम्मिटुचिमि।
येसुऎ ङाबङ् याॽमिचि चामा पिॽमिम्पा
(मारकुस ६:३०-४४; लुका ९:१०-१७; युहान्ना ६:१-१४)
13हाङ् येसुऎ ग खानावाँ खेमुहाङ् सिङ्खङ्बाङ् खुनिङ्म आसास माआमिहा ठालबि खाइटा। टर ग खानावाँ वाप्टकुचिहाङ् हाटाबिहा ओइर याॽमिचिऎ लाम्ढुसे खो टिङुचि। 14येसु सिङ्खङ्बा युढिन्मार खोसॆ ओइर याॽमिचि खाङ्टकुचि हाङ् नाम्नाम् पिस्सिटुचि। हाङ् उम्चि टुक्खाचि नुबक्मिट्टुचि।
15नाम् किक्खारा हाङ् टिङ्खुबाचि टाआमि हाङ् येसु लोसुचि, “ग आसास पेन्मिनिहा ठाल लॆ हाङ् नाम् सङ्क डाखारा। इघा याॽमिचि खारानॆ लोहाङ्सॆचॆ मसॆ खोचि गाँवाँबि खॆःॽमि हाङ् खोचिम् लागि चामा इन्चाहिमिर।” 16टर येसुऎ आक्खाचि लोसुचि, “खोचि खॆॽमा पाब्नि। आन्नॆॽन खोचि माङ्हाङ्स चामा पिट्टाम्चिनॆ।” 17टिङ्खुबाचिऎ खो लोसुचि, “गुबि काङ्कानुङ्ग ङाचि चारेपा नुङ् हिच्चि ङाटेःॽन चु।” 18हाङ् येसुऎ लोसुचि, “आक्खा चारेपा नुङ् ङा काबि लारापाम्नॆ।”
19हाङ् येसुऎ आक्खा याॽमिचि याॽवाबि पेनानॆ कामानुङ् लोसुचि। हाङ् आक्खा ङाचि चारेपा हाङ् हिच्चि ङा याङु हाङ् पारुबिट्टु खाङ्ठासॆ आक्कमि लागि निवाँहाङ् ओहाक् पिट्टु। हाङ् चारेपा योबुहाङ् टिङ्खुबाचि पिट्टुचि हाङ् टिङ्खुबाचिऎ याॽमिचि हाबिटुचिमि। 20हाङ् खोचि चोब्न बखार चाआमि। हाङ् याॽमिचिऎ ऎम्पक्मिम्पा टुक्कारा टिङ्खुबाचिऎ इःक्मार एपङ्हि बचॽवा लिसा। 21आक्कुबि मेॽनुङ्माचि नुङ् पिसाचि बाहेका चाखुबा वाठाङ्पाचि टेःॽन ङाबङ्र लॆटुचि।
येसु योवा सक्पि लाम्ढुमिम्पा
(मारकुस ६:४५-५६; युहान्ना ६:१५-२१)
22मरक्लन येसुऎ खोम् टिङ्खुबाचि सिङ्खङ्पि ठाङ्मिटुचि हाङ् खोबाङ् याॽलॽन टोम्पलिॽवा मॆआरॆङ् पाङ्हाङ्सुचि। खो चाइ याॽमिचि खारानॆ कासि आक्कुबि पेना।
23याॽमिचि पाङ्सिटुचिहाङ् येसु उम्टाङ्पॆ पारठाना लॆसि पङ्पङ्माबि ठाङा। नाम् किक्खॆॽमार उम्टाङपॆ लॆटा। 24आक्रल सिङ्खङ्पिहा टिङ्खुबाचि चाइ टोम्पलिॽवामि किनाराबाङ् डिरिक् मॆअङ् टाखॆम्पा लॆटामि। टर ढ्या हिॽवापाऎ आक्खाचि डॆःॽमॆ पाइटुचि। 25नाम्समाक्मि येसु योवा सक्पि लाम्ढुम्से टिङ्खुबाचि पोट्टा टामॆ पाइटा। 26हाङ् येसु योवा सक्पि लाम्डुमिम्पा टिङ्खुबाचिऎ खाङ्टकुचि हाङ् चाप्ये कामानुङ् किसिमावे याकाबकामि। 27टर मरक्लन येसुऎ आक्खाचि लोसुचि, “निवाँ चॆकुवॆ लिसानॆ, काङाये आकिसिआनॆ।”
28हाङ् पाट्रुसऎ लोसु, “पारभु, चाइबान आनान हाङ्ग, काङा सङ्क योवा सक्पि लाम्ढुङ्सॆ आनाबि टाऎ लोङॆ।” 29येसुऎ खो लोसु, “डाबॆम्टा।” पाट्रुस सिङ्खङ्बाङ् आम्पका हाङ् योवा सक्पि लाम्ढुसे येसु पोट्टा खारा। 30टर ढ्या हिॽवापा लुमिम्पा खाङु। हाङ् किसिखॆॽमिम्पासॆ योवाबि रुम्ढॆॽमा परका। हाङ् याकासे लोसु, “पारभु काङा हिङ्चामिॽङॆ!” 31हाङ् येसुऎ मरक्लन हुक् टिसुहाङ् खो लाप्इटु हाङ् लोसु, “ओ मिःक्म टे निवाँयुङ् लॆखुबा आना, आनॆ मान्ठा साङ्का लॆटुनॆ?” 32हाङ् खोचि सिङ्खङ्पि ठाङाचि हाङ् हिॽवापा सङ्क लुमा याइटु। 33हाङ् सिङ्खङ्पि चुखुबाचिऎ खो स्यामिसॆ लोसुचि, “चाइबान आना ग निवाँहाङ्मि पासान!”
34हाङ् येसु नुङ् खोम् टिङ्खुबाचिऎ टोम्पलिॽवा पाङ्फॆटुचि हाङ् मॆआरॆङ् गानेसारेट लोमॆ ठालबि टाआमि। 35हाङ् आक्कुबिहा वाठाङ्पा याॽमिचिऎ खो येसु कामानुङ् लेटकुचि। हाङ् खोचिऎ म खानावाँ गॆअङ्मॆअङ्हा चोब्न ठालबि फुबकुचि। हाङ् याॽमिचिऎ उम्चि चोब्न टुक्खाचि खोबि लाटॆटुचिमि। 36हाङ् खोचिऎ येसु काङ्कामि टुक्खाचि आनाम् चे मिःक्म हाङ्स डिन्चामा पिट्टॆचॆ कामानुङ् नुःर लोसुचि। हाङ् आसॆआसॆ म डिन्चाउचि खोचि नुबक्खारामि।
Currently Selected:
मट्टि 14: LBR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
