मट्टि 12
12
नाचामॆ डिनामि पारभु
(मारकुस २:२३-२८; ३:१-६; लुका ६:१-११)
1इॽया नाचामॆ डिना येसु सिःचाम्मि रोपाबाङ् खॆॽमॆ पाइमार खोम टिङ्खुबाचि सागॆसिसुचि। हाङ् सिःचाम्मि बाला टेस्से चाःबकामि। 2टर फारिसिचिऎ ग खाङुचिहाङ् येसु लोसुचि, “खाङ्लॆ, आम् टिङ्खुबाचिऎ नाचामॆ डिना यिक्मा फॆन्नॆ योम्पक् यिक्मे पाइमि।”
3टर खोसॆ आक्खाचि खानावाँ ऎम्पिसे लोसुचि, “डाउडऎ खो हाङ् खोम् लाङ्काम्चि सागेसिसुचिर माङ् लॆटुवॆ लोमॆ खानावाँ आन्नॆ मापाडालिटिटाम्नॆ? 4मान्टॽल खो निवाँहाङ्मि खिम्पि खारा हाङ् युङ्ठङ्बि सङ्टिम्पा याटाङ्पाचिऎ टेःॽन चामा नुऎ चामा ठका टाबु हाङ् चउ हाङ् खोम् याॽमिचि सङ्क पिट्टुचि।#१ सामुएल २१:१-६; लेबि २४:९ 5आठावा माल आन्नॆ मोसामि यायेॽमाबि निवाँहाङ्मि खिम्पि याटाङ्पाचिऎ नाचामॆ डिना योम्पक् मुःक्मिहाङ् यायेॽमाऎ लोसिन्ट लॆःॽमिनि हाङ्स खोचि आब्डिक् मॆड्डिङ्मान लिःक्मि लोमॆ खानावाँ मापाडालिटिटाम्नॆ? 6टर कॆ आन्ना लोकानि, गुबि चुऎ एक्क याॽमिबि निवाँहाङ्मि खिम् बाङ्स ढ्या ढुप्पाट्ट खोनुङ् चु। 7निवाँहाङ्ऎ ‘कॆ काम लागि सङ्टिमिम्पा खानावाँ हॆॽनि, टर होइढा याॽमिचि नाम्नाम् पिसिॽमॆ खानावाँ चाइ नेन्चाकुङ्’#होसे ६:६ लोमिम्पा खानावाँ आन्नॆ वाबाम्निग आब्डिक् मॆड्डिङ्हा याॽमिचि आब्डिक् टिसाम्निनि। 8मान्ठाभनॆ याॽमिमि पासा नाचामॆ डिनामि सङ्क पारभु यो।”
9हाङ् येसु आक्कबाङ् खाइटा हाङ् उम्चि याहुडिचि खोम्ठाम् खिम्पि खारा। 10आक्कुबि एक्क हुक् सोप्खॆमिम्पा याॽमि चुआ हाङ् फारिसिचिऎ येसु आब्डिक् टिमे निवाँऎ खो सिमुचि, “नाचामॆ डिना टुक्खा याॽमि नुबक्मिॽमॆ योम्पक् यिक्मा नुऎ रु फॆन्नॆ?” 11येसुऎ आक्खाचि खानावाँ ऎम्पिसे लोसुचि, “आन्ना हङ्सिबि आसामि एक्क सामुङ् चु, हाङ् नाचामॆ डिनाबि रुम्रुम्पाबि हेड्ढारा हाङग आक्क लाबकाम्निनिहॆ? 12हाङ् याॽमि सामुङ्बाङ् ग ऎॽवा योम्पक् पिक्खुबा रेटा, मसॆ नाचामॆ डिनाबि काम्नुऎ योम्पक यिक्मा नुऎ लि।” 13हाङ् खोसॆ म हुक् सोप्खॆॽमिम्पा याॽमि लोसु, “आम् हुक् खिङ्पकॆ” आक्क याॽमिऎ उम् हुक् खिङ्पकु हाङ् म सोप्खॆडॆ हुक् नुबक्खारा हाङ् होइक नुऎ हुक् रक्मान लिखारा। 14टर फारिसिचि चाइ बाहिरा खाइटामि हाङ् येसु मान्टॽल सेॽमॆ कामानुङ् खानावाँ टङ्पकामि।
निवाँहाङ्ऎ सॆःक्मिम्पा याॽमि
(मारकुस ३:७-१२)
15हाङ् येसुऎ खो काइर लॆःॽमा परक्मिम्पा खानावाँ वाप्टकु हाङ् आक्क ठालबाङ् खाइहाङ्सा। हाङ् डिरिक् याॽमिचिऎ खो टिङुचि हाङ् खोसॆ उम्चि चोब्न टुगुक्मिहाचि नुबक्मिट्टुचि। 16टर येसुऎ आक्खा याॽमिचि “काङा आसारङा लोमॆ आसास आनऎलोसाम्चिनॆ” कामानुङ् लोसुचि। 17हाङ् ग चाइ यासाइया लोमॆ निवाँहाङ्मि खानावाँ लोखुबाऎ गरहाङ् यामुमिम्पा खानावाँ लिमाम् लागि गर लिमिम्पा यो
18“खाङाम्नॆ, कॆ सॆःक्डुङॆ काम् योम्पक् मुखुबा गन,
खो कॆ एट्टान नाम्नाम् पिसिकुङ्, हाङ् खोनुङ् काङा चेन्चाडिङ।
कॆ काम लावा खो सक्पि युङ्पिकुङ्,
हाङ् खोसॆॽन चोब्न हॆॽनिबारेक्चिम् लुम्पि न्यायॆमि खानावाँ खेम्मिकुचि।
19खो याटक्माटक् लॆःॽनि, या काटिॽनि मसॆ आसॆस खोमि साम्ला लाम्फुबि खेम्टकुचिनि।
20हाङ् आसॆस मॆखाङ्पाचि हाङ् टाङ्पाम् लागि माङ्स ऎमुहिखुबाचिम् लागि
खो खोचि खाङ्खुबा हाङ् नाम्नाम् पिसिखुबा लि।
हाङ् खोसॆ न्यायॆ चाइ हेचामिकु।
21हाङ् चोब्न होइढा हॆॽनिबारेक्चिऎ खोम् निङ्पि आस युङ्कुचि।”#यासाइया ४२:१-४
येसु नुङ् बालाजिबुला
(मारकुस ३:२०-३०; लुका ११:१४-२३)
22हाङ् याॽमिचिऎ येसुबि खारिॽमाङ्ऎ लाप्मिम्पा एक्क याॽमि लाटॆटुचि। खो मिॽसुरुम्पा हाङ् यामुहिनॆ याॽमि लॆटा। हाङ् येसुऎ आक्क नुबक्मिट्टु, मसॆ खो खाङ्हिखुबा हाङ् यामुहिखुबा लिसा। 23हाङ् म खाङुचिहाङ् आक्कुबि चुक्मिहा चोब्न याॽमिचि आक्खॆसॆ गर कासामि, “माल येसुन डाउडमि पासा खिरिस्ट लिहिहॆ टा?” 24टर फारिसिचिऎ ग खेमुचिहाङ् कासामि, “ग याॽमिऎ ग खारिॽमाङ्चिम् टुङ्घङ्पा बालाजिबुलामि चॆक्मावाऎ खारिॽमाङ् लाबक्मॆ योम्पक् यिगुकु।”
25टर येसुऎ आक्खाचिमि निवाँ हङ्सिऎ खानावाँ वाप्टकुहाङ् लोसुचि, “एक्क हाङ्टेम्पिऎ याॽमिचिम् लुम्पि खिमाटुमा लिसा हाङ्ग आक्क हाङ्टेम् लुक्खॆ। हाङ् हाम्पिऎ हाटा अठावा खिम्पि खिमाटुमा परक् आक्क सङ्क लुक्खॆ। 26हाङ् साइटानमि साइटान नुङ्न खिमाटुमा लिसा हाङ्ग, आक्क सङ्क लिढाङ्हिनि, आक्क लुख्खॆ। 27हाङ् काङॆ बालाजिबुलमि चॆक्मावाबाङ् खारिॽमाङ्चि लाबक्कुङ्चि हाङग, आन्नामि टिङ्खुबाचिऎ चाइ आसामि चॆक्मावाबाङ् लाबकुचिहा? मसॆ आम्नि टिङ्खुबाचिऎन आन्नामि न्यायॆ लॆःॽमि। 28टर कॆ निवाँहाङ्मि चॆक्मावाबाङ् खारिॽमाङ्चि लाबक्मॆ योम्पक् यिगुक्ङा हाङ्ग आन्नामि लुम्पि निवाँहाङ्मि हाङ्डाम् टाखॆडा। 29हाङ् एक्क चॆकुयॆ याॽमिमि खिम्पिहा चासुम् लुप्चामाम् लागि आक्क चॆकुयॆ याॽमि नुःर माठुप्पा आसॆस लुप्हिसुचिनि। आक्क ठुप्सिकुचि हाङ्टेःॽन चासुम् लुप्हिकुचि।
30“हाङ् आसा चाइ काङानुङ् टङ्नि, खो काङा काइर लॆखुबा लि, हाङ् आसा चाइ कानुङ् खोम्मॆ योम्पक् मुनि, खोसॆ कॆ खोम्मिम्पा सङ्क टुप्लाहाङ्कु। 31मसॆ कॆ आन्ना लोकानि, याॽमिचिऎ लॆःॽमिम्पा चोब्न हिङ्वा हाङ् इचामिम्पा खानावाँ यङ्निहि, टर सॆङ्सॆङॆ लावा काइर लॆसॆ यिक्मिम्पा हिङ्वा यङ्निहिनि। 32हाङ् आसॆ याॽमिमि पासा काइर लोकु हाङ्ग आक्कसॆ यङ्निमा टक्चाकु, टर आसॆ सॆङ्सॆङॆ लावा काइर लोकु आक्कसॆ इग लःबि हाङ् हानाम्स यङ्निमा टक्चाउनि।
बोटा हाङ् आक्कमि उम्चा
(लुका ६:४३-४५)
33“बोटा मान्टऎ कामानुङ् आक्कमि उम्चाबाङ्न लेट्टखॆ। मान्ठाभनॆ काम्नुऎ बोटाऎ काम्नुऎन उम्चा सिकु हाङ् काइसॆ बोटाऎ काइसॆन उम्चा सिकु। 34ओ आन्ना पुसॆःमामि पासाचि! हङ्सिॽयुबाङ्न आन्ना काइसॆ लॆकानि हाङ् मान्टॽल काम्नुहा खानावाँ यामुहिकानिहा? मान्ठाभनॆ निवाँबि माङ् खानावाँ चु मन याबाङ् आम्पक्। 35नुऎ याॽमिऎ टाङ्पामि निवाँ हङ्सि चुहा नुऎ ठकाबाङ् नुहा खानावाँन लाबकु, टर काइसॆ याॽमिऎ टाङ्पाबि चुऎ काइसॆ निवाँबाङ् काइसॆ ठकान लाबकु। 36कॆ आन्ना लोकानि, हुन्नहा खानावाँ यामुखुबाचिऎ न्यायॆमि डिना आक्खा इमिम्पा चोब्न काइसॆ खानावाँ मान्ठा इमिम्पा कामानुङ् इमा लॆ। 37मान्ठाभनॆ आनॆ यामुमिम्पा खानावाँऎन न्यायॆमि डिना आना आब्डिक् नुङ्मा आठावा काइसॆ याॽमि लिःक्ना।”
योनामि चिन्नामि खानावाँ
(मारकुस ८:११-१२; लुका ११:२९-३२)
38इॽया एक्क हिप्पा मोसामि यायेॽमा चिन्खुबाचि हाङ् फारिसिचि टाआमि हाङ् येसु लोसुचि, “चिन्खुबो, आनाबाङ् काङ्कॆ एक्क आक्खॆॽमॆ खानावाँ खाङ्मा मिडुङ्का।” 39टर येसुऎ आक्खाचि खानावाँ ऎम्पिसे लोसुचि, “आच्चेलाहा काइसॆ हाङ् ब्याबिचारि याॽमिचि आक्खॆॽमॆ चिन्ना खाङ्मा यगुक्मि। टर आक्खाचिऎ निवाँहाङ्मि खानावाँ यामुखुबा योनामि चिन्नाबाङ् होइक चिन्ना खाङ्टकुचिनि। 40मान्ठाभनॆ मान्टाहाङ् योना सुम्चि लेन्टा हाङ् सुम्चि सेन्टा ढ्या ङामि बःक्हङ्सि पेना, आक्रहाङ्न याॽमिमि पासा सङ्क बाखा हङ्सि सुम्चि लेन्टा हाङ् सुम्चि सेन्टा पेनुक्। 41न्यायॆमि डिना निनाबॆ हाटाबिहा याॽमिचि आच्चेलाहा याॽमिचि नुङ् येबुक्मि हाङ् खोचिऎ आच्चेलाहा याॽमिचि आब्डिक् टिकुचि। मान्ठाभनॆ खोचिऎ योनाऎ इमिम्पा खानावाँ खेमुचिहाङ् टाङ्पाम् हिङ्वाबाङ् ऎम्पक्मिम्पा लॆटामि, टर खाङाम्नॆ, गुबि योनाबाङ्स टुङ्घङ्पा एक्क चु। 42हाङ् युलाम् पोट्टाऎ सेबा लोमॆ हाङ्डाम्पिऎ एक्क हाङ्टाङ्मा सङ्क न्यायॆमि डिना आच्चेलाहा याॽमिचि नुङ् येबुक् हाङ् खोचि आब्डिक् टिकुचि। मान्ठाभनॆ खो डिरिक् डिना लाम्ढुम्मानुङ् सोलोमानमि निवाँटाङ्पा खानावाँ खेम्सि टाआ, टर खाङाम्नॆ, गुबि सोलोमानबाङ् सङ्क ढ्या एक्क चु।
खारिॽमाङ् ऎन्टा
(लुका ११:२४-२६)
43“एक्क याॽमिबाङ् खारिॽमाङ् आम्प हाङ् आक्क आसास पेम्मिनिहा ठालबि पेम्माम् लागि काम्नुऎ ठाल यक्से खॆ। टर हाबिस काम्नुऎ ठाल यक्टकुनि। 44हाङ् आक्कसॆ लोकु, ‘याॽल पेन्डिङॆ ठालबिॽन खॆःॽङा’ हाङ् आक्क ऎन्टा। आक्क टामार आक्कसॆ म खिम् बॆःक्से काम्नुःर काम्नुःर चिल्लाहाङ्पा खिम्र यक्टकु। 45हाङ् आक्क खॆ हाङ् खोबाङ्स काइसाहा होइढा वाङ्चि खारिॽमाङ्चि लाटॆकुचि हाङ् आक्क हङ्सि भॆनुक्मि हाङ् पेनुक्मि हाङ् आक्क याॽमिमि हिङ्खामा याॽलऎ बाङ्स काइर लि। आच्चेलाहा काइसा याॽमिचि सङ्क आक्रक्न लिःक्मि।”
येसुमि उम्मा हाङ् नुसाचि
(मारकुस ३:३१-३५; लुका ८:१९-२१)
46आक्रहाङ् येसु याॽमिचि नुङ् यामुमे सिसार, खोम् उम्मा हाङ् नुसाचि टाआमि हाङ् खोनुङ् यामुमाम् लागि बाहिरा येप्डाङ्पा लॆटामि। 47हाङ् एक्कसॆ येसु लोसु, “आम्मानुङ् आम्नुसाचि आनानुङ् यामुमाम् लागि बाहिरा येप्डाङ्डामि।” 48टर येसुऎ आक्क याॽमि लोसु, “काम् आमा नुङ् काम् नुसाचि आसाचिर?” 49हाङ् खोसॆ टाङ्पाम् टिङ्खुबाचि हुगॆ खाङ्मिसे लोसुचि, “उङ्मा नुड् कामि नुसाचि इघाचिन। 50मान्ठाभनॆ आसाचि चाइ पारुबि चुखुबा काम् आपामि निवाँर पाइमि, खोचिन काम् नुसाचि हाङ् उङ्मा।”
Currently Selected:
मट्टि 12: LBR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
