मरकुस 4

बीज बीजण आळै गी मिसाल

(मत्ती 13:1-9; लूका 8:4-8)

1फेर बे एकर झील गै किनारै पर खड़ी लोगां गी भीड़ नै उपदेस देण लागरया अर आप लोगां ऊं थोड़ी दूर झील गै मा किस्ती में बेठया। 2बां लोगां नै भोत सी बातां मिसाल ऊं समझाई अर उपदेस देवंता केयो कै।

3“ध्यान ऊं सुणो, एकर एक किसान आपगै खेत में बीज गो छिंटो मारण गेयो। 4जद बो छिंटो मारण लागरयो तो केई बीज रा पर पड़ग्या अर पंछियां आ'गे बानै चुग लिआ। 5केई बीज हिसी जिग्यां पड़या जठै जिग्यां पक्की ही पण बे बीज बठै उग्या तो हा। 6पण तावड़ो बोळो होण गै कारण बे बेगाई सुकग्या क्यूंकै बांगी जड़ जादा डूंगी कोनी बणी। 7केई बीज झाड़का में पड़गे उगग्या पण झाड़का मोटा बधगे बानै दबा दिआ। 8पण केई बीज आच्छी भूमी पर पड़या झिका उगगे केई तीस गुणा, केई साठ गुणा अर केई सो गुणा फळ ल्याया।”

9फेर यीसू बानै केयो, “ईं मिसाल नै आच्छी तरियां जाण गे इंगो मतलब समझो।”

मिसाल गो मतलब

(मत्ती 13:10-17; लूका 8:9,10)

10जद लोगां गी भीड़ बढगी तो बिंगै बारा चेला अर झिका लोग यीसू गै सागै हा बां ईं मिसाल गो मतलब पूछयो। 11यीसू बानै केयो, “परमेसर गै राज गै बारै में झिकी बाता गो दूसरा नै ठा कोनी बो थानै बताण लागरयो हूं। दूसरै लोगां नै तो मैं मिसाल ऊं बताऊं। 12जिंऊं जिस्या ऐ लोग करै बिंया ई देखता तो रेवै पण कदी सच्चाई नै ना जाण सकैगा अर सुणता रेवै पण समझ ना पावै अर आंगा पाप माफ होण खातर मेरै कानी ना मुड़ सकैगा।”

बीज बीजण आळै गी मिसाल गो सार

(मत्ती 13:18-23; लूका 8:11-15)

13फेर यीसू बानै केयो, “जे थे ईं मिसाल गो मतलब ना समझ सको तो दूसरी मिसाल नै समझणो ओखो होवैगो। 14ईं मिसाल गो मतलब ओ है, कै परमेसर गो बचन सुणाण आळो आदमी, बीज छिड़कणै आळै किसान गी तरियां है। 15अर रा बे लोग है झिकै पर बीज गिरैया तो हा अर बां बचन सुणयो हो पण सैतान बांगै माऊ दबादब बीज रूपी बचन काड़ ले गयो। 16अर पक्की भूमी बे लोग है झिका बचन नै आनंद ऊं सुण्यो तो हो। 17पण पूरी जड़ ना घालण गै कारण थोड़ा दिना गै बाद क्ळेस अर बिरोध गै कारण पाछा हट ज्यै। 18झाड़का बे लोग है झिका में बीज तो गिरैया यानी बचन सुण्यो पण परिवार गी चिंता में फस गे दबग्यो अर बिना फळ गै रेग्यो। 19-20आच्छी भूमी बे लोग है झिका स्वीकार कर'गे तीस गुणा, साठ गुणा अर सो गुणा फळ ल्यावै है।”

दीयै गी मिसाल

(लूका 8:16-18)

21यीसू बानै केयो, “आदमी दीयो जगा गे बठळ निचै कोनी रखै। दीयो तो हमेसां ऊंची जिग्यां पर रखै। 22इंयाई झिकी सच्चाईयां परमेसर लोगां ऊं आज तांई लकोगे राखी है बानै बे परगट करैगा। 23आं बाता नै ध्यान ऊं सुणो अर समझो।

24मेरी बात नै ध्यान ऊं सुणो अर बिं पर बिचार करो मेरी बाता पर जितो ई थे बिचार करोगा बितो ई थे जादा समझ पावोगा। 25झिको मेरी बात पर ध्यान देगे समझै बानै परमेसर ओर जादा समझण गी ताकत दैयगो। झिका ध्यान देगे ना समझै, बे जितो कीं जाणै बिनै ई भूल ज्यैगा।”

उगण आळै बीज गी मिसाल

26फेर यीसू केयो, “परमेसर गो राज हिस्यो है जिंया एक आदमी बीज गो छिंटो मारै। 27अर जद बो दिन में आपगै काम में लीन होगे रात नै सोज्यै अर दिन गै उठगे देखै तो बीज आपी उगगे मोटो हो'ज्यै अर किसान नै ठाई कोनी होवै कै ओ किंया हो'ग्यो। 28धरती अपणै आप अनाज पैदा करै। पेलां बीज फूटै फेर अंकुर बणगे उपर बाल निकळै फेर बाल में दाणा बणै। 29अर जिंयाई दाणा पकगे तैयार हो'ज्यै तो किसान दांती लेगे बिनै बाडल्यै अर काडगे घरे लियावै।”

राई गै दाण गी मिसाल

(मत्ती 13:31,32; लूका 13:18,19)

30फेर यीसू केयो, “मैं थानै कीं तरियां गी मिसाल ऊं समझाऊं कै परमेसर गो राज किंगै बरगो है। 31बो राई गै दाणै गी तरियां होवै झिको सारै बीजा में छोटो होवै। 32पण जद बिनै बीज दैय तो बिमू एक मोटो बूंटो निकळै अर बिमुं इती मोटी डाळियां निकळै कै आकास गा पंछी बिं पर बसेरो करण लागज्यै।”

33हिसी हिसी मिसाल देगे जठै तांई हो सक्यो यीसू बानै परमेसर गा बचन समझाया। 34बिना मिसाल गै बां कीं कोनी समझायो। पण आपगा चेला जद एकला होंता तो सिरफ बानै ई मिसाल गो अरथ बतावंतो।

आंधी नै रोकणी

(मत्ती 8:23-27; लूका 8:22-25)

35बिं दिन ई जद रात ढळण लागगी तो यीसू आपगै चेला नै केयो, “आज्यो आपां गलील झील गै दूसरै पासै चालां।” 36जिंयाई यीसू किस्ती पर चढया बिंयाई बानै लोग भीड़ नै दूर करता आप किस्ती पर चढ'ग्या अर बठू चाल पड़या। पण बांगी किस्ती लारै ओर बी किस्ती ही। 37जद चाणचकै ई तकड़ी आंधी आ'गी अर किस्ती ऊं उपाकर मोटी मोटी लेहरा चढण लागगी। अर किस्ती पाणी ऊं भरीजण लागगी। 38यीसू किस्ती गै लारलै पासै एक गदी गो सीराणो लगा गे सूत्या पड़या। बांगा चेला बानै जगागे केयो, हे गुरू थानै म्हारो थोड़ो भोत ई फिकर कोनी के? म्हे डूबण लागरया हां।

39यीसू खड़या होया अर आंधी नै ललकारी कै, “सांत होज्या।” इतो केंता ई आंधी एकदम ई बंद होगी। 40जद बां आपगै चेला नै केयो, “थे क्यामी घबरा रया हो थानै मेरै पर भरोसो कोनी हो के? कै मैं थानै बचा कोनी सकूं।”

41सारा चेला घबराग्या अर आपसरी में अचंभो करण लागग्या कै ओ हिस्यो कुण आदमी है झिकै गो केणो आंधी अर लेहरा मानै।

Currently Selected:

मरकुस 4: BGQ

Highlight

Copy