युहान्ना 6
6
येसुऎ ङाबङ् याॽमिचि चामिॽमिम्पा
(मट्टि १४:१३-२१; मारकुस ६:३०-४४; लुका ९:१०-१७)
1आक्क डॆङ्पि येसु गालिलमि टोम्पलिॽवा मॆएरॆङ् खारा। (आक्क टोम्पलिॽवा चाइ टिबेरियासमि टोम्पलिॽवा स लोयुक्सुचि)। 2हाङ् खोसॆ टुक्खा याॽमिचि आक्खॆॽमा लुर नुबक्मिॽमिम्पा खाङ्मिम्पासॆ डिरिक् याॽमिचिऎ खो टिङ्पकुचि। 3हाङ् येसु एक्क पङ्पङ्माबि खारा हाङ् खोम् टिङ्खुबाचि नुङ् आक्कुबि पेना। 4हाङ् याहुडिचिम् फाक्मॆ लोमॆ चाडा नेन्टाङ्न टाखॆम्पा लॆटा।
5हाङ् येसुऎ खोम् गॆअङ्मॆअङ् खाङ्मार डिरिक् याॽमिचि खो पोट्टा डाप्मॆ पाइमिम्पा खाङुचि। हाङ् खोसॆ फिलिप लोसु, “इघा याॽमिचि चामिॽमाम् लागि काङ्कॆ हाबाङ् चाइ चारेपा इन्टॆहिऎ?” 6येसुऎ आक्क खानावाँ फिलिपऎ मान्टक्मा खानावाँ इकुवॆ कामानुङ् सिम्मिम्पा लॆटु, मान्ठाभनॆ ह खोसॆ माङ् योम्पक् यिक्मा परक्मिम्पा लॆटु, म खोसॆ लेस्सिम्पा लॆटु। 7हाङ् फिलिपऎ लोसु, “इघा याॽमिचि मिॽमिम चामा पिॽमार सङ्क हिकक् सिःमि ढॆक्का याङ्ऎ#६:७ ग हिकक् सिःमि ढॆक्का याङ् चाइ एक्क याॽमिमि बाङ्चि माहिनामिर नाम्याक लि। इन्टॆम्पा चारेपाऎ स खेटुचिनि।”
8हाङ् खोमि टिङ्खुबा हङ्सिऎ सिमोन पाट्रुसमि नुसा आन्डिरियासऎ लोसु, 9“गुबि एक्क वाठाङ्पा पिसानुङ् जाउमि ङाचि चारेपा नुङ् हिच्चि ङाः चु। टर गरवॆॽलि याॽमिचि ग आक्कसॆ खेटुचिनि टा?”
10हाङ् येसुऎ खोम् टिङ्खुबाचि लोसुचि, “याॽमिचि पेन्मिटाम्चिनॆ।” हाङ् आक्कुबि डिरिक् घाँसानुङ्मा चाउरा चुआ हाङ् याॽमिचि आक्कुबि पेनामि। आक्कुबि मेॽनुङ्माचि नुङ् पिसाचि बाहेका वाठाङ्पाचि टे ङाबङ्र लॆटुचि। 11हाङ् येसुऎ आक्खा ङाचि चारेपा याङु हाङ् निवाँहाङ् ओहाक् पिट्टु हाङ् याॽमिचि हाबिटाम्चिनॆ कामानुङ् टिङ्खुबाचि पिट्टुचि। आक्रहाङ्न खोसॆ ङाः सङ्क याङुहाङ् हाबिटुचि। हाङ् याॽमिचिऎ बखार चाउचि। 12हाङ् चोब्पासॆ चाइखॆटुचि हाङ् येसुऎ खोम् टिङ्खुबाचि लोसुचि, “ऎम्पम्पा हाङ् टुप्लाङ्पा खोमाम्नॆ। आक्खा एक्क स नासॆ ऎलिर।” 13मसॆ खोचिऎ आक्क जाउमि ङाचि वटा चारेपाबाङ् ऎम्पम्पा हाङ् योप्खॆम्पा चारेपा हिपङ् बचॽवा खोमुचि।
14आक्रक्मा येसुऎ यिक्मिम्पा आक्खॆमाहा योम्पक् खाङुचिहाङ् कासामि, “बाखाटेम्पि टा कामानुङ् काङ्कॆ हुङ्मिम्पा निवाँहाङ्मि खानावाँ लोखुबा याॽमि चाइ चाइबान गन।” 15हाङ् याॽमिचि खोबि टामानुङ् खो आखासिमार सङ्क याॽमिचिऎ खो उम्चि हाङ् मुमा परक्डुचि लोमॆ खानावाँ वाप्टकु। मसॆ खो होइखेपा सङ्क खोम्टाङ्पा पङ्पङ्मा पोट्टा खाइटा।
येसु योवा सक्पि लाम्ढुम्मिम्पा
(मट्टि १४:२२-३३; मारकुस ६:४५-५२)
16हाङ् नाम् डाखारा हाङ् येसुमि टिङ्खुबाचि टोम्पलिॽवा पोट्टा खारामि। 17हाङ् आक्रलढारि नाम् किक्खॆम्पा लॆटा, टर येसु खोचिबि माटामिम्पा लॆटा। मसॆ एक्क सिङ्खङ्पि ठाङामि हाङ् मॆआरॆङ् काफारनुहुमपि खॆॽमाम् लागि लङ्पकामि। 18हाङ् आक्कुबि ढ्या हिॽयापा लुबम्पासॆ टोम्पलिॽवामि योवा चुःबका। 19हाङ् खोचि डिरिक् मॆअङ् टाखॆम्पा लॆटामि। आक्रलरे खोचिऎ येसु योवा सक्पि लाम्ढुसे योवाखङ् पोट्टा टामॆ पाइमिम्पा खाङ्टकुचि हाङ् खोचि एट्टान किसिखारामि। 20टर येसुऎ आक्खाचि लोसुचि, “आन्ना एकिसिआनॆ, काङाये।” 21हाङ् खोचिऎ चेन्चासे येसु सिङ्खङ्पि ठाङ्मिटुचि। मरक्लन खोचि खॆॽमॆ ठाल सङ्क टाखारा।
22हाङ् वेन्डालाम्पॆ टोम्पलिॽवा मॆआरॆङ्हा याॽमिचिऎ टोम्पलिॽवा कॆक्पि एक्क टे सिङ्खङ् चुआ कामानुङ् लेसुचि। हाङ् टिङ्खुबाचि ठाङ्मिम्पा सिङ्खङ्पि येसु मॆठाङ्मिम्पा लॆटा, टर टिङ्खुबाचि टे खॆॽमिम्पा खानावाँ खोचिऎ लेमिम्पा लॆटुचि। 23हाङ् पारभुऎ निवाँहाङ् ओहाक् पिॽमानुङ् याॽमिचि चारेपा चामिॽमिम्पा ठावाँमि नेन्टाङ् टिबेरियासबाङ् होइढा सिङ्खङ् सङ्क टाआ। 24हाङ् आक्खा याॽमिचिऎ येसु हाङ् खोम् टिङ्खुबाचि आसास आक्कुबि माखाङ्टम्पासॆ येसु यक्सॆ आक्खा सिङ्खङ्बाङ् काफारनुहुमपि खारामि।
येसु हिङ्खामा पिक्खुबा चारेपा
25हाङ् याॽमिचिऎ येसु टोम्पलिॽवा मॆआरॆङ् चुबुचिहाङ् सिमुचि, “चिन्खुबो, आना गुबि हानाम्रो टाआनॆ?”
26येसुऎ आक्खाचि खानावाँ एम्पिसे लोसुचि, “चाइबान कॆ आन्ना लोकानि, आक्खॆॽमाहा योम्पक् वाप्मिम्पासॆ हॆॽनॆ, टर बखार चारेपा चाटाक्मिम्पासॆ आन्नॆ काङा यगुक्ङानि। 27हाङ् नासॆलिखुबा चामामि लागि हॆॽनॆ, टर हानाम्स ऎनासॆलिखुबा चामामि लागि पाइटानॆ। ग चामा चाइ याॽमिमि पासाऎ आन्ना पिकानि, मान्ठाभनॆ निवाँहाङ् आपॆ गमि लागिॽन खो पाङ्हाङ्पा लोमॆ खानावाँ खाङ्मुडु।”
28हाङ् आक्खा याॽमिचिऎ सिमुचि, “निवाँहाङ्मि निवाँ रक्मा योम्पक् मुमाम् लागि काङ्कॆ माङ् योम्पक् यिक्मा लॆऎ?”
29हाङ् येसुऎ आक्खाचि लोसुचि, “निवाँहाङ्ऎ पाङ्हाङ्पा याॽमि निवाँयुङ् लॆःॽमान खोम् निवाँर योम्पक् मुमॆ रेम।”
30मसॆ आक्खाचिए लोसुचि, “आना सक्पि काङ्कॆ निवाँयुङ् लॆःॽमाम् लागि आनॆ काङ्कॆ खाङ्माम् लागि माङ् आक्खॆॽमॆ योम्पक् यिगुक्नॆ? मान्टक्मा योम्पक् मुक्नॆ? 31निवाँनेन् साब्चिराबि ‘खोसॆ आक्खाचि पारुबाङ् मान्ना पिट्टुचि’ कामानुङ् साबिन्टक्न खोसॆ काङ्कामि टुबालाबाचि आसास पेम्मिनिहा ठालबि मान्ना चामा पिट्टुचि।”#पारास्ठान १६:४; खोम्मिम्पासाम् ७८:२४
32हाङ् येसुऎ लोसुचि, “चाइबान कॆ आन्ना लोकानि, पारुबाङ् आन्ना चारेपा पिक्खुबा मोसा हॆॽनॆ, टर पारुबाङ् काम् आपॆ आन्ना चाइबानऎ चारेपा पिकानि। 33मान्ठाभनॆ निवाँहाङ्मि चारेपा चाइ पारुबाङ् उङ्मानुङ् बाखाटेम्पिहा याॽमिचि हिङ्खामा पिक्खुबा याॽमि यो।”
34मसॆ खोचिऎ खो लोसुचि, “चिन्खुबो, आक्क चारेपा काङ्का हानाम्स पिच्चिमॆ।”
35हाङ् येसुऎ आक्खाचि लोसुचि, “हानाम्स लुक्खॆनॆ हिङ्खामा पिक्खुबा चारेपा चाइ काङान। काङाबि टाखुबा चाइ हानाम्स सागॆसिसुनि हाङ् काङा सक्पि निवाँयुङ् लॆखुबा हानाम्स वाइमे सिसुनि। 36टर कॆ लोडानि, आन्नॆ काङा खाङिङ्नि हाङ्स निवाँयुङ् लॆटानिनि। 37हाङ् निवाँहाङ् आपॆ काङा पिॽमिम्पा याॽमिचि चोब्न काङाबि टाःक्मि। हाङ् काबि टाखुबाचि कॆ हानाम्स याइङाचिनि। 38मान्ठाभनॆ काङा काम् निवाँर पाइसि हॆॽनॆ, टर काङा पाङ्हाङ्खुबामि निवाँर पाइमाम् लागि पारुबाङ् टाडिङ। 39हाङ् काङा पाङ्हाङ्खुबामि निवाँ चाइ गन, खोसॆ काङा पिॽमिम्पा याॽमिचि आसास कॆ माइॽमा आसिॽल, टर बाखाटेम् लुक्खॆऎ डिना खोचि हिङ्पक्हिङाचिर। 40मान्ठाभनॆ काम् आपामि निवाँ गन, पासा खाङ्खुबा हाङ् खो सक्पि निवाँयुङ् लॆखुबा चोप्पसॆ हानाम्स आसिखॆखुबा हिङ्खामा टक्चाकुचि। हाङ् कॆ खोचि बाखाटेम् लुक्खॆऎ डिना हिङ्पॽमिकुङ्चि।”
41हाङ् येसुऎ “काङा पारुबाङ् टामिम्पा चारेपाङा” कामानुङ् लोमिम्पासॆ याहुडिचि ङॆम्पकामि। 42हाङ् खोचि कासामि, “ग याॽमि योसेफमि पासा येसु हॆॽनॆ? खोम् आपा नुङ् आमा काङ्कॆ लेकुङ्का। हाङ् मान्टक्ल खोसॆ ‘काङा पारुबाङ् उङ्डिङॆ’ कामानुङ् काऎ?”
43येसुऎ आक्खाचि लोसुचि, “काङॆ यामुमिम्पा खानावाँबि आन्ना आङॆनानॆ। 44काङा पाङ्हाङ्खुबा आपॆ काबि टामॆ निवाँ मापिॽलढारि आसास काबि टाहिमिनि। हाङ् काबि टाखुबाचि चाइ कॆ बाखाटेम् लुक्खॆऎ डिना हिङ्पॽमिकुङ्चि। 45हाङ् निवाँहाङ्मि खानावाँ लोखुबाचिऎ गरहाङ् साब्डुचि, ‘निवाँहाङ्ऎन आक्खा चोब्न याॽमिचि चिनुकुचि।’#यासाइया ५४:१३ हाङ् निवाँहाङ् आपामि खानावाँ खेम्खुबा नुङ् चिन्खुबाचि चाइ काबि डाबुक्मि। 46हाङ् निवाँहाङ्बाङ् टाखुबाबाङ् होइक आसॆस निवाँहाङ् आपा मॆखाङ्टिटुचि। निवाँहाङ्बाङ् टाखुबॆ चाइ आपा खाङ्डु।
47“चाइबान कॆ आन्ना लोकानि, निवाँयुङ् लॆखुबा नुङ् हानाम्स सिखॆॽनॆ हिङ्खामा चु। 48हिङ्खामा पिक्खुबा चारेपा काङान। 49आन्नामि पाप्पा टुबाचिऎ आसास पेन्मिनिहा ठालबि मान्ना चाउचि हाङ्स खोचि सिखारामि। 50टर पारुबाङ् टामिम्पा चारेपा चाइ गन, आसॆ आक्क चाकु खो हानाम्स सिखॆॽनि। 51पारुबाङ् टामिम्पा हिङ्चाम्पा चारेपा काङान। आसॆ ग चारेपा चाकु खो हानाम्स सिखॆॽनि। आक्क चारेपा चाइ काम् सालुङ् यो, म कॆ बाखाटेम्पिहा याॽमिचि हिङ्चामिर कामानुङ् पिकुङ।”
52हाङ् याहुडिचि उम्चि लुम्पि गरहाङ् खानावाँ इपकामि, “मान्टक्ल ग याॽमिऎ कानि खोम् सालुङ् चामा पिॽहिकिहा?” 53मसॆ येसुऎ आक्खाचि लोसुचि, “चाइबान कॆ आन्ना लोकानि, आन्नॆ याॽमिमि पासामि सालुङ् माचाआम्नि हाङ् खोम् हारि माडुङाम्नि हाङ्ग आन्नानुङ् हानाम्स सिखॆॽनॆ हिङ्खामा लिनि। 54टर आसॆ चाइ काम् सालुङ् चाकु हाङ् हारि डुङुकु, आक्कनुङ् हानाम्स सिखॆॽनॆ हिङ्खामा लि। आक्क याॽमि कॆ बाखाटेम् लुक्खॆऎ डिना हिङ्पक्मिकुङ। 55मान्ठाभनॆ काम् सालुङ् चाइबानऎ चामॆ ठका हाङ् काम् हारि चाइबानऎ डुङ्मॆ ठका यो। 56हाङ् काम् सालुङ् चाखुबा हाङ् काम् हारि डुङ्खुबा कानुङ् लि हाङ् का सङ्क खोनुङ् लिङा। 57मान्टहाङ् निवाँहाङ् आपाऎ काङा पाङ्हाङ्सिङ् हाङ् काङा आपाबाङ्न हिङ्चाङा, मरहाङ्न काङा चाखुबा चाइ काबाङ् हिङ्चा। 58काङा चाइ पारुबाङ् टामिम्पा चाइबानऎ चारेपाङा। ग चाखुबा चाइ मान्ना चाखुबा आन्नामि टुबाचिर सिखॆॽमिनि, टर हिङ्चाढाङ्मि।”
59येसुऎ इघा खानावाँ काफारनुहुमबिऎ याहुडिचि खोम्ठाम् खिम्पि चिन्मार इसु।
हानाम्स सिखॆॽनॆ हिङ्खामा
60हाङ् खो टिङ्खुबाचिबाङ् डिरिक् याॽमिचि गरहाङ् कासामि, “ग खानावाँ खेनखेम्टिहिनि, हाङ् आसॆ चाइ निवाँयुङ् लॆकुयॆ?”
61टर येसुऎ आक्खाचि ङॆन्मिम्पा खानावाँ वाप्टकुहाङ् लोसुचि, “माल् कॆ इमिम्पा खानावाँऎ आन्नाम् लाम्फु ऎक्डॆ? 62हाङ् याॽमिमि पासा होइखेपा सङ्क पारुबि ठेट्टिखॆॽमिम्पा आम्नि मिगॆॽन खाङाम्नि हाङ्ग माङ् मिङ्कानिहा? 63हाङ् लावाऎ हानाम्स आसिखॆॽमॆ हिङ्खामा पि। याॽमिऎ मिॽमिम्पासॆ ग माङ्स योम्पक् यिगुनि। काङॆ आन्ना लोमिम्पा खानावाँ चाइ लावा हाङ् हिङ्खामा यो। 64टर आन्नाबाङ् ऎॽवाचिऎ चाइ काङा निवाँयुङ् लॆःॽङानिनि।” येसुऎ ग लोसु मान्ठाभनॆ आसॆ चाइ निवाँयुङ् लॆःॽङामिनि लोमॆ खानावाँ हाङ् आसॆ चाइ खो बङ्सिकुयॆ लोमॆ खानावाँ येसुऎ याॽलन लेकु। 65हाङ् येसुऎ लोसॆ लाखॆटु, “मसॆॽन कॆ आन्ना गर लोमिम्पा रेम, निवाँहाङ् आपाऎ काबि टामा मापिॽलढारि आसास काबि टाहिमिनि।” 66हाङ् आक्क डॆङ्पि खो टिङ्खुबाचिबाङ् डिरिक् याॽमिचिऎ खो याइमानुङ् टिङ्मा याइटुचि।
67हाङ् येसुऎ खोम् हिपङ् टिङ्खुबाचि लोसुचि, “आन्नॆ सङ्क काङा याइङानिहा रु?” 68हाङ् सिमोन पाट्टरुसऎ येसु लोसु, “पारभु, काङ्का आसाबि खॆॽमॆ? आनानुङ् हानाम्स सिखॆॽनॆ हिङखामा पिक्खुबा खानावाँ चु। 69हाङ् काङ्कॆ आना निवाँयुङ् लॆक्चिम् हाङ् आना निवाँहाङ्मि सॆङ्सॆङॆना कामानुङ् लेक्चिम्।” 70हाङ् येसुऎ आक्खाचि लोसुचि, “आन्ना हिपाङ्न कॆ सॆःक्मिम्पाचि हॆॽनॆ? हाङ्स आन्नाबाङ् एक्क चाइ चाप् यो।” 71येसुऎ ग खानावाँ सिमोन इस्कारियोटमि पासा याहुडामि बारेबि इमिम्पा लॆटु। मान्ठाभनॆ खो हिपङ् टिङ्खुबाचिबाङ् एक्क लॆटा हाङ्स खोसॆ येसु बङ्सिॽमा परम्पा लॆटा।
Currently Selected:
युहान्ना 6: LBR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
