लुका 17
17
हिङ्वा लॆःॽमा आपिॽमॆ
(मट्टि १८:६-७,२१-२२; मारकुस ९:४२)
1येसुऎ टाङ्पा टिङ्खुबाचि लोसुचि, “चाइबान याॽमिचि हिङ्वा लॆॽमिखुबा खानावाँ ग टाक्न। टर ढिक्कारा होइढाचि हिङ्वा लॆःॽमिखुबा याॽमिचि। 2आसॆ इघा मिॽमिहाचिबाङ् एक्क हिङ्वा लॆःॽमिकु, आक्क ग उम् पॆॽलाबि एक्क यिःॽलुङ् हिक्टिबिॽमाहाङ् पॆरॆरॆमाबि कक्ढाङ्मा काम्नुऎ लिक्। 3मसॆ काम्नुःर पेनानॆ, आनाम् लाङ्काम्ऎ आना काइसॆ लॆटा हाङ्ग खोम् काइसॆ योम्पक् खाङ्मिटॆ, हाङ् खोसॆ काङॆ काइसॆ योम्पक् लॆटुङ् कामानुङ् मिॽलउ हाङ्ग खोनुङ् सोम् आखेरॆ।
4“आनाम् लाङ्काम्ऎ आना डिरिक् खेपा#१७:४ याहुडिचिम् लागि वाङ्चि खेप्पा लोमॆ डिरिक् खेप्पायो। काइसॆ लॆटा टर खो चोब्न खेपा आनाबि टाहाङ् ‘कॆ आना काइर लॆटाना, कानुङ् सोम् आखेरो’ काहाङ्ग आनॆ खोम् काइसॆ योम्पक् मिखॆबिॽमा लॆ।”
5सॆक्ढुङ्पाचिऎ येसु लोसुचि, “पारभु येसु काङ्काम् निवाँयुङ् ढ्या मुबिच्चिमॆ।” 6येसुऎ खानावाँ ऎम्पिटुचि, “आन्नाबि एक्क मिःछुॽमा उम्चा रकॆ निवाँयुङ् चु हाङ्ग इग नुन्नेसिमि सिङ् डेल्लिङ्खॆॽल हाङ् मिउ पॆरॆरॆमाबि लिटिखॆॽल, लोसाम्नि हाङ्ग आक्कसॆ लोमिम्पा खेम्कु।”
योम्पक् मुखुबाऎ मुमा लॆऎ योम्पक्
7“आन्नाबाङ् आसॆ टाङ्पाम् योम्पक् मुखुबा रोपाबाङ् योम्पक् मुटामार आठावा कुठाम्पा टामा अक्सि लु चामा चासि पेन्इटे लोकाम्नॆ? 8टर गरहाङ् लोकाम्नि, ‘खारॆहाङ् चोब्न चामा डुङ्मा मुसॆहाङ् काङा चामा पिॽङॆ, कॆ चासिकुङ् हाङ् आनॆ चाऎ।’ 9खोसॆ लोमिम्पा खेम्मिम्पासॆ टुङ्घङ्पाऎ खो नुचाऎ लोकुयॆ टा? 10आक्रहाङ्न आन्नॆ स टाङ्पा लोमिम्पा चोब्न योम्पक् मुसिटाम्नॆ हाङ् लोसाम्नॆ, ‘काङ्का ग आनामि योम्पक् मुखुबा टेःॽन रेम, काङ्कॆ मुमा लॆऎ चोब्न योम्पक् मुडुङ्का’।”
एपङ् साखक्मि टुक्खाचि
11येसु यारुसालेम खॆॽमार गालिल नुङ् सामारियामि लुम्पाङ् खारा। 12खो एक्क गाँवाँबि भॆम्मा ठाबाक्मार खोसॆ एपङ् साखक्मि टुक्खाचि चुप्टिखॆट्टुचि। आक्खाचि मिउन येप्टि खारामिहाङ् 13ढ्या साम्लाऎ याकामानुङ् येसु लोसुचि, “पारभु येसु काङ्का नाम्नाम् पिसिचिमॆ।” 14येसुऎ आक्खाचि लोसुचि, “आन्ना याटाङ्पाबि खारानॆहाङ् खाङ्मिटाम्चिनॆ।” आक्खाचि याटाङ्पाबि खॆब्भॆमारक्न नुबक्खारामि। 15एक्कऎ चाइ टाङ्पा नुबक्मिम्पा लॆटकुहाङ् चेन्चामानुङ् ढ्या साम्लाऎ निवाँहाङ्मि निङ् ठेस्से येसुबि ऎन्टाआ, 16हाङ् येसुमि लाङ्पि स्यामिसे खो काम्नुःर लोसु। आक्क ऎन्टाखुबा चाइ सामारि लॆटा। 17हाङ् येसुऎ सिमु, “एपङ्न नुबक्मिम्पाचि हॆॽनॆ? होइढा नाङ्चि चाइ हाबि चुक्मिहा? 18इग सामारिबाङ् होइढाचि चाइ मान्ठा निवाँहाङ्मि निङ् ठेस्सि माटामिहा?” 19आक्क डॆङ्पि येसुऎ आक्क सामारि लोसु, “ह खारॆ, आनाम् निवाँयुङ्ऎन आना नुबक्मिडा।”
निवाँहाङ्मि हाङ्डाम्
(मट्टि २४:२३-२८,३७-४१)
20इॽया निवाँहाङ्मि हाङ्डाम् हानाम् टाऎ कामानुङ् फारिसिचिऎ येसु सिमुचि। हाङ् येसुऎ आक्खाचि लोसुचि, “निवाँहाङ्मि हाङ्डाम् खाङ्टॽमॆ गारि टानि। 21आसॆस निवाँहाङ्मि हाङ्डाम् गुबि रु आक्कुबि लोहिसुचिनि मान्ठाभनॆ निवाँहाङ्मि हाङ्डाम् आन्ना हङ्सिॽउन चु।”
22आक्क डॆङ्पि येसुऎ खोम् टिङ्खुबाचि लोसुचि, “गरक्मा लः सङ्क टा, आन्नॆ काङा याॽमिमि पासा ऎन्टाखॆ हाङ् आन्नॆ खोम इॽयाक् खाङ्मा मिकाम्नि, टर खाङ्टकाम्निनि। 23याॽमिचिऎ आन्ना ‘खो गुबि नुङ् आक्कुबि चु’ लोकानि टर आक्खाचिम् खानावाँबि निवाँयुङ् आलॆटानॆ। 24मान्ठाभनॆ काङा याॽमिमि पासा टामॆ डिना नाम्फलिॽवाबि नाम्टुरुङ्मा हासे खाङ्ङुम्पा रक्न कास खाङ्मुङा। 25टर ग लिमाबाङ् याॽल कॆ एट्टान डुखा आङ्मा लॆङा हाङ् गरक्लहा याॽमिचिऎ काङा सिच्चाङामि। 26नोहाबिऎ लःबि लिसिन्टन का याॽमिम् पासामि लःबि सङ्क लि। 27नोआ योवाखङ्पि माभॆन्लढारि याॽमिचि चामा नुङ् डुङ्मानुङ् हाङ् भ्या लॆःॽमॆ पाइटामि। आक्रलॽन ढ्या वारि टाआ हाङ् चोब्न रुम्सि खारामि। 28लोटमि लःबि सङ्क आक्रक्न लिमिम्पा लॆटा। याॽमिचि चामॆ, डुङ्मॆ, इन्चामॆ, इल्लामॆ, रोपा लिःॽमॆ हाङ्खिम् हेॽमॆ योम्पक् मुमे पाइटामि। 29लोटऎ साडोम् हाटा याइडाम्पा डिनान नाम्फलिॽवाबाङ् मिः हाङ् गान्ढाक् हेड्ढिन्टा हाङ् चोब्न हिस्सिखारामि। 30काङा याॽमिमि पासा खाङ्मुङॆ डिना स आक्रक्न लिः।
31“आक्रल खिम्मि सङ्पिटु चुऎ याॽमि कक्नाम लासि मिम्मु आयुर हाङ् रोपाबि चुक्मिहाचि खिम्पि ऎऎम्पक्मिर। 32लोटमि खिम्टाङ्मा#उट्पाटि १९:२६ माङ् लिमिम्पा लॆटॆ मिॽलाआनॆ। 33टाङ्पामि हिङ्खामा हिङ्पॽमा मिङ्खुबॆ खोम् हिङ्खामा माराङ्कु। टर टाङ्पाम् हिङ्खामा माराङ्खुबॆ आक्क हिङ्चामिकु। 34कॆ आन्ना लोकानि, ‘आक्क सेन्टा एक्क इम्चाठाम्पि इम्चाम्पा हिप्पाबाङ् एक्क याइडाकु हाङ् होइक लाखॆकु। 35हिप्पा यिःइलुङ्पि खाॽमिक् यिःढाङ्पा मेॽनुङ्माचिबाङ् एक्क लाखॆ हाङ् होइक वॆड्डा। 36आक्रक्न रोपाबि चुक्चिहा हिप्पाबि एक्क लाखॆ हाङ् होइक वेड्डा’।”#१७:३६ ग पड डिरिक् ठालबि माआ।
37टिङ्खुबाचिऎ येसु सिमुचि, “पारभु ग खानावाँ हाम्पि लिऎ?” येसुऎ आक्खाचि लोसुचि, “हाम्पि सिखॆम्पा सा लि आक्कुबि डिरिक् नाप्पॆङ्चःवा खोम्टि खॆःॽमि।”
Currently Selected:
लुका 17: LBR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
