Luqaas Seensa
Seensa
Kitaabonni Luqaasii fi Hojiin Ergamootaa hojiidhuma tokkotu kutaa lamatti qoodame (seensa Hojii Ergamootaa caalaatti gad fageenyaan hubachuuf, affeerraa Hojii Ergamootaatiif godhame ilaalaa). Kitaabonni kunneen lamaan waliin taʼanii seenaa haala itti Waaqayyo jalqabatti saba Israaʼeliin, itti aansee immoo saboota addunyaa hunda, akka isaan Yesuus duukaa buʼaniif waame himu. Sochiin kutaa isa jalqabaa keessatti godhame gara Yerusaalem, giddu gala jireenya biyyoolessa Yihuudootaatti ture. Sochiin kutaa lammaffaa keessatti godhame immoo Yerusaalemii gara saboota biraatti taʼe. Labsii mootummaa Waaqaa isa Phaawulos Roomaatti, magaalaa guddittii empaayerichaa keessatti labseen xumurama.
Luqaas seenaa isaa qondaala Roomaa guddicha, Tewofilos kabajamaadhaaf barreesse. Kitaabonni kunneen burqaawwan Luqaas irraa argamaniin guutaman; isaanis xalayoota, haasaawwan, faarfannaawwan, yaadannoowwan imalaa, yaadannoowwan qorumsaatii fi seenaa yaadannoo dhuunfaa ti. Kaayyoon Luqaas karoora Waaqayyo ifa isaa karaa Israaʼel gara addunyaatti fiduuf qabu raawwatamuu isaa argisiisuu dha. Duuka buutonni Yesuus warri jalqabaa moʼicha Yesuus cubbuu fi duʼa irratti qabu saba hundatti labsuudhaan waamicha kana simatan.
Kutaa jalqabaa keessatti Luqaas waaʼee seenaa Yesuus hima; innis iddoo gurguddaa sadiitti qoodama:
Tokkoffaa, Yesuus Galiilaatti naannoo kaabaa biyya Israaʼel keessatti tajaajiluu isaa.
Itti aansee, imala dheeraa gara Yerusaalemitti godhe; yeroo kana gara bulchiinsa mootummaa Waaqayyootti saba simate; hubannaa Israaʼeloonni yeroo sana mootummaa Waaqayyootiif qaban irratti isaaniin morme.
Sadaffaa, Luqaas akka Yesuus Yerusaalem keessatti lubbuu isaa dabarsee kennuu fi itti aansee akka Mootii Israaʼelii fi Gooftaa addunyaa isa dhugaa taʼee mulʼatuuf duʼaa kaʼee hima.
Currently Selected:
Luqaas Seensa: HAH
Highlight
Share
Copy
Want to have your highlights saved across all your devices? Sign up or sign in
Kitaaba Qulqulluu, Hiikkaa Ammayyaa Haaraa™, Loqoda Dhiʼaa
Mirgi seeraan eegama © 2022 Biblica, Inc.
Eeyyamaan itti fayyadamu.
Mirgi hundi addunyaa guutuu irratti kan eegamee dha.
Holy Bible, New Oromo Contemporary Version™, Western
Copyright © 2022 by Biblica, Inc.
Used with permission. All rights reserved worldwide.