लुका 19
19
यावेङ्ग लाखुबा जाक्काइ
1येसु यरिहो लोमॆ हाटाबाङ् खॆॽमॆ पाइटा। 2आक्कुबि यावेङ्ग खोम्खुबाचिमि एक्क जाक्काइ लोमॆ टुङ्घङ्पा चुआ हाङ् खो चासुम्टाङ्पा लॆटा। 3येसु आसार कामानुङ् खो खाङ्माम् लागि परक्मिम्पा लॆटा टर खो टाक्सॆ लिमिम्पासॆ होइढा याॽमिचिऎ यिप्सिटुचि, मसॆ खोसॆ येसु माखाङ्टकु। 4मसॆ खो होइढा याॽमिचिबाङ् याॽल पिन्से खाराहाङ् येसु खाङ्माम् लागि एक्क छाराक्फुबि सिङ् सक्पि ठाङा, मान्ठाभनॆ आक्क लाम्फुबाङ्न येसु खॆॽमॆ पाइटा। 5आक्क ठालबि येसु टाआहाङ् मिट्टु खाङ्ठाकुहाङ् जाक्काइ लोसु, “ओ जाक्काइ, उङॆ! आइ काङा आनाम् खिम्पि पेम्मान लॆःॽङा।” 6जाक्काइ उङ्खारा हाङ् चेन्चामानुङ् येसु खोम् खिम्पि लाखॆटुहाङ् काम्नुःर लॆटु। 7ग खाङ्टखुबाचि गरक् कामानुङ् ङॆम्पकामि, “गग हिङ्वामि खिम्पि टाबाङ् लॆङ्सि खारा।” 8टर ऎच्छ डॆङ्पि जाक्काइ पारभुमि याॽल येप्टिखाराहाङ् लोसु, “पारभु, खाङॆ, ह काङॆ माङ्स माआमिहाचि काम् चासुम्बाङ् बारॆक् हाबिकुङ्चि हाङ् लोमिम्पाबाङ् डिरिक् लाडुङ्चि हाङ्ग आक्कमि रिचि खेपा ऎम्पिकुङ्चि।” 9येसुऎ आक्क लोसु, “आइ आना हाङ् आनामि खिम्पिहा याॽमिचि हिङ्पडामि, मान्ठाभनॆ आना स आबाराहाममि सामॆक्बिऎन। 10काङा याॽमिमि पासा माखॆम्पाचि यक्सि हाङ् हिङ्पॽमाम् लागि टामिम्पा यो।”
याङ्मि काठा
(मट्टि २५:१४-३०)
11येसुऎ लोमिम्पा खानावाँ याॽमिचिऎ खेम्से लॆःॽमार खोसॆ होइक एक्क काठा लोसु। मान्ठाभनॆ येसु यारुसालेम कॆक्पि टामिम्पा लॆटा। याॽमिचिऎ निवाँहाङ्मि हाङ्डाम् सॆॽलन टा कामानुङ् मिम्मिम्पा लॆटाचि। 12“एक्क ढ्या#१९:१२ आक्रल रोमबिऎ हाङ्ऎ चोब्न हाङ्डाम् फॆॽमिम्पासॆ खोम् ढुप्पाट्टबिहा चोब्न हाङ्डाम्पिहा याॽमिचि खोसॆ ढुप्पाट्ट पिट्टुचि भनॆ टेःन टुङ्घङ्पा लॆङ्ट युक्सामि। टुङ्घङ्पाऎ होइक हाङ्टेम्पि खाइमाहाङ् टाङ्पाम् हाङ्डाम्पिऎ हाङ् लिमानुङ् ऎन्टामा मिनु। 13खाइमाबाङ् याॽल खोसॆ टाङ्पाम् एपङ् योम्पक् मुखुबाचि सेःरुचिहाङ् एक्क एक्क फिःॽयामि याङ् पिट्टुचिहाङ् लोसुचि, ‘काङा माऎन्टालढारि इग याङ् फॆरानॆहाङ् डिरिक् याङ् डुबानॆ।’ 14टर टाङ्पाम् हाङ्डाम्बिऎ याॽमिचिऎ खो सिच्चोयुक्सुचि। मसॆ खो खाइटा हाङ् आक्खाचिऎ गर कामानुङ् खानावाँ खेम्मिखुबा याॽमि पाङ्हाङ्सुचि, ‘ग याॽमि हाङ् लिमिम्पा काम्नुऎ मिनिङ्कानि।’
15“टर खो हाङ्न लिसा हाङ् ऎन्टाआ। ऎन्टामा अक्सि खोसॆ योम्पक् मुखुबाचिऎ ऎॽवा याङ् डुबुचॆ कामानुङ् सिम्माम् लागि सेहाङ्सुचि। 16याॽलऎ योम्पक् खुमुबॆ लोसु, ‘टुङ्घङ्पो, आनॆ पिडिङानॆ याङ्बाङ् कॆ एपङ् फिःॽयामि याङ् डुप्डुङ।’ 17खोसॆ आक्क लोसु, ‘आनॆ काम्नुऎ लॆटुना, आना मिःछुॽमा खानावाँबि निवाँयुङ्मा लिमिम्पासॆ ह आना कॆ एपङ् हाटामि टुङ्घङ्पा मुक्ना।’ 18होइक टाआहाङ् लोसु, ‘टुङ्घङ्पो, आनॆ पिडिङानॆ याङ्बि कॆ ङाचि फिःॽयामि याङ् डुब्डुङ।’ 19हाङ्ऎ आक्क लोसु, ‘आना ङाचि हाटाबिऎ टुङ्घङ्पा लिक्ना।’ 20होइक योम्पक् मुखुबा टाआहाङ् लोसु, ‘टुङ्घङ्पो, खाङॆ, आनॆ पिडिङानॆ याङ् गुबिॽन चु। आक्क कॆ चेःबि मोम्से चुम्मानुङ् युङ्डुङ। 21काङा आनानुङ् किसिइङ् मान्ठाभनॆ आना नाम्नावाँ मॆड्डिङ्मा याॽमिना लॆःक्ना। आना आनॆ मापिॽमिम्पाबाङ् स लामा यगुक्ना हाङ् मालिॽमिम्पा ठालबाङ् खोमुक्ना।’ 22हाङ्ऎ आक्क लोसु, ‘ओ काइसॆ योम्पक् मुखुबा, आनॆ यामुमिम्पाबाङ्न आना रःग्मा खाइहाङ्चाक्ना। काङा काइसॆ लॆःॽङा, टाङ्पॆ मापिॽमिम्पाबाङ् लामा यगुॽङा हाङ् टाङ्पॆ माटुॽमिम्पा ठालबाङ् खोमुॽङा कामानुङ् आनॆ लेकुनॆ रछ। 23मरक् हाङ्ग मान्ठा आनॆ काम् याङ् ब्याजबि माटिसुनॆ? ब्याजबि टिसुना ग काङा ऎन्टामार माङ्हाङ्स ब्याज ग टक्चाउङ् हला।’ 24हाङ् खोसॆ आक्कुबि येप्ढाङ्खुबाचि लोसुचि, ‘आक्कबाङ् आक्क याङ् ङाप्लाह्साम्नॆ हाङ् एपङ् याङ् डुप्खुबा पिट्टाम्नॆ।’ 25आक्खाचिऎ खो लोसुचि, ‘टङ्घङ्पो, खोनुङ्ग एपङ् याङ् चुइॽनि।’ 26हाङ्ऎ लोसु, ‘कॆ आन्ना लोकानि आसानुङ् चु, खो येप्टिबि। टर आसानुङ् माआ आक्कमि मिःक्म चुहा स ङाप्लाह्ङ्ऎछ। 27ह काङा हाङ् लिमिम्पा सिच्चोखुबाचि काम् कॆक्पि लाटॆटाम्चिनॆहाङ् सेराम्चिनॆ’।”
यारुसालेमपि येसु काम्नुःर लॆःॽमिम्पा
(मट्टि २१:१-११; मारकुस ११:१-११; युहान्ना १२:१२-१९)
28ग काठा लोसिटुचिहाङ् येसु आक्खाचिम् याॽल याॽल यारुसालेममि लाम्फु पोट्टि लङ्लाह्रा। 29बेठफागे हाङ् बेठानिया लोमॆ गाँवाँ नेन्टाङ्ऎ जाइटुन लोमॆ पङ्पङ्माबि टाआहाङ् येसुऎ हिप्पा टिङ्खुबाचि गरक् लोहाङ्सुचि, 30“आक्क मिऎ गाँवाँबि खाराचॆ, आक्क गाँवाँबि भॆन्मा अक्सि हढारि आसॆस मॆठाङ्मिम्पा एक्क वॆन्चा गाढा हिक्मिम्पा भॆट्टक्चुना। आक्क हेम्बकाचॆहाङ् गुबि लाटॆटाचॆ। 31याॽमिचिऎ मान्ठा हेङ्काम्नॆ कामानुङ् सिमानि हाङ्ग, पारभु पाब्डा कामानुङ् लोसाम्चिनॆ।”
32आक्खा हिप्पा टिङ्खुबाचि गावॆँटु खाराचि हाङ् येसुऎ लोसिन्टॽन गाढामि उम् पासा खाङ्टकाचु। 33आक्क हेन्पक्मार आक्कमि टुङ्घङ्पाचिऎ “मान्ठा हेनुकाम्नॆ?” कामानुङ् सिमुचि। 34आक्खाचिऎ लोसुचि, “पारभु पाब्डा।” 35आक्खाचिऎ आक्क गाढामि पासा येसुबि लाखॆटुचिहाङ् आक्कमि डॆङ्कॽवाबि टाङ्पाम् चेः डिङुचि हाङ् येसु आक्क सक्पि पेम्मिटुचि। 36येसु खॆॽमॆ पाइटार याॽमिचिऎ लाम्फुबि टाङ्पाम् चेः बिल्लाह्ङ्से डिङ्पिटुचि।
37येसु यारुसालेममि कॆक्पि जाइटुन लोमॆ पङ्पङ्मामि उङ्मॆ लाम्फुबि टामार चोब्न याॽमिचिऎ येसुऎ लॆःॽमिम्पा आक्खॆमाह खानावाँ मिॽलउचिहाङ् चेन्चासे ढ्या साम्लाऎ निवाँहाङ्मि निङ् ठेस्से गरहाङ् याकाबकामि,
38“पारभु निवाँहाङ्मि निङ्पि टाखुबा हाङ्ऎ आसिका टक्चाडा।
“पारुबि सान्टि हाङ् निवाँहाङ्मि निङ् सङ्पि लिर।”
39याॽमिचिम् सयक्पयक्बाङ् फारिसिचिऎ येसु लोसुचि, “चिन्खुबो, आनाम् टिङ्खुबाचि या आकासानॆ कामानुङ् वोसॆचॆ।” 40येसुऎ आक्खाचि खानावाँ एम्पिटुचि, “इघाचि यङ् उगामि हाङ्ग इघा लुङ्कॽवा स याकाबक्मि।”
येसु यारुसालेम हाटा खाङ्से हाःॽमिम्पा
41येसु यारुसालेम नेन्टाङ् टाआहाङ् यारुसालेम हाटा खाङ्टकु हाङ् हाबा, 42ओ, यारुसालेमबिहा याॽमिचि, आन्नॆ सान्टिमि लागि माङ् पाबुऎ कामानुङ् लेसाम्निग काम्नुऎ लिखुबा लॆटा। टर आन्नॆ ग मानमाखाङ्टकाम्नि! 43ह गरक्मा लः टा, आना सिच्चोखुबाचिऎ खोमुक्मि हाङ् आना चोब्न ठालबाङ् बॆङ्ठाङ्मि। 44हाङ् यारुसालेम हाङ् आक्कुबि पेन्खुबा चोब्न आक्खाचिऎ सेरुकुचि। आक्खाचिऎ एक्क लुङ्कॽवा सक्पि चुऎ होइक लुङ्कॽवा स युङुचिनि मान्ठभनॆ निवाँहाङ्ऎ आना कोब्माडोॽमाम् लागि टामिम्पा लः आनॆ लेनमालेसुना।
येसु निवाँहाङ्मि खिम्पि खॆॽमिम्पा
(मट्टि २१:१२-१७; मारकुस ११:१५-१९; युहान्ना २:१३-२२)
45आक्क डॆङ्पि येसु निवाँहाङ्मि खिम्मि पालुम्पि खाराहाङ् गर कामानुङ् इन्चाखुबाचि यिॽहाङ्सुचि, 46“निवाँहाङ्मि साब्चिराबि गरहाङ् साब्डा, ‘काम् खिम् निवाँहाङ् नुङ् यामुठाम् खिम् लिमा लॆ।’#यासाइया ५६:७ टर आन्नॆ ग इग खुसुबाङ्चिम् ढाँणा#यारमिया ७:११ मुःॽडाम्नि।”
47आक्क डॆङ्पि डिनाहु येसुऎ निवाँहाङ्मि खिम्पि चिन्युक्सुचि। टर ढ्या याटाङ्पाचि, मोसामि यायेॽमा चिन्खुबाचि हाङ् होइढा याॽमिचिम् टुङ्घङ्पाचिऎ खो सेॽमा यक्युक्सुचि। 48टर आक्खाचिऎ सेॽमॆ लाम्न माभॆट्टकुचि मान्ठाभनॆ चोब्न याॽमिचि खोम् खानावाँ खेम्मा नेन्चायुक्सामि।
Currently Selected:
लुका 19: LBR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
