युहान्ना 3
3
येसुऎ निकोडेमास चिन्मिम्पा
1एक्क निकोडेमास निङ् लॆखुबा फारिसि याॽमि चुआ। खो चाइ याहुडिचिम् टुङ्घङ्पाचि खोम्ठाम् ठालबिऎ याॽमिचिबाङ्ऎ एक्क लॆटा। 2खो युटा येसुबि टाआहाङ् लोसु, “रब्बि, आना निवाँहाङ्बाङ् टाडानॆ चिन्खुबानाये कामानुङ् लेःक्चिम्। मान्ठाभनॆ निवाँहाङ्ऎ मामुबाक्रढारि आसॆस आनॆ यिक्मॆ पाइमिम्पा आक्खॆॽमाहा योम्पक् यिक्हिसुचिनि।”
3हाङ् येसुऎ खो लोसु, “चाइबान कॆ आना लोक्ना उम्चङ् लिमानुङ् जान्म मालिरढारि आसॆस निवाँहाङ्मि हाङ्डाम् खाङ्टकुनि।”
4हाङ् निकोडेमासऎ लोसु, “हॆॽनि, याॽमि पासिङ् पिक्खॆहाङ् मान्टक्ल खो जान्म लिहिऎ? माल् खो उम्मामि बःक्पि भॆन्माहाङ् फेरि जान्म लिहिहॆ टा?”
5हाङ् येसुऎ लोसु, “चाइबान कॆ आना लोक्ना, योवा हाङ् लावाबाङ् जान्म मालिबा आसास निवाँहाङ्मि हाङ्डाम्पि भॆन्हिमिनि। 6सालुङ्बाङ् जान्म लिमिम्पा सालुङ्न हाङ् लावाबाङ् जान्म लिमिम्पा लावान। 7कॆ आना उम्चङ् लिमानुङ् जान्मा लिमान लॆ लोमिम्पा खानावाँऎ ऎआक्टिखारॆ। 8हिॽयापा हाम्पि लुमा मिनुक्र, आक्कुब्न लु। आक्कमि साम्ला ग खेम्कुना, टर आक्क हाम्पा टाऎ हाङ् हाम्पा खॆऎ लोमॆ खानावाँ चाइ लेसुनानि। हाङ् लावाबाङ् जान्म लिमिम्पा याॽमि चोब्न आक्रक्मान लिक्मि।”
9हाङ् निकोडेमासऎ सिमु, “गरक्मा ग मान्टॽल लिऎ?”
10येसुऎ खो लोसु, “आना इस्राएलिचिम् चिन्खुबाना लॆःक्ना हाङ्स इघा खानावाँ वाबुनानॆ? 11चाइबान कॆ आना लोक्ना, काङ्कॆ लेमिम्पा खानावाँन यामुकिङ्का हाङ् काङ्कॆ खाङ्मिम्पा खानावाँन चुमॆक्सङ् पिकुङ्का। टर आन्नॆ काङ्काम् चुमॆक्सङ्पि निवाँयुङ् लॆटाम्निनि। 12हाङ् कॆ आन्ना बाखाटेम्पिहा खानावाँ खेम्मिॽमार टा वाबाम्निनि, हाङ् पारुबिऎ खानावाँ ग मान्टक्ल वाव्हिकाम्नॆ? 13पारुबाङ् बाखाटेम्पि टाखुबा याॽमिमि पासाबाङ् होइक आसास पारुबि माखॆट्टि। 14हाङ् आसास पेन्मिनिहा ठालबि मोसाऎ सिङ्बि पिट्टालामि पुसॆःॽमा ठेट्टिम्पा रक्न याॽमिमि पासा ठेट्टि खॆॽमान लॆ।#यायेॽमा २१:९ 15गरहाङ् आसाचिऎ चाइ खोबि निवाँयुङ् लॆकुचि, आकखाचिऎ हानाम्स सिखॆॽनॆ हिङ्खामा टक्चाकुचि। 16मान्ठाभनॆ निवाँहाङ्ऎ बाखाटेम्पिहा याॽमिचि गर डिरिक् नाम्नाम् पिसिटुचि मसॆ खोसॆ टाङ्पाम् एक्क टे पासा सङ्क पिइटु। मसॆ पासाबि निवाँयुङ् लॆखुबाचि आसास सिखॆॽमिनि, टर हानाम्स लुक्खॆॽनॆ हिङ्खामा टक्चाकुचि। 17मान्ठाभनॆ निवाँहाङ्ऎ बाखाटेम्पिहा याॽमिचि आब्डिक टिमाम् लागि खोम् पासा पाङ्हाङ्पा हॆॽनॆ, टर खोम् पासाबाङ् हिङ्चामिर कामानुङ् पाङ्हाङ्सु। 18हाङ् आसॆ चाइ खोबि निवाँयुङ् लॆकु, आक्क आब्डिक् नुङ्मा लिनि। टर आसॆ चाइ खोबि निवाँयुङ् लॆटुनि, खोसॆ निवाँहाङ्मि एक्क टे पासाबि निवाँयुङ् मालॆमिम्पासॆ आक्क आसिॽन आब्डिक् नुङ्मा लिखॆडा। 19हाङ् न्यायॆ चाइ गन, बाखाटेम्पि निवाँहाङ्मि ओप्लिङ् टाडा, टर याॽमिचिऎ ओप्लिङ् हॆॽनॆ, माॽयाक्ट चाइ नेन्चाउचि मान्ठाभनॆ उम्चि योम्पक् काइसॆ लॆटा। 20काइसॆ योम्पक् यिक्खुबा चोप्पसॆ ओप्लिङ् सिच्चाकुचि हाङ् उम्चि काइसॆ योम्पक् खाङ्मुक् कामानुङ् किसिमॆ ओप्लिङ्पि टासुटामिनि। 21टर चाइबानऎ खानावाँऎ लोमिम्पा रक्न हिङ्चामा यक्खुबा याॽमि चाइ ओप्लिङ्पि टा। हाङ् आक्रहाङ् खोसॆ यिक्मिम्पा योम्पक् निवाँहाङ्बाङ्ऎ यो कामानुङ् याॽमिचिऎ खाङ्टकुचि।”
बाप्टिस्मा पिक्खुबा युहान्नाऎ येसुमि चुमॆक्सङ् पिॽमिम्पा
22आक्क डॆङ्पि येसु हाङ् खोम् टिङ्खुबाचि याहुडियाबि खारामि। हाङ् एक्क हिच्चि डिना येसु आक्खाचिनुङ् पेना हाङ् याॽमिचि बाप्टिस्मा पिट्टुचि। 23हाङ् युहान्नाऎ सङ्क सालिम कॆक्पि ऎनोन लोमॆ ठालबि बाप्टिस्मा पिॽमॆ पाइटुचि। मान्ठाभनॆ आक्कुबि डिरिक् योवा चुहा हाङ् याॽमिचि टासे बाप्टिस्मा लायुक्सामि। 24(मान्ठाभनॆ आक्रलढारि युहान्ना सेक्चिम्पि मासॆक्ढिङ्खॆम्पा लॆटा)।
25हाङ् युहान्नामि टिङ्खुबाचि हाङ् एक्क याहुडि याॽमिमि लुम्पि योवॆ सॆङ्सॆङॆ लिमॆ खानावाँबि याटक्माटक् लिसा। 26हाङ् युहान्नामि टिङ्खुबाचि खोबि टाआमिहाङ् लोसुचि, “चिन्खुबो, यारडान मॆएरॆङ् आनानुङ् चुखुबा एक्क याॽमिऎ बाप्टिस्मा पिॽमे सिकुचि। आनॆ खोम् बारेबि चुमॆक्सङ् पिट्टुना। हाङ् खोबि रे चोब्न याॽमि खॆॽमॆ पाइमि।” 27हाङ् युहान्नाऎ लोसुचि, “पारुबाङ् मापिॽलढारि याॽमिऎ माङ्स टक्चाउनि। 28‘काङा खिरिस्ट हॆॽङानॆ, टर खोबाङ् याॽल खोम् लाम् टङ्सि पाङ्हाङ्पा याॽमिङा रेम’ कामानुङ् कॆ नुःर लोमिम्पा खानावाँ आन्नॆॽन खेम्डाम्नि। 29हाङ् डाङ्मा चाइ डाङ्पामि रेम। डाङ्पामि टङ्चाखुबा लाङ्काम् खोनुङ् येबुक् खोम् खानावाँ खेमुकु हाङ् चेन्चाक्। मसॆ काम् चेन्चामाऎ काम् निवाँ चॆप्खॆडु। 30हाङ् खो चाइ पुसे खॆॽमा लॆ, टर का चाइ लुक्खॆसॆ खॆॽमा लॆ।”
पारुबाङ् टामिम्पा पासा
31मिट्टुगॆ टाखुबा चाइ चोब्बाङ् टुङ्घङ्पा लॆ। बाखाबाटेम्बाङ् आम्पम्पा बाखाटेम्पिऎन, हाङ् खो खाबाटेमपिऎन खानावाँ इक। पारुबाङ् टाखुबा चाइ चोब्बाङ् टुङ्घङ्पा लॆ। 32हाङ् खोसॆ टाङ्पॆ खाङ्मिम्पा हाङ् खेम्मिम्पा खानावाँन इकु टर आसॆस खोम् खानावाँ खेमुचिनि। 33टर खोसॆ लोमिम्पा खानावाँ खेम्खुबॆ चाइ निवाँहाङ् चाइबानऎ कामानुङ् खाङ्मुकु। 34मान्ठाभनॆ निवाँहाङ्ऎ पाङ्हाङ्पा याॽमिऎ निवाँहाङ्मिन खानावाँ इकु। मान्ठाभनॆ निवाँहाङ्ऎ खो सॆङ्सॆङॆ लावाऎ चॆप्खॆमिकु। 35निवाँहाङ् आपॆ खोम् पासा नाम्नाम् पिसिकु हाङ् चोब्न खानावाँ खोम् हुक्पि पिडु। 36हाङ् आसॆ चाइ पासा सक्पि निवाँयुङ् लॆकु, आक्कनुङ् हानाम्स सिखॆॽनॆ हिङ्खामा लि। टर आसॆ चाइ पासाऎ लोमिम्पा खेमुनि, आक्कसॆ हानाम्स आसिखॆखुबा हिङ्खामा टक्चाउनि, टर निवाँहाङ्मि सिरि खो सक्पि सि।
Currently Selected:
युहान्ना 3: LBR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
